អ្នកស្វាយរៀងហួសចិត្តរឿងទំនិញមានជាតិគីមីខណៈការនាំចូលពីវៀតណាមដោយសេរី
2017.10.03
ពលរដ្ឋរស់នៅស្រុករមាសហែក ខែត្រស្វាយរៀង សម្ដែងការហួសចិត្តនៅគ្រាដែលប្រមុខរដ្ឋាភិបាលលោក ហ៊ុន សែន ផ្ដាំឲ្យពលរដ្ឋកុំទិញទំនិញផ្ទុកសារធាតុគីមី។ ពួកគាត់ចាត់ទុកការលើកឡើងនេះ ថា មិនបានសិក្សាឲ្យគ្រប់ជ្រុងជ្រោយ និងមិនទទួលខុសត្រូវ ខណៈពលរដ្ឋរស់ខ្មែរភាគច្រើនមិនប្រាកដថា ទំនិញប្រភេទណាផ្ទុកសារធាតុគីមី និងពុំមានសារធាតុគីមីនោះទេ។
ក្រុមអាជីវករ និងពលរដ្ឋរស់នៅស្រុករមាសហែក ខែត្រស្វាយរៀង ឲ្យដឹងនៅថ្ងៃទី៣ តុលា ថា ពាណិជ្ជករវៀតណាមបាននាំទំនិញមកលក់នៅផ្សារនានាខែត្រស្វាយរៀងរយៈពេល ២ឆ្នាំមកហើយ កម្រឃើញអាជ្ញាធររដ្ឋាភិបាលណាត្រួតពិនិត្យគុណភាពទំនិញទាំងនោះ ឲ្យបានត្រឹមត្រូវទេ គឺឃើញតែចាំទទួលផលប្រយោជន៍តាមច្រកព្រំដែន ជាថ្នូរនាំទំនិញចូលដោយសេរី។
អាជីវករនៅផ្សារកំពង់ត្រាច នៃស្រុករមាសហែក ខែត្រស្វាយរៀង លោក ព្រាប សុខា ត្អូញថា ការបណ្ដោយឲ្យពាណិជ្ជករវៀតណាមលក់ទំនិញនៅផ្សារស្រុកខ្មែរដោយសារីបែបនេះ បង្កប៉ះពាល់ដល់មុខរបរពលរដ្ឋនៅមូលដ្ឋាន ត្បិតទំនិញនាំចូលពីវៀតណាមផ្ទុកសារជាតិគីមី និងមានតម្លៃថោក។ លើសពីនេះ ទំនិញទាំងនោះមានដូចជា បន្លែត្រីសាច់ ផ្លែឈើ និងម្ហូបអាហារជាដើម។ លោករកឃើញថា មន្ត្រីកាំកុងត្រូល និងសមត្ថកិច្ចពាក់ព័ន្ធ មិនបានយកចិត្តទុកដាក់ ត្រួតពិនិត្យលក្ខណៈបច្ចេកទេស និងទប់ស្កាត់ទំនិញទាំងនោះឲ្យបានត្រឹមត្រូវទេ ដែលនាំឲ្យប៉ះពាល់មុខរបរ សុខភាព និងអាយុជីវិតពលរដ្ឋ។
ពលរដ្ឋម្នាក់ទៀតរស់នៅជាប់ព្រំដែនកម្ពុជាវៀតណាម នៃស្រុករមាសហែក ថ្លែងសុំមិនបញ្ចេញឈ្មោះដោយបារម្ភថា រាល់ឆ្នាំដល់រដូវមង្គលការម្តងៗ គេឃើញពលរដ្ឋខ្មែរច្រើនប្រើប្រាស់ទំនិញមកពីវៀតណាម ព្រោះមានតម្លៃថោក ដោយមិនបានគិតពីផលប៉ះពាល់សុខភាពនោះទេ។ ទំនិញទាំងនោះដូចជា ជើងមាន់ ភ្លៅមាន់ សាច់ជ្រូក និងបន្លែផ្លែឈើជាដើម។ ចំណែកទំនិញរបស់ពលរដ្ឋខ្មែរវិញ ដូចជាត្រីសាច់ បន្លែ និង