អ្នកឃ្លាំមើល៖ គម្រោងបញ្ជូនជនភៀសខ្លួនពីអូស្ត្រាលីមកកម្ពុជាពុំមានសុវត្ថិភាព
2014.04.08
រដ្ឋមន្ត្រីក្រសួងការបរទេសអូស្ត្រាលី អ្នកស្រី ជូលី ប៊ីហ្សប (Julie Bishob) ក្នុងពេលជួបជាមួយរដ្ឋមន្ត្រីក្រសួងការបរទេសកម្ពុជា លោក ហោ ណាំហុង នារាជធានីភ្នំពេញ កាលពីថ្ងៃទី២២ ខែកុម្ភៈ ឆ្នាំ២០១៤។
ក្រុមឃ្លាំមើលការគោរពសិទ្ធិមនុស្ស ចាត់ទុកគម្រោងការនៃការបញ្ជូនអ្នកស្វែងរកសិទ្ធិជ្រកកោននៅប្រទេសអូស្ត្រាលី មកកម្ពុជា គឺរុញច្រានពួកគេអោយមករកកន្លែងពុំមានសុវត្ថិភាព។ ការលើកឡើងនេះ គឺស្របពេលដែលសារព័ត៌មានបរទេសជាច្រើនបានស្រង់សម្ដីរបស់ប្រធាននាយកដ្ឋានអន្តោប្រវេសន៍អូស្ត្រាលី ទៅផ្សព្វផ្សាយថា ពិតមែនថាកម្ពុជា ពុំមែនជាប្រទេសដែលមានសេដ្ឋកិច្ចឈានមុខជាប្រទេសអភិវឌ្ឍន៍ ប៉ុន្តែជាទីកន្លែងមានសុវត្ថិភាព។
អ្នកឃ្លាំមើលស្ថានភាពសិទ្ធិមនុស្ស និងជាសាស្ត្រាចារ្យនៅសាកលវិទ្យាល័យ ញូសោតវែល (NSW) លោក ខាល ថាយយ័រ (Carl Thayer) ត្រូវសារព័ត៌មានក្នុងប្រទេសអូស្ត្រាលី ស្រង់សម្ដីមកចុះផ្សាយថា លោករន្ធត់ក្នុងចិត្តនៅពេលរដ្ឋាភិបាលអូស្ត្រាលី ប្រាថ្នាជ្រើសរើសកម្ពុជា ជាកន្លែងបញ្ជូនជនភៀសខ្លួន។ លោកថា បញ្ជូនពួកគេទៅ គឺប្រៀបបាននឹងដាក់ពួកគេទៅក្នុងគ្រោះថ្នាក់ ដោយសំអាងថា កម្ពុជា ពុំមានស្ថិរភាពនយោបាយ។
រដ្ឋមន្ត្រីអន្តោប្រវេសន៍ប្រទេសអូស្ត្រាលី លោក ស្កុត ម៉ូរីសសុន (Scott Morrison) បានជួបប្រជុំជាមួយរដ្ឋមន្ត្រីក្រសួងមហាផ្ទៃកម្ពុជា លោក ស ខេង កាលពីសប្ដាហ៍មុន ប៉ុន្តែលទ្ធផលយ៉ាងណាពុំត្រូវបង្ហាញជាសាធារណៈឡើយ។ លោក ម៉ូរីសសុន បានប្រាប់អ្នកសារព័ត៌មាន បន្ទាប់ពីបានត្រឡប់ទៅដល់ប្រទេសអូស្ត្រាលី វិញនោះថា ទីកន្លែងរដ្ឋាភិបាលគ្រោងបញ្ជូនជនភៀសខ្លួនជាកន្លែងពិតមែនថាពុំជាប្រទេសអភិវឌ្ឍន៍ ប៉ុន្តែមានសុវត្ថិភាព។
បើទោះជាយ៉ាងណា មកដល់ពេលនេះរដ្ឋាភិបាលកម្ពុជា នៅមិនឆ្លើយតបយ៉ាងណាចំពោះសំណើបញ្ជូនជនភៀសខ្លួនពីប្រទេសអូស្ត្រាលី ដែលបានស្នើឡើងតាមរយៈរដ្ឋមន្ត្រីការបរទេស អ្នកស្រី ជូលី ប៊ីហ្សប (Julie Bishob) កាលពីខែកុម្ភៈ។
ករណីនេះ អ្នកឃ្លាំមើលសិទ្ធិមនុស្សនៅកម្ពុជា ក៏មានការព្រួយបារម្ភពីផលប៉ះពាល់មួយចំនួន ដែលអាចកើតឡើងចំពោះអ្នកស្វែងរកសិទ្ធិជ្រកកោនទាំងនោះ ប្រសិនបើពួកគេពិតជាត្រូវបញ្ជូនមកកម្ពុជា មែននោះ។
