សវនាការសាលាក្ដីខ្មែរក្រហមបន្តស្ដាប់សាក្សី ឈ្មោះ នង សុផង់

នៅថ្ងៃទី ៤ សីហា នេះ អង្គជំនុំជម្រះសាលាក្ដីខ្មែរក្រហម បន្តស្ដាប់សាក្សី ឈ្មោះ នង សុផង់ អតីតប្រធានក្រុមអ្នកបកប្រែសារទូរលេខសម្ងាត់ នៅក្នុងរបបកម្ពុជាប្រជាធិបតេយ្យ។

ដោយ ឡេង ម៉ាលី
2012-09-05

សវនាការរយៈពេល ៥ ថ្ងៃកន្លងមកនេះ មានឯកសារជាសារទូរលេខមួយចំនួន ត្រូវបានសហព្រះរាជអាជ្ញាលើកយកមកសួរសាក្សី នង សូផង់ ទាក់ទងនឹងការជម្លៀសប្រជាជន និងការចាប់ខ្លួនជាដើម។ ក៏ប៉ុន្តែសាក្សីបដិសេធថា ឯកសារសារទូរលេខដែលលើកយកមកសួរនេះ មិនមែនជាឯកសារអង្គភាពលោកទេ។

សាក្សី នង សូផង់៖ «បាទ! ចំពោះអង្គភាពខ្ញុំ គឺនៅដើមខែមករា ឆ្នាំ ១៩៧៩ មុននឹងចេញមក គឺខ្ញុំមិនបានរក្សាទុក សូម្បីតែឯកសារមួយសន្លឹកក៏គ្មាននៅក្នុងហោប៉ៅខ្ញុំដែរ គឺខ្ញុំដុតចោលខ្ទេចអស់ហើយ។ អ៊ីចឹងអ្វីដែលអស់លោកយកបានការណ៍សម្ងាត់ទាំងអស់នេះ គឺពុំមែនជាអ្វីដែលខ្ញុំ និងអង្គភាពខ្ញុំ ត្រូវទទួលខុសត្រូវទេ»។

សាក្សី នង សុផង់ ត្រូវបានភាគីសហព្រះរាជអាជ្ញា និងមេធាវីដើមបណ្ដឹងរដ្ឋប្បវេណីសួរដេញដោលបញ្ចប់អំពីសារទូរលេខ ដែលទាក់ទងនឹងមេដឹកនាំជាន់ខ្ពស់ខ្មែរក្រហមនៃមន្ទីរ ៨៧០ ដែលមាន ប៉ុល ពត នួន ជា និង ខៀវ សំផន ជាដើម។

សាក្សី នង សុផង់ បញ្ជាក់ថា ក្នុងនាមលោកជាប្រធានអ្នកបកប្រែសារទូរលេខ លោកស្ថិតនៅតែមួយកន្លែងទេ ហើយលោកមិនដែលដឹងច្រើនអំពីរចនាសម្ព័ន្ធថ្នាក់ដឹកនាំ ឬការងាររបស់អ្នកទាំងនោះដែរ។ លោកក៏មិនធ្លាប់ឃើញជនជាប់ចោទ នួន ជា ខៀវ សំផន និង អៀង សារី ផ្ញើសារទូរលេខទាក់ទងគ្នាទេ ព្រោះអ្នកទាំងនេះនៅក្នុងទីក្រុងភ្នំពេញស្រាប់។ លោកក៏មិនធ្លាប់បកប្រែសារទូរលេខក្រៅប្រទេសដែរ។ លោកធ្លាប់ទទួលបានសារទូរលេខរបស់ជនជាប់ចោទ នួន ជា តែម្ដងគត់ គឺរឿងប្រជុំសភា។

សវនាការស្ដាប់ និងសួរដេញដោលសាក្សី នង សុផង់ ទើបតែបានបញ្ចប់ដោយភាគីសហព្រះរាជអាជ្ញា និងមេធាវីដើមបណ្ដឹងរដ្ឋប្បវេណី។

សវនាការនៅថ្ងៃពុធ ទី ៥ សីហា អង្គជំនុំជម្រះ នឹងផ្ដល់វេទិកាឱ្យទៅមេធាវីការពារក្ដីជនជាប់ចោទទាំង ៣ ក្រុមសួរដេញដោលសាក្សីរូបនេះម្ដង៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។