ពលរដ្ឋ១៨គ្រួសារនៅកំពង់ធំខកចិត្តនឹងអាជ្ញាធរដែលមិនចែកប័ណ្ណកម្មសិទ្ធិដីធ្លី
2015.03.06
ពលរដ្ឋ ១៨គ្រួសារ នៅឃុំក្រយា ស្រុកសន្ទុក ខេត្តកំពង់ធំ ដែលមានប័ណ្ណចុងសន្លឹកថានឹងអាចទទួលបានប្លង់កម្មសិទ្ធិដីធ្លីពីរដ្ឋាភិបាល ប៉ុន្តែត្រូវខកបំណង ពីព្រោះពួកគាត់មិនបានទទួលប័ណ្ណកម្មសិទ្ធិពីអាជ្ញាធរនោះទេ។ ចំណែកអាជ្ញាធរបញ្ជាក់ថា មូលហេតុដែលពលរដ្ឋខ្លះមិនបានប័ណ្ណកម្មសិទ្ធិនោះ ដោយសារដីរបស់ពួកគេឋិតនៅជាដីមានជម្លោះ និងមិនទាន់មានទិន្នន័យច្បាស់លាស់។
ក្រោយពេលទទួលបានចុងសន្លឹកសម្គាល់ក្បាលដីពីអាជ្ញាធរ ពលរដ្ឋ ១៨គ្រួសារក្នុងចំណោមប្រជាពលរដ្ឋផ្សេងទៀត រំពឹងថានឹងអាចទទួលប័ណ្ណកម្មសិទ្ធិស្របច្បាប់ ប៉ុន្តែផ្ទុយទៅវិញ ពួកគាត់បែរជាខកចិត្ត បន្ទាប់ពីមិនមានឈ្មោះក្នុងបញ្ជីឈ្មោះទទួលប័ណ្ណកម្មសិទ្ធិ។ ពលរដ្ឋថា នេះជារឿងអយុត្តិធម៌សម្រាប់ពួកគាត់ ពីព្រោះពីដើមដល់ចប់ ពួកគាត់មិនបានដឹងថាមានអ្នកប្ដឹងជំទាស់ឡើយ។
តំណាងពលរដ្ឋនៅឃុំបល្ល័ង្ក ស្រុកបារាយណ៍ ដែលមានដីនៅឃុំក្រយា ត្រៀមនឹងទទួលប័ណ្ណកម្មសិទ្ធិ លោក ឡុង ស៊ីវុត្ថា មានប្រសាសន៍ថា នៅពេលក្រុមនិស្សិតចុះវាស់វែងកាលពីឆ្នាំ២០១២ ហើយរហូតឈានដល់ប្រគល់ចុងសន្លឹកដល់ពួកគាត់នោះ គឺដោយសារតែដីរបស់ពួកគាត់មិនមានប៉ះពាល់ជាមួយបុគ្គលណាទេ។ លោកបន្តថា សូម្បីតែនៅពេលបិទប្រកាសក្បាលដី ដើម្បីឲ្យពលរដ្ឋ ឬក្រុមហ៊ុនដែលយល់ថាប៉ះពាល់លើដីខ្លួនចេញមុខជំទាស់ ក៏មិនមានដែរ ប៉ុន្តែពេលអាជ្ញាធរចែកប័ណ្ណកម្មសិទ្ធិជូនពលរដ្ឋកាលពីថ្ងៃទី២ មីនា ទើបដឹងថាមានអ្នកប្ដឹងជំទាស់ពីមុនមក ហើយពួកគាត់ក៏ត្រូវខកខានទទួលបានប្លង់កម្មសិទ្ធិស្របច្បាប់៖ «សម្រាប់ខ្ញុំជារឿងអយុត្តិធម៌បន្តិចដែរ ព្រោះពេលដែលយើងនាំក្រុមនិស្សិតវាស់វែង គឺមិនមានបញ្ហាទេ»។
ប្រភពដដែលបន្តថា ប្រសិនបញ្ហានេះមិនអាចដោះស្រាយបាន គឺធ្វើឲ្យពលរដ្ឋរស់នៅដោយមិនស្ងប់ចិត្ត និងមិនអាចប្រើប្រាស់ដីរបស់ខ្លួនទៅតាមចិត្តចង់បានឡើយ។
ទាក់ទងបញ្ហានេះ អភិបាលស្រុកសន្ទុក លោក ពេជ សុធា មានប្រសាសន៍ថា ជាគោលការណ៍ អាជ្ញាធរ គឺផ្ដល់ជូនប័ណ្ណកម្មសិទ្ធិជូនពលរដ្ឋនៅក្នុងឃុំក្រយា ដែលមានឈ្មោះទាំងអស់ ក៏ប៉ុន្តែលោកថា មានក្បាលដីខ្លះ គឺឋិតនៅជាដីជម្លោះ ពីព្រោះមានពលរដ្ឋផ្សេងបានប្ដឹងជំទាស់មកអាជ្ញាធរតាំងពីបិទបញ្ជីឈ្មោះលើកដំបូងម្ល៉េះ តែដោយសារពលរដ្ឋមិនបានដឹង។ លោកបន្តថា កាលណាដីនោះនៅមិនទាន់ដោះស្រាយឲ្យបានចប់សព្វគ្រប់ អាជ្ញាធរមិនអាចចេញប្លង់ជូនពួកគាត់បានទេ៖ «ទីមួយគ្មានទិន្នន័យច្បាស់លាស់ មានតែក្បាលដី តែមិនដឹងថាម្ចាស់មួយណា។ ទីពីរពាក់ព័ន្ធនឹងជម្លោះផ្សេងៗដែលមិនទាន់បានដោះស្រាយចប់»។
