គម្រោងអ៊ីនធឺណិតកាហ្វេ (Internet Café) គឺជាគម្រោងរបស់ក្លឹបអ្នកកាសែតកម្ពុជា ក្រោមជំនួយពីសហភាពអឺរ៉ុប ដែលបានចាប់ផ្ដើមដំណើរការចាប់ពីឆ្នាំ២០០៨។ គម្រោងនេះ ដើម្បីបង្កើនសមត្ថភាពដល់អ្នកសារព័ត៌មាននៅកម្ពុជា។ ទន្ទឹមគ្នានេះ ចង់ឲ្យអ្នកសារព័ត៌មានកម្ពុជា មានចំណេះដឹងបន្ថែមទៀត។ សហភាពអឺរ៉ុប នឹងបន្តគាំទ្រទាំងធនធាន និងសម្ភារៈ លើការបន្តអនុវត្តគម្រោងអ៊ីនធឺណិតកាហ្វេនេះ។
សហភាពអឺរ៉ុប ចាត់ទុកគម្រោងអ៊ីនធឺណិតកាហ្វេ ថាដើរតួជាមជ្ឈមណ្ឌលបណ្តុះបណ្តាលកុំព្យូទ័រ និងអ៊ីនធឺណិតដ៏សំខាន់ សម្រាប់អ្នកសារព័ត៌មានកម្ពុជា។ ការលើកឡើងរបស់សហភាពអឺរ៉ុប នៅពេលនេះ ធ្វើឡើងនៅក្នុងពិធីប្រកាសអំពីការបន្តគម្រោងរបស់ខ្លួន ពីកិច្ចគាំទ្រដល់ការភ្ជាប់សេវាអ៊ីនធឺណិតសម្រាប់អ្នកសារព័ត៌មាននៅក្នុងប្រទេសកម្ពុជា នៅថ្ងៃទី២៧ ខែមករា។
ថ្លែងក្នុងពិធីនេះ ឯកអគ្គរដ្ឋទូតសហភាពអឺរ៉ុប ប្រចាំប្រទេសកម្ពុជា លោក ច្សច អេដហ្គា (George EDGAR) មានប្រសាសន៍ថា ធនធានមនុស្សផ្នែកសារព័ត៌មាននៅកម្ពុជា នៅមានកម្រិត ពិសេសអ្នកសារព័ត៌មាន នៅតែពិបាកស្វែងរកព័ត៌មាន ឬសិក្សាស្រាវជ្រាវបានទូលំទូលាយនៅឡើយ បើប្រៀបធៀបនឹងបណ្ដាប្រទេសដទៃទៀត។ បញ្ហានេះ សហភាពអឺរ៉ុប យល់ថា ដើម្បីបង្កើនធនធានមនុស្សផ្នែកសារព័ត៌មានឲ្យគ្រប់គ្រាន់ និងជួយជំរុញឲ្យអ្នកសារព័ត៌មានមានសមត្ថភាពពេញលេញ ដើម្បីបំពេញវិជ្ជាជីវៈរបស់ខ្លួនបានល្អ មានតែបន្តគម្រោងអ៊ីនធឺណិតកាហ្វេសម្រាប់អ្នកសារព័ត៌មានប៉ុណ្ណោះ។
ឯកអគ្គរដ្ឋទូតសហភាពអឺរ៉ុប ប្រចាំប្រទេសកម្ពុជា រូបនេះ រំពឹងថា អ៊ីនធឺណិតកាហ្វេមិនត្រឹមតែជាវេទិកាដ៏មានប្រយោជន៍ ដែលអ្នកសារព័ត៌មានកម្ពុជា អាចស្វែងរកព័ត៌មាន និងប្រាស្រ័យទាក់ទងជាមួយនិពន្ធនាយករបស់ខ្លួន អ្នកសារព័ត៌មានផ្សេងទៀតនៅក្នុងតំបន់ និងនៅក្នុងពិភពលោកប៉ុណ្ណោះទេ ប៉ុន្តែថែមទាំងដើរតួជាមជ្ឈមណ្ឌលបណ្តុះបណ្តាលកុំព្យូទ័រ និងអ៊ីនធឺណិតដ៏សំខាន់សម្រាប់អ្នកសារព័ត៌មានកម្ពុជា ផងដែរ៖ «នេះ គឺជាគម្រោងមួយដ៏មានសារសំខាន់ ថាមានអ្នកកាសែតមួយចំនួន