យុវតីខ្មែរបីនាក់សង្ស័យថាត្រូវគេជួញដូរផ្លូវភេទនៅប្រទេសថៃ

ស្ថានទូតខ្មែរប្រចាំនៅទីក្រុងបាងកក កំពុងសហការជាមួយនគរបាលថៃ ស៊ើបអង្កេតករណីយុវតីខ្មែរបីនាក់ ដែលត្រូវគេអះអាងថា បានរកឃើញនៅពេលកំពុងជាប់ក្នុងការឃុំខ្លួនក្នុងបន្ទប់ និងទំនងថាត្រូវគេចាប់ពង្រាត់ និងបង្ខាំងទុក ដើម្បីបង្ខំអោយបម្រើសេវាផ្លូវភេទតាមផ្ទះបនក្នុងទីក្រុងនេះ។

ដោយ សុ ជីវី
2012-09-22

h092112in-a1.mp3

អ្នកនាំពាក្យក្រសួងការបរទេសកម្ពុជា លោក កុយ គួង មានប្រសាសន៍ថា លោកបានទទួលព័ត៌មាននេះដែរ ហើយមន្ត្រីជំនាញកម្ពុជា កំពុងស្រាវជ្រាវ ដើម្បីបញ្ជាក់ការពិត៖ «យើងកំពុងធ្វើការងារហ្នឹងជាមួយអាជ្ញាធរ ប៉ូលិស ដើម្បីរកការពិត ហើយនឹងអន្តរាគមន៍ បើសិនជាមានពិត នឹងជួយអន្តរាគមន៍ជួយពួកគាត់។ គឺយើងទើបដឹងព័ត៌មានហ្នឹងម្សិលមិញ ហើយស្ថានទូតយើងនៅទីនោះកំពុងធ្វើការហ្នឹង»។

វិធានការរបស់ក្រសួងការបរទេសកម្ពុជា បានធ្វើឡើងបន្ទាប់ពីសារព័ត៌មានបាងកកប៉ុស្តិ៍របស់ថៃ បានចេញផ្សាយនូវរបាយការណ៍ស៊ើបអង្កេតរបស់នគរបាលថៃ បានបង្ហាញថា គេបានរកឃើញនារីខ្មែរបីនាក់ ដែលមានអាយុប្រហែល ១៥ឆ្នាំ ត្រូវគេឃុំនៅក្នុងបន្ទប់នៃអគារមួយក្នុងក្រុងបាងកក ដែលសង្ស័យថា ត្រូវគេបង្ខាំងដើម្បីបង្ខំអោយធ្វើពេស្យាចារ។

បើតាមបាងកកប៉ុស្តិ៍ នៅព្រឹកថ្ងៃទី២០ ខែកញ្ញា គេបានឮសម្រែកនារីខ្មែរវ័យក្មេងទាំងនោះ បានស្រែកអោយគេជួយចេញពីបន្ទប់ នៃអគារមួយនៅផ្លូវសុខុមវីត (Sukhumvit) លេខ៧៧ ហើយពួកគេក៏ត្រូវនាំទៅមណ្ឌលសង្គ្រោះដោយនគរបាលថៃ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។

អត្ថបទដែលទាក់ទង

មតិ (1)

ចុចត្រង់នេះដើម្បីបន្ថែមយោបល់របស់អ្នក

CheyVorman007

ពី AngKor Wat

មើលសុទ្ធតាចឹងៗហីថាប្រជានុរាស្សធូរធារយ៉ាងម៉េចលោក
បណ្ឌិតសេក?អាគេបាញ់ងាប់នោះផ្សេងទៅ អាគេបោករក
ការងារបន្លំយកមកលក់នោះផ្សឹងទៅ អាទៅនេសាទលោត
ទឹកហែលរកគេជួយនោះក៏មួយបែបទៀតទៅ អាងាប់បាត់
ខ្លួននៅស្រុកគេនោះក៏មួយផ្នែកទៅ ឳ ខ្មែរជំនាន់នេះយើង
រស់ដូចនឹងពាក្យ ចុះទឹកក្រពើ ឡើងលើខ្លា ចូលព្រៃបន្លា
ចូលផ្សារប៉ូលីស ដោយសារជីវិត ចង់រស់ក្នុងភាពថ្លៃថ្នូរជា
ជាងសុំទានគេទើបធ្លាក់ក្នុងអន្ទាក់នៃពាក្យទាំងបួនឃ្លានេះ។

Sep 22, 2012 04:59 PM