សត្វប្រចៀវច្រើនរយក្បាលនៅប្រាសាទលើកំពូលភ្នំបូកងាប់ជាបន្តបន្ទាប់
2016.04.20
សត្វប្រចៀវច្រើនរយក្បាលងាប់រាយប៉ាយនៅលើដីជុំវិញបរិវេណប្រាសាទបុរាណលើកំពូលភ្នំបូក នាឃុំរុនតាឯក ស្រុកបន្ទាយស្រី ខេត្តសៀមរាប កាលពីថ្ងៃទី១៩ ខែមេសា ឆ្នាំ២០១៦។
Photo provided
ប្រជាពលរដ្ឋ និងអ្នកទេសចរខ្លះ ដែលបានទៅលេងប្រាសាទបុរាណលើកំពូលភ្នំបូក ក្នុងឃុំរុនតាឯក ស្រុកបន្ទាយស្រី ខេត្តសៀមរាប បានសំដែងការភ្ញាក់ផ្អើលដោយសារតែគេឃើញសត្វប្រចៀវជាច្រើនរយក្បាលងាប់នៅក្នុងប្រហោងថ្មនៃប្រាសាទ រហូតដល់សាកសពហៀរធ្លាក់រាយប៉ាយមកលើដី។
ការភ្ញាក់ផ្អើលនេះ ដោយសារតែគេនឹកទៅដល់ជំងឺអ្វីម្យ៉ាង ថាក្រៅតែពីសម្លាប់សត្វប្រចៀវច្រើនរយក្បាល ក្រែងវាអាចនឹងចម្លងរោគទៅដល់ប្រជាពលរដ្ឋដែលរស់នៅជុំវិញនោះដែរ។
មន្ត្រីមន្ទីរបរិស្ថានបានប្រញាប់ប្រញាល់ធ្វើដំណើរទៅកាន់ប្រាសាទបុរាណនៅលើកំពូលភ្នំបូក ចម្ងាយជាង ៤០គីឡូម៉ែត្រ ភាគឦសានពីទីរួមខេត្តសៀមរាប កាលពីរសៀលថ្ងៃពុធ ទី២០ ខែមេសា ដើម្បីពិនិត្យរកមូលហេតុឱ្យច្បាស់លាស់ ថាតើសត្វប្រជៀវច្រើនរយក្បាលបានងាប់ជាបន្តបន្ទាប់គ្នានោះបណ្ដាលមកពីអ្វី?
ដំណើរទៅកាន់ប្រាសាទបុរាណនៅលើកំពូលភ្នំនោះ បន្ទាប់ពីគេទទួលព័ត៌មានថា ចាប់តាំងតែពីថ្ងៃទី១០ រហូតដល់ថ្ងៃទី២០ ខែមេសា មានសត្វប្រចៀវ ដែលនៅតាមប្រហោងថ្មនៃប្រាសាទបុរាណបានងាប់ធ្លាក់រាយប៉ាយមកលើដីជាបន្តបន្ទាប់នៅឡើយ។
មន្ត្រីប៉ូលិសការពារបេតិកភណ្ឌនៃស្នងការពិសេស ១រូប ដែលកំពុងប្រចាំការពារប្រាសាទនៅលើកំពូលភ្នំបូក គឺលោក ហឿន សារឿន។ លោកមានប្រសាសន៍ថា ជាច្រើនថ្ងៃមកហើយ ហើយលោកតែងរវល់នឹងការប្រមូលយកសាកសពសត្វប្រចៀវជាច្រើនដែលងាប់នៅក្នុងរូងថ្ម និងខ្លះបានលូនចេញមកងាប់នៅខាងក្រៅរន្ធ។
បុរសដដែលមានប្រសាសន៍ថា សត្វប្រជៀវជាច្រើនរយក្បាលបានងាប់រាយប៉ាយ នៅលើដី ក្នុងរយៈពេលប្រហែល១០ថ្ងៃមកនេះ។ លោកមិនដឹងមូលហេតុអ្វីបានជាសត្វប្រចៀវទាំងនោះងាប់ជាបន្តបន្ទាប់ទេ ប៉ុន្តែលោកគិតថា ប្រហែលមកពីអាកាសធាតុឡើងកម្ដៅខ្លាំង៖ «សត្វដែលស្លាប់នេះ នៅក្នុងរន្ធថ្ម ដល់ក្រោយមកវាស្លាប់កាន់តែច្រើន វាហៀរធ្លាក់ចេញជាបន្តបន្ទាប់។ ខ្ញុំមិនដឹងថា វាកើតអ្វីទេ?»។
