សាលាក្ដីខ្មែរក្រហមបញ្ចប់សវនាការពិនិត្យភស្តុតាងនៅក្នុងសំណុំរឿង០០២ វគ្គ២
2017.01.11
អង្គជំនុំជម្រះសាលាដំបូងនៃសាលាក្ដីខ្មែរក្រហម បានប្រកាសបញ្ចប់សវនាការលើភស្តុតាងនៅក្នុងសំណុំរឿង ០០២ វគ្គ២ ហើយ នៅថ្ងៃពុធ ទី១១ មករា។ សវនាការពិនិត្យភស្តុតាងវគ្គទី២ ដែលទើបបញ្ចប់នេះបានចាប់ផ្ដើមតាំងពីដើមឆ្នាំ២០១៥ មក។
ការប្រកាសបញ្ចប់សវនាការពិនិត្យភស្តុតាងនៅក្នុងសំណុំរឿង ០០២ វគ្គ ២ នៅថ្ងៃទី១១ ខែមករា ត្រូវបានអង្គជំនុំជម្រះសាលាដំបូងប្រកាសបន្ទាប់ពីបានស្ដាប់សារណាផ្ទាល់មាត់របស់ភាគីដើមចោទ និងចុងចោទទាក់ទងអង្គហេតុសេសសល់ និងការប៉ះពាល់ការការពារក្ដីជនជាប់ចោទ។
ទន្ទឹមគ្នានេះ ប្រធានអង្គជំនុំជម្រះសាលាដំបូង លោកចៅក្រម និល ណុន ក៏បានកំណត់កាលបរិច្ឆេទសម្រាប់ភាគីទាំងអស់ ធ្វើសេចក្ដីសន្និដ្ឋានផ្ទាល់មាត់ ដើម្បីបិទបញ្ចប់កិច្ចពិភាក្សាដេញដោលទាំងស្រុងក្នុងសំណុំរឿង ០០២ វគ្គ ២ នេះ នៅថ្ងៃទី៥ ខែមិថុនាខាងមុខ៖ «សេចក្ដីសន្និដ្ឋានផ្ទាល់មាត់បិទបញ្ចប់កិច្ចពិភាក្សាដេញដោលនឹងចាប់ធ្វើនៅថ្ងៃទី៥ ខែមិថុនា ឆ្នាំ២០១៧ ដោយសហមេធាវីនាំមុខតំណាងដើមបណ្ដឹងរដ្ឋប្បវេណី មានរយៈពេល ១ថ្ងៃ ដើម្បីបង្ហាញសេចក្ដីសន្និដ្ឋានរបស់ខ្លួន។ សហព្រះរាជអាជ្ញាមានរយៈពេល ៣ថ្ងៃ ហើយមេធាវីការពារក្ដីក្រុមនីមួយៗ មានរយៈពេល ២ថ្ងៃ ដើម្បីបង្ហាញសេចក្ដីសន្និដ្ឋានរបស់ខ្លួន។ អង្គជំនុំជម្រះបានកំណត់រយៈពេល ១ថ្ងៃ សម្រាប់ការរៀបចំការធ្វើសេចក្ដីសន្និដ្ឋានតប និងបានកំណត់រយៈពេល ៤ម៉ោង សម្រាប់ការធ្វើសេចក្ដីថ្លែងចុងក្រោយរបស់ជនជាប់ចោទផងដែរ ប្រសិនបើជនជាប់ចោទជ្រើសរើសអនុវត្តន៍សិទ្ធិនេះ»។
ការប្រកាសនៅពេលនេះ គឺគ្រាន់តែជាការបិទសវនាការពិនិត្យភស្តុតាងប៉ុណ្ណោះ។ អង្គជំនុំជម្រះនឹងប្រមូលសារណាពីភាគីទាំងអស់ ហើយនឹងធ្វើសវនាការស្ដាប់សេចក្ដីសន្និដ្ឋានរបស់ភាគីដោយផ្ទាល់មាត់មួយលើកទៀត នៅថ្ងៃទី៥ ខែមិថុនា នោះ ដើម្បីបិទបញ្ចប់កិច្ចពិភាក្សាដេញដោលសំណុំរឿងនេះទាំងស្រុង។
អង្គជំនុំជម្រះបានកំណត់កាលបរិច្ឆេទសម្រាប់ភាគីដាក់សារណារបស់ខ្លួនជាលាយលក្ខណ៍អក្សរត្រឹមថ្ងៃទី២៤ ខែមេសា ហើយកាលបរិច្ឆេទសម្រាប់បណ្ដឹងសហមេធាវីនាំមុខតំណាងដើមបណ្ដឹងរដ្ឋប្បវេណីទាមទារសំណងចុងក្រោយ គឺនៅថ្ងៃទី២២ ខែឧសភា ខាងមុខ។
ស្របពេលដែលអង្គជំនុំជម្រះកំណត់កាលបរិច្ឆេទនេះ ភាគីការពារក្ដីជនជាប់ចោទ នួន ជា លោក វិកទ័រ កូប៉េ (Victor Koppe) និង ខៀវ សំផន អ្នកស្រី អង់តា ហ្គីហ្សេ (Anta Guisse) ក៏បានបង្ហាញអំពីការប៉ះពាល់ការងាររបស់ខ្លួនក្នុងការដាក់សារណាបិទបញ្ចប់កិច្ចពិភាក្សាដេញដោលនេះដែរ នៅពេលដែលផ្នែករដ្ឋបាលពិចារណាកាត់បន្ថយថវិកា និងបុគ្គលិកសម្រាប់ក្រុមមេធាវីទាំងពីរក្រុម។
