តើគួរមានគោលការណ៍អ្វីខ្លះដើម្បីឲ្យការបញ្ចេញមតិតាមអ៊ីនធឺណិតមានភាពល្អប្រសើរ?
2015.08.17
សេរីភាពបញ្ចេញមតិតាមប្រព័ន្ធអ៊ីនធឺណិតនៅកម្ពុជា ត្រូវបានគេវាយតម្លៃថា មានលក្ខណៈល្អប្រសើរជាងពេលមុន ប៉ុន្តែអ្នកប្រើប្រាស់ខ្លះនៅតែអាចប្រឈមនឹងបញ្ហាផ្លូវច្បាប់ បើសិនជាគេគិតថា វាជាការវាយប្រហារ ឬជាព័ត៌មានមិនពិត។
តើសេរីភាពបញ្ចេញមតិតាមអ៊ីនធឺណិតនៅកម្ពុជា គួរមានគោលការណ៍អ្វីខ្លះ?
សេរីភាពបញ្ចេញមតិតាមប្រព័ន្ធអ៊ីនធឺណិតនៅកម្ពុជា មានភាពល្អប្រសើរច្រើន។ អ្នកប្រើប្រាស់អ៊ីនធឺណិតអាចបញ្ចេញយោបល់ កាត់តរូបភាពផ្សេងៗ និងចែករំលែកតគ្នានូវអ្វីដែលពួកគេពេញចិត្ត។ នេះជាការអះអាងរបស់ លោក សូ សោទ្ធី មន្ត្រីសម្របសម្រួលតស៊ូមតិ នៃមជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យ កាលពីព្រឹកថ្ងៃទី១៦ ខែសីហា៖ «ទីមួយ យើងរីករាយដែរដែលស្រុកខ្មែរយើងមានសេរីភាពបញ្ចេញមតិច្រើននៅលើប្រព័ន្ធអ៊ីនធឺណិត ប៉ុន្តែទីពីរ យើងក៏បារម្ភដែរក្នុងការប្រើប្រាស់ក្នុងផ្លូវខុស។ អ៊ីចឹងយើងកំពុងតែបង្កើតឡើងនូវគោលការណ៍នៃសិទ្ធិអ៊ីនធឺណិតមួយ ដើម្បីឲ្យស្រុះស្រួលគ្នាថាសិទ្ធិយើងមាន ក៏ប៉ុន្តែយើងមិនត្រូវធ្វើឲ្យប៉ះពាល់ដល់សិទ្ធិឯកជនរបស់អ្នកដទៃទេ»។
គោលការណ៍សិទ្ធិស្តីអំពីសេរីភាពអ៊ីនធឺណិត ដែលមជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យ បានចងក្រងរួមមាន ការទទួលស្គាល់សិទ្ធិនៅលើអ៊ីនធឺណិត និងសិទ្ធិនៃការប្រើប្រាស់អ៊ីនធឺណិតដើម្បីធានាថា បុគ្គលទាំងអស់មានសិទ្ធិក្នុងការប្រើប្រាស់អ៊ីនធឺណិតដោយមិនមានអ្នកណាអាចកាត់ផ្តាច់ លើកលែងតែក្នុងករណីជាប់ពិរុទ្ធ។ ក្រៅពីនេះ អ្នកប្រើប្រាស់អ៊ីនធឺណិតត្រូវមានសិទ្ធិចូលរួមបង្កើតជាក្រុម និងសិទ្ធិក្នុងការបញ្ចេញមតិ លើកលែងតែការប្រើប្រាស់ក្នុងរូបភាពជេរប្រមាថ ការប្រើប្រាស់រូបថតរបស់អ្នកដទៃដោយគ្មានការអនុញ្ញាត ឬការចោទប្រកាន់អ្នកដទៃដោយគ្មានភស្តុតាង។ បន្ថែមពីលើនេះ អ្នកប្រើប្រាស់អ៊ីនធឺណិតត្រូវមានសិទ្ធិទទួលបានព័ត៌មាន ដោយមិនមានការរារាំង ឬបំបិទការទទួលបានព័ត៌មាននោះឡើយ ជាពិសេស អ្នកប្រើប្រាស់អ៊ីនធឺណិតត្រូវតែទទួលបាននូវសិទ្ធិឯកជនភាព សិទ្ធិនៃការបង្កើតថ្មី និងត្រូវគោរពសិទ្ធិអ្នកប្រើប្រាស់ដទៃទៀត។
ទិន្នន័យមូលដ្ឋានខែមិថុនា ឆ្នាំ២០១៥ របស់ក្រសួងប្រៃសណីយ៍ និងទូរគមនាគមន៍ អតិថិជនអ៊ីនធឺណិតទាំងចល័ត និងអចល័តនៅកម្ពុជា មានចំនួនជិត ៦លាននាក់ (៥.៩១៣.១៥៩នាក់) កើនឡើងខ្លាំង បើធៀបនឹងឆ្នាំ២០១៣ ដែលមានអ្នកប្រើប្រាស់តែ ២,៧លាននាក់តែប៉ុណ្ណោះ។