ជ្រូកជាដើមត្រូវពាណិជ្ជករវៀតណាមចាំទទួលទិញពីពលរដ្ឋខ្មែរ ដឹកជញ្ជូនត្រឡប់ទៅលក់នៅប្រទេសវៀតណាមវិញ។ លោកសម្ដែងការហួសចិត្តចំពោះប្រសាសន៍លោក ហ៊ុន សែន ដោយចាត់ទុកថា មិនបានសិក្សាឲ្យគ្រប់ជ្រុងជ្រោយ និងគេចវេះមិនទទួលខុសត្រូវ ខណៈចំណេះដឹងពលរដ្ឋខ្មែរភាគច្រើននៅមានកម្រិត ទិញទំនិញនាំចូលពីក្រៅប្រទេសដោយមិនបានគិតពីគុណភាព និងសុវត្ថិភាពនោះទេ៖ «ពលរដ្ឋរាប់សិបអ្នកគាត់មានពេលណាត្រួតពិនិត្យគាត់ទិញបន្តិចបន្តួចទៅ ស្លហូបៗ ប៉ះពាល់លែងនិយាយ។ ហួសចិត្តត្រង់ថា ផ្ដោតដាក់កំហុសតែពលរដ្ឋ បើតាមពិតគេបន្ទោស ប្រទេសជឿនលឿនអីគេបន្ទោសថ្នាក់ដឹកនាំ តែបន្ទោសពលរដ្ឋយល់ដឹងមានកម្រិត»។
បុរសដដែលបន្តថា ជនជាតិវៀតណាមបានយកទំនិញមកលក់នៅផ្សារកំពង់ត្រាច ផ្សារជីភូ ផ្សារកណ្ដៀងរាយ ផ្សារប្រសូត្រ និងផ្សារនៅទីរួមខែត្រស្វាយរៀង ដោយសេរីនៅរយៈពេល ពីរឆ្នាំចុងក្រោយនេះ ព្រោះកន្លងមកទំនិញដែលនាំចូលពីវៀតណាម គេឃើញលក់បន្តឲ្យអាជីវករខ្មែរ៖ «រដូវបុណ្យការ ប៉ះពាល់បំផុតមាន់ក្លាសេ ជាពិសេសពោះគោមិនដឹងមកពីណាទេ ស្លគ្រប់រោងការតែម្ដង ហើយរោងការនីមួយៗមិនមែនហូបតែម្នាក់ឯងទេ វាប៉ះពាល់រាប់សិបអ្នក»។
កាលពីពេលថ្មីនេះ លោកនាយករដ្ឋមន្ត្រី ហ៊ុន សែន បានផ្ដាំទៅពលរដ្ឋដែលអំពាវនាវឲ្យរដ្ឋាភិបាលមានវិធានការទប់ស្កាត់ទំនិញនាំចូលពីក្រៅប្រទេសផ្ទុកសារធាតុគីមី និងផុតសុពលភាពនោះថា សូមឲ្យពលរដ្ឋកុំទិញទំនិញដែលមានជាតិគីមី។ លោកថា ដោយសារពលរដ្ឋសម្រុកទិញទំនិញមានជាតិគីមីហើយ ដែលជាមូលហេតុគាំទ្រឲ្យមានការលក់បន្តទៀត រួចហើយចោទតែរដ្ឋាភិបាល៖ «សុំត្រឡប់ទៅវិញ សុំពលរដ្ឋរួមគ្នាពហិការកុំទិញរបស់ណា អ្នកលក់ណា ដែលដាក់លក់ដោយមានសារធាតុគីមី។ ខ្ញុំមានពេលខ្លះខ្ញុំថា ដូចជាពេកហើយមិនដឹងទេអី សំណូមពរខ្លះដូចជាជ្រុលពេកហើយ ក្រែងទិញខ្លួនឯង ស្លខ្លួនឯង បែរជាបន្ទោសតែរដ្ឋាភិបាលមួយមុខ»។
