គ្រូពេទ្យ២០០នាក់នៅខេត្តកំពង់ចាមទទួលការបណ្ដុះបណ្ដាលជំនាញបន្ថែម
ការផ្សព្វផ្សាយនេះជាទុនខ្លះសម្រាប់ឲ្យគ្រូពេទ្យទាំងនោះអាចជួយសង្គ្រោះកុមារ ឬអាចបញ្ជូនកុមារមកព្យាបាលនៅកន្លែងដែលអាចជួយសង្គ្រោះដោយសុវត្ថិភាព និងទាន់ពេលវេលា ដើម្បីកាត់បន្ថយអត្រាស្លាប់ និងពិការភាពរបស់កុមារនៅកម្ពុជា។
ក្រុមគ្រូពេទ្យចំនួន ២០០នាក់ នៅតាមមណ្ឌលសុខភាពទូទាំងខេត្តកំពង់ចាម ត្រូវបានពង្រឹងសមត្ថភាពបន្ថែម ពាក់ព័ន្ធនឹងការបញ្ជូនជំងឺវះកាត់កុមារជាសារវន្តទៅមន្ទីរពេទ្យខេត្ត ដើម្បីសង្គ្រោះបន្ទាន់។
ការវះកាត់កុមារជាសារវន្ត ជាទូទៅគេស្គាល់ថា ជាប្រភេទជំងឺមិនគ្រប់លក្ខណៈពីកំណើត មានដូចជារង្វះចំហនៅលើផ្ទៃមុខ លក្ខណៈមិនធម្មតាពីកំណើត ជំងឺដែលបណ្ដាលមកពីបញ្ហាផ្សេងៗ ដូចជាការប៉ះទង្គិចទៅលើក្បាល និងផ្ទៃមុខ មាត់ឆែប ខ្វេរជើង និងទឹកក្នុងខួរក្បាល ធ្វើឲ្យក្បាលចេះតែរីកធំឡើងៗជាដើម។
ថ្លែងនៅក្នុងសន្និសីទលើកទី៤ នៃជំងឺវះកាត់កុមារជាសារវន្តនៅកម្ពុជា ដែលប្រព្រឹត្តទៅនៅមន្ទីរសុខាភិបាលខេត្តកំពង់ចាម នៅថ្ងៃទី១១ ខែមិថុនា ប្រធានការិយាល័យមន្ទីរពេទ្យកុមារជាតិ និងជាប្រធានសមាគមសោធន៍សាស្ត្រកុមារ លោក ម៉ម វិទ្យារិទ្ទ ឲ្យដឹងថា បច្ចុប្បន្នអត្រាវះកាត់ជំងឺកុមារដែលមន្ទីរពេទ្យកុមារជាតិទទួលបានពីមន្ទីរពេទ្យបង្អែកខេត្ត និងមន្ទីរពេទ្យជាតិមួយចំនួននៅមានចំនួនទាបនៅឡើយ។ លោកលើកឧទាហរណ៍ចំពោះភាពលូតលាស់យឺតយ៉ាវនៃសន្ទះទ្រូងកុមារដែលតាមហ្វ្រេកង់ ជំងឺនេះកើតមានលើកុមារចំនួន ៩០នាក់ក្នុងមួយឆ្នាំ តែជាក់ស្តែងមន្ទីរពេទ្យកុមារជាតិទទួលបានអ្នកជំងឺក្រោម ១០នាក់ប៉ុណ្ណោះ។
លោក ម៉ម វិទ្យារិទ្ទ បញ្ជាក់ថា ខាងមន្ទីរពេទ្យទទួលបានអ្នកជំងឺតិច មិនមានន័យថា គ្មានអ្នកជំងឺនោះទេ។ កុមារទាំងនោះអាចស្លាប់នៅមណ្ឌលសុខភាព ឬតាមផ្លូវនៅពេលដែលបញ្ជូនមកពីមន្ទីរពេទ្យខេត្ត ឬមន្ទីរពេទ្យកុមារជាតិ៖ «ការផ្សព្វផ្សាយនេះក្នុងគោលបំណងឲ្យមន្ត្រីនៅមណ្ឌលសុខភាពមានការយល់ដឹងខ្លះ និងស្គាល់ទីកន្លែងដែលត្រូវការព្យាបាលទៅកន្លែងដែលសមស្រប»។
លោកបន្តថា ការផ្សព្វផ្សាយពីការវះកាត់កុមារជាសារវន្តដល់គ្រូពេទ្យនៅតាមមណ្ឌលសុខភាពជាការពង្រឹងសមត្ថភាព និងឲ្យគ្រូពេទ្យទាំងនោះដឹងពីលក្ខណៈរោគវិនិច្ឆ័យមួយចំនួននៃស្ថានភាពជំងឺកុមារ ហើយអាចបញ្ជូនកុមារទាំងនោះមកព្យាបាលឲ្យបានទាន់ពេលវេលា ដើម្បីកាត់បន្ថយអត្រាស្លាប់ និងពិការភាពរបស់កុមារ។