លោកបន្ថែមថា អាជ្ញាធរបានចែកប្លង់កម្មសិទ្ធិជូនពលរដ្ឋចំនួនជាង ៤ពាន់គ្រួសារ (៤.០១៨គ្រួសារ) នៅឃុំក្រយា កាលពីថ្ងៃទី២ មីនា ហើយអាជ្ញាធរនឹងបន្តប្រគល់ប័ណ្ណកម្មសិទ្ធិជូនប្រជាពលរដ្ឋថែមទៀត ដរាបណាបញ្ហាផ្សេងៗត្រូវបានដោះស្រាយចប់។ តែយ៉ាងណាលោកថា នឹងឲ្យមន្ត្រីសុរិយោដីថ្នាក់ស្រុក ចុះពិនិត្យលើបញ្ហាពលរដ្ឋ ១៨គ្រួសារ រួមនឹងពលរដ្ឋផ្សេងដែលមិនទាន់បានទទួលប្លង់កម្មសិទ្ធិ ដើម្បីឈានទៅរកដំណោះស្រាយរួមមួយនៅពេលខាងមុខ។
យោងតាមច្បាប់ភូមិបាលឆ្នាំ២០០២ មាត្រា២៣៧ ចែងថា ករណីមានវិវាទលើទំហំក្បាលដី ឬឈ្មោះនៃកម្មសិទ្ធិករកើតឡើងនៅក្នុងពេលប្រតិបត្តិការធ្វើសម្រង់សុរិយោដី អ្នកទទួលខុសត្រូវ គឺមន្ត្រីរដ្ឋបាលសុរិយោដី ត្រូវអញ្ជើញសាមីខ្លួនមកសម្រុះសម្រួលគ្នា។ ចំណែកវិវាទដែលកើតឡើងក្នុងតំបន់កំពុងវិនិច្ឆ័យ ដែលមានលក្ខណៈជាប្រព័ន្ធវិញ គណៈកម្មការរដ្ឋបាលមានភារកិច្ចសម្រុះសម្រួលវិវាទកម្មនោះ។ បន្ថែមពីនេះ បើកិច្ចព្រមព្រៀងមិនអាចទៅរួចទេ អ្នកទទួលខុសត្រូវ គឺនៅតែបន្តអង្កេតវាស់វែង ហើយកសាងកំណត់ហេតុនៃវិវាទនោះ ប៉ុន្តែមិនមានសិទ្ធិអារកាត់ឡើយ។ ប្រសិនបើវិវាទកើតឡើងនៅពេលប្រគល់ប័ណ្ណកម្មសិទ្ធិ ខាងមន្ត្រីសុរិយោដី ត្រូវប្រកាន់យកតែឈ្មោះកម្មសិទ្ធិករដែលបានចុះក្នុងបញ្ជីរបស់ខ្លួនប៉ុណ្ណោះ គ្មានករណីណាមួយដែលខាងសុរិយោដីអាចកែប្រែ ឬប្រគល់ប័ណ្ណកម្មសិទ្ធិឲ្យទៅបុគ្គលផ្សេងទៀតបានឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- វៀតណាមព្រមានថា ព្រែកជីកហ្វូណនតេជោអាចជួយសម្រួលវត្តមានយោធាចិនក្នុងទឹកដីកម្ពុជាកាន់តែជ្រៅ
- ពលរដ្ឋនៅតំបន់បឹងតាមោក ចោទប្រកាន់អាជ្ញាធរខណ្ឌព្រែកព្នៅថា ប្រើអំពើហិង្សា
- អាជ្ញាធរក្រុងភ្នំពេញមិនអនុញ្ញាតឱ្យបក្សកម្លាំងជាតិធ្វើបាតុកម្ម នៅទីលានប្រជាធិបតេយ្យ
- ក្រសួងដែនដីបានហៅអតិថិជនបុរីពិភពថ្មីទៅពិភាក្សា ដើម្បីរកដំណោះស្រាយ
- ពលរដ្ឋខ្មែរ-អូស្ត្រាលីម្នាក់ ដែលរិះគន់រដ្ឋាភិបាលកម្ពុជា រងការវាយដំពីជនមិនស្គាល់មុខមួយក្រុម ពេលទៅលេងស្រុកខ្មែរ
