អ្នកភូមិនៅបាត់ដំបងជិត៣០០នាក់ត្រូវបានរកឃើញថាមានផ្ទុកមេរោគអេដស៍
2014.12.15
អ្នកភូមិនៅស្រុកសង្កែ ខេត្តបាត់ដំបង ជិត ៣០០នាក់ ត្រូវបានគ្រូពេទ្យធ្វើតេស្តឈាមហើយរកឃើញថា មានផ្ទុកមេរោគអេដស៍ (AIDS)។ ការត្រួតពិនិត្យជំងឺនេះ កើតឡើងបន្ទាប់ពីពួកគាត់ឃើញប្រជាពលរដ្ឋក្នុងភូមិជាច្រើននាក់ដែលបានធ្វើទៅតេស្តឈាមកន្លងមក មានផ្ទុកមេរោគអេដស៍ដោយមិនដឹងមូលហេតុ។ បញ្ហានេះកំពុងស្ថិតនៅក្នុងការសង្ស័យនិងស៊ើបអង្កេតបន្ត។
ក្រោយពីគ្រូពេទ្យពិនិត្យឈាមអ្នកជំងឺមិនបានប៉ុន្មានផង ក្នុងនោះលទ្ធផលដំបូងបង្ហាញថា អ្នកជំងឺក្មេងចាស់ប្រុសស្រីដែលធ្វើតេស្តឈាមភាគច្រើនមានផ្ទុកមេរោគអេដស៍។
អ្នកភូមិម្នាក់ដែលសង្ស័យថា ផ្ទុកមេរោគអេដស៍រស់នៅឃុំរកា ស្រុកសង្កែ ថ្លែងក្នុងលក្ខខណ្ឌមិនឲ្យបញ្ចេញឈ្មោះក្នុងទឹកមុខស្លេកស្លាំងបន្ទាប់ពីទទួលលទ្ធផលឈាមនៅមណ្ឌលសុខភាពឃុំរកា កាលពីព្រឹកថ្ងៃទី១៥ ធ្នូ ថា លទ្ធផលធ្វើតេស្តឈាមដំបូងនេះបង្ហាញថា មានផ្ទុកមេរោគអេដស៍។
ពលរដ្ឋរូបនេះបន្តថា សមាជិកក្នុងក្រុមគ្រួសាររបស់ខ្លួនជាមនុស្សស្អាតស្អំគឺពុំមាននរណាម្នាក់ធ្លាប់មានប្រវត្តិមិនល្អទៅប៉ះពាល់មនុស្សដែលផ្ទុកមេរោគដ៏កាចសាហាវបែបនេះនោះឡើយ។ អ្នកភូមិរូបនេះឲ្យដឹងទៀតថា ជំងឺនេះកើតឡើងប្រហែលជាឆ្លងតាមម្ជុលចាក់ថ្នាំរបស់គ្រូពេទ្យដែលបានព្យាបាលជំងឺកាលពីប្រមាណ ៦ខែកន្លងទៅ៖ «ខ្ញុំមិនដឹងថា គ្រូពេទ្យដែលខ្ញុំចាក់ថ្នាំកន្លងមកហ្នឹងយ៉ាងម៉េចទេ គឺគ្រាន់តែដឹងថា គាត់គ្រូពេទ្យចាក់ថ្នាំឲ្យអ្នកភូមិជាប្រចាំ។ អ្នកមានផ្ទុកមេរោគអេដស៍ហ្នឹងមិនដឹងថា គាត់មានមេរោគ ឬមិនមាននោះទេ ប៉ុន្តែឃើញគេមកធ្វើតេស្តឈាម ហើយមានរោគសញ្ញាមេរោគច្រើន ខ្ញុំក៏មកដែរទៅ»។
