ក្រុមសង្គមស៊ីវិលផ្នែកអាស៊ានជំរុញឲ្យពិនិត្យនិងចាត់វិធានការលើបញ្ហាដែលបានដាក់ជូន
2015.03.03
អ្នកសម្របសម្រួលនៃក្រុមអង្គការមិនមែនរដ្ឋាភិបាល លើកិច្ចការអាស៊ាន អះអាងថា អង្គការសង្គមស៊ីវិលកំពុងតែពន្លឿនកិច្ចការរបស់ខ្លួន អំពីរបាយការណ៍ពាក់ព័ន្ធកិច្ចការអាស៊ាន ដើម្បីដាក់បញ្ចូលទៅក្នុងកិច្ចប្រជុំអាស៊ាន និងជំរុញឲ្យអន្តររដ្ឋាភិបាលថ្នាក់តំបន់ និងថ្នាក់ជាតិ ពិនិត្យ និងចាត់វិធានការតាមសំណើលើបញ្ហានានា ដែលកិច្ចប្រជុំនេះគ្រោងនឹងរៀបចំនៅប្រទេសម៉ាឡេស៊ី នាចុងខែមេសា ខាងមុខ។
ជំនួយការនាយិកាអង្គការសីលការ (Silaka) កញ្ញា សេង រាសី ឲ្យដឹងថា ឆ្លងតាមរយៈកិច្ចប្រជុំពេញមួយថ្ងៃទី៣ មីនា បានរកឃើញបញ្ហាចំនួន ១៨ចំណុច ក្នុងនោះរួមមាន បញ្ហាស្ត្រី កុមារ និងសិទ្ធិមនុស្ស ជាដើម។ កញ្ញាបន្តថា បញ្ហាដែលបានរកឃើញទាំងនេះ គឺនៅមិនទាន់បានសម្រេចជាផ្លូវការនៅឡើយទេ ពោល គឺត្រូវឆ្លងកាត់សេចក្ដីសម្រេចពីក្រុមអង្គការស្នូលចំនួន ១២ស្ថាប័នបន្ថែមទៀត ដែលធ្វើលើកិច្ចការអាស៊ាន។ បើតាម កញ្ញា សេង រាសី សេចក្ដីថ្លែងការណ៍រួមចុងក្រោយនឹងដាក់ចូលទៅក្នុងសមាជប្រជាជនអាស៊ាន នាចុងខែមេសា ខាងមុខ នៅប្រទេសម៉ាឡេស៊ី ដើម្បីជំរុញអន្តររដ្ឋាភិបាលអាស៊ានថ្នាក់តំបន់ និងថ្នាក់ជាតិ ធ្វើសេចក្ដីសម្រេចជុំវិញកង្វល់នានារបស់អង្គការសង្គមស៊ីវិល។
កញ្ញា សេង រាសី បន្តថា «យើងដាក់ទាំងថ្នាក់ជាតិ និងថ្នាក់តំបន់។ នៅក្នុងថ្នាក់ជាតិ យើងដាក់ទៅក្នុងក្រសួងពាក់ព័ន្ធ ទៅលើវិស័យដែលអង្គការក្រៅគាត់ដាក់មក ប៉ុន្តែអ្វីដែលយើងផ្ដោតសំខាន់នៅទីនេះ ដោយសារនៅថ្នាក់អាស៊ាន យើងមានយន្តការពីរ គឺគណៈកម្មការអន្តររដ្ឋាភិបាលអាស៊ាន ស្ដីពីសិទ្ធិមនុស្ស និងគណៈកម្មាធិការអាស៊ានស្ដីពីស្ត្រី និងកុមារ»។
អង្គការមិនមែនរដ្ឋាភិបាល ដែលធ្វើលើកិច្ចការអាស៊ាន បញ្ជាក់ថា អស់រយៈពេល ១០ឆ្នាំកន្លងទៅហើយចាប់តាំងពីឆ្នាំ២០០៥ មក បញ្ហាជាច្រើនសំណុំរឿងដែលដាក់ចូលទៅ ក៏ប៉ុន្តែមិនត្រូវបានយកចិត្តទុកដាក់ពីថ្នាក់តំបន់ និងថ្នាក់ជាតិទេ៕