ប្រកួតជ្រើសរើសជើងឯកប្រដាល់ក្បាច់គុនបុរាណខ្មែរឆ្នាំ២០១២

មន្ត្រីសហព័ន្ធកីឡាប្រដាល់កម្ពុជា បានឲ្យដឹងថា ការប្រកួតប្រដាល់ក្បាច់គុនបុរាណខ្មែរ ដើម្បីជ្រើសរើសជើងឯកឆ្នាំ២០១២ មានកីឡាករចុះឈ្មោះចូលរួមប្រកួតជិត ៦០០នាក់ មកពី២០សមាគមន៍ទូទាំងប្រទេស។

ដោយ ដែន អយុធ្យា
2012-07-18

h071712ay.mp3

លោក តែម ម៉ឺន ប្រធានសហព័ន្ធកីឡាប្រដាល់កម្ពុជា មានប្រសាសន៍ថា ការប្រកួតជើងឯកប្រដាល់ជាតិឆ្នាំនេះ មាន ៨ប្រភេទទម្ងន់ គឺចាប់ពីទម្ងន់ ៤៨ ដល់ ៧៥គីឡូ ហើយភាគច្រើនជាកីឡាករមានបទពិសោធន៍ខ្ពស់។

លោកបន្តថា សម្រាប់ថ្ងៃអង្គារ ទី១៧ ខែកក្កដា មានកីឡាករប្រកួតជាង ៦០គូ ក្នុងនោះមានប្រដាល់ក្បាច់គុនបុរាណខ្មែរ ២៨គូ និងប្រដាល់សកលមាន ៣៣គូ។

លោក តែម ម៉ឺន ឲ្យដឹងថា ការប្រកួតជ្រើសរើសជើងឯកឆ្នាំនេះ មានប្រភេទទម្ងន់មួយចំនួន បានឈានដល់វគ្គ១ភាគ៤ ផ្ដាច់ព្រ័ត្រ និងវគ្គពាក់កណ្ដាលផ្ដាច់ព្រ័ត្រ។ ដូចជាទម្ងន់ ៤៨គីឡូក្រាម ទម្ងន់ ៥១គីឡូក្រាម ទម្ងន់ ៥៤គីឡូក្រាម ទម្ងន់ ៦០គីឡូក្រាម និងទម្ងន់ ៦៣គីឡូកន្លះ។

ចំពោះប្រដាល់សកលមាន ៤ប្រភេទទម្ងន់ បានឈានមកដល់វគ្គ១ភាគ៤ផ្ដាច់ព្រ័ត្រដែរ គឺទម្ងន់៦០គីឡូក្រាម ៦៤គីឡូក្រាម ៦៩គីឡូក្រាម និង៧៥គីឡូក្រាម។
លោក តែម ម៉ឺន៖ «ឈានមកបានចំណាត់ថ្នាក់លេខ៣ខ្លះហើយ។ កីឡាករខ្លះទៀត អាចនៅសល់១ប្រកួត អាចចូលដល់ថ្នាក់លេខ៣ ហើយអ្នកខ្លះបានចំណាត់ថ្នាក់លេខ៣ខ្លះហើយ។ គ្រោះថ្នាក់ការប្រកួតមានសន្លប់ខ្លះដែរ ប៉ុន្តែនៅក្នុងលក្ខណៈបច្ចេកទេសធម្មតាទេ និងមានបាក់ឆ្អឹងដងកាំបិតម្នាក់ ដោយសារវាយកែង»។

ការប្រកួតប្រដាល់ជ្រើសរើសជើងឯកជាតិឆ្នាំនេះ បានចាប់ផ្ដើមពីថ្ងៃទី១១ ខែកក្កដា ឆ្នាំ២០១២។ គ្រូពេទ្យប្រចាំការប្រកួត លោក ជឹម ផល្លា បានឲ្យដឹងថា ការប្រកួត១សប្ដាហ៍មកនេះ មានអ្នកប្រដាល់មួយរូបបាក់ដៃ ១រូបទៀតបាក់ឆ្អឹងដងកាំបិត ពេលប្រកួតលើសង្វៀន និងមានរបួសសន្លប់ធំមួយចំនួន។

លោក ម៉ិល កាដូ អគ្គលេខាធិការសហព័ន្ធកីឡាប្រដាល់កម្ពុជា បានឲ្យដឹងដែរថា ឆ្នាំនេះអ្នកប្រដាល់ដែលចូលរួមប្រកួតជើងឯកជាតិ បានកើនចំនួនបើប្រៀបធៀបឆ្នាំកន្លងទៅ។

លោក ឡុង សាលវ័ន្ត ជាគ្រូបង្វឹកកីឡាប្រដាល់ក្បាច់គុណបុរាណខ្មែរ ក្លឹបសាលវ័ន្តកីឡា លោក បានឲ្យដឹងថា ឆ្នាំនេះក្លឹបរបស់លោកបានបញ្ជូនកីឡាករចូលរួមប្រកួតបានចំនួន ២១នាក់ និងឈ្នះបានមេដាយមួយចំនួនហើយ៖ «កូនសិស្សជាប់បានចំណាត់ថ្នាក់ចំនួន ៦នាក់ហើយ និងនៅបន្តឈ្នះទៀត គឺអាចយកឈ្នះចំណាត់ថ្នាក់លេខ១ លេខ២ និងចំណាត់ថ្នាក់លេខ៣»។

លោកថា ការប្រកួតជើងឯក ទាមទារឲ្យកីឡាករហ្វឹកហាត់ឲ្យបានដិតដល់ និងត្រូវត្រួតពិនិត្យសុខភាពកីឡាករជាប្រចាំ បើមិនដូច្នេះទេ នឹងជួបគ្រោះថ្នាក់ធ្ងន់ធ្ងរនៅលើសង្វៀនប្រកួត។

ស្រដៀងគ្នាដែរ លោក សួន ប៊ុនសូត្រ គ្រូប្រដាល់ក្លឹបប្រដាល់ បក្សីស្លាបដែក បានឲ្យដឹងថា ក្លឹបលោកបានបញ្ជូនកីឡាករតែ៣រូបទេ ចូលរួមប្រកួតជើងឯកឆ្នាំនេះ ព្រោះក្លឹបពុំសូវមានកីឡាករល្អៗ និងមានគុណភាព។ លោកថា អ្នករៀបចំការប្រកួតប្រដាល់ជ្រើសរើសជើងឯកឆ្នាំនេះ បានជ្រើសយកតែកីឡាករខ្លាំងៗ និងបានហ្វឹកហាត់បានដិតដល់ទើបឲ្យចូលរួមប្រកួត។

ប្រទេសកម្ពុជា បានបង្កើតឲ្យមានកម្មវិធីប្រកួតក្បាច់គុនបុរាណខ្មែរ ដើម្បីជ្រើសរើសជើងឯកជាតិជារៀងរាល់ឆ្នាំ។ មន្ត្រីសហព័ន្ធប្រដាល់ បានឲ្យដឹងថា ក្នុងរយៈពេល ២ទៅ៣ឆ្នាំ ចុងក្រោយនេះ មានកីឡាករចុះឈ្មោះចូលរួមប្រកួត បានកើនចំនួនពី ១ឆ្នាំទៅ១ឆ្នាំ ដោយសារមានក្លឹបប្រដាល់ទើបបង្កើតថ្មី នៅតាមខេត្តទូទាំងប្រទេសមានចំនួនច្រើន៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។