សមាគមមួយនៅប៉ោយប៉ែតគ្រោងដាក់លិខិតស្នើអន្តរាគមន៍រឿងប៉ូលិសអុកឡុកការជួបជុំ
2016.10.20
ប៉ូលិសចុះសាកសួរមន្ត្រីសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ (IDEA) ខណៈជួបជុំគ្នាជ្រើសរើសប្រធានថ្មីនៅភូមិផ្សារកណ្ដាល សង្កាត់ផ្សារកណ្ដាល ក្រុងប៉ោយប៉ែត ខេត្តបន្ទាយមានជ័យ កាលពីថ្ងៃទី១៨ តុលា ឆ្នាំ២០១៦។
Photo provided
មន្ត្រីសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ ហៅកាត់ថា អាយឌា (IDEA) នៅក្រុងប៉ោយប៉ែត ខេត្តបន្ទាយមានជ័យ នឹងដាក់សំណើទៅអាជ្ញាធរពាក់ព័ន្ធនៅក្នុងខេត្តនេះ ដើម្បីឲ្យជួយសម្រួលកុំឲ្យសមត្ថកិច្ចរារាំងរំខានរាល់ការងារជួបគ្នារបស់សមាគមបន្តទៀត។ ប៉ូលិសក្រុងប៉ោយប៉ែត បង្កការរំខានអុកឡុកដល់សមាគមនេះ ក្នុងការប្រជុំជ្រើសរើសប្រធានថ្មីកាលពីថ្ងៃទី១៨ ខែតុលា។
មន្ត្រីសមាគមអាយឌា ប្រចាំខេត្តបន្ទាយមានជ័យ ហៅការរំខានពីសំណាក់សមត្ថកិច្ចនេះ ថាជាការរារាំងបិទសិទ្ធសេរីភាពក្នុងការជួបជុំគ្នារបស់អង្គការសង្គមស៊ីវិល។
ប្រធានសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ ប្រចាំខេត្តបន្ទាយមានជ័យ លោក កង ណាកន មានប្រសាសន៍នៅថ្ងៃទី១៩ ខែតុលា ថា មន្ត្រីប៉ូលិស មេភូមិ និងប្រជាការពារភូមិនៅក្រុងប៉ោយប៉ែត ប្រមាណ ១៥នាក់ អុកឡុករំខានសមាគមអាយឌា មិនឲ្យរៀបចំពិធីជួបជុំគ្នាដែលមានមនុស្សចូលរួមប្រមាណ ១០០នាក់ នៅភូមិផ្សារកណ្ដាល សង្កាត់ផ្សារកណ្ដាល ដើម្បីជ្រើសរើសប្រធានថ្មី កាលពីថ្ងៃទី១៨ ខែតុលា នោះទេ។
លោកអះអាងថា សមាគមអាយឌា កំពុងរៀបចំលិខិតអន្តរាគមន៍ដើម្បីដាក់ទៅសាលាក្រុងប៉ោយប៉ែត និងសាលាខេត្តបន្ទាយមានជ័យ ដើម្បីឲ្យជួយសម្រួលកុំឲ្យសមត្ថកិច្ចបង្កការរំខានដល់ការងាររបស់ខ្លួននៅថ្ងៃក្រោយទៀត៖ «យើង ៣ឆ្នាំ បោះឆ្នោតម្ដងៗ ហើយជាអាណត្តិលើកទី៤ហើយ ដែលបានបោះឆ្នោត មិនដែលមានការអុកឡុកទេ ទើបលើកនេះដែលសមត្ថកិច្ចរំខាន។ ខ្ញុំចង់បានឲ្យអាជ្ញាធរគ្រប់ជាន់ថ្នាក់ឲ្យគាត់គោរពសិទ្ធិ សេរីភាពប្រជាពលរដ្ឋក្នុងបញ្ចេញមតិ និងការជួបជុំឲ្យបានទូលំទូលាយជាងនេះ»។
