សហគមន៍នេសាទខេត្តបាត់ដំបងស្នើឲ្យតុលាការដាក់ទោសអ្នកនេសាទខុសច្បាប់

ក្នុងទិសដៅការពារធនធានជលផល នៅក្នុងទឹកបឹងទន្លេសាប ឲ្យមានភាពប្រសើរឡើងវិញ សហគមន៍នេសាទ និងអាជ្ញាធរពាក់ព័ន្ធ រួមទាំងប្រជាពលរដ្ឋ បានចូលរួមគ្នាក្នុងការទប់ស្កាត់បទល្មើសនេសាទ។

ដោយ សួន សុផលមុន្នី
2012-10-06

h100512mn.mp3

ជាក់ស្ដែង កាលពីថ្ងៃទី៤ ខែតុលា ក្រុមការងារចម្រុះបានចុះចាប់បានជនប្រព្រឹត្តិបទល្មើសនេសាទ ១នាក់ ដែលបានដាក់ស្បៃមងក្រឡាល្អិតនៅភូមិសាស្ត្រ ឃុំព្រៃចាស់ ស្រុកឯកភ្នំ ខេត្តបាត់ដំបង។

មន្ត្រីជលផលអាជ្ញាធរមូលដ្ឋាន និងសហគមន៍នេសាទសរុប ៣២នាក់ បានចុះទៅចាប់បុរសមានវ័យ ៥០ឆ្នាំម្នាក់ ដោយចោទថា បានប្រើឧបករណ៍នេសាទខុសច្បាប់ចាប់ត្រីនៅក្នុងទឹកបឹងទន្លេសាប ស្ថិតនៅឃុំព្រៃចាស់ ស្រុកឯកភ្នំ ខេត្តបាត់ដំបង។

លោក សៀង ដារិទ្ធិ ជាមន្ត្រីជលផលនៅសង្កាត់ព្រែកទាល់ បានថ្លែងនៅថ្ងៃសុក្រ ទី៥ ខែតុលា ថា លោក សៅ ផាត អាយុ ៥០ឆ្នាំ រស់នៅភូមិព្រៃចាស់ ឃុំព្រៃចាស់ ស្រុកឯកភ្នំ ខេត្តបាត់ដំបង បានប្រើស្បៃមងក្រឡាល្អិត (ណរ៉ាវ) ដាក់ចាប់ត្រីនៅក្នុងទឹកបឹងទន្លេសាប។

ក្រុមការងារចម្រុះ ចាប់បានទូកនេសាទមួយគ្រឿង និងស្បៃមងក្រឡាល្អិតជាច្រើនរយម៉ែត្រ។ ការឃាត់ខ្លួននេះ បានធ្វើឡើងកាលពីរសៀលថ្ងៃទី៤ ខែតុលា ឆ្នាំ២០១២៖ «អាហ្នឹងនៅអតីតឡូត៍លេខ ១០ ចំណុចដាក់នៅរាំងជ្រំ ឃុំព្រៃចាស់។ កម្លាំងចុះចាប់ទាំងអស់ ៣២នាក់ ទាំងសមត្ថកិច្ច ទាំងសហគមន៍ កំពុងកសាងសំណុំបែបបទហ្នឹង រក្សានៅអធិការដ្ឋានប៉ូលិស។ ប្រធានជាប់ចុះបេសកកម្មទៅបឹងទន្លេសាប»។

លោក រឹម រំដួល លេខាសហគមន៍នេសាទព្រែកហ្លួង បានថ្លែងថា កន្លងទៅថ្មីៗនេះ ជនសង្ស័យទាំងពីរនាក់ ត្រូវបានមន្ត្រីជលផលកសាងសំណុំរឿងបញ្ជូនទៅតុលាការចាត់ការតាមនីតិវិធីច្បាប់ ប៉ុន្តែ ក្រោយមកមានការដោះលែងវិញ។ ករណីនេះ សហគមន៍ស្នើសុំឲ្យតុលាការចូលរួមគ្នាលើកទឹកចិត្ត ដើម្បីអនុវត្តច្បាប់ការពារធនធានជលផលទាំងអស់គ្នា៖ «ប្រជាពលរដ្ឋក្នុងសហគមន៍ ចង់បានឲ្យតុលាការអនុវត្តទៅតាមច្បាប់ ហើយវែកមុខឲ្យឃើញអ្នកនៅពីក្រោយខ្នង ព្រោះអីអ្នកប្រព្រឹត្តិហ្នឹង បើអត់មានអ្នកនៅពីក្រោយខ្នង គាត់ដាក់អត់បានទេ ហើយគាត់ក៏ជាជនរងគ្រោះដែរ»។

ពាក់ព័ន្ធករណីនេះ លោក ស៊ុន តឹក ជាអ្នកសម្របសម្រួលអង្គការលីកាដូ (Licadho) ប្រចាំខេត្តបាត់ដំបង បានស្នើឲ្យតុលាការ ពង្រឹងការអនុវត្តច្បាប់ ដើម្បីរកអ្នកនៅពីក្រោយខ្នងបទល្មើសនេសាទ។ សមត្ថកិច្ចជលផល បានកសាងសំណុំរឿងជនសង្ស័យក្នុងការប្រព្រឹត្តិបទល្មើសនេសាទ បញ្ជូនទៅឲ្យតុលាការ ប៉ុន្តែការដោះលែងជនសង្ស័យ ទំនងបង្កឲ្យមានការរិះគន់ច្រើន។

លោក ស៊ុន តឹក៖ «រយៈកាលកន្លងមក យើងឃើញថា ថៅកែដែលមានលុយសម្រាប់ធ្វើណរ៉ាវអីហ្នឹង អត់មានកាត់ទោសទេ ព្រោះចាប់បានតែថៅកែពាក់ស្បែកជើង ចាប់បានតែអ្នកក្រីក្រ។ អ៊ីចឹង វាអត់មានអីទេ។ ចៅក្រមគាត់ពិចារណាទៅឃើញអ្នកក្រីក្រអាចឲ្យនៅក្រៅឃុំបណ្ដោះអាសន្ន។ ក្នុងនាមអង្គការសង្គមស៊ីវិលនៅបាត់ដំបង សំណូមពរដល់តុលាការ ជាពិសេសលោកចៅក្រមហ្នឹង ស្វែងរកអ្នកនៅពីក្រោយខ្នងដែលជាថៅកែធំៗ ដើម្បីឲ្យមកទទួលទោសតាមច្បាប់»។

មន្ត្រីជលផល និងសហគមន៍នេសាទ បានបញ្ជាក់ថា ពួកគេបានខំប្រឹងរួមគ្នាបង្ក្រាបបទល្មើសនេសាទ ដោយចាប់បានអ្នកប្រព្រឹត្តិបទល្មើសជាច្រើននាក់ នារយៈកាលកន្លងទៅនេះ ហើយបានកសាងសំណុំរឿងបញ្ជូនទៅឲ្យតុលាការ។ តាមគោលការណ៍ច្បាប់ តុលាការមានឆន្ទានុសិទ្ធិក្នុងការអនុវត្តច្បាប់ឲ្យបានត្រឹមត្រូវ និងប្រកបដោយប្រសិទ្ធភាព៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។