អ្នកកាសែតចាត់ទុកសេចក្ដីរាយការណ៍តាមបែបព័ត៌មានសន្តិភាពគឺមានសារសំខាន់
2015.03.22
ក្រុមអ្នកកាសែតដែលបានឆ្លងកាត់វគ្គបណ្ដុះបណ្ដាលស្ដីពីគោលការណ៍សារព័ត៌មានសន្តិភាព ចាត់ទុកថា សេចក្ដីរាយការណ៍តាមបែបសារព័ត៌មានសន្តិភាពនេះ គឺពិតជាបរិបទមួយថ្មីទៀតសម្រាប់ពួកគេ។ អង្គការក្រុមការងារដើម្បីដោះស្រាយទំនាស់ ដែលហៅកាត់ថា អេ.ស៊ី.ធី (ACT) ឲ្យដឹងថា ថ្វីបើវគ្គនេះបានបញ្ចប់គម្រោងរបស់ខ្លួនក្នុងរយៈពេល ៣ឆ្នាំនៅក្នុងឆ្នាំ២០១៥ នេះក៏ដោយ ក៏សេចក្ដីរាយការណ៍តាមបែបសារព័ត៌មានសន្តិភាពនេះ នៅតែមានសារសំខាន់ និងចាំបាច់បន្ថែមទៀតនៅឡើយ សម្រាប់ក្របខ័ណ្ឌប្រព័ន្ធផ្សព្វផ្សាយនៅកម្ពុជា។
ក្រុមអ្នកកាសែតចាត់ទុកថា សេចក្ដីរាយការណ៍តាមបែបថ្មីដែលហៅថា ជាសេចក្ដីរាយការណ៍ព័ត៌មានតាមគោលការណ៍សារព័ត៌មានសន្តិភាពបានផ្ដល់ចំណេះដឹងថ្មីបន្ថែមទៀតលើជំនាញវិជ្ជាជីវៈក្នុងប្រព័ន្ធផ្សព្វផ្សាយ ដែលផ្អែកលើព័ត៌មាន។ សេចក្ដីរាយការណ៍តាមគោលការណ៍សន្តិភាពនេះ ព្យាយាមកាត់បន្ថយជម្លោះ និងបង្កើនដំណោះស្រាយនេះ គឺជាធាតុផ្សំមួយដ៏មានសារសំខាន់មួយទៀតសម្រាប់ប្រទេសកំពុងអភិវឌ្ឍន៍ដូចជាកម្ពុជា ជាដើមនេះ។
អ្នកគ្រប់គ្រងផ្នែកព័ត៌មានឲ្យទូរទស្សន៍អាស៊ីអាគ្នេយ៍ លោក វណ្ណ មួយមករ៉ា ឲ្យដឹងក្រោយបញ្ចប់វគ្គនៃការវាយតម្លៃបញ្ចប់គម្រោងរបស់អង្គការ អេ.ស៊ី.ធី កាលពីព្រឹកថ្ងៃទី២២ មីនា ថា វគ្គសិក្សាតាមបែបសារព័ត៌មានសន្តិភាពនេះ គឺពិតជាជួយធ្វើឲ្យអ្នកធ្វើឲ្យសេចក្ដីរាយការណ៍មានតម្លៃ និងគុណធម៌ខ្ពស់ណាស់ ព្រោះជាព័ត៌មានដែលព្យាយាមបញ្ចេញដោយតុល្យភាពនៃដំណឹងសម្រាប់សាធារណជន៖ «យើងតែងតែប្រជុំពិភាក្សាគ្នានៅក្នុងកិច្ចប្រជុំផលិតផ្សេងៗ ជាពិសេសព័ត៌មានពាក់ព័ន្ធទៅនឹងចំណុចបញ្ហាជម្លោះផ្សេងៗ ហើយនិងជារឿងហិង្សា»។
ប្រធានគម្រោងរបស់អង្គការក្រុមការងារដើម្បីដោះស្រាយទំនាស់ ឲ្យដឹងថា ដែលហៅថា សេចក្ដីរាយការណ៍តាមបែបព័ត៌មានសន្តិភាពនេះ ជាព័ត៌មានដែលផ្សាយចេញគឺមិនបញ្ចូលទស្សនៈរបស់អ្នកនិពន្ធ អ្នកធ្វើសេចក្ដីរាយការណ៍ ប្រកាន់វិជ្ជាជីវៈ និងក្រមសីលធម៌របស់ខ្លួន។ ជាងនេះទៀត គឺជាព័ត៌មានដែលមានទំនោរដោះស្រាយទំនាស់ជាជាងព្យាយាមបង្កើតបញ្ហា។ ព័ត៌មានដែលមិនបម្រើឲ្យភាគីណាមួយ ឬបុគ្គលមានឥទ្ធិពលណាមួយ។
