ជម្លោះរវាងពលករខ្មែរនិងភូមាមិនទាន់ដោះស្រាយចប់
ជម្លោះនោះបណ្ដាលឲ្យមានអ្នកស្លាប់ និងរបួសទាំងសងខាង កាលពីថ្ងៃ៣ និង ៤ មិថុនា រហូតមកដល់ពេលនេះ កម្មករខ្មែរមិនទាន់ចូលធ្វើការនៅឡើយ។
លោក កុយ គួង៖ «ក្រោយពីមានព្រឹត្តិការណ៍នៅថ្ងៃ៣ ថ្ងៃ៤ កន្លងមកនេះ ដែលបណ្ដាលឲ្យពលករខ្មែរយើងម្នាក់បាត់បង់ជីវិត និងខាងភាគីភូមានោះក៏បាត់បង់ជីវិតម្នាក់ដែរ ហើយមានរបួសជាច្រើន។ ពេលដែលរឿងហេតុកើតឡើងនោះ ខាងរោងចក្រក៏គេធ្វើការសម្របសម្រួលឲ្យពលករទាំង២ប្រទេសនោះ ចូលធ្វើការវិញ ក៏ប៉ុន្តែខាងខ្មែរយើងគាត់មិនហ៊ាន គាត់មិនហ៊ានចូលធ្វើការនៅកន្លែងដើម ដោយសារខ្លាចមានការសងសឹក។ អ៊ីចឹងខាងរោងចក្រក៏គេមានចំណាត់ការថា ឲ្យពលករទាំង២ប្រទេសហ្នឹង ចាកចេញពីកន្លែងស្នាក់នៅ ដើម្បីកុំឲ្យមានទំនាស់។ ប៉ុន្តែខាងពលករភូមាគេសុំនៅកន្លែងដដែល ហើយខាងកម្ពុជា យើងគាត់សុំចេញទៅឲ្យឆ្ងាយបន្តិច ដើម្បីកុំឲ្យមានប៉ះទង្គិចទៀត»។
ជម្លោះហិង្សារវាងពលករខ្មែរ និងពលករភូមា កាប់សម្លាប់គ្នានៅក្នុងរោងចក្រ ស៊ីយ៉ាម អ៊ីនធឺណេសិនណល ហ្វូត បានកើតឡើងនៅយប់ថ្ងៃអាទិត្យ ទី៣ មិថុនា និងព្រឹកថ្ងៃចន្ទ ទី៤ មិថុនា។
ប្រភពពីពលករខ្មែរធ្វើការនៅក្នុងរោងចក្រនោះ ឲ្យដឹងថា ពលករភូមាមាន ១.៥០០នាក់។ ឯពលករខ្មែរមានតែ ៧ ទៅ ៨០០នាក់ប៉ុណ្ណោះ។ បន្ទាប់ពីមានជម្លោះហិង្សានោះមក ថៅកែរោងចក្របានដឹកពលករខ្មែរជម្លៀសចេញទៅវត្តមួយមានចម្ងាយប្រមាណ ៥ ទៅ ៦គីឡូម៉ែត្រពីរោងចក្រ។
លោក កុយ គួង អ្នកនាំពាក្យក្រសួងការបរទេសខ្មែរ បន្តថា ប្រភពដែលបង្កឲ្យមានជម្លោះហិង្សាក៏មិនទាន់អាចស្រាវជ្រាវរកជនបង្កជម្លោះមុននោះបាននៅឡើយ។ លោកថា ក្រោយពីជម្លោះហិង្សា ថៅកែរោងចក្រ ស៊ីយ៉ាម អ៊ីនធឺណេសិនណល ហ្វូត បានជួយដឹកជម្លៀសពលករខ្មែរចេញពីតំបន់ជម្លោះ ហើយបានជួលកន្លែងឲ្យស្នាក់នៅ។ ថៅកែរោងចក្រក៏មានគម្រោងឲ្យពលករទាំង ២ប្រទេសធ្វើការបែកគ្នា ដោយប្តូរពលករខ្មែរឲ្យធ្វើការតែក្នុងរោងចក្រមួយផ្សេង ហើយពលករភូមាឲ្យទៅធ្វើការនៅរោងចក្រផ្សេង។
លោកបន្ថែមថា អ្នកស្រីឯកអគ្គរាជទូតខ្មែរនឹងជួបជាមួយមន្រ្តីទូតថ្មីរបស់ប្រទេសភូមា ដែលនឹងប្ដូរមកធ្វើការក្នុងប្រទេសថៃ នៅកន្លះខែទៀត ដើម្បីពិភាក្សាគ្នារកវិធីបន្ថយកំហឹងពលកររៀងៗខ្លួន ដើម្បីបញ្ចប់ជម្លោះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
-
ស្ដាប់ផ្ទាល់
(ព្រឹក ៥:៣០-៦:៣០ ល្ងាច ៧:៣០-៨:៣០) - សំឡេង
ភាសា
