អង្គការសហប្រជាជាតិជំរុញឲ្យមានការគោរពសិទ្ធិស្ត្រីជនបទ
2016.03.08
សេចក្តីថ្លែងការណ៍របស់អ្នកជំនាញការអង្គការសហប្រជាជាតិ ប្រចាំទីក្រុងហ្សឺណែវ (Geneva) ប្រទេសស្វីស (Switzerland) បង្ហាញថា ស្ត្រីជនបទជាច្រើននៅតែជួបបញ្ហាប្រឈម និងត្រូវបានគេផាត់ចេញពីភាពជាអ្នកដឹកនាំ និងមុខតំណែងធ្វើការសម្រេចចិត្តនៅគ្រប់កម្រិត ដែលមិនអាចឲ្យពួកគេចូលរួមចំណែកបានពេញលេញក្នុងការអភិវឌ្ឍសង្គមបាន។ ទន្ទឹមគ្នានេះ អង្គការសហប្រជាជាតិ ជំរុញឲ្យគោរពសិទ្ធិស្ត្រីជនបទ និងទទួលស្គាល់ពួកគេក្នុងការអភិវឌ្ឍសង្គម។
សេចក្តីថ្លែងការណ៍របស់អង្គការសហប្រជាជាតិ ចាត់ទុកថា ស្ត្រីជនបទរួមចំណែកដ៏សំខាន់ក្នុងការអភិវឌ្ឍជនបទ ស្បៀងអាហារ ព្រមទាំងកាត់បន្ថយភាពក្រីក្រ ទាំងផ្នែកសេដ្ឋកិច្ច និងសង្គមជនបទ។
សេចក្តីថ្លែងការណ៍នេះ ត្រូវបានផ្សព្វផ្សាយនៅក្នុងថ្ងៃទិវាសិទ្ធិនារីអន្តរជាតិ ៨ មីនា ដែលអង្គការសហប្រជាជាតិ បញ្ជាក់ថា មួយភាគបួននៃចំនួនប្រជាជនសរុបនៃពិភពលោក គឺជាស្ត្រីរស់នៅតាមជនបទ ហើយពួកគេបានជំរុញឲ្យមានការអភិវឌ្ឍជនបទ ទាំងកសិកម្ម និងសេដ្ឋកិច្ច។ ទោះបីជាដូច្នេះក្តី ស្ត្រីជនបទទាំងនោះ បានបន្តជួបប្រទះបញ្ហាប្រឈមជាច្រើនដល់ការអនុវត្តសិទ្ធិរបស់ពួកគេឲ្យបានពេញលេញ។
សេចក្តីថ្លែងការណ៍ដដែល បានឲ្យដឹងបន្តថា នៅប្រទេសជាច្រើននៅក្នុងពិភពលោក តម្រូវការជាក់លាក់របស់ស្ត្រី មិនត្រូវបានរដ្ឋាភិបាលរបស់ពួកគេយកចិត្តទុកដាក់ និងដោះស្រាយឲ្យបានត្រឹមត្រូវ ស្របតាមច្បាប់គោលនយោបាយថវិកាជាតិ និងថវិកាថ្នាក់មូលដ្ឋានឡើយ។ បញ្ហានេះ បណ្ដាលឲ្យស្ត្រីជនបទរងផលប៉ះពាល់ទាំងអំពើហិង្សា មិនទទួលបានធនធានគ្រប់គ្រាន់ និងសេវាសង្គមជាមូលដ្ឋាន។ កត្តាទាំងនេះ អង្គការសហប្រជាជាតិ បានជំរុញឲ្យសហគមន៍អន្តរជាតិ រួមទាំងរដ្ឋាភិបាលនានា ត្រូវតែធានាផ្តល់សិទ្ធិអំណាចឲ្យពួកគេ។
អ្នកសម្របសម្រួលផ្នែកកសិកម្មរបស់មជ្ឈមណ្ឌលសិក្សា និងអភិវឌ្ឍន៍កសិកម្មកម្ពុជា (CEDAC) អ្នកស្រី ស៊ិន អង្គារសាធ ទទួលស្គាល់ថា ស្ត្រីជនបទពិតជារួមចំណែកសំខាន់ក្នុងការអភិវឌ្ឍដំណើរការផលិតកម្ម និងទ្រទ្រង់សេដ្ឋកិច្ចគ្រួសារជនបទផងដែរ។ អ្នកស្រីឲ្យដឹងថា ស្ត្រីជនបទនៅកម្ពុជា ភាគច្រើន នៅតែទទួលបានអំណាចក្នុងការសម្រេចចិត្តមានកម្រិតនៅឡើយ បើធៀបនឹងបុរស៖ «បញ្ហាស្ត្រីជនបទ ភាគច្រើនគាត់កង្វះចំណេះដឹងក្នុងការសម្រេច ហើយរឿងធំៗភាគច្រើន បុរសជាអ្នកសម្រេចចិត្ត។ ហេតុនេះ ពួកគាត់ប្រឈមនឹងការរងអំពើហិង្សាក្នុងគ្រួសារ និងមិនមានសិទ្ធិពេញលេញសម្រេចចិត្តគ្រប់គ្រងផ្នែកសេដ្ឋកិច្ចគ្រួសារបានពេញលេញ»។
