ប៉ូលិស​ខេត្ត​រតនគិរី​បញ្ជូន​ម៉ុងតាញ៉ា​មួយ​គ្រួសារ​មាន​គ្នា​៤​នាក់​ទៅ​ស្រុក​កំណើត​វិញ

ដោយ រដ្ឋា វិសាល
2017-08-25
អ៊ីម៉ែល
មតិ
ចែករំលែក
បោះពុម្ព
  • បោះពុម្ព
  • ចែករំលែក
  • មតិ
  • អ៊ីម៉ែល
ម៉ុងតាញ៉ា​វៀតណាម១៤នាក់ នៅ​ការិយាល័យ​ប៉ូលិស​អន្តោប្រវេសន៍​ច្រក​ទ្វារ​ព្រំដែន​អូរយ៉ាដាវ ដើម្បី​ធ្វើ​កំណត់ហេតុ​សាកសួរ​មុន​នឹង​អនុញ្ញាត​ឲ្យ​ឆ្លង​ដែន​ទៅ​ប្រទេស​វៀតណាម នៅ​ថ្ងៃទី៣១ ខែ​កក្កដា ឆ្នាំ​២០១៥។
ម៉ុងតាញ៉ា​វៀតណាម១៤នាក់ នៅ​ការិយាល័យ​ប៉ូលិស​អន្តោប្រវេសន៍​ច្រក​ទ្វារ​ព្រំដែន​អូរយ៉ាដាវ ដើម្បី​ធ្វើ​កំណត់ហេតុ​សាកសួរ​មុន​នឹង​អនុញ្ញាត​ឲ្យ​ឆ្លង​ដែន​ទៅ​ប្រទេស​វៀតណាម នៅ​ថ្ងៃទី៣១ ខែ​កក្កដា ឆ្នាំ​២០១៥។
RFA/Ratha Visal

ប៉ូលិស​ខេត្ត​រតនគិរី បាន​បញ្ជូន​ជនជាតិ​ដើម​ភាគតិច​ចារ៉ាយ-វៀតណាម ដែល​គេ​និយម​ហៅ​ថា​ម៉ុងតាញ៉ា មួយ​គ្រួសារ​មាន​គ្នា ៤​នាក់​ទៅ​ឲ្យ​អាជ្ញាធរ​ខេត្ត​យ៉ាឡាយ វិញ​ហើយ បន្ទាប់​ពី​ពួក​គេ​ស្នើសុំ​ឲ្យ​សមត្ថកិច្ច​ប៉ូលិស​ជួយ​អន្តរាគមន៍​ត្រឡប់​ទៅ​លំនៅឋាន​វិញ ក្រោយ​ពី​ពួក​គេ​រត់​ចេញ​ពី​ភូមិ​កាល​ពី​ឆ្នាំ​២០១៥។

ស្នងការ​រង​ប៉ូលិស​ខេត្ត​រតនគិរី ទទួល​បន្ទុក​កិច្ចការ​អន្តោប្រវេសន៍​បញ្ជាក់​នៅ​ថ្ងៃ​ទី​២៥ ខែ​សីហា ថា ជនជាតិ​វៀតណាម មួយ​គ្រួសារ​នេះ​បាន​រត់​ចេញ​ពី​វៀតណាម មក​រស់នៅ​ភ្នំពេញ​ជិត​មួយ​ឆ្នាំ​ជា​អន្តោប្រវេសន៍​ខុស​ច្បាប់ បន្ទាប់​មក​ពួក​គេ​បាន​ឆ្លង​ចូល​ទៅ​រស់នៅ​ប្រទេស​ថៃ ដើម្បី​ស្វែងរក​ការងារ​ធ្វើ។ រហូត​មក​ដល់​បច្ចុប្បន្ន ទើប​ពួក​គេ​សម្រេច​ចិត្ត​វិល​ទៅ​ស្រុក​កំណើត​វិញ។ ជនជាតិ​វៀតណាម នេះ​ចេញ​ពី​ប្រទេស​ថៃ មក​ដល់​ភ្នំពេញ និង​បន្ត​ដំណើរ​មក​ដល់​ក្រុង​បានលុង ខេត្ត​រតនគិរី កាល​ពី​ថ្ងៃ​ទី​២៣ ខែ​សីហា ដោយ​ស្នាក់នៅ​ផ្ទះ​សំណាក់​មួយ​កន្លែង​ក្នុង​ក្រុង​បានលុង ដើម្បី​ស្វែងរក​លទ្ធភាព​ឆ្លង​ដែន​ទៅ​ស្រុក​កំណើត​វិញ ពីព្រោះ​ខ្លាច​អាជ្ញាធរ​វៀតណាម ធ្វើ​ទុក្ខបុកម្នេញ។

លោក​បន្ត​ថា សមត្ថកិច្ច​ប៉ូលិស​បាន​រក​ឃើញ​ពួក​គេ និង​ជូន​ដំណើរ​ពួក​គេ​ទៅ​ប្រគល់​ឲ្យ​អាជ្ញាធរ​វៀតណាម ស្រុក​ដាក់កឺ កាល​ពី​ថ្ងៃ​ទី​២៤ ខែ​សីហា ដោយ​មាន​ក្រុម​គ្រួសារ​ពួក​គេ​នៅ​រង់ចាំ​ទទួល​ទៅ​លំនៅឋាន​វិញ​ហើយ៖ «ខ្ញុំ​សួរ​ថា​បាន​ជួប​យូ.អិន (UN) ទេ? គាត់​ថា​អត់​ទេ។ ក្រោយ​មក​ទៅ​នៅ​ថៃ រក​ការងារ​ធ្វើ​បាន​លុយ​បាន​កាក់ ក្រោយ​មក​ពិបាក​រស់នៅ​ពេក ក៏​ត្រឡប់​មក​វិញ។ ជូន​ទៅ​ដល់​វៀតណាម ប្រគល់​ទទួល​ត្រឹមត្រូវ ហើយ​គេ​ទំនាក់ទំនង​បង​ប្អូន​មក​ទទួល​ត្រឹមត្រូវ»

ជនជាតិ​វៀតណាម ទាំង ៤​នាក់​នោះ គឺ​លោក ពុយ អ៊ីចឆាត អាយុ ៣២​ឆ្នាំ​ជា​ស្វាមី​របស់​ស្ត្រី​ឈ្មោះ រចំ ប៊ីត អាយុ ៣២​ឆ្នាំ និង​កូន​ស្រី​ពីរ​នាក់​ដែល​មាន​អាយុ ៥​ឆ្នាំ និង ១៣​ឆ្នាំ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
  • បោះពុម្ព
  • ចែករំលែក
  • អ៊ីម៉ែល
គេហទំព័រ​ទាំងមូល