លោក រស់ ថុន អនុប្រធានមន្ទីរពេទ្យខេត្តស្វាយរៀង ដែលធ្លាប់សិក្សាផ្នែកជំនាញវះកាត់កុមារ និងចូលរួមក្នុងសិក្ខាសាលា ឲ្យដឹងថា ដោយចំណេះដឹងនៅមានកម្រិត ពីមុនលោកធ្លាប់គិតថា ការកើតមិនប្រក្រតីរបស់កុមារ ដូចជាការគ្មានរន្ធគូថ ជារឿងផលកម្មដែលក្មេងនោះបានសាងពីជាតិមុន និងមិនបានព្យាបាលកុមារនោះទេ។ តែក្រោយពីបានសិក្សា និងស្វែងយល់ពីជំងឺវះកាត់កុមាររយៈពេល ២ឆ្នាំបន្ថែមទៀត លោកអាចមានលទ្ធភាពវះកាត់ ជួយកុមារដែលមានជំងឺទាំងនោះបានដោយជោគជ័យ។
លោក រស់ ថុន៖ «កុមារដែលកើតមកអត់មានរន្ធគូថ យើងអាចជួយគាត់បានភ្លាម អាអ្នកកើតមកអត់មានរន្ធគូថ បើមិនបានជួយវា វាស្លាប់ហើយ យើងមិនអាចបណ្ដោយតាមវាសនាគេបានទេ ត្រូវច្នៃឲ្យគេរស់។ ករណីថា កើតមកមាត់ឆែបអ៊ីចឹង ថ្វីត្បិតនៅកន្លែងខ្ញុំមិនទាន់ធ្វើបាន ក៏យើងដឹងថា ត្រូវបញ្ជូនគាត់ទៅណាដែលអាចធ្វើឲ្យបានស្អាតស្អីអ៊ីចឹង»។
ប្រធានមណ្ឌលសុខភាពតាប្រុក នៅស្រុកចំការលើ លោក បេ គុណថាច ឲ្យដឹងថា កន្លងមកកុមារដែលមានស្ថានជំងឺពីកំណើតមួយចំនួនត្រូវបានបញ្ជូនផ្ទាល់ទៅមន្ទីរពេទ្យកុមារជាតិ ដោយត្រូវចំណាយថវិកាធ្វើដំណើរច្រើន និងខ្លះមានគ្រោះថ្នាក់ដល់ជីវិត។
លោកបន្តថា ក្រោយពីទទួលការផ្សព្វផ្សាយពីជំងឺវះកាត់កុមារ លោកអាចបែងចែកស្ថានភាពជំងឺកុមារមួយចំនួនដែលអាចបញ្ជូនមកព្យាបាលនៅមន្ទីរពេទ្យខេត្ត ហើយជំងឺធ្ងន់ធ្ងរខ្លះទៀត អាចបញ្ជូនផ្ទាល់ទៅមន្ទីរពេទ្យកុមារជាតិនៅភ្នំពេញ៖ «ចង់ឲ្យយើងដឹងពីការវះកាត់កូនក្មេងមិនឲ្យទៅដល់ថ្នាក់ជាតិទេ ត្រឹមថ្នាក់ខេត្តគេមានសេវាហ្នឹង»។
អ្នកស្រី អាគីមី តាកាហាស៊ី ( Akemi Takahashi) នាយកប្រតិបត្តិមូលនិធិសម្រាប់ការអភិវឌ្ឍ និងជំនួយសង្គ្រោះអន្តរជាតិ ម្ចាស់ជំនួយដើម្បីពង្រឹងប្រព័ន្ធបញ្ជូនកុមារពីមណ្ឌលសុខភាពទៅមន្ទីរពេទ្យបង្អែកខេត្ត និងមន្ទីរពេទ្យកុមារជាតិ នឹងរៀបចំផ្ទាំងរូបភាពចំនួន ៧ផ្ទាំង នៅតាមមណ្ឌលសុខភាពនីមួយៗ បង្ហាញពីស្ថានភាពជំងឺវះកាត់កុមារ ដើម្បីឲ្យបុគ្គលិកមណ្ឌលសុខភាពស្គាល់ និងអាចបញ្ជូនកុមារទៅរកការព្យាបាលឲ្យទាន់ពេល។
អង្គការFIDR ក៏បានបណ្ដុះបណ្ដាលវេជ្ជបណ្ឌិតជំនាញ ៤ ទៅ ៥នាក់ក្នុងមួយឆ្នាំ តាំងពីឆ្នាំ២០០៦ លើផ្នែកវះកាត់កុមារជាសារវន្តផងដែរ នៅតាមបណ្ដាខេត្តចំនួន ១០ ដើម្បីឲ្យវេជ្ជបណ្ឌិតទាំងនោះមានសមត្ថភាពអាចវះកាត់កុមារជាសារវន្តក្នុងតំបន់ដោយមិនចាំបាច់បញ្ជូនទៅមន្ទីរពេទ្យកុមារជាតិដែលនៅឆ្ងាយពីមូលដ្ឋានរបស់ខ្លួន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
-
ស្ដាប់ផ្ទាល់
(ព្រឹក ៥:៣០-៦:៣០ ល្ងាច ៧:៣០-៨:៣០) - សំឡេង
ភាសា
