កម្មការិនីរោងចក្រនៅស្រុកខ្សាច់កណ្ដាលម្នាក់ស្លាប់ក្រោយដួលសន្លប់មុខរោងចក្រ
2017.08.19
មជ្ឈមណ្ឌលសម្ពន្ធភាពការងារ និងសិទ្ធិមនុស្ស ហៅកាត់ថា សង់ត្រាល់ (CENTRAL) កំពុងបើកការស្រាវជ្រាវរកការពិតជុំវិញហេតុការណ៍បណ្ដាលឲ្យកម្មការិនីរោងចក្រត្រូវដួលសន្លប់ និងស្លាប់ជាបន្តបន្ទាប់។ ការស្រាវជ្រាវនេះ ធ្វើឡើងបន្ទាប់ពីសង្គមស៊ីវិលសង្ស័យថា បរិយាកាសមិនល្អ ខ្យល់អាកាសចេញចូលមិនគ្រប់គ្រាន់ក្នុងរោងចក្រ ការធ្វើការលើសពី ១០ម៉ោងក្នុងមួយថ្ងៃ និងការហូបចុកខ្វះជីវជាតិ គឺជាកត្តានាំឲ្យកម្មការិនីត្រូវខ្សត់កម្លាំងដួលសន្លប់ និងស្លាប់។
ចាប់តាំងពីថ្ងៃទី៣ សីហា មកដល់ថ្ងៃទី១៩ សីហា នេះ មានកម្មការិនីរោងចក្រកាត់ដេរមិនក្រោម ១០០នាក់ឡើយ ដែលខ្លះត្រូវដួលសន្លប់ និងជាសះស្បើយឡើងវិញ និងមួយចំនួនតូចក្នុងចំណោមនោះបានស្លាប់ភ្លាមៗក្រោយពីការដួលសន្លប់បាត់ស្មារតី។
មន្ត្រីបេឡាជាតិរបបសន្តិសុខសង្គមស៊ីវិល ឲ្យដឹងថា នៅព្រឹកថ្ងៃទី១៩ សីហា នៅរោងចក្រ ខេបូយូនិសូល អិល.ធី.ឌី (Cambounisol Ltd) ស្ថិតក្នុងស្រុកខ្សាច់កណ្ដាល ខេត្តកណ្ដាល មានកម្មការិនីម្នាក់ទៀតឈ្មោះ ហ៊ៅ ស្រីនាត បានដួលសន្លប់បាត់ស្មារតី ហើយក្រោយមកបានស្លាប់ភ្លាមៗនៅពេលកំពុងបញ្ជូនទៅកាន់មន្ទីរពេទ្យព្យាបាល។
នាយកប្រតិបត្តិមជ្ឈមណ្ឌលសម្ពន្ធភាពការងារ និងសិទ្ធិមនុស្ស (សង់ត្រាល់) លោក មឿន តុលា ថ្លែងថា ខាងលោកកំពុងស្វែងរកឲ្យបានច្បាស់លាស់ ថាតើបញ្ហាអ្វីខ្លះនាំឲ្យកម្មការិនីត្រូវដួលសន្លប់ និងស្លាប់ភ្លាមៗនៅកន្លែងធ្វើការ បន្ទាប់ពីសង្ស័យថា បញ្ហានេះបណ្ដាលមកពីកត្តាខ្វះរបបអាហារ រោងចក្រគ្មានអុកស៊ីហ្សែនចេញចូលគ្រប់គ្រាន់ និងការធ្វើការថែមម៉ោង ជាដើម។ លោកបន្តថា ការដួលស្លាប់ និងសន្លប់របស់កម្មករ ដែលកើតឡើងជាបន្តបន្ទាប់នេះ គឺនៅចំរដូវកាលដែលរោងចក្រជាច្រើននៅកម្ពុជា កំពុងសម្រុកឲ្យកម្មករធ្វើការថែមម៉ោង ហើយជាមូលហេតុអាចនាំឲ្យកម្មករត្រូវធ្វើការលើសពី ១០ម៉ោងក្នុងមួយថ្ងៃ។ លោកក៏សង្ឃឹមថា ស្ថាប័នមួយចំនួនដូចជាបេឡាជាតិរបបសន្តិសុខសង្គម ជាដើម នឹងចូលរួមស្វែងរកការពិតអំពីបញ្ហានាំឲ្យកម្មករត្រូវដួលសន្លប់ និងស្លាប់នេះ៖ «ទីមួយត្រូវស្រាវជ្រាវរកឲ្យឃើញច្បាស់អំពីមូលហេតុដែលគាត់ស្លាប់ហ្នឹង តើការស្លាប់ហ្នឹងមានចំណែក និងកំហុសខាងរោងចក្រដែរអត់? រោងចក្រហ្នឹងមានគីមីទេ? ហើយរោងចក្រហ្នឹងមានអាកាសយ៉ាងម៉េចដែរ»។
លោក មឿន តុលា បញ្ជាក់ថា លទ្ធផលស្រាវជ្រាវ នឹងធ្វើជាមូលដ្ឋានយកទៅជជែកជាមួយអ្នកបញ្ជាទិញ ដើម្បីស្វែងរកដំណោះស្រាយរួមគ្នា។ លោកថ្លែងទៀតថា ប្រសិនបើរដ្ឋាភិបាលកម្ពុជា បណ្ដែតបណ្ដោយឲ្យមានកម្មករត្រូវដួលសន្លប់ និងស្លាប់បែបនេះបន្តទៀត នឹងធ្វើឲ្យប៉ះពាល់ដល់វិស័យកាត់ដេររបស់កម្ពុជា ឬអាចថាអ្នកបញ្ជាទិញទាំងនោះនឹងស្ទាក់ស្ទើរចិត្តទិញសម្លៀកបំពាក់នាំចេញពីកម្ពុជា ផងដែរ។