អ្នកធ្វើការពាក់ព័ន្ធនឹងស្ត្រីជនបទរូបនេះ ក៏អំពាវនាវឲ្យរដ្ឋាភិបាល និងស្ថាប័នពាក់ព័ន្ធ ត្រូវតែផ្តល់វគ្គបណ្តុះបណ្តាលដល់ស្ត្រី ជាពិសេសត្រូវតែលុបបំបាត់រាល់ទម្រង់នៃការរើសអើងប្រឆាំងស្ត្រីជនបទ ដោយធ្វើយ៉ាងណា ផ្ដោតលើតម្រូវការពិសេសរបស់ក្រុមស្ត្រីបាត់បង់ឱកាស ឬក្រុមស្ត្រីដែលគេមិនសូវយកចិត្តទុកដាក់គិតគូរឲ្យបានប្រសើរជាងនេះ៖ «បើសិនជារដ្ឋាភិបាលមានផ្តល់ជាវគ្គបណ្តុះបណ្តាលដល់ស្ត្រី ឲ្យគាត់ចេះកែច្នៃក្នុងរបរកសិកម្ម ឬបច្ចេកទេសផ្សេង គាត់នឹងក្លាយជាម្ចាស់ការខ្លួនឯង ពិសេសឈានទៅកាត់បន្ថយភាពក្រីក្រទៀត»។
អ្នកស្ម័គ្រចិត្តអប់រំសហគមន៍ស្ត្រីជនបទក្នុងស្រុកម៉ាឡៃ ខេត្តបន្ទាយមានជ័យ លោកស្រី អន ប៊ុនធឿន មានប្រសាសន៍ដែរថា បច្ចុប្បន្ន ស្ត្រីជនបទមួយចំនួននៅតែប្រឈមខ្លាំងពីអំពើហិង្សាក្នុងគ្រួសារ សង្គមមិនឲ្យតម្លៃ ព្រោះសង្គមនៅតែចាត់ទុកស្ត្រី ថាជាភេទដែលអាចប្រមាថ និងបំពានសិទ្ធិពីដៃគូជាបុរស។ ជាងនេះទៀត ស្ត្រីជនបទ ក៏ប្រឈមនឹងសេវាគាំពារសុខភាព ទឹកស្អាតសម្រាប់ទទួលទាន និងអនាម័យ ដែលមានគុណភាព និងមានតម្លៃសមរម្យផងដែរ។អ្នកអប់រំស្ត្រីជនបទរូបនេះ ជំរុញឲ្យរដ្ឋាភិបាល ត្រូវមានកញ្ចប់ថវិកាណាមួយ ដើម្បីដោះស្រាយបញ្ហាស្ត្រីជនបទ។
ក្នុងសេចក្តីថ្លែងការណ៍របស់អង្គការសហប្រជាជាតិ បានដាក់អនុសាសន៍ចំនួន ១០ចំណុចដល់សហគមន៍អន្តរជាតិ រួមទាំងរដ្ឋាភិបាលនានា ដើម្បីលើកកម្ពស់សិទ្ធិស្ត្រីជនបទ រួមមាន ត្រូវអនុម័តក្របខ័ណ្ឌគតិយុត្តិដែលមិនរើសអើង និងផ្តល់ភាពយុត្តិធម៌ដល់ស្ត្រី លុបបំបាត់រាល់ទម្រង់នៃការរើសអើងប្រឆាំងស្ត្រីជនបទ បង្កើតគោលនយោបាយដែលមានគោលដៅលើកកម្ពស់លក្ខខណ្ឌសេដ្ឋកិច្ច និងសង្គមស្ត្រីជនបទ បង្ការរាល់ទម្រង់នៃអំពើហិង្សាប្រឆាំងស្ត្រី ផ្តល់ការអប់រំ សម្ភារៈបរិក្ខារ សេវាថែទាំសុខភាព លំនៅឋានសមរម្យ ទឹកស្អាត អនាម័យ លទ្ធភាពទទួលបានដីធ្លី និងឥណទាន បច្ចេកវិទ្យាថ្មីៗ រួមទាំងបច្ចេកវិទ្យាព័ត៌មាន និងគមនាគមន៍ ព្រមទាំងការពារសន្តិសុខសុវត្ថិភាពស្ត្រីជនបទ។
អង្គការសហប្រជាជាតិ ជឿជាក់ថា ការដោះស្រាយស្ថានភាពស្ត្រីជនបទ នឹងរួមចំណែកដល់ការអភិវឌ្ឍសង្គម ការពង្រឹងបទដ្ឋាន និងធានាស្តង់ដារសិទ្ធិមនុស្សរបស់ប្រទេសទាំងនោះ៕