ដោយសារតែកំណើនអ្នកប្រើប្រាស់អ៊ីនធឺណិតកាន់តែខ្ពស់ និងមិនមានការត្រួតពិនិត្យ រាជរដ្ឋាភិបាលកម្ពុជា ហាក់បង្ហាញពីកង្វល់របស់ខ្លួន និងបង្កើតឲ្យវិធានការផ្សេងៗ ដើម្បីអាចគ្រប់គ្រងប្រព័ន្ធព័ត៌មានវិទ្យានេះបាន។ វិធានការទាំងនោះរួមមាន សេចក្តីព្រាងច្បាប់ស្ដីពីការគ្រប់គ្រងប្រព័ន្ធបច្ចេកវិទ្យា គម្រោងដំឡើងឧបករណ៍តាមដានលើក្រុមហ៊ុន ដែលផ្តល់សេវាអ៊ីនធឺណិតក្នុងប្រទេស និងការបង្កើតក្រុមប្រយុទ្ធប្រឆាំងនឹងបទឧក្រិដ្ឋលើប្រព័ន្ធព័ត៌មានវិទ្យា ដើម្បីឃ្លាំមើលគេហទំព័រ ពិសេសគឺបណ្ដាញសង្គមហ្វេសប៊ុក ពីការផ្សាយព័ត៌មានដែលអាចមានលក្ខណៈមិនពិតពីរដ្ឋាភិបាល។ ប៉ុន្តែដោយមានការរិះគន់ច្រើនពីមជ្ឈដ្ឋានជាតិ និងអន្តរជាតិ សេចក្តីព្រាងច្បាប់ស្ដីពីការគ្រប់គ្រងប្រព័ន្ធបច្ចេកវិទ្យា ត្រូវបានទីស្ដីការគណៈរដ្ឋមន្ត្រីទម្លាក់ចោលជាផ្លូវការនៅចុងឆ្នាំ២០១៤។
ទោះបីជាមានការទម្លាក់ចោលសេចក្តីព្រាងច្បាប់នេះក៏ដោយ ក៏រដ្ឋាភិបាលហាក់មិនទាន់អស់ចិត្តក្នុងការរឹតបន្តឹងការប្រើប្រាស់អ៊ីនធឺណិតដែរ។ ជាក់ស្តែងកាលពីខែឧសភា កន្លងទៅ មន្ត្រីនាំពាក្យនៃទីស្ដីការគណៈរដ្ឋមន្ត្រី លោក ផៃ ស៊ីផាន បានសរសេរនៅលើគណនេយ្យហ្វេសប៊ុករបស់លោកថា «នឹងចាត់វិធានការណាមួយទាំងផ្លូវបច្ចេកទេស និងផ្លូវច្បាប់ ដើម្បីរក្សាសេរីភាព និងសេចក្តីថ្លៃថ្នូរក្នុងការប្រើប្រាស់ប្រព័ន្ធអនឡាញ» ក្នុងករណីដែលមានជនណាប្រើប្រាស់បណ្ដាញព័ត៌មានសង្គម ដើម្បីប្រើពាក្យអសុរោះ ប្រមាថ មាក់ងាយ បំផ្លើស និងវាយប្រហារបរិហារបង្កាច់កេរ្តិ៍ទៅលើមន្ត្រីរាជការសាធារណៈ។
ឆ្លើយតបនឹងការលើកឡើងនេះ លោក សូ សោទ្ធី មន្ត្រីសម្របសម្រួលតស៊ូមតិនៃមជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យ បានលើកឡើងថា ការដាក់ទោសទណ្ឌគួរធ្វើឡើងត្រឹមកម្រិតរដ្ឋប្បវេណី ជាជាងទោសព្រហ្មទណ្ឌ៖ «សង្គមស៊ីវិលមើលឃើញថា ការបញ្ចេញមតិនៅប្រទេសកម្ពុជា មានលក្ខណៈសេរីជ្រុលបន្តិចមែន ក៏ប៉ុន្តែនៅក្នុងបុព្វហេតុមួយដើម្បីធានាឲ្យសិទ្ធិបញ្ចេញមតិដើរបានទូលំទូលាយតែប៉ុណ្ណោះ។ នៅក្នុងលក្ខខណ្ឌណាមួយដែលយើងចង់បង្កើតច្បាប់ ដើម្បីដាក់ទោស យើងសំណូមពរថា ឲ្យច្បាប់នោះមានលក្ខណៈត្រឹមតែជាទោសរដ្ឋប្បវេណីជាការផាកពិន័យបានហើយ ជាជាងការដាក់ពន្ធនាគារ»។
លោក សូ សោទ្ធី បានសំណូមពរដល់អ្នកប្រើប្រាស់អ៊ីនធឺណិតនៅកម្ពុជា ឲ្យប្រើប្រាស់ក្នុងគោលបំណងលើកស្ទួយសេរីភាពបញ្ចេញមតិ ទទួលបានព័ត៌មាន និងចូលរួមក្នុងការអភិវឌ្ឍសង្គម ដោយចៀសវាងការជេរប្រមាថ ឬចោទប្រកាន់អ្នកដទៃ៕