ជប៉ុនផ្ដល់លុយជិត១,៤លានដុល្លារដល់ភាគីអន្តរជាតិនៃសាលាក្ដីខ្មែរក្រហម
2015.01.19
ក្រុមចៅក្រមអង្គជំនុំជម្រះសាលាដំបូងនៃសាលាក្ដីខ្មែរក្រហម មុនពេលចាប់ផ្ដើមប្រកាសសាលក្រមសំណុំរឿង ០០២ វគ្គ១ នៅថ្ងៃទី៧ ខែសីហា ឆ្នាំ២០១៤។
រដ្ឋាភិបាលជប៉ុនប្រកាសផ្ដល់ថវិកាវិភាគទានថ្មីចំនួនជិត ១,៤លានដុល្លារសហរដ្ឋអាមេរិក (១.៣៨៥.៥៦៧) ដល់ភាគីអន្តរជាតិនៃសាលាក្ដីខ្មែរក្រហម។
ជប៉ុនគឺជាប្រទេសផ្ដល់ជំនួយធំបំផុតរបស់សាលាក្ដីខ្មែរក្រហម។ រួមទាំងការប្រកាសថ្មីនេះផង ប្រទេសជប៉ុន បានផ្ដល់លុយវិភាគទានរបស់ខ្លួនដល់សាលាក្ដីខ្មែរក្រហមសរុបជាង ៨២លានដុល្លារហើយ។ ចំនួននេះ គឺស្មើនឹង ៣៦% នៃថវិកាជំនួយសរុបដែលសាលាក្ដីខ្មែរក្រហមទទួលបានពីម្ចាស់ជំនួយចាប់តាំងពីពេលដែលសាលាក្ដីកូនកាត់ខ្មែរ-អន្តរជាតិនេះមកបង្កើតឡើងមក។
មន្ត្រីនាំពាក្យនៃសាលាក្ដីខ្មែរក្រហម លោក នេត្រ ភក្ត្រា មានប្រសាសន៍ថា ថវិការបស់ជប៉ុននេះ នឹងជួយសម្រាលខ្ទង់ចំណាយរបស់ភាគីអន្តរជាតិ ដែលត្រូវការចំនួនជិត ២៣ (២២,៩) លានដុល្លារអាមេរិក សម្រាប់ឆ្នាំ២០១៥។ ដោយឡែកខាងភាគីជាតិ ដែលត្រូវការចំនួន ៦លានដុល្លារក្នុងគម្រោងចំណាយរបស់ខ្លួន គឺនៅខ្វះនៅឡើយ ហើយក៏នៅរង់ចាំការអនុម័តខ្ទង់ចំណាយដែរ។
លោកបញ្ជាក់ថា ចាប់តាំងពីឆ្នាំ២០០៦ រហូតមកដល់ឆ្នាំ២០១៤ ភាគីជាតិ និងអន្តរជាតិនៃសាលាក្ដីខ្មែរក្រហមបានប្រើប្រាស់ថវិកាអស់ចំនួនជិត ២០៥លាន (២០,៦) ដុល្លារហើយ។ ក្នុងនោះ ភាគីអន្តរជាតិចំណាយអស់ជាង ១៥០លាន (១៥៤,៩) ដុល្លារ ហើយភាគីជាតិចំណាយអស់ជិត ៥០លាន (៤៩,៦) ដុល្លារ។
នៅថ្ងៃពុធ ទី២១ មករា អង្គជំនុំជម្រះសាលាដំបូងនៃសាលាក្ដីខ្មែរក្រហម គ្រោងធ្វើសវនាការរបស់ខ្លួនលើសំណុំរឿង ០០២ វគ្គ ២ ជាបន្តទៀត បន្ទាប់ពីបានផ្អាកអស់រយៈពេល ២សប្ដាហ៍ ដោយសារជនជាប់ចោទ ខៀវ សំផន ត្រូវបញ្ជូនទៅព្យាបាលនៅមន្ទីរពេទ្យ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- វៀតណាមព្រមានថា ព្រែកជីកហ្វូណនតេជោអាចជួយសម្រួលវត្តមានយោធាចិនក្នុងទឹកដីកម្ពុជាកាន់តែជ្រៅ
- ពលរដ្ឋនៅតំបន់បឹងតាមោក ចោទប្រកាន់អាជ្ញាធរខណ្ឌព្រែកព្នៅថា ប្រើអំពើហិង្សា
- អាជ្ញាធរក្រុងភ្នំពេញមិនអនុញ្ញាតឱ្យបក្សកម្លាំងជាតិធ្វើបាតុកម្ម នៅទីលានប្រជាធិបតេយ្យ
- ក្រសួងដែនដីបានហៅអតិថិជនបុរីពិភពថ្មីទៅពិភាក្សា ដើម្បីរកដំណោះស្រាយ
- ពលរដ្ឋខ្មែរ-អូស្ត្រាលីម្នាក់ ដែលរិះគន់រដ្ឋាភិបាលកម្ពុជា រងការវាយដំពីជនមិនស្គាល់មុខមួយក្រុម ពេលទៅលេងស្រុកខ្មែរ