គណៈកម្មការទី១រដ្ឋសភាដាក់លិខិតស្នើនាយករដ្ឋមន្ត្រីពិនិត្យដីសម្បទានសេដ្ឋកិច្ចនៅក្រចេះ
2015.03.03
គណៈកម្មការទី១នៃរដ្ឋសភា ទទួលបន្ទុកសិទ្ធិមនុស្ស អង្កេត និងទទួលពាក្យបណ្ដឹង បានដាក់លិខិតមួយច្បាប់ជាផ្លូវការកាលពីចុងខែកុម្ភៈ ស្នើទៅនាយករដ្ឋមន្ត្រី ពិនិត្យ និងស៊ើបអង្កេតការបែងចែកដីសម្បទានសេដ្ឋកិច្ចជាង ៣.៦០០ហិកតារ ទៅឲ្យពលរដ្ឋនៅស្រុកឆ្លូង ខេត្តក្រចេះ។
សំណើនេះ ក្រោយពេលគណៈកម្មការសភារកឃើញថា អាជ្ញាធរធ្វើការបែងចែងដីឲ្យពលរដ្ឋគ្មានតម្លាភាព និងសុចរិតភាព។ ប៉ុន្តែអាជ្ញាធរខេត្តក្រចេះ អះអាងរឿងនេះថា ខេត្តដោះស្រាយជិតរួចរាល់ហើយ គឺរង់ចាំតែសេចក្តីសម្រេចពីរដ្ឋាភិបាលប៉ុណ្ណោះ។
ការស្នើសុំនេះ បន្ទាប់ពីគណៈកម្មការទី១រដ្ឋសភា ទទួលបន្ទុកសិទ្ធិមនុស្ស អង្កេត និងទទួលពាក្យបណ្ដឹង រកឃើញថា ក្នុងចំណោមពលរដ្ឋ ៩៩៨គ្រួសារដែលត្រូវទទួលបានដីសម្បទានសេដ្ឋកិច្ចពីរដ្ឋាភិបាល កាលពីឆ្នាំ២០១២ មានតែពលរដ្ឋចំនួន ២៧៩គ្រួសារប៉ុណ្ណោះដែលទទួលបានដី។ ជាងនេះទៅទៀត គណៈកម្មការទី១រដ្ឋសភា ក៏ស្នើសុំឲ្យចាត់វិធានការទៅលើមន្ត្រីខិលខូចមួយចំនួនដែលមិនយកដីឲ្យពលរដ្ឋក្រីក្រ បែរជាចែកឲ្យតែបក្ខពួកខ្លួន។
ប្រធានគណៈកម្មការទី១រដ្ឋសភា ទទួលបន្ទុកសិទ្ធិមនុស្ស អង្កេត និងទទួលពាក្យបណ្ដឹង លោក អេង ឆៃអ៊ាង បានឲ្យដឹងថា ការទាមទារនេះព្រោះពលរដ្ឋភាគច្រើនដែលត្រូវទទួលបានដីសម្បទានសេដ្ឋកិច្ច បែរជាមិនបានទទួល។ លោកថា ប្រសិនបើគ្មានអន្តរាគមន៍ពីរដ្ឋាភិបាលលើបញ្ហាដីធ្លីនៅខេត្តក្រចេះ ទោះដោះស្រាយយ៉ាងណាក៏ដោះមិនចេញដែរ ព្រោះមន្ត្រីខិលខូចមួយចំនួនកំពុងកេងចំណេញលើរឿងនេះ៖ «អាជ្ញាធរខេត្តជាអ្នកដោះស្រាយរឿងដីធ្លីជូនពលរដ្ឋ ប៉ុន្តែបែរជាមិនបានដី។ ដូចនេះ គណៈកម្មការទី១មានតែស្នើរដ្ឋាភិបាលស៊ើបអង្កេត»។
នៅក្នុងលិខិតរបស់គណៈកម្មការទី១សភា លើកឡើងថា ពលរដ្ឋក្រីក្រ ៩៩៨គ្រួសារ នៅពេលរដ្ឋាភិបាលផ្តល់ដីជូនពួកគេតាមការស្នើសុំ បែរជាអាជ្ញាធរខេត្តធ្វើការបែងចែកដីទាំងនោះឲ្យទៅអ្នកផ្សេង ដោយបង្ខំពលរដ្ឋ ៩៩៨គ្រួសារទៅទីតាំងផ្សេង ដែលរហូតមកដល់ពេលនេះពួកគាត់មិនទាន់ទទួលបានដីសម្បទានសេដ្ឋកិច្ចនៅឡើយ។