មន្ត្រីប៉ូលិសការពារបេតិកភណ្ឌឱ្យដឹងថា ជាច្រើនឆ្នាំមកហើយនៅក្នុងប្រាសាទបុរាណលើកំពូលគឺមានសត្វប្រចៀវច្រើនពាន់ក្បាលរស់នៅ។ ក៏ប៉ុន្តែ រយៈពេល ១០ថ្ងៃមកនេះ សត្វប្រចៀវច្រើនរយក្បាលបានងាប់រាយប៉ាយពេញដី។
សាកសពសត្វប្រចៀវដែលងាប់នោះខ្លះត្រូវក្មេងឡើងមកឆ្កឹះ និងរើសយកទៅចម្អិនធ្វើជាអាហារទទួលទាន។
ទោះជាយ៉ាងណា ប្រធានមន្ទីរសុខាភិបាលខេត្តសៀមរាប លោកវេជ្ជបណ្ឌិត ក្រូស សារ៉ាត់ បានបដិសេធមិនពន្យល់ទេថា តើវាអាចមានបញ្ហាសុខភាព ឬទេ ប្រសិនបើយកសត្វប្រចៀវដែលងាប់ទៅធ្វើម្ហូបនោះ ពីព្រោះតែលោកមិនទាន់បានទទួលព័ត៌មានច្បាស់ ថាតើសត្វនោះងាប់បណ្ដាលពីអ្វីនៅឡើយទេ?
ចំណែកប្រធានមន្ទីរបរិស្ថាន ខេត្តសៀមរាប លោក ភួង លីណា មានប្រសាសន៍ថា លោកមិនទាន់ដឹងពីរឿងសត្វប្រចៀវច្រើនរយក្បាលងាប់ជាបន្តបន្ទាប់គ្នានោះនៅឡើយ។ លោក ភួង លីណា នឹងដឹកនាំមន្ត្រី១ក្រុមទៅពិនិត្យមើលបញ្ហានោះ៖ «ខ្ញុំធ្លាប់អានឯកសារមួយចំនួន ហើយដឹងថា សត្វស្លាបខ្លះស្លាប់ដោយសារតែអាកាសធាតុប្រែប្រួល ដូចជាខ្យល់ខ្លាំងជាដើម ប៉ុន្តែករណីប្រចៀវងាប់នេះ អាចបណ្ដាលមកពីអាកាសធាតុ ឬក៏ជំងឺ»។
មន្ត្រីមន្ទីរបរិស្ថាន អំពាវនាវឱ្យប្រជាពលរដ្ឋដែលរស់នៅជុំវិញកុំរើសសត្វប្រចៀវដែលងាប់នោះយកទៅចម្អិន ធ្វើម្ហូបអាហារឱ្យសោះ ខ្លាចក្រែងវាចម្លងរោគអ្វីផ្សេងៗ នៅក្នុងពេលដែលមន្ត្រីជំនាញមិនទាន់រកឃើញពីមូលហេតុនៃការងាប់នោះច្បាស់លាស់ ថាបណ្ដាលពីអ្វីនៅឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- វៀតណាមព្រមានថា ព្រែកជីកហ្វូណនតេជោអាចជួយសម្រួលវត្តមានយោធាចិនក្នុងទឹកដីកម្ពុជាកាន់តែជ្រៅ
- ពលរដ្ឋនៅតំបន់បឹងតាមោក ចោទប្រកាន់អាជ្ញាធរខណ្ឌព្រែកព្នៅថា ប្រើអំពើហិង្សា
- អាជ្ញាធរក្រុងភ្នំពេញមិនអនុញ្ញាតឱ្យបក្សកម្លាំងជាតិធ្វើបាតុកម្ម នៅទីលានប្រជាធិបតេយ្យ
- ក្រសួងដែនដីបានហៅអតិថិជនបុរីពិភពថ្មីទៅពិភាក្សា ដើម្បីរកដំណោះស្រាយ
- ពលរដ្ឋខ្មែរ-អូស្ត្រាលីម្នាក់ ដែលរិះគន់រដ្ឋាភិបាលកម្ពុជា រងការវាយដំពីជនមិនស្គាល់មុខមួយក្រុម ពេលទៅលេងស្រុកខ្មែរ