ទាក់ទងនឹងបញ្ហានេះប្រធានកម្មវិធីអេដស៍ស្រុកសង្កែ លោក ហ៊ា ស៊ិ មានប្រសាសន៍បញ្ជាក់ថា លទ្ធផលឈាមដែលពិនិត្យនេះ លទ្ធផលដំបូងពុំទាន់ជាក់ច្បាស់នៅឡើយទេ គឺត្រូវបញ្ជូនទៅពិនិត្យនៅមន្ទីរពេទ្យខេត្តបាត់ដំបង ម្ដងទៀត ទើបសន្និដ្ឋានថា ជាជំងឺអ្វីជាក់ច្បាស់។ ទោះយ៉ាងនេះក្ដីលោកថា អាជ្ញាធរពាក់ព័ន្ធកំពុងព្រួយបារម្ភចំពោះការលទ្ធផលឈាមដំបូងនេះដែលរកឃើញថា មានអ្នកជំងឺជាច្រើននាក់ផ្ទុកមេរោគអេដស៍ ហើយការផ្ទុកមេរោគនេះដោយពុំដឹងមូលហេតុបណ្ដាលមកពីអ្វីច្បាស់លាស់នោះទេ៖ «ព័ត៌មានដែលខ្ញុំទទួលបានគឺជំងឺនេះពុំមែនឆ្លងពីចាក់វ៉ាក់សាំងនោះទេ គឺជំងឺនេះប្រហែលជាឆ្លង តាមរយៈការចាក់ថ្នាំរបស់គ្រូពេទ្យដែលព្យាបាលអ្នកជំងឺតាមភូមិកន្លងមក។ ប៉ុន្តែនេះគ្រាន់តែជាការសន្និដ្ឋាន មិនទាន់ជាការពិតនៅឡើយទេ»។
ទាក់ទងនឹងបញ្ហានេះដែរ មេឃុំរកា អ្នកស្រី ស៊ឹម ពៅ មានប្រសាសន៍ថា ប្រជាពលរដ្ឋដែលសង្ស័យថា ផ្ទុកមេរោគអេដស៍ ហើយទៅពិនិត្យឈាមនៅមណ្ឌលសុខភាពនោះ ភាគច្រើនប្រជាពលរដ្ឋរស់នៅភូមិរកា តែម្ដង។ អ្នកស្រីបន្តថា ដំបូងឡើយប្រជាពលរដ្ឋពុំបានចាប់អារម្មណ៍ទៅពិនិត្យឈាមរកមេរោគអេដស៍នោះទេ គឺពួកគាត់ទៅពិនិត្យឈាមដើម្បីព្យាបាលជំងឺប្រចាំកាយធម្មតា៖ «ដំបូងប្រជាពលរដ្ឋទៅពិនិត្យរកមើលមេរោគស្វាយនិងប្រមេះទេ ប៉ុន្តែពេលទៅពិនិត្យក៏ប្រទះឃើញផ្ទុកមេរោគអេដស៍នោះតែម្ដង ហើយក៏ផ្អើលនាំគ្នាធ្វើតេស្តឈាមជាបន្តបន្ទាប់ទៅ ហើយការពិនិត្យឃើញថា អ្នកផ្ទុកមេរោគអេដស៍មានទាំងមនុស្សចាស់មានទាំងកូនក្មេង»។
ចាប់តាំងពីធ្វើតេស្តឈាមរកឃើញមុខសញ្ញាមេរោគអេដស៍មក ប្រជាពលរដ្ឋក្មេងចាស់ប្រុសក្នុងឃុំរកា សម្រុកទៅពិនិត្យឈាមជាបន្តបន្ទាប់។ មេឃុំឲ្យដឹងថា រហូតមកទល់ពេលនេះគ្រូពេទ្យធ្វើតេស្តឈាមហើយរកឃើញថា ប្រជាពលរដ្ឋដែលសង្ស័យផ្ទុកមេរោគអេដស៍ក្នុងខ្លួនប្រមាណជិត ៣០០នាក់ ប៉ុន្តែចំនួននេះអាចនឹងកើនទៀត។ បច្ចុប្បន្នអ្នកដែលសង្ស័យផ្ទុកមេរោគទាំងនោះ មួយចំនួនធំត្រូវមន្ត្រីសុខាភិបាលស្រុកសង្កែ និងអាជ្ញាធរពាក់ព័ន្ធនាំទៅធ្វើតេស្តឈាមបន្តនៅមន្ទីរពេទ្យខេត្តបាត់ដំបង៕