សាលាក្ដីខ្មែរក្រហមបញ្ចប់ការស្ដាប់សាក្សី រចឹម ទន់

សាលាក្ដីខ្មែរក្រហមបានបញ្ចប់ការស្ដាប់សាក្សី ឈ្មោះ រចឹម ទន់ ដែលជាថ្នាក់ដឹកនាំទី៣ នៃក្រសួងការបរទេសរបបកម្ពុជាប្រជាធិបតេយ្យហើយ នៅព្រឹកថ្ងៃទី២ សីហា នេះ។

2012-08-03

សាក្សី រចឹម ទន់ ជាអ្នកតស៊ូក្នុងចលនាបដិវត្តខ្មែរក្រហម ចាប់តាំងពីឆ្នាំ១៩៦៣ រហូតមកដល់របបកម្ពុជាប្រជាធិបតេយ្យដួលរលំ នៅឆ្នាំ១៩៧៩។

កាលនៅក្រសួងការបរទេសក្នុងរបបកម្ពុជាប្រជាធិបតេយ្យ ហៅមន្ទីរ ប១ សាក្សី រចឹម ទន់ ជាអ្នកទទួលខុសត្រូវផ្នែកសន្តិសុខ បន្ទាប់ពីជនជាប់ចោទ អៀង សារី និងលោក សូ ហុង ដែលមេកើយធំរបស់គាត់។ លោកជម្រាបតុលាការថា លោកជាអ្នកនាំមនុស្សដែលគេត្រូវចាប់ខ្លួន បញ្ជូនឱ្យក្រុមយោធាមកពីមន្ទីររបស់ ប៉ុល ពត។

បន្ទាប់ពីសាក្សី រចឹម ទន់ អង្គជំនុំជម្រះសាលាក្ដីខ្មែរក្រហម បានស្ដាប់សាក្សីថ្មីមួយរូបទៀត ដែលមានឈ្មោះថា សួង ស៊ីគឿន ហៅ គង់ ឬ ធន់។

តាមការថ្លែងនៅក្នុងសវនាការថ្ងៃទី២ សីហា បានឱ្យដឹងថា សាក្សី សួង ស៊ីគឿន ក៏ជាអ្នកតស៊ូជើងចាស់មួយរូបដែរ ក្នុងចលនាបដិវត្តរបស់ក្រុមខ្មែរក្រហម។ លោក សួង ស៊ីគឿន ជាបញ្ញវន្តនៃបក្សកុម្មុយនិស្តកម្ពុជា ដែលទៅរៀននៅប្រទេសបារាំង ដូចគ្នានឹងក្រុមមេដឹកនាំជាន់ខ្ពស់ខ្មែរក្រហមមួយចំនួនទៀតដែរ។

លោក សួង ស៊ីគឿន ក៏ជាអ្នកធ្លាប់ទទួលខុសត្រូវផ្នែកសន្តិសុខដែរ។ មេធំរបស់គាត់ គឺជនជាប់ចោទ អៀង សារី។ លោកក៏អ្នកធ្វើព័ត៌មានផ្សាយ នៃវិទ្យុរណសិរ្សរួបរួមជាតិកម្ពុជា នៅក្រុងហាណូយ ជាមួយអ្នកតស៊ូចាស់ ដូចជាលោក ជា សុទ្ធ ជាដើម។ ជនជាប់ចោទ អៀង ធីរិទ្ធ ជាចាងហ្វាងនៃវិទ្យុសំឡេងនោះ នៅទសវត្សឆ្នាំ១៩៦០។

សវនាការស្ដាប់សាក្សី សួង ស៊ីគឿន នឹងបន្តនៅថ្ងៃទី៦ សីហា សប្ដាហ៍ក្រោយទៀត ដែលលោកនឹងត្រូវសួរដេញដោលបន្តដោយសហព្រះរាជអាជ្ញាអន្តរជាតិ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។