មូលនិធិប្រទេសអូស្ត្រាលីជួយវះកាត់ជំងឺភ្នែកដល់ពលរដ្ឋនៅកំពង់ឆ្នាំង
pb.mp3
ប្រជាពលរដ្ឋក្មេងចាស់ប្រុសស្រីរាប់រយនាក់ នៅព្រឹកថ្ងៃទី១៣ សីហា បាននាំគ្នាមកកាន់មន្ទីរពេទ្យបង្អែកស្រុកបរិបូណ៌ ដើម្បីទទួលការព្យាបាល និងវះកាត់ជំងឺភ្នែក។
លោក ឡេង វណ្ណៈ ជាវេជ្ជបណ្ឌិតជំនាញផ្នែកចក្ខុរោគនៃមូលនិធិហ្វ្រេដហូឡូវ ប្រទេសអូស្ត្រាលី ប្រចាំប្រទេសកម្ពុជា។ លោកបានឲ្យដឹងនៅរសៀលថ្ងៃទី១៣ សីហា ថា វេជ្ជបណ្ឌិត និងគ្រូពេទ្យជំនាញផ្នែកចក្ខុរោគនៃមូលនិធិហ្វ្រេដហូឡូវ ប្រចាំប្រទេសកម្ពុជាមួយក្រុម មានគ្នា ៦នាក់ បានមកធ្វើការពិនិត្យ និងព្យាបាលជំងឺភ្នែកជូនប្រជាពលរដ្ឋដោយឥតគិតថ្លៃនៅមន្ទីរពេទ្យបង្អែកស្រុកបរិបូណ៌ តាមសំណូមពររបស់អាជ្ញាធរខេត្តកំពង់ឆ្នាំង ក្នុងរយៈពេល ៥ថ្ងៃ។
លោក ឡេង វណ្ណៈ៖ «ថ្ងៃនេះខាងខ្ញុំសហការជាមួយមន្ទីរពេទ្យខេត្តកំពង់ឆ្នាំង ចុះមកធ្វើការពិនិត្យភ្នែក និងវះភ្នែកឲ្យប្រជាពលរដ្ឋនៅស្រុកបរិបូណ៌ ខេត្តកំពង់ឆ្នាំង។ យើងធ្វើកម្មវិធីនេះ Free (ឥតគិតថ្លៃ) ដោយមានការ Support (គាំទ្រ) ពីខាងមូលនិធិហ្វ្រេដហូឡូវ ប្រទេសអូស្ត្រាលី...»។
ជំទប់ទី១ ឃុំត្រពាំងចាន់ លោក សាំង ខាត់ មានប្រសាសន៍ថា ភ្នែកលោកកើតជំងឺកន្ទុយថ្លែនអស់រយៈពេលជាង ៣ឆ្នាំហើយ មិនទាន់បានព្យាបាលដោយសារកង្វះថវិកា និងដោយការងារក្នុងមូលដ្ឋានមមាញឹក។
លោកថា ការមកធ្វើការពិនិត្យ និងព្យាបាលជំងឺភ្នែកជូនប្រជាពលរដ្ឋរបស់មូលនិធិហ្វ្រេដហូឡូវ គឺជាឱកាសដ៏ល្អសម្រាប់រូបលោក៖ «ភ្នែកខ្ញុំវាកើតកន្ទុយថ្លែន វាចេះតែផ្សា ហើយក្ដៅ និងរមាស់ មើលទៅឃើញស្រវាំងៗ។ តែខ្ញុំនៅលេខរៀងទី ២៣០ ខ្ញុំនៅចាំខាងក្រៅនៅឡើយ។ ក្នុងអារម្មណ៍ខ្ញុំរីករាយ ព្រោះខ្ញុំមិនចាំបាច់ទៅឆ្ងាយ ហើយក៏មិនចាំបាច់ចំណាយលុយទៀតផង...»។
បុរសអ្នកភូមិឈ្មោះ ពិន ពៅ នៅភូមិម៉ុងបារាំង សង្កាត់ផ្អេរ ក្រុងកំពង់ឆ្នាំង ដែលកំពុងរង់ចាំលេខរៀងចូលពិនិត្យជំងឺភ្នែកនោះ បានឲ្យដឹងថា គាត់សប្បាយចិត្តព្រោះការពិនិត្យ និងព្យាបាលនេះគាត់ពុំចាំបាច់ចំណាយប្រាក់នោះទេ៖ «លោកគ្រូពេទ្យដែលគាត់មកពិនិត្យជំងឺនោះ គាត់មិនយកលុយទេ ហើយឲ្យប្រជាពលរដ្ឋទូទៅមកពិនិត្យ។ ប្រជាពលរដ្ឋមកច្រើនណាស់...»។
ប្រធានការិយាល័យសុខាភិបាលស្រុកបរិបូណ៌ លោកវេជ្ជបណ្ឌិត ឈុន ប៊ុនថា បានឲ្យដឹងថា ការពិនិត្យ និងព្យាបាលជំងឺភ្នែកជូនប្រជាពលរដ្ឋនេះ នឹងដំណើរការរយៈពេល ៥ថ្ងៃ គឺពីថ្ងៃទី១៣ ដល់ថ្ងៃទី១៧ សីហា ដោយឥតមានបង់ថ្លៃសេវាអ្វីទាំងអស់។ លោកថា មូលនិធិហ្វ្រេដហូឡូវ នៃប្រទេសអូស្ត្រាលី ប្រចាំប្រទេសកម្ពុជា ជាអ្នកឧបត្ថម្ភទាំងស្រុងក្នុងការពិនិត្យការព្យាបាល និងការវះកាត់ជូនប្រជាពលរដ្ឋ ដោយសហការជាមួយគ្រូពេទ្យជំនាញផ្នែកចក្ខុរោគ នៃមន្ទីរពេទ្យបង្អែកខេត្តកំពង់ឆ្នាំង និងស្រុកបរិបូណ៌។
មូលនិធិហ្វ្រេដហូឡូវ មានវត្តមាននៅប្រទេសកម្ពុជា តាំងពីឆ្នាំ១៩៩៨។ ការស្រាវជ្រាវរបស់មូលនិធិហ្វ្រេដហូឡូវ បង្ហាញថា ប្រជាពលរដ្ឋខ្មែរប្រមាណជាង ១៦៦.០០០នាក់ មានជំងឺងងឹតភ្នែក ហើយ ៦៥% នៃចំនួននេះ បណ្ដាលមកពីជំងឺភ្នែកឡើងបាយ ឬ (Cataract)៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
-
ស្ដាប់ផ្ទាល់
(ព្រឹក ៥:៣០-៦:៣០ ល្ងាច ៧:៣០-៨:៣០) - សំឡេង
ភាសា
