សាច់ញាតិអះអាងថាគ្រូពេទ្យសង្ស័យថាជាអ្នកចម្លងមេរោគអេដស៍មិនរត់គេចខ្លួនទេ
2014.12.17
សាច់ញាតិរបស់គ្រូពេទ្យដែលអ្នកភូមិសង្ស័យថា ជាអ្នកចាក់ថ្នាំចម្លងមេរោគអេដស៍ដល់ប្រជាពលរដ្ឋ នៅភូមិរកា ខេត្តបាត់ដំបង ដែលអះអាងថាឪពុកក្មេកលោកជាគ្រូពេទ្យនោះ ពុំបានរត់គេចខ្លួនទៅណាឆ្ងាយពីភូមិស្រុកនោះទេ គឺស្នាក់នៅក្នុងទឹកដីខេត្តបាត់ដំបង។
លោកបានបញ្ជាក់ទៀតថា មូលហេតុដែលឪពុកក្មេកលោកមិននៅផ្ទះនេះ គឺធ្វើឡើងទៅតាមសំណូមពររបស់អាជ្ញាធរទៅវិញទេ ដើម្បីរក្សាសុវត្ថិភាពរបស់គ្រូពេទ្យមួយរយៈសិន។
កូនប្រសាប្រុសរបស់គ្រូពេទ្យ ដែលអ្នកភូមិរកា សង្ស័យថា ជាដើមចមបង្កឲ្យមានការឆ្លងមេរោគអេដស៍ដល់ប្រជាពលរដ្ឋនោះ សម្ដែងការសោកស្ដាយចំពោះមន្ទិលសង្ស័យរបស់មហាជន ដែលថាគ្រូពេទ្យភ័យខ្លាច ហើយរត់គេចខ្លួននោះ គឺជារឿងមិនពិតឡើយ។
កូនប្រសាប្រុសរបស់គ្រូពេទ្យ គឺលោក ឆែម ជឿន រស់នៅភូមិរកា ថ្លែងនៅខាងមុខផ្ទះក្បែរមណ្ឌលសុខភាពរកា នៅថ្ងៃទី១៧ ធ្នូ ថា គ្រូពេទ្យដែលគេសង្ស័យនោះឈ្មោះ លោក យ៉ែម ជ្រិន អាយុ ៥៦ឆ្នាំ ប្រកបរបរពេទ្យតាំងតែត្រឡប់មកពីជំរំភៀសខ្លួនព្រំដែនថៃ វិញ គឺប្រមាណជាង ២០ឆ្នាំមកហើយ គឺពុំដែលបង្កបញ្ហាដល់អ្នកភូមិម្នាក់ណានោះទេ។
លោកបន្តថា កាលពីប្រមាណថ្ងៃមុននេះ គ្រូពេទ្យបានទៅមើលជំងឺសាច់ញាតិរបស់គាត់នៅឯខេត្តតាកែវ អស់រយៈពេលប្រមាណជា ៤ថ្ងៃ ហើយបានត្រឡប់មកស្រុកភូមិវិញ គឺពុំបានរត់គេចខ្លួនដូចការសង្ស័យនោះទេ។ លោកថា សព្វថ្ងៃគ្រូពេទ្យមិនបានទៅណាឆ្ងាយនោះទេ គឺស្ថិតនៅក្នុងទឹកដីខេត្តបាត់ដំបង ហើយថានឹងវិលត្រឡប់មកផ្ទះសម្បែងវិញ ប្រសិនបើសមត្ថកិច្ចត្រូវការជួប៖ «គាត់នៅនេះយូរឆ្នាំគាត់ដឹងថា ប្រជាពលរដ្ឋស្រុកនេះមិនធ្វើអីគាត់នោះទេ ប៉ុន្តែនៅដែលគេចោទគាត់អ៊ីចឹងទៅគាត់មានការងឿងឆ្ងល់ ហើយចង់ដឹងពីមូលហេតុដែលបណ្ដាលឆ្លងមេរោគអេដស៍នោះ ប៉ុន្តែខាងអាជ្ញាធរគេមិនទាន់ឲ្យត្រឡប់មកនោះទេ ដើម្បីសុវត្ថិភាពរបស់គាត់គេក៏ឲ្យគាត់លាក់ខ្លួនមួយរយៈសិន»។