គាត់មិនទាន់មានចំណេះជំនាញពិតប្រាកដ ក្នុងការសរសេរអត្ថបទដ៏ល្អសម្រាប់អ្នកសារព័ត៌មាន។ ចឹងគម្រោងអ៊ីនធឺណិតកាហ្វេនេះ អាចឲ្យអ្នកកាសែតស្វែងយល់ ពង្រឹងសមត្ថភាពរបស់ខ្លួនបន្ថែមទៀត ទទួលបានវគ្គបណ្តុះបណ្តាល ពិសេសអាចសរសេរអត្ថបទប្រកបដោយគុណភាពល្អ ជំរុញឲ្យការអភិវឌ្ឍប្រទេសកាន់តែរីកចម្រើន»។
ប្រធានក្លឹបអ្នកកាសែតកម្ពុជា (CCJ) លោក ប៉ែន បូណា សាទរចំពោះការបន្តគាំទ្រទាំងធនធាន និងសម្ភារៈ ដល់ដំណើរការគម្រោងអ៊ីនធឺណិតកាហ្វេនេះ ព្រោះអាចឲ្យអ្នកសារព័ត៌មានជាច្រើននៅកម្ពុជា ទទួលបានការបណ្តុះបណ្តាល បង្កើនចំណេះដឹងផ្ទាល់ខ្លួន ខណៈកម្ពុជា ចូលជាសមាហរណកម្មសេដ្ឋកិច្ចអាស៊ាន៖ «យើងឥឡូវហ្នឹង យើងចូលក្នុងក្របខ័ណ្ឌអាស៊ាន។ ចឹងបើអ្នកកាសែតយើងអត់ចេះអ៊ីនធឺណិត អត់ចេះស្រាវជ្រាវតាមរយៈបច្ចេកវិទ្យាផ្សេង វាពិបាកណាស់។ ហេតុនេះវាចាំបាច់ណាស់លើវិជ្ជាជីវៈសារព័ត៌មាន ហើយខ្ញុំសង្ឃឹមយ៉ាងមុតមាំថា គម្រោងនឹងផ្តល់ប្រយោជន៍ដល់អ្នកសារព័ត៌មាន ដរាបណាអ្នកសារព័ត៌មាននៅតែត្រូវការ»។
ចំណែកអ្នកសារព័ត៌មានម្នាក់ដែលតែងតែមកស្រាវជ្រាវតាមរយៈគម្រោងអ៊ីនធឺណិតកាហ្វេ លោក សុខ សុវណ្ណ មកពីកាសែតកម្ពុជាថ្មី និយាយថា អ៊ីនធឺណិតកាហ្វេបានផ្តល់ជូននូវសម្ភារៈមួយចំនួន ដូចជា ម៉ាស៊ីនកុំព្យូទ័រ និងម៉ាស៊ីនបោះពុម្ព អាចបង្កភាពងាយស្រួលដល់អ្នកសារព័ត៌មាននៅកម្ពុជា ស្វែងរកព័ត៌មានដើម្បីឆ្លើយតបចំពោះតម្រូវការរបស់ខ្លួន ឬស្ថាប័នរបស់ពួកគេ៖ «គិតថាគម្រោងហ្នឹងល្អ អាចឲ្យអ្នកសារព័ត៌មាននានាមកជួបជុំគ្នាស្រាវជ្រាវការងារ និងចែករំលែកបទពិសោធន៍ឲ្យគ្នាទៅវិញទៅមកបានដែរ»។
ក្លឹបអ្នកកាសែតកម្ពុជា បានអំពាវនាវដល់អ្នកសារព័ត៌មានកម្ពុជា ដែលខ្វះខាតសេវាអ៊ីនធឺណិត ឬចង់ស្រាវជ្រាវបន្ថែមទៀតពីចំណេះដឹងផ្សេងៗ អាចមកប្រើប្រាស់សេវាអ៊ីនធឺណិតកាហ្វេនៃក្លឹបអ្នកកាសែតកម្ពុជា ដែលមានទីតាំងនៅសង្កាត់ទួលទំពូង១ ខណ្ឌចំការមន រាជធានីភ្នំពេញ បានជារៀងរាល់ថ្ងៃ ដោយមិនចំណាយថវិកានោះឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។