អ្នកជំនាញ៖ ការវាយកម្ទេចអគារប៊ូឌីងត្រូវការចំណាយពេល៤ខែ
2017.07.17
គ្រឿងចក្រត្រៀមវាយកម្ទេចអគារប៊ូឌីងនៅថ្ងៃទី១៧ ខែកក្កដា ឆ្នាំ២០១៧។
RFA/Brach Chev
ក្រោយពេលក្រសួងដែនដី ដោះស្រាយបញ្ហាសំណងដល់ពលរដ្ឋរស់នៅអគារប៊ូឌីងជិត ៥០០គ្រួសារបានសម្រេចទាំងស្រុងរួចហើយ ការងារបន្ទាប់ គឺវាយកម្ទេចអគារចោល។ ក្រុមមន្ត្រីជំនាញអះអាងថា ពួកគេត្រូវចំណាយពេល ៤ខែ ដើម្បីវាយកម្ទេចអគារប៊ូឌីងទាំងស្រុង។
ថ្ងៃទី១៧ ខែកក្កដា ជាថ្ងៃទីមួយនៃការចាប់ផ្តើមវាយកម្ទេចអគារប៊ូឌីង ឬហៅថាអគារស។ ក្រុមមន្ត្រីក្រសួងដែនដី និងតំណាងក្រុមហ៊ុន អារ៉ាកាវ៉ា (Arakawa) របស់ជប៉ុន ពលរដ្ឋរស់នៅប៊ូឌីង និងអ្នកពាក់ព័ន្ធប្រមាណ ៣០នាក់ នាំគ្នារៀបចំពិធីក្រុងពាលីនៅលើដំបូលអគារប៊ូឌីង សុំទឹកសុំដីតាមទំនៀមទម្លាប់ខ្មែរ មុននឹងចាប់ផ្តើមវាយកម្ទេចអគារ។
អ្នកជំនាញផ្នែកវាយកម្ទេចអគារនៃក្រុមហ៊ុនពិស្ណុការ (PISNOKA) លោក ហេង ប៊ុននី ដែលទទួលបានសិទ្ធិវាយកម្ទេចអគារប៊ូឌីង ឲ្យដឹងថា ថ្ងៃចាប់ផ្ដើមដំបូងគ្រាន់តែសម្អាតទីធ្លាអគារ ធ្វើរបងហ៊ុមព័ទ្ធបរិវេណ។ លោកថា សកម្មភាពវាយកម្ទេចអាចនឹងចាប់ផ្ដើមយ៉ាងហោចណាស់មួយអាទិត្យទៀត។ លោកពន្យល់ថា ដើម្បីសុវត្ថិភាពអ្នករស់នៅជុំវិញ ចាំបាច់ត្រូវឲ្យគ្រឿងចក្រច្របាច់បំបែកទម្លាក់ចុះបំណែកសំណង់ និងមានបាញ់ទឹកផង ដើម្បីការពារកុំឲ្យធូលីហុយ៖ «ត្រូវការលឿនរយៈបីបួន (ខែ) ហ្នឹង ធ្វើកម្លាំងមិនបានទេ ត្រូវគ្រឿងចក្រ ហើយគ្រឿងចក្រហ្នឹងបើប្រើគ្រឿងធំៗម៉ង អត់បានទេ»។
ថ្ងៃចាប់ផ្តើមវាយកម្ទេចអគារនេះដែរ ឃើញមានគ្រឿងចក្រសម្រាប់វាយកម្ទេចអគារប្រមាណ ៤គ្រឿងដាក់តម្រៀបគ្នានៅមុខអគារ ក្រៅពីនេះក៏មានរបងបារ៉ាស់ដែលដាក់បម្រាមគ្មានភារកិច្ចហាមចូលនៅបរិវេណនេះដែរ។ ដោយឡែកក្រុមពលរដ្ឋ ៧គ្រួសារដែលទើបយល់ព្រមចាកចេញ មិនទាន់រើអីវ៉ាន