សាលាក្ដីខ្មែរក្រហមកាត់បន្ថយវិសាលភាពនៃសំណុំរឿង ០០២
2017.02.27
ជនជាប់ចោទ នួន ជា (ឆ្វេង) និង ខៀវ សំផន នៅក្នុងពេលតុលាការកំពូលនៃសាលាក្ដីខ្មែរក្រហម ប្រកាសសាលដីកាលើបណ្ដឹងសាទុក្ខក្នុងសំណុំរឿង ០០២ វគ្គទី១ នៅថ្ងៃទី២៣ ខែវិច្ឆិកា ឆ្នាំ២០១៦។
Photo courtesy of ECCC
អង្គជំនុំជម្រះសាលាដំបូងនៃសាលាក្ដីខ្មែរក្រហម នៅថ្ងៃទី២៧ ខែកុម្ភៈ ចេញសេចក្ដីសម្រេចកាត់បន្ថយវិសាលភាពនៃសំណុំរឿង ០០២ ដែលប្រឆាំងអតីតមេដឹកនាំខ្មែរក្រហម ២រូប គឺលោក នួន ជា និង ខៀវ សំផន។
មន្ត្រីនាំពាក្យរបស់សាលាក្ដីខ្មែរក្រហម លោក នេត្រ ភក្ត្រា បញ្ជាក់បន្ថែមថា ការកាត់បន្ថយវិសាលភាពនៃសំណុំរឿង ០០២ នេះ ព្រោះសាលាដំបូងយល់ថា អង្គហេតុនានា ក្នុងសំណុំរឿង ០០២ វគ្គ ១ ដែលបានជំនុំជម្រះចប់ និង ០០២ វគ្គ ២ ដែលកំពុងបន្ត គឺសមស្របនៃអំពើឧក្រិដ្ឋ និងការទទួលខុសត្រូវជាលក្ខណៈបុគ្គលរបស់ជនជាប់ចោទដែលត្រូវបានចោទប្រកាន់ទាំងមូលហើយ។ សាលាដំបូងក៏យល់ឃើញថា ការបន្តជំនុំជម្រះលើអង្គហេតុផ្សេងទៀត លើសពីសំណុំរឿងទាំងពីរនេះ ក៏នឹងមិនផ្ដល់ប្រយោជន៍អ្វីដល់យុត្តិធម៌មានអត្ថន័យទេ ហើយក៏ប្រើពេលយូរដែរ។
លោក នេត្រ ភក្ត្រា៖ «សេចក្ដីប្រកាសព័ត៌មាននេះ បញ្ជាក់អំពីសេចក្ដីសម្រេចអង្គជម្រះសាលាដំបូង មានន័យថា នឹងមិនមានការជំនុំជម្រះក្ដីទៅលើអង្គហេតុផ្សេងទៀត នៅក្នុងសំណុំរឿង ០០២ នេះទេ។ មានន័យថា យើងមានតែសំណុំរឿងពីរតែប៉ុណ្ណោះ។ សំណុំរឿងពីរនេះ គឺសំណុំរឿង ០០២ វគ្គ ១ និងសំណុំរឿង ០០២ វគ្គ ២។ មិនមានសំណុំរឿង ០០២ វគ្គ ៣ សំណុំរឿង ០០២ វគ្គ ៤ អីនោះទេ ដោយសារតែពេលវេលា»។
សំណុំរឿង ០០២ ត្រូវបានសាលាដំបូងសម្រេចបំបែកទៅជាសំណុំរឿងតូចៗពីរ ដែលហៅថា សំណុំរឿង ០០២ វគ្គ ១ និងសំណុំរឿង ០០២ វគ្គ ២។ អង្គហេតុនៅក្នុងដីកាដំណោះស្រាយ ដែលសល់ពីសំណុំរឿងទាំង ២ ហើយសាលាដំបូងមិនយកមកជំនុំជម្រះបន្ថែមទៀតនោះ មានជាអាទិ គឺការដ្ឋានស្រែអំបិល (កំពត) ការដ្ឋានព្រៃស (ភ្នំពេញ) មន្ទីរសន្តិសុខ សង់ (ខេត្តកណ្ដាល) មន្ទីរសន្តិសុខ កោះខ្យង (ខេត្តព្រះសីហនុ) មន្ទីរសន្តិសុខ ព្រៃដំរីស្រុត មន្ទីរសន្តិសុខ វត្តគីរីរម្យ (បាត់ដំបង) មន្ទីរសន្តិសុខ ភូមិភាគឧត្តរ មន្ទីរសន្តិសុខ វត្តធ្លក និងមន្ទីរសន្តិសុខ គោកក្ដួច កន្លែងសម្លាប់មនុស្សក្នុងស្រុក ១២ ក្នុងភូមិភាគបស្ចិម ទួលពោធិ៍ជ្រៃ (ពោធិ៍សាត់) កន្លែងសម្លាប់មនុស្សនៅស្ទឹងតូច ការផ្លាស់ទីលំនៅប្រជាជនពីភូមិភាគបូព៌ា ដំណាក់កាលទី៣ ការប្រព្រឹត្តលើពុទ្ធសាសនិកទូទាំងប្រទេស ការប្រព្រឹត្តលើជនជាតិចាម នៅមន្ទីរសន្តិសុខ ក្រូចឆ្មា (កំពង់ចាម/ត្បូងឃ្មុំ) និងឧក្រិដ្ឋកម្មប្រព្រឹត្តដោយកងទ័ពបដិវត្តកម្ពុជា នៅលើទឹកដីវៀតណាម។ ទោះជាយ៉ាងនេះក្ដី ភស្តុតាងទាំងនេះខ្លះ មាននៅក្នុងសំណុំរឿង ០០២ វគ្គ ២ ហើយ។