ទោះយ៉ាងនេះក្ដី ប្រធានប៉ុស្តិ៍នគរបាលឃុំរកា លោក ជិន ប៊ុនរាំង មានប្រសាសន៍ឲ្យដឹងថា គ្រូពេទ្យដែលគេសង្ស័យថាជាអ្នកចាក់ថ្នាំបង្កមេរោគអេដស៍ដល់ប្រជាពលរដ្ឋនោះ ទៅលេងបងប្អូននៅខេត្តតាកែវ ពុំទាន់ត្រឡប់មកផ្ទះវិញនៅឡើយទេ៖ «គាត់ទៅលេងម្ដាយរបស់គាត់នៅឯស្រុកកំណើតខេត្តតាកែវ ឯណោះតាំងពីថ្ងៃទី១១ ធ្នូ មកម្លិះ»។
ទាក់ទងនឹងបញ្ហានេះដែរ អាជ្ញាធរជាតិប្រយុទ្ធនឹងជំងឺអេដស៍ នៃក្រសួងសុខាភិបាល លោក តែង គន្ធី មានប្រសាសន៍បញ្ជាក់ថា ការសង្ស័យតាមរយៈការសាកសួរពីប្រជាពលរដ្ឋដែលទៅធ្វើតេស្ដឈាម ហើយរកឃើញថាមានមេរោគអេដស៍នោះ បង្ហាញថា ភាគច្រើនពួកគាត់ធ្លាប់មានប្រវត្តិចាក់ថ្នាំជាមួយពេទ្យភូមិចំនួន ២នាក់ ប៉ុន្តែក្នុងនោះមានគ្រូពេទ្យម្នាក់ដែលប្រជាពលរដ្ឋសង្ស័យជាងគេ ហើយបានរត់គេចខ្លួនបាត់ទៅហើយ៖ «រហូតមកដល់ថ្ងៃនេះយើងមិនទាន់បានទាក់នៅឡើយទេ ហើយអ្វីដែលយើងគិតថា ហ្នឹងទៅតាមការយល់ឃើញរបស់ប្រជាពលរដ្ឋទេ។ ក៏ប៉ុន្តែក្រុមការងារបច្ចេកទេសរបស់យើងកំពុងតែញាប់ដៃញាប់ជើងធ្វើការងារហ្នឹង មានន័យថា គឺយើងធ្វើការសិក្សាតាមបែបវិទ្យាសាស្ត្រ គឺពុំមែនគ្រាន់តែជាការសួរឆ្លើយៗទៅលើប្រជាពលរដ្ឋប៉ុណ្ណោះទេ គឺធ្វើយ៉ាងណាដើម្បីប្រមូលព័ត៌មានឲ្យបានគ្រប់ជ្រុងជ្រោយ»។
របាយការណ៍របស់អាជ្ញាធរជាតិប្រយុទ្ធនឹងជំងឺអេដស៍ នៃក្រសួងសុខាភិបាល បង្ហាញថា គិតត្រឹមម៉ោងប្រមាណ ៥កន្លះថ្ងៃទី១៧ ធ្នូ ប្រជាពលរដ្ឋដែលទៅពិនិត្យឈាមមានចំនួន ៨៩៥នាក់ ក្នុងនោះរកឃើញអ្នកផ្ទុកមេរោគអេដស៍មានចំនួន ១០៦នាក់។ រហូតមកដល់ពេលនេះ ប្រជាពលរដ្ឋនៅតែសម្រុកទៅធ្វើតេស្ដឈាមជាបន្តបន្ទាប់នៅឡើយ៕