ប្រធានក្រុមប្រឹក្សាភិបាលនៃមជ្ឈមណ្ឌលសិទ្ធិមនុស្សកម្ពុជា លោក អ៊ូ វីរៈ មានប្រសាសន៍ថា កម្ពុជា អាចចំណេញលើផ្នែកសេដ្ឋកិច្ច ជាថ្នូរនឹងទទួលអ្នកភៀសខ្លួន។ ប៉ុន្តែ បញ្ហាដែលអាចនឹងចោទឡើង គឺសិទ្ធិរបស់អ្នកភៀសខ្លួន៖ «ប៉ិនរឿងចំណេញហ្នឹងមិនប្រាកដថាយើងត្រូវទទួលយក យើងត្រូវតែសប្បាយចិត្តទេ ប្រសិនបើការចំណេញហ្នឹងថាឈានទៅមានការរំលោភសិទ្ធិជនភៀសខ្លួន។ គេរិះគន់ត្រង់ហ្នឹង យើងឆ្ងល់ថា ហេតុអីអូស្ត្រាលី មិនទទួលខុសត្រូវចំពោះជនភៀសខ្លួនតាមច្បាប់អន្តរជាតិ។ ប្រសិនបើអូស្ត្រាលីបញ្ជូនមកកម្ពុជា អូស្ត្រាលី ត្រូវតែធានាថា កម្ពុជា មិនបញ្ជូនពួកគាត់បន្តអោយជួបគ្រោះថ្នាក់ឡើយ ហ្នឹងបានទៅរួច»។
សារព័ត៌មាន ឌឹ ហ្ការឌាន (The guardian) បានចុះផ្សាយថា កម្ពុជា ទំនងនឹងអាចទទួលយកអ្នកភៀសខ្លួនដល់ ១០០នាក់ ជាថ្នូរនឹងប្រាក់ ៤០លានដុល្លារ។
ករណីនេះ អ្នកវិភាគសង្គម លោក ឡៅ ម៉ុងហៃ មានប្រសាសន៍ថា កម្ពុជា ពិតជាធ្លាប់មានបទពិសោធន៍ក្នុងការបញ្ជូនជនភៀសខ្លួនដែលស្វែងរកសិទ្ធិជ្រកកោន គេចពីការរំលោភសិទ្ធិមនុស្ស។ ម្យ៉ាងទៀត បើកម្ពុជា ព្រមទទួលយកអ្នកភៀសខ្លួនដែលពុំមានបំណងមកសុំសិទ្ធិជ្រកកោននៅកម្ពុជា ផងនោះ គឺប្រៀបបាននឹងកម្ពុជា ហាក់ពុំគិតគូរពីកិត្តិសព្ទខ្លួនឯង៖ «គឺយើងគួរ ហើយត្រូវតែទទួលជនភៀសខ្លួនដែលតម្រង់មកប្រទេសយើងតែម្ដងគោលដៅ។ ឬមួយក៏ប្រើភាសាអសុរោះទៅ គឺយើងគឺដូចជាប្រទេសទី២ ឬកាន់តែអាក្រក់ទៅជាប្រទេសជជុះ»។
វិទ្យុអាស៊ីសេរី ព្យាយាមទាក់ទងមន្ត្រីរដ្ឋាភិបាលកម្ពុជា ដើម្បីសុំការអធិប្បាយលើបញ្ហានេះ តែមិនបានលទ្ធផលទេនៅថ្ងៃទី៨ ខែមេសា។
កាលពីឆ្នាំ២០០៩ កម្ពុជា ធ្លាប់បញ្ជូនជនជាតិអ៊ុយហ្គរ៍ (Uyghur) ២០នាក់ ទៅអោយប្រទេសចិន វិញ ដោយពុំបានគិតពីសុវត្ថិភាពរបស់ពួកគេនៅពេលត្រឡប់ទៅវិញនោះឡើយ។ ពួកគេទាំងនោះអ្នកស្វែងរកសិទ្ធិជ្រកកោន ដើម្បីគេចផុតពីការរំលោភបំពានសិទ្ធិមនុស្សក្នុងប្រទេសចិន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- វៀតណាមព្រមានថា ព្រែកជីកហ្វូណនតេជោអាចជួយសម្រួលវត្តមានយោធាចិនក្នុងទឹកដីកម្ពុជាកាន់តែជ្រៅ
- ពលរដ្ឋនៅតំបន់បឹងតាមោក ចោទប្រកាន់អាជ្ញាធរខណ្ឌព្រែកព្នៅថា ប្រើអំពើហិង្សា
- អាជ្ញាធរក្រុងភ្នំពេញមិនអនុញ្ញាតឱ្យបក្សកម្លាំងជាតិធ្វើបាតុកម្ម នៅទីលានប្រជាធិបតេយ្យ
- ក្រសួងដែនដីបានហៅអតិថិជនបុរីពិភពថ្មីទៅពិភាក្សា ដើម្បីរកដំណោះស្រាយ
- ពលរដ្ឋខ្មែរ-អូស្ត្រាលីម្នាក់ ដែលរិះគន់រដ្ឋាភិបាលកម្ពុជា រងការវាយដំពីជនមិនស្គាល់មុខមួយក្រុម ពេលទៅលេងស្រុកខ្មែរ
