ម៉ុងតាញ៉ា-វៀតណាម១៣នាក់ទៀតនឹងត្រូវបញ្ជូនត្រឡប់ទៅប្រទេសវៀតណាមវិញ
2017.08.09
ជនជាតិម៉ុងតាញ៉ា ៩នាក់ ដែលរត់ភៀសខ្លួនពីប្រទេសវៀតណាម មកដល់ទីក្រុងភ្នំពេញកាលពីចុងខែកញ្ញា ឆ្នាំ២០១៥។ រូបថតថ្ងៃទី២ ខែតុលា ឆ្នាំ២០១៥
ជនជាតិដើមភាគតិចម៉ុងតាញ៉ា (Montagnard) វៀតណាម ចំនួន ១៣នាក់ទៀត នឹងត្រូវបញ្ជូនត្រឡប់ទៅប្រទេសវៀតណាម វិញ។
មន្ត្រីផ្នែកព័ត៌មានសាធារណៈប្រចាំតំបន់របស់អង្គការសហប្រជាជាតិ ទទួលបន្ទុកជនភៀសខ្លួន អ្នកស្រី វីវៀន តាន់ (Vivian Tan) ឲ្យអាស៊ីសេរី ដឹងតាមសារអេឡិចត្រូនិក (Email) នៅយប់ថ្ងៃទី៩ ខែសីហា ថា ជនជាតិដើមភាគតិចម៉ុងតាញ៉ា-វៀតណាម ដែលស្វែងរកសិទ្ធិជ្រកកោនចំនួន ១៣នាក់ទៀតដែលធ្លាក់ការសម្ភាស បានស្ម័គ្រចិត្តត្រឡប់ទៅវៀតណាម ដោយមានការគាំពារពីអង្គការសហប្រជាជាតិ។
ទោះជាយ៉ាងណា អ្នកស្រីបញ្ជាក់យ៉ាងខ្លីថា អ្នកទាំង ១៣នាក់នោះនៅមិនទាន់ត្រូវបញ្ជូនទៅវិញនៅឡើយទេនៅថ្ងៃទី៩ ខែសីហា នេះ ហើយអ្នកស្រីក៏មិនបានឲ្យដឹងពីពេលវេលាជាក់លាក់ដែលនឹងបញ្ជូនអ្នកទាំងនោះនៅឡើយដែរ។
អ្នកស្រីឲ្យដឹងដែរថា មន្ត្រីនៃអង្គការសហប្រជាជាតិ ទទួលបន្ទុកជនភៀសខ្លួន នឹងចុះទៅពិនិត្យស្ថានភាពរស់នៅរបស់ក្រុមជនជាតិដើមភាគតិចម៉ុងតាញ៉ា ដែលបានវិលត្រឡប់ទៅវៀតណាម វិញរួចហើយ ដែលជាការព្រមព្រៀងជាមួយរដ្ឋាភិបាលវៀតណាម។
អ្នកស្រី វីវៀន តាន់ បន្តថា សុវត្ថិភាពជនជាតិដើមភាគតិចម៉ុងតាញ៉ា ដែលបញ្ជូនត្រឡប់ទៅវិញ គឺជាការទទួលខុសត្រូវការពាររបស់រដ្ឋាភិបាលពួកគេ ដែលបានធានាថា ពួកគេមិនរងទារុណកម្មដោយសារការចាកចេញពីប្រទេសនោះទេ និងផ្ដល់លទ្ធភាពឲ្យអង្គការសហប្រជាជាតិអាចទៅពិនិត្យស្ថានភាពពួកគេបាន។
បច្ចុប្បន្នមានជនជាតិម៉ុងតាញ៉ា ៥២នាក់ បានស្នាក់នៅក្នុងប្រទេសកម្ពុជា ក្រោមការគ្រប់គ្រងរបស់អង្គការសហប្រជាជាតិ។ ក្នុងចំណោម ៥២នាក់នេះមាន ៣នាក់ត្រូវបានផ្ដល់ឋានៈជាជនភៀសខ្លួនរួចហើយ ខណៈដែល ៤៩នាក់បានធ្លាក់សម្ភាសកាលពីខែមិថុនា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- ពលរដ្ឋនៅតំបន់បឹងតាមោក ចោទប្រកាន់អាជ្ញាធរខណ្ឌព្រែកព្នៅថា ប្រើអំពើហិង្សា
- វៀតណាមព្រមានថា ព្រែកជីកហ្វូណនតេជោអាចជួយសម្រួលវត្តមានយោធាចិនក្នុងទឹកដីកម្ពុជាកាន់តែជ្រៅ
- ពលរដ្ឋខ្មែរ-អូស្ត្រាលីម្នាក់ ដែលរិះគន់រដ្ឋាភិបាលកម្ពុជា រងការវាយដំពីជនមិនស្គាល់មុខមួយក្រុម ពេលទៅលេងស្រុកខ្មែរ
- ក្រសួងដែនដីបានហៅអតិថិជនបុរីពិភពថ្មីទៅពិភាក្សា ដើម្បីរកដំណោះស្រាយ
- ការប្រារព្ធពិធីបុណ្យចូលឆ្នាំថ្មី នៅតាមតំបន់មួយចំនួននៅស្រុកសុរិន្ទ
