ក្រុមម្ចាស់ជំនួយផ្ដល់ថវិកាជាង ១លានដុល្លារអាមេរិក ដើម្បីចំណាយបើកប្រាក់ខែឲ្យបុគ្គលិក និងចំណាយទូទៅរបស់សាលាក្ដីខ្មែរក្រហម នៅក្នុងឆ្នាំ២០១៤។
ការផ្តល់ជំនួយនេះ ត្រូវបញ្ជាក់អោយដឹងនៅពេលដែលតំណាងក្រុមប្រទេសម្ចាស់ជំនួយបរទេសនានា បានបញ្ជាប់ទស្សនកិច្ចជាផ្លូវការនៅថ្ងៃទី២៧ មិថុនា នៅសាលាក្ដីខ្មែរក្រហម ក្នុងការត្រួតពិនិត្យលើដំណើរការរបស់សាលាក្ដី និងបញ្ហាថវិកា។
អ្នកនាំពាក្យនៃសាលាក្ដីខ្មែរក្រហម លោក នេត្រ ភក្ដ្រា បានឲ្យដឹងថា ទស្សនកិច្ចរបស់ក្រុមម្ចាស់ជំនួយនេះ បានវាយតម្លៃខ្ពស់ចំពោះលទ្ធផលដែលសម្រេចបានកន្លងមក និងមានការសហការគ្នារវាងសហគមន៍អន្តរជាតិ និងរាជរដ្ឋាភិបាលកម្ពុជា។
លោក នេត្រ ភក្ដ្រា បានឲ្យដឹងទៀតថា នៅក្នុងគម្រោងថវិការបស់សាលាក្ដីខ្មែរក្រហម ក៏បានស្នើសុំទៅម្ចាស់ចំនួនជាតិ និងអន្តរជាតិ នូវទឹកប្រាក់ជាង ៦០លានដុល្លារអាមេរិក សម្រាប់អនុវត្តកិច្ចការបន្តនៅក្នុងឆ្នាំ២០១៤ និងឆ្នាំ២០១៥។ ប្រទេសផ្ដល់ជំនួយដល់សាលាក្ដីខ្មែរក្រហម រួមមាន ប្រទេសជប៉ុន បារាំង អូស្ត្រាលី ស៊ុយអែត អាល្លឺម៉ង់ និងសហរដ្ឋអាមេរិក ជាដើម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។