លោក វិកទ័រ កូប៉េ៖ «ខ្ញុំមិនប្រាកដអំពីបញ្ហានេះទេ តែអាចថាមានសម្ពាធពីប្រទេសផ្ដល់ជំនួយ ឬអ្នកផ្ដល់ជំនួយ។ ដូច្នេះហើយខាងមេធាវីការពារក្ដីត្រូវទទួលយកការកាត់បន្ថយថវិកា ដោយសារតែបញ្ហាផ្ដល់មូលនិធិទៅលើធ្វើឲ្យគ្រប់ផ្នែកទាំងអស់នៅ អ.វ.ត.ក ត្រូវជួបប្រទះនូវបញ្ហានេះ ហើយប្រទេសអ្នកផ្ដល់ជំនួយជាអ្នកតម្រូវ ធ្វើឲ្យគ្រប់ផ្នែកទាំងអស់ទទួលនូវផលវិបាកទាំងអស់នេះ។ តាមដែលខ្ញុំយល់គឺថា ត្រឹមចុងខែមីនា គឺថា ២៤ ថ្ងៃមុនកាលបរិច្ឆេទកំណត់ដាក់សារណាបញ្ចប់ការពិភាក្សាដេញដោល គឺក្រុមទាំងពីរ គឺថាបុគ្គលិកកិច្ចសន្យា មិនត្រូវបានគេបន្តកិច្ចសន្យាឡើយ។ បើតាមខ្ញុំយល់ គឺសមាជិកក្រុមការពារដែលត្រូវទទួលការងារ សម្រាប់ការដាក់បង្ហាញឯកសារហ្នឹង ត្រូវបញ្ចប់។ គឺបានន័យថា ក្រុមការងារហ្នឹងត្រូវបញ្ចប់ការងារលឿន។ នេះជាអ្វីដែលអង្គភាពគាំពារការពារក្ដីជម្រាបមកយើង»។
មេធាវីការពារក្ដីចង់ឲ្យរដ្ឋបាលបន្តកិច្ចសន្យាដល់បុគ្គលិករបស់ខ្លួនដដែល។ ប៉ុន្តែអង្គជំនុំជម្រះមិនទាន់អាចដោះស្រាយបញ្ហានេះបាននៅឡើយទេ ហើយនឹងយកបញ្ហានេះទៅពិភាក្សាជាមួយផ្នែករដ្ឋបាលសាលាក្ដីបន្តទៀត។
សំណុំរឿង ០០២ វគ្គ ២ ដែលអង្គជំនុំជម្រះបានធ្វើសវនាការចាប់តាំងពីថ្ងៃទី៨ ខែមករា ឆ្នាំ២០១៥ មានរយៈពេល ២៧៤ថ្ងៃ ដោយស្ដាប់សាក្សីចំនួន ១១៤នាក់ ដើមបណ្ដឹងរដ្ឋប្បវេណី ៦៣នាក់ និងអ្នកជំនាញ ៨នាក់។ លើសពីនេះទៀត មានសាធារណជនសរុបជិត ៨ម៉ឺន (៧៧.៦០៤) នាក់ បានចូលរួមស្ដាប់សវនាការនៅក្នុងសាលសវនាការដោយផ្ទាល់។
សវនាការនេះ គឺទាក់ទងនឹងប្រធានបទស្ដីពីសហករណ៍ត្រាំកក់ (រួមទាំងមន្ទីរសន្តិសុខក្រាំងតាចាន់ និងការប្រព្រឹត្តិលើពុទ្ធសាសនិក) ការដ្ឋានទំនប់ ១ មករា នៅខេត្តកំពង់ធំ ការដ្ឋានសាងសង់វាលយន្តហោះខេត្តកំពង់ឆ្នាំង ការដ្ឋានទំនប់ត្រពាំងថ្ម ខេត្តបន្ទាយមានជ័យ ការប្រព្រឹត្តិលើជនជាតិចាម និង វៀតណាម មន្ទីរសន្តិសុខអូរកន្សែង ខេត្តរតនគិរី មន្ទីរសន្តិសុខភ្នំក្រោល ខេត្តមណ្ឌលគិរី និងមន្ទីរសន្តិសុខ ស-២១ នៅភ្នំពេញ ព្រមទាំងការបោសសំអាតផ្ទៃក្នុង ការចេញបទបញ្ជាអំពីការរៀបអាពាហ៍ពិពាហ៍ដោយបង្ខំ លក្ខណៈជម្លោះប្រដាប់អាវុធ និងជាចុងក្រោយជាប្រធានបទស្ដីពីតួនាទីរបស់ជនជាប់ចោទ។
អង្គជំនុំជម្រះសាលាដំបូង នៅមិនទាន់អាចកំណត់ពេលវេលាសម្រាប់ចេញសាលក្រមសំណុំរឿង ០០២ វគ្គ ២ នេះបានទេ បន្ទាប់ពីសវនាការនៅថ្ងៃទី៥ ខែមិថុនា នោះ៕