ប្រធានអង្គការសម្ព័ន្ធគណនេយ្យភាពសង្គមកម្ពុជា លោក សន ជ័យ យល់ថា រដ្ឋធម្មនុញ្ញរបស់កម្ពុជា បានចែងថា រដ្ឋមានកាតព្វកិច្ចការពារ និងធ្វើឲ្យប្រសើរឡើងនូវសុខុមាលភាពពលរដ្ឋ។ លោកអង្កេតឃើញថា ពលរដ្ឋខ្មែរមិនមានមធ្យោបាយពិនិត្យមើលបន្លែ និងទំនិញណាដែលមានសារធាតុគីមី ឬមិនមាននោះទេ ហេតុនេះរដ្ឋាភិបាលត្រូវមានវិធានការទប់ស្កាត់កុំឲ្យនាំទិញខូចគុណភាព និងមានសារធាតុគីមីចរាចរមកស្រុកខ្មែរ ដើម្បីការពារសុខភាព និងអាយុជីវិតពលរដ្ឋ៖ «នៅពេលដែលជាកាតព្វកិច្ចរបស់រដ្ឋហើយ ការការពារ ការនាំចូលទំនិញតាមព្រំដែនហ្នឹង ជាពិសេសត្រីសាច់បន្ថែជាដើម ចាំបាច់ត្រូវតែមានការពារឲ្យបានហ្មត់ចត់ ហើយជំរុញការដាំដុះក្នុងស្រុកឲ្យបានខ្លាំងក្លាជាងមុនទៅ»។
លោក សន ជ័យ បន្ថែមថា នៅប្រទេសលោកខាងលិច ឬប្រទេសទៅទ្វីបអឺរ៉ុប រដ្ឋាភិបាលប្រទេសគេ បានចាត់វិធានការបន្ទាន់មិនឲ្យមានការនាំចូលទំនិញពីក្រៅប្រទេសផ្ទុកសារធាតុគីមីទេ ក្នុងបំណងការពារសុខភាពពលរដ្ឋរបស់ប្រទេសគេ ដែលផ្ទុយពីមេដឹកនាំនៅកម្ពុជា៖ «អ្វីដែលគេធ្វើដើម្បីការពារសុខុមាលភាពរបស់គេ គេមិនឲ្យពលរដ្ឋគេមានបញ្ហាដោយសាររឿងម្ហូបអាហារ ត្រីសាច់ដែលនាំពីក្រៅប្រទេសអ៊ីចឹងទៅទេ នៅពេលដែលយើងប្រៀបធៀបពីការទទួលខុសត្រូវរបស់ មេដឹកនាំគេ និងមេដឹកនាំនៅកម្ពុជា ខ្ញុំមើលឃើញថា ផ្ទុយគ្នា។ ខុសគ្នាត្រង់ថា គេរកមធ្យោបាយសព្វបែបយ៉ាងដើម្បីឲ្យពលរដ្ឋរស់នៅ ឬបរិភោគមិនមានសារធាតុគីមី»។
រដ្ឋធម្មនុញ្ញកម្ពុជា មាត្រា ៤៦ ចែងថា រដ្ឋត្រូវហាមឃាត់ និងផ្ដន្ទាទោសជាទម្ងន់ដល់ជនណាដែលនាំចូល ផលិតលក់ដូរគ្រឿងញៀន ទំនិញក្លែងក្លាយ ហួសរយៈពេលប្រើ ដែលប៉ះពាល់សុខភាព និង អាយុជីវិតអ្នកប្រើ។ ចំណែកមាត្រា ៧២ ចែងថា សុខភាពរបស់ប្រជារាស្ត្រត្រូវបានធានា រដ្ឋយកចិត្តទុកដាក់ដល់ការពារជំងឺ និងព្យាបាលជំងឺ។ ក៏ប៉ុន្តែពលរដ្ឋ និងមន្ត្រីសង្គមស៊ីវិលរកឃើញថា រដ្ឋាភិបាលហាក់មិនបានយកចិត្តទុកដាក់ ធានាសុខភាពពលរដ្ឋកម្ពុជានោះទេ ដែលបណ្ដោយឲ្យទំនិញគេចពន្ធ ផុតសុពលភាព និងមានសារធាតុគីមីលក់នៅស្រុកខ្មែរដោយសេរីច្រើនឆ្នាំមកហើយ បង្កខាតប្រយោជន៍របស់ពលរដ្ឋ និងសង្គមជាតិធ្ងន់ធ្ងរ៕