ចំណែកអភិបាលរងខេត្តក្រចេះ និងជាប្រធានក្រុមការងារចុះដោះស្រាយបញ្ហាដីធ្លីនៅស្រុកឆ្លូង លោក ខ័ណ្ឌ ចំណាន ស្វាគមន៍ការអន្តរាគមន៍នានារបស់ថ្នាក់លើ។ លោកអភិបាលខេត្តរងមានប្រសាសន៍ទៀតថា ករណីដីធ្លីនេះអាជ្ញាធរខេត្តបានដោះស្រាយជាដំណាក់កាលៗ ស្ទើររួចអស់ហើយ។ លោកថា នៅពេលនេះអាជ្ញាធរខេត្តនៅរង់ចាំតែការសម្រេចពីរដ្ឋាភិបាលប៉ុណ្ណោះ ដើម្បីប្រទានកម្ម និងកាត់ដីពីដីក្រុមហ៊ុនទៅជូនពលរដ្ឋ៖ «យើងបានស្នើទៅរដ្ឋាភិបាល គឺសុំដីរដ្ឋ និងកាត់ដីពីក្រុមហ៊ុន»។
កាលពីខែកុម្ភៈ គណៈកម្មការទី១សភា បានចុះសិក្សាស្រាវជ្រាវករណីដីធ្លីនៅក្នុងខេត្តក្រចេះ និងបានរកឃើញថា មន្ត្រីខិលខូចបានយកឈ្មោះប្រជាពលរដ្ឋធ្វើជាលេស ដើម្បីសុំដីសម្បទានសេដ្ឋកិច្ចពីរដ្ឋាភិបាលអស់ជាង ២ម៉ឺនហិកតារ និងស្នើសុំកាត់ដីសម្បទានសេដ្ឋកិច្ចពីក្រុមហ៊ុននានា ប៉ុន្តែដីទាំងនោះបានតែបក្ខពួកគេប៉ុណ្ណោះ ចំណែកពលរដ្ឋក្រីក្រនៅតែគ្មានដីរស់នៅបង្កបង្កើនផលដដែល។
រដ្ឋលេខាធិការទីស្ដីការគណៈរដ្ឋមន្ត្រី លោក ផៃ ស៊ីផាន ឲ្យដឹងថា លិខិតដែលផ្ញើមកនាយករដ្ឋមន្ត្រីទាក់ទងរឿងដីធ្លីដូចនេះ គឺក្រសួងមានសមត្ថកិច្ចដែលធ្វើការងារទាក់ទងរឿងនេះ រួមមាន ក្រសួងរៀបចំដែនដី នគរូបនីយកម្ម និងសំណង់ ក្រសួងកសិកម្ម រុក្ខាប្រមាញ់ និងនេសាទ និងក្រសួងបរិស្ថាន ជាអ្នកឆ្លើយបំភ្លឺ៖ «អ្នកដែលមានសិទ្ធិចូលបំភ្លឺនៅរដ្ឋសភា គឺនាយករដ្ឋមន្ត្រី និងអ្នកបន្តទៀតមកដែលតូចបំផុត គឺរដ្ឋលេខាធិការ»។
មន្ត្រីស៊ើបអង្កេតនៃសមាគមការពារសិទ្ធិមនុស្សអាដហុក (adhoc) លោក ហេង ភារៈ និយាយថា ករណីដីធ្លីនៅស្រុកឆ្លូង របស់ពលរដ្ឋ ៩៩៨គ្រួសារ ដែលអាជ្ញាធរខេត្តដោះស្រាយមិនចេញដូចនេះ ព្រោះមានជាប់ពាក់ព័ន្ធមន្ត្រីយោធាជាន់ខ្ពស់ និងឈ្មួញមានលុយនៅក្នុងរឿងនេះ។
ប្រធានគណៈកម្មការទី១រដ្ឋសភា លោក អេង ឆៃអ៊ាង បន្តថា ប្រសិនបើរដ្ឋាភិបាលមិនឆ្លើយតបលិខិតនេះ លោកនឹងកោះអញ្ជើញមន្ត្រីរដ្ឋាភិបាលដែលទាក់ទងរឿងនេះមកឆ្លើយបំភ្លឺនៅរដ្ឋសភា៕