ពលរដ្ឋនៅឧត្ដរមានជ័យបារម្ភខ្លាចមានទឹកជំនន់ដោយសារគម្រោងសង់ទំនប់ទឹករបស់ចិន
2015.10.20
ក្រុមហ៊ុនចិន មួយឈ្មោះ ស៊ីណូ ហាយដ្រូ (Sinohydro) បានដឹកជញ្ជូនគ្រឿងចក្រទៅកាន់តំបន់ភ្នំអាតោ ដែលមានភូមិសាស្ត្រជាប់គ្នារវាងស្រុកអន្លង់វែង និងស្រុកចុងកាល់ ខេត្តឧត្តរមានជ័យ ដើម្បីអនុវត្តគម្រោងសាងសង់ទំនប់ទឹកស្ទឹងស្រែងទី២ រយៈពេលច្រើនខែមកហើយ គិតមកដល់ពេលនេះ។
គម្រោងសាងសង់ទំនប់ទឹកស្ទឹងស្រែងទី២ សម្រាប់បម្រើឱ្យប្រព័ន្ធស្រោចស្រពនោះ នឹងបង្កឱ្យមានការប៉ះពាល់ដល់ព្រៃឈើរបស់សហគមន៍ដីស្រែចម្ការ ព្រមទាំងភូមិឋានរបស់ប្រជាពលរដ្ឋជាច្រើនដែលទាមទារឱ្យរដ្ឋាភិបាលត្រូវដោះស្រាយសំណងនានា ក៏ប៉ុន្តែរហូតមកដល់ពេលនេះ គេនៅមិនទាន់ឃើញមានគោលនយោបាយសំណងណាមួយនៅឡើយទេ។
ប្រជាពលរដ្ឋជាច្រើនគ្រួសារនៅភូមិស្រះកែវ ឃុំពង្រ ស្រុកចុងកាល់ ខេត្តឧត្តរមានជ័យ នៅតែទទូចឱ្យអាជ្ញាធររដ្ឋាភិបាល ត្រូវមានវិធានការដោះស្រាយជាបន្ទាន់ទៅលើការប៉ះពាល់ដែលអាចនឹងកើតឡើងដោយសារតែគម្រោងសាងសង់ទំនប់ទឹកស្ទឹងស្រែងទី២ ដែលក្រុមហ៊ុនចិន ស៊ីណូ ហាយដ្រូ កំពុងតែដំណើរការនៅជិតតំបន់ពួកគេរស់នៅនេះ។
បុរសអ្នកភូមិស្រះកែវ ម្នាក់ ដែលធ្លាប់តវ៉ារឿងនេះ ក្នុងចំណោមអ្នកភូមិជាច្រើនទៀត គឺលោក ខៀវ ពេជ្រ។ លោកមានប្រសាសន៍កាលពីរសៀលថ្ងៃអង្គារ ទី២០ ខែតុលា ដោយបង្ហាញក្ដីព្រួយបារម្ភថា ផ្ទះសម្បែង និងដីស្រែចម្ការរបស់លោក ក៏ដូចជារបស់អ្នកភូមិជិត ១០០គ្រួសារផ្សេងទៀត នឹងទទួលរងការលិចលង់ដោយទឹកជំនន់នៅពេលណាដែលក្រុមហ៊ុនចិន ស៊ីណូ ហាយដ្រូ សាងសង់ទំនប់ទឹកស្ទឹងស្រែង រួចរាល់។
បុរសដដែលបញ្ជាក់ថា បច្ចុប្បន្ន ក្រុមហ៊ុនចិន កំពុងចាប់ផ្ដើមដំណើរការគម្រោងសាងសង់ទំនប់ទឹកនេះ ដោយគ្មានប្រជាពលរដ្ឋណាអាចហាមឃាត់បានទេ បើទោះបីជាគម្រោងសាងសង់នេះ បានប៉ះពាល់ដីចម្ការ និងផលដំណាំខ្លះហើយក៏ដោយ៖ «សព្វថ្ងៃកំពុងជីកដីបិទធ្វើទំនប់នេះឯង កន្លែងបិទធ្វើទំនប់ គឺកាយចុះក្រោយលិចនៅខែវស្សានោះ។ ប្រជាជនអត់មានអ្នកណាហ៊ានតវ៉ាទេ ខ្លាចគេចាប់យកទៅដាក់គុក»។
អាជ្ញាធរស្រុកចុងកាល់ ឱ្យដឹងថា គម្រោងសាងសង់ទំនប់ទឹកស្ទឹងស្រែងទី២ នេះ នឹងធ្វើឱ្យប៉ះពាល់ដល់ដីស្រែចម្ការ និងភូមិឋានប្រជាពលរដ្ឋជាច្រើនភូមិនៅក្នុងឃុំពីរ គឺឃុំពង្រ និងឃុំចុងកាល់ ភាគខាងកើតនៃតំបន់ភ្នំអាតោ។
អភិបាលស្រុកចុងកាល់ លោក រិទ្ធី ប៉ាក់ មានប្រសាសន៍ថា លោកពុំទាន់បានដឹងពីគោលនយោបាយដោះស្រាយការប៉ះពាល់ទាំងនេះយ៉ាងណានៅឡើយទេ ពីព្រោះលោកទើបតែឡើងមកកាន់តំណែងថ្មី ប៉ុន្តែលោកដឹងថា កន្លងទៅ គណៈកម្មការរបស់ខេត្តឧត្តរមានជ័យ ធ្លាប់ចុះសិក្សាទៅលើការប៉ះពាល់ដោយសារគម្រោងទំនប់ទឹកនេះដែរ៖ «គេចុះដោះស្រាយគោលនយោបាយផលប៉ះពាល់ ដូចជាមានការដោះដូរដី ឬកថវិកាអីម៉េច»។
កាលពីថ្ងៃទី៦ ខែឧសភា កន្លងទៅ គណៈកម្មការរបស់ខេត្តឧត្តរមានជ័យ និងមន្ត្រីអន្តរក្រសួងធ្លាប់បានចុះសិក្សាអំពីគម្រោងសាងសង់ទំនប់ទឹកស្ទឹងស្រែងទី២ នេះ ហើយបានរកឃើញការប៉ះពាល់ទៅលើប្រជាពលរដ្ឋច្រើនរយគ្រួសារ ក្នុងស្រុកចំនួន ៣ ដែលរស់នៅផ្នែកខ្លះនៃស្រុកអន្លង់វែង ស្រុកចុងកាល់ និងផ្នែកខ្លះនៃក្រុងសំរោងផង។
អភិបាលខេត្តឧត្តរមានជ័យ លោក ស ថាវី ធ្លាប់មានប្រសាសន៍ឱ្យដឹងក្នុងពេលចុះសិក្សាអំពីផលប៉ះពាល់នោះថា គម្រោងសាងសង់ទំនប់ទឹកស្ទឹងស្រែងទី២នេះ អាចនឹងស្តុកទឹកទុកប្រើប្រាស់លើវិស័យកសិកម្មបានប្រមាណ ២០ម៉ឺនម៉ែត្រគូប ហើយបើទំនប់ទឹកសាងសង់រួចរាល់ គឺនឹងអាចផ្គត់ផ្គង់ទៅឱ្យកសិករប្រើប្រាស់បាន ៣ខេត្ត ដូចជាខេត្តឧត្តរមានជ័យ ខេត្តសៀមរាប និងខេត្តបន្ទាយមានជ័យ ជាដើម៕