អតីតមេដឹកនាំជាន់ខ្ពស់ខ្មែរក្រហមទាំងពីររូប គឺ នួន ជា និង ខៀវ សំផន ត្រូវបានកាត់ទោសជាប់ពន្ធនាគារមួយជីវិត ក្នុងសំណុំរឿង ០០២ វគ្គ ១ ហើយក៏នៅជាជនជាប់ចោទក្នុងសំណុំរឿង ០០២ វគ្គ ២ ដែលសាលាដំបូងនឹងត្រូវបន្តសវនាការនៅខែមិថុនាខាងមុខនេះ។
លោក នេត្រ ភក្ត្រា ឲ្យដឹងថា សាលាក្ដីខ្មែរក្រហមគ្រោងបញ្ចប់ការជំនុំជម្រះសំណុំរឿង ០០២ វគ្គ ២ ជាស្ថាពរ នៅឆ្នាំ ២០១៩៖ «នៅពេលនេះ ភាគីពាក់ព័ន្ធនានា កំពុងតែធ្វើសារណាសង្ខេបទៅលើអ្វីដែលបានលើកឡើងនៅក្នុងដំណើរការសវនាការ ដើម្បីឈានទៅដល់ការចូលរួមសវនាការធ្វើសេចក្ដីសន្និដ្ឋានបិទបញ្ចប់ការសួរដេញដោល ដែលគ្រោងនឹងធ្វើឡើងនៅថ្ងៃទី៥ ខែមីនា ឆ្នាំ២០១៧ ហើយបន្តទៅចៅក្រមគាត់នឹងសរសេរសាលក្រមលើសំណុំរឿង ០០២ វគ្គ ២។ ក្នុងកាលបរិច្ឆេទនៃដំណើរការតុលាការក្នុងសំណុំរឿង ០០២ វគ្គ ២ នេះ គឺគេគ្រោងនឹងបញ្ចប់នៅឆ្នាំ២០១៩ ខាងមុខ ទាំងការប្រកាសសាលក្រម ហើយនិងការប្ដឹងសាទុក្ខ បើសិនជាមានទៅអង្គជំនុំជម្រះតុលាការកំពូល»។
អង្គជំនុំជម្រះសាលាដំបូងកាត់បន្ថយវិសាលភាពសំណុំរឿង ០០២ ប្រឆាំង ខៀវ សំផន និង នួន ជា គឺស្របពេលដែលសាធារណជនមើលឃើញថា សាលាក្ដីនេះកាត់ក្ដីប្រើពេលយូរ ហើយប្រឈមនឹងបញ្ហាខ្វះថវិកា។ ទាក់ទងបញ្ហានេះដែរ សាលាក្ដីខ្មែរក្រហម កាលពីថ្ងៃទី២២ កុម្ភៈ ក៏សម្រេចលើកលែងការចោទប្រកាន់ជនជាប់ចោទក្នុងសំណុំរឿង ០០៤ វគ្គ ១ ម្នាក់ គឺអ្នកស្រី អ៊ឹម ចែម។ អ្នកតាមដានដំណើរការសាលាក្ដីខ្មែរក្រហមខ្លះយល់ថា បញ្ហាថវិកា ការខ្វែងមតិគ្នារវាងចៅក្រមជាតិ និងអន្តរជាតិ ហើយរដ្ឋាភិបាលមិនគាំទ្រឲ្យមានការចោទប្រកាន់មនុស្សបន្ថែមទៀតនោះ សាលាក្ដីខ្មែរក្រហមអាចនឹងមិនមានសវនាការសំណុំរឿងផ្សេងទៀតទេ ក្រៅពីសំណុំរឿង ០០២ ដែលប្រឆាំងជនជាប់ចោទ នួន ជា និង ខៀវ សំផន សព្វថ្ងៃនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- វៀតណាមព្រមានថា ព្រែកជីកហ្វូណនតេជោអាចជួយសម្រួលវត្តមានយោធាចិនក្នុងទឹកដីកម្ពុជាកាន់តែជ្រៅ
- ពលរដ្ឋនៅតំបន់បឹងតាមោក ចោទប្រកាន់អាជ្ញាធរខណ្ឌព្រែកព្នៅថា ប្រើអំពើហិង្សា
- អាជ្ញាធរក្រុងភ្នំពេញមិនអនុញ្ញាតឱ្យបក្សកម្លាំងជាតិធ្វើបាតុកម្ម នៅទីលានប្រជាធិបតេយ្យ
- ក្រសួងដែនដីបានហៅអតិថិជនបុរីពិភពថ្មីទៅពិភាក្សា ដើម្បីរកដំណោះស្រាយ
- ពលរដ្ឋខ្មែរ-អូស្ត្រាលីម្នាក់ ដែលរិះគន់រដ្ឋាភិបាលកម្ពុជា រងការវាយដំពីជនមិនស្គាល់មុខមួយក្រុម ពេលទៅលេងស្រុកខ្មែរ