សាលាក្ដីខ្មែរក្រហមបញ្ចប់សវនាការស្ដាប់សក្សី យន់ គីម

មុននឹងបញ្ចប់សវនាការស្ដាប់សាក្សី យន់ គីម នៅថ្ងៃទី២០ មិថុនា ជនជាប់ចោទ នួន ជា បាននិយាយថា សក្ខីកម្មរបស់សាក្សីរូបនេះ មានការពិតខ្លះទាក់ទងទៅនឹងការជម្លៀសប្រជាពលរដ្ឋចេញពីទីក្រុង ដែលថា ដើម្បីគេចពីការទម្លាក់គ្រាប់បែករបស់សហរដ្ឋអាមេរិក ការអត់ឃ្លាន និងសង្គ្រាមដណ្ដើមគ្នាទៅវិញទៅមក។

ដោយ ឡេង ម៉ាលី
2012-06-21

h062012lm.mp3

ប៉ុន្តែចំណុចខ្លះ គាត់ថា សាក្សីរូបនេះមិនដឹងហេតុផលច្រើនទេ ហើយបង្ហាញថា ការជម្លៀសនោះមានចេតនាអាក្រក់ទៅវិញ។

ជនជាប់ចោទ នួន ជា បន្តថា ការជម្លៀសប្រជាពលរដ្ឋបច្ចុប្បន្ននេះ មានភាពមិនសមរម្យ បើប្រៀបធៀបទៅនឹងការជម្លៀសប្រជាពលរដ្ឋ នៅឆ្នាំ១៩៧៥៖ «យើងខ្ញុំជាអ្នកចាញ់សង្គ្រាម ត្រូវបានចោទប្រកាន់ពីការជម្លៀសប្រជាជនដោយបង្ខំ។ ប៉ុន្តែសកម្មភាពក្នុងពេលបច្ចុប្បន្ននេះ មានភាពមិនសមរម្យ បើប្រៀបទៅនឹងការជម្លៀសនៅបន្ទាប់ថ្ងៃទី១៧ ខែមេសា ឆ្នាំ១៩៧៥ ទៅទៀត។ ខ្ញុំសុំនិយាយដើម្បីប្រជាជនក្រីក្រ ដែលត្រូវបានជិះជាន់ និងធ្វើទុក្ខបុកម្នេញដល់អាយុជីវិត ដោយពួកអ្នកមានលុយ មានបុណ្យសក្ដិ ដែលកំពុងប្លន់ដីធ្លីស្រែចម្ការ»។

ជនជាប់ចោទ នួន ជា មានចេតនាថ្លែងបញ្ជាក់បញ្ហាជម្លៀសប្រជាពលរដ្ឋជាបន្តទៀត ក៏ប៉ុន្តែ គាត់ត្រូវប្រធានចៅក្រមជំនុំជម្រះ គឺលោក និល ណុន មិនអនុញ្ញាតឱ្យបន្តទេ ព្រោះអង្គហេតុដែលអង្គជំនុំជម្រះលើកយកមកពិភាក្សានៅពេលនេះ គឺទាក់ទងនឹងរចនាសម្ព័ន្ធរដ្ឋបាល ដូចជាសហករណ៍ និងមន្ទីរឃុំឃាំងមួយ ឈ្មោះ គោកក្ដួច។

លោក និល ណុន៖ «យើងមិនឱ្យនិយាយអ្វីទៀតទេលោក នួន ជា។ ចប់ត្រឹមហ្នឹងហើយ ករណីបរិបទនេះ គឺមិនឱ្យលោកបន្តធ្វើសេចក្ដីថ្លែងការណ៍អ្វីទៀតទេ។ វាខុសនឹងគោលបំណងនៃការស្ដាប់សក្ខីកម្មពាក់ព័ន្ធនឹងសាក្សីរូបនេះ»។

សាក្សី យន់ គីម ដែលជាអតីតគណៈសហករណ៍ឃុំសំបូរ និងឃុំវឌ្ឍនៈ ខេត្តក្រចេះ ក្នុងរបបខ្មែរក្រហម បានបញ្ជាក់ប្រាប់តុលាការម្ដងហើយម្ដងទៀតថា ពលរដ្ឋរស់នៅក្រោមការគ្រប់គ្រងរបស់គាត់ នៅក្នុងសហករណ៍វឌ្ឍនៈ និងសហករណ៍សំបូរ មិនមានបញ្ហាអ្វីទេ ទាំងម្ហូបអាហារ ការធ្វើការងារ និងទាំងផ្នែកសន្តិសុខ។

ទាក់ទងនឹងការអះអាងរបស់សាក្សី យន់ គីម សហចៅក្រមនៃអង្គជំនុំជម្រះសាលាដំបូង បានលើកយកសម្ដីសាក្សីមួយរូបផ្សេងទៀត មកសួរបញ្ជាក់។ សាក្សីនោះបាននិយាយថា ការរស់នៅក្នុងសហករណ៍ ដែលក្រោមការគ្រប់គ្រងរបស់លោក យន់ គីម គឺមានការលំបាក។

ឆ្លើយតបទៅនឹងបញ្ហា ដែលលើកឡើងដោយសាក្សីនោះ លោក យន់ គីម ថ្លែងថា អ្នកដែលនិយាយដូច្នេះ គឺមានភាពមិនច្បាស់លាស់៖ «ចម្លើយរបស់គាត់នេះ គាត់និយាយមិនសូវជាច្បាស់លាស់ប៉ុន្មានទេ។ បើតាមសម្ដីរបស់គាត់ ទទួលអត់បានទេខ្ញុំ ហើយតា ខាំ នៅសហករណ៍កែងប្រាសាទ សហករណ៍ស្រែខឿននេះ ដែលគ្រប់គ្រងនៅកែងប្រាសាទនេះ គឺរូបខ្ញុំហ្នឹងតែម្ដង»។

សាក្សី យន់ គីម ត្រូវបានខ្មែរក្រហមតែងតាំងជាគណៈឃុំ និងជាគណៈសហករណ៍ ចាប់តាំងពីឆ្នាំ១៩៧១ រហូតឆ្នាំ១៩៧៩។

ក្រោយការបញ្ចប់សក្ខីកម្មរបស់សាក្សី យន់ គីម នៅថ្ងៃទី២០ មិថុនា អង្គជំនុំជម្រះ បន្តស្ដាប់សាក្សីមួយរូបទៀត ឈ្មោះ ខៀវ នៅ ដែលជាជនបដិវត្តខ្មែរក្រហមម្នាក់ ក្រោមការគ្រប់គ្រងរបស់តា ម៉ុក នៅខេត្តតាកែវ។ សក្ខីកម្មសាក្សី ខៀវ នៅ នៅមិនទាន់បញ្ចប់ទេ ហើយនឹងត្រូវបន្តនៅថ្ងៃទី២១ មិថុនា ទៀត៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។