លោកបន្ថែមថា សមាគមអាយឌា មានគម្រោងរៀបចំការប្រជុំជ្រើសរើសប្រធានថ្មីនៅភោជនដ្ឋានមួយកន្លែងក្នុងក្រុងប៉ោយប៉ែត ក៏ប៉ុន្តែមិនអាចដំណើរការទៅបាន ដោយសារសមត្ថកិច្ចរារាំង ហើយក៏ប្ដូរទីតាំងទៅរៀបចំនៅផ្ទះរបស់មន្ត្រីសមាគមនៅសង្កាត់ផ្សារកណ្ដាល វិញ។
ឆ្លើយតបនឹងបញ្ហានេះ អធិការរងនគរបាលក្រុងប៉ោយប៉ែត លោក ព្រំ ពិសិដ្ឋ មានប្រសាសន៍ថា សមត្ថកិច្ចពុំមានចេតនាទៅរារាំងសមាគមនេះ មិនឲ្យជួបជុំគ្នាជ្រើសរើសប្រធានថ្មីនោះទេ ប្រសិនបើពួកគាត់មានច្បាប់អនុញ្ញាតពីសមត្ថកិច្ចនោះ៖ «យើងក៏មិនមានការអុកឡុកអីដែរ គឺគ្រាន់តែសំណូមពរឲ្យលើកទៅធ្វើនៅថ្ងៃទី២០ ខែតុលា វិញទៅ។ ធម្មតាអាជ្ញាធរតែងតែសួរនាំអ៊ីចឹងហើយដើម្បីចង់ដឹងថា មានឆ្លងរដ្ឋបាលក្រុងអីទេ?»។
ទោះជាយ៉ាងនេះក្ដី មន្ត្រីសម្របសម្រួលសមាគមការពារសិទ្ធិមនុស្សអាដហុក (ADHOC) ខេត្តបន្ទាយមានជ័យ លោក ស៊ុំ ច័ន្ទគា អះអាងថា ករណីនេះសមាគមអាយឌា មិនចាំបាច់ទៅសុំច្បាប់អនុញ្ញាតពីអាជ្ញាធរក្រុងនោះទេ។ លោកពន្យល់ថា មូលហេតុដែលមិនចាំបាច់សុំច្បាប់ ពីព្រោះការប្រជុំជ្រើសរើសប្រធានថ្មីរបស់សមាគមនេះគឺមិនខុសច្បាប់ឡើយ៖ «ព្រោះសមាគមអាយឌា បានចុះបញ្ជីស្របច្បាប់ ដែលទទួលស្គាល់ពីក្រសួងមហាផ្ទៃ ហើយម្យ៉ាងការធ្វើនេះ ក៏មិនប៉ះពាល់ដល់សន្តិសុខប្រទេសជាតិដែរ»។
ច្បាប់រដ្ឋធម្មនុញ្ញ មាត្រាទី៣៥ ចែងថា ប្រជាពលរដ្ឋខ្មែរទាំង ២ភេទ មានសិទ្ធិចូលរួមយ៉ាងសកម្មក្នុងជីវភាពនយោបាយ សេដ្ឋកិច្ច សង្គមកិច្ច និងវប្បធម៌របស់ប្រទេសជាតិ។ សេចក្ដីស្នើទាំងឡាយណារបស់ប្រជាពលរដ្ឋត្រូវទទួលការពិនិត្យ និងដោះស្រាយយ៉ាងហ្មត់ចត់ពីអង្គការរដ្ឋ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- វៀតណាមព្រមានថា ព្រែកជីកហ្វូណនតេជោអាចជួយសម្រួលវត្តមានយោធាចិនក្នុងទឹកដីកម្ពុជាកាន់តែជ្រៅ
- ពលរដ្ឋនៅតំបន់បឹងតាមោក ចោទប្រកាន់អាជ្ញាធរខណ្ឌព្រែកព្នៅថា ប្រើអំពើហិង្សា
- អាជ្ញាធរក្រុងភ្នំពេញមិនអនុញ្ញាតឱ្យបក្សកម្លាំងជាតិធ្វើបាតុកម្ម នៅទីលានប្រជាធិបតេយ្យ
- ក្រសួងដែនដីបានហៅអតិថិជនបុរីពិភពថ្មីទៅពិភាក្សា ដើម្បីរកដំណោះស្រាយ
- ពលរដ្ឋខ្មែរ-អូស្ត្រាលីម្នាក់ ដែលរិះគន់រដ្ឋាភិបាលកម្ពុជា រងការវាយដំពីជនមិនស្គាល់មុខមួយក្រុម ពេលទៅលេងស្រុកខ្មែរ
