ព្រះសង្ឃវត្តទួលសន្តិវ័ន្ត ធ្វើបុណ្យផ្ការកបច្ច័យជួយមន្ទីរពេទ្យគន្ធបុប្ផា
h082412ay-a1.mp3
ព្រះចៅអធិការស្តីទីវត្តទួលសន្តិវ័ន្ត ព្រះនាម ចន្ទ នឿន ព្រះអង្គមានសង្ឃដីកាថា នៅថ្ងៃអាទិត្យ ទី២ ខែកញ្ញា ឆ្នាំ២០១២ នៅវត្តទួលសន្តិវ័ន្ត មានប្រារព្ធពិធីបុណ្យផ្កា ដើម្បីប្រមូលបច្ច័យជួយឧបត្ថម្ភមន្ទីរពេទ្យគន្ធបុប្ផា ដែលកំពុងខ្វះខាតថវិកាសម្រាប់ទ្រទ្រង់មន្ទីរពេទ្យឲ្យមានដំណើរការ។ ផ្ដើមពីកង្វះខាតនេះ ព្រះអង្គសូមបិណ្ឌបាត និងអំពាវនាវឲ្យប្រជាពុទ្ធបរិស័ទ ឬប្រជាពលរដ្ឋជិតឆ្ងាយ ចូលរួមពិធីបុណ្យផ្កាសប្បុរសឲ្យបានច្រើនកុះករ។
ព្រះចៅអធិការស្តីទីវត្តទួលសន្តិវ័ន្ត ព្រះនាម ចន្ទ នឿន ព្រះអង្គមានសង្ឃដីកាថា៖ «ដូចអ្វីដែលខ្ញុំព្រះករុណាអាត្មាភាពបានប្រគេន និងចម្រើនពរខាងដើមនេះ សូមអរត្តនាព្រះករុណាព្រះសង្ឃគ្រប់ព្រះអង្គ ញាតិញោមពុទ្ធបរិស័ទទាំងអស់ មេត្តានិមន្ត និងអញ្ជើញចូលរួមនៅក្នុងពិធីបុណ្យនេះ ឲ្យបានច្រើន ដើម្បីបានជាចំណែកក្នុងការជួយឧបត្ថម្ភចូលក្នុងមន្ទីរពេទ្យ ក៏ដូចជាជួយប្រជាពលរដ្ឋខ្មែរ ជាពិសេសក្មេងៗដែលតែងតែទៅព្យាបាលនៅមន្ទីរពេទ្យគន្ធបុប្ផាជាច្រើនរយនាក់ ជារៀងរាល់ថ្ងៃ ដើម្បីគ្នាបានជាទីពឹងពំនាក់។ ពីព្រោះថា បើអត់មានមន្ទីរពេទ្យគន្ធបុប្ផានេះទេ អាចនឹងបង្កលក្ខណៈលំបាកដល់កូនខ្មែរ ពិសេសគឺអ្នកក្រីក្រ»។
ព្រះចៅអធិការស្តីទីវត្តទួលសន្តិវ័ន្ត ព្រះនាម ចន្ទ នឿន មានសង្ឃដីកាថា បច្ច័យដែលទទួលបានពីពិធីបុណ្យផ្កា នឹងយកទៅឧបត្ថម្ភជូនមន្ទីរពេទ្យគន្ធបុប្ផាទាំងអស់ ព្រោះថាមន្ទីរពេទ្យនេះមានគុណ និងបានជួយសង្គ្រោះកុមារកម្ពុជារាប់សែននាក់ ជារៀងរាល់ឆ្នាំឲ្យបានជាសះស្បើយ និងរួចផុតស្លាប់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
-
ស្ដាប់ផ្ទាល់
(ព្រឹក ៥:៣០-៦:៣០ ល្ងាច ៧:៣០-៨:៣០) - សំឡេង
ភាសា