ទាំងលោកស្រី សុខ ល័ណ្ខ អ្នកយកព័ត៌មានប្រចាំទូរទស្សន៍ ស៊ី.ធី.អ៊ិន (CTN) និងលោក សេរី មុនី អ្នកព័ត៌មានឲ្យវិទ្យុបារាំងអន្តរជាតិ និងវិទ្យុមិត្តភាពកម្ពុជា-ចិន ដែលបានឆ្លងកាត់វគ្គបណ្ដុះបណ្ដាលនេះដែរ យល់ឃើញថា មេរៀនដែលនិយាយពីគោលការណ៍តាមបែបសារព័ត៌មានសន្តិភាពនេះ គឺពិតជាធ្វើឲ្យព័ត៌មានអាចជឿទុកចិត្ត និងមានភាពសុក្រឹតព្រោះថា ជាសេចក្ដីរាយការណ៍ដែលបានផ្ដល់ឪកាសស្មើៗគ្នា ឲ្យភាគីពាក់ព័ន្ធក្នុងសាច់រឿងបានបញ្ចេញទស្សនៈ៖ «បើសិនជាយើងមានភាពលំអៀង ក៏ដូចជាបញ្ចេញមតិខ្លួនឯងច្រើនគឺវាមិនល្អនោះទេ សំខាន់យើងយកអ្វីជាការពិត។ ភាពផ្លាស់ប្ដូរតាមបែបសន្តិភាព និងអហិង្សា»។
ប្រធានគម្រោងរបស់អង្គការ អេ.ស៊ី.ធី អ្នកស្រី ខន សុភី ថ្លែងក្រោយបញ្ចប់វគ្គវាយតម្លៃបញ្ចប់គម្រោងរយៈពេល ៣ឆ្នាំ ជុំវិញការបង្កើនចំណេះដឹងវិស័យព័ត៌មានថា មូលហេតុដែលអង្គការ ក្រុមការងារដោះស្រាយទំនាស់ជ្រើសរើសយកគម្រោងពាក់ព័ន្ធនឹងអ្នកកាសែតនេះឡើង ព្រោះពួកគេជាក្រុមមនុស្សដែលមានឥទ្ធិពលខ្លាំងជាងគេនៅក្នុងសង្គម។ អ្នកស្រីបន្តថា អ្នកកាសែតអាចជួយធ្វើឲ្យអ្នកតាក់តែងគោលនយោបាយ ធ្វើសេចក្ដីសម្រេចចិត្តមួយដ៏ត្រឹមត្រូវ ឬអាចធ្វើឲ្យមានការប្រែប្រួលបាននៅក្នុងសង្គម៖ «ដូចយើងដឹងស្រាបហើយថា វិស័យសារព័ត៌មានគឺជាវិស័យចម្បងមែនទែន ដែលវិស័យសារព័ត៌មានត្រូវចែករំលែកអ្វីដែលជាព្រឹត្តិការណ៍កើតមាននៅក្នុងសង្គម»។
ទន្ទឹមនឹងមានការរិះគន់អំពីការទទួលខុសត្រូវរបស់ស្ថាប័នរដ្ឋ ទទួលបន្ទុកវិស័យព័ត៌មានថា ហាក់មានការឆ្លើយតបតិចតួចនៅពេលស្នើសុំព័ត៌មានណាមួយជាប់ពាក់ព័ន្ធអំពើពុករលួយ និងគម្រោងវិនិយោគ។ បច្ចុប្បន្ន ប្រទេសកម្ពុជា កំពុងពន្លឿនការតាក់តែងច្បាប់ស្ដីពីសិទ្ធិទទួលបានព័ត៌មាន។ ដោយឡែកអ្នកជំនាញផ្នែកវិស័យប្រព័ន្ធផ្សព្វផ្សាយវិញ យល់ឃើញថា ប្រសិនបើច្បាប់នេះត្រូវបានរដ្ឋសភាអនុម័តមែននោះ វាអាចជួយបានច្រើនសម្រាប់បម្រើឲ្យប្រយោជន៍សាធារណជនបានប្រសើរជាងមុន៕