លោក ជាវ ប៊ុនរិទ្ធ មន្ត្រីនាំពាក្យបេឡាជាតិរបបសន្តិសុខសង្គម (ប.ស.ស) បានសរសេរនៅលើហ្វេសប៊ុក (facebook) របស់លោកនៅថ្ងៃទី១៩ សីហា ថា កម្មការិនីរោងចក្រ ខេមបូយូនិសូល ឈ្មោះ ហ៊ៅ ស្រីនាត បានស្លាប់នៅពេលបញ្ជូនដល់មន្ទីរពេទ្យបង្អែកស្រុកខ្សាច់កណ្ដាល។ កម្មការិនីរូបនេះកើតអាការៈវិលមុខ ធីងធោង និងសន្លប់បាត់ស្មារតី ខណៈចុះពីលើរថយន្តដឹកកម្មករដើរចូលទៅដល់ខាងមុខនៃរោងចក្រ។ លោកបន្តថា ថ្វីត្បិតតែមានការដាក់អុកស៊ីហ្សែនដើម្បីធ្វើចលនាបេះដូង ពេលបញ្ជូនទៅមន្ទីរពេទ្យបង្អែកយ៉ាងណាក្ដី ប៉ុន្តែនៅតែមិនអាចជួយសង្គ្រោះជីវិតកម្មការិនីនេះបាននោះទេ។
គិតចាប់ពីដើមខែសីហា រហូតមកដល់ពេលនេះ ករណីកម្មការិនីរោងចក្របម្រើការក្នុងវិស័យកាត់ដេរបានដួលសន្លប់ និងដួលស្លាប់ស្ទើរបន្តកន្ទុយគ្នា។ កាលពីថ្ងៃទី៣ សីហា កម្មការិនីកាត់ដេរម្នាក់នៅក្នុងរោងចក្រ យ៉ាកជីន (Yakjin) ក្នុងខេត្តកំពង់ស្ពឺ ឈ្មោះ មាស ស្រីល័ក្ខ ក៏បានដួលសន្លប់ និងស្លាប់ បន្ទាប់ពីធ្វើការថែមម៉ោង។ ចំណែកនៅរាជធានីភ្នំពេញវិញ កម្មការិនីចំនួន ១០៦នាក់នៅរោងចក្រ ញ៉ូវ អរេន ខេមបូឌា ហ្គាមិន (New Orient) និងកម្មការិនីចំនួន ៩នាក់នៅរោងចក្រ លូស៊ីដា កម្ពុជា (Lucida Cambodia Enterprise Co., Ltd) ដែលរោងចក្រទាំងពីរនេះស្ថិតនៅម្ដុំផ្លូវវ៉េងស្រេង ក្នុងសង្កាត់ចោមចៅ ក៏បានដួលសន្លប់ជាបន្តបន្ទាប់ ហើយដែលគេសង្ស័យថា កត្តាទាំងនេះដោយសារហូបចុកអាហារគ្មានជីវជាតិ ព្រមទាំងរោងចក្រគ្មានបរិយាកាសល្អ និងគ្មានស្តង់ដារ ជាដើម។
ចំណែកប្រធានសហភាពការងារកម្ពុជា លោក អាត់ ធន់ ព្រួយបារម្ភថានឹងអាចមានកម្មករកម្មការិនីត្រូវដួលសន្លប់ និងស្លាប់បន្ថែមទៀត ប្រសិនបើរដ្ឋាភិបាលនៅតែគ្មានវិធានការបន្ទាន់ដើម្បីដោះស្រាយបញ្ហា៖ «ពន្លឺមិនគ្រប់គ្រាន់ ហើយអគារហ្នឹងវាមិនត្រូវស្តង់ដារ ដែលហប់ និងខ្វះអុកស៊ីសែន គឺក្រសួងមិនមែនទៅឃើញហើយរាយការណ៍មកដដែលៗ អត់កែប្រែទេ ហើយខ្ញុំថាបើមិនកែប្រែ បញ្ឈប់ ឬបិទមួយរយៈទៅ ក្រុមហ៊ុនគេនឹងខ្លាចហើយ»។
រីឯលោក មឿន តុលា នាយកប្រតិបត្តិមជ្ឈមណ្ឌលសម្ពន្ធភាពការងារ និងសិទ្ធិមនុស្ស បញ្ជាក់ថា ប្រឈមនឹងបញ្ហានាំឲ្យកម្មករដួលសន្លប់នេះ រដ្ឋាភិបាលត្រូវឲ្យតាមរោងចក្រនានាកំណត់កម្រិតកម្ដៅឲ្យបានច្បាស់លាស់ ឈប់ប្រើប្រាស់កិច្ចសន្យារយៈពេលខ្លីជាមួយកម្មករ ជាពិសេសត្រូវគិតគូរអំពីប្រាក់ខែអប្បបរមាឡើងវិញសម្រាប់កម្មករ ពីព្រោះការអប់រំកម្មករឲ្យឈប់ហូបលៀសហាល និងខ្ចៅខ្យងដែលជាអាហារគ្មានសុខភាព និងទៅហូបចុកអាហារសុខភាព ដូចជាត្រីសាច់ដូចគ្នានោះ មិនបានជោគជ័យឡើយ ដរាបណាប្រាក់ខែកម្មករនៅតែទាបដូចសព្វថ្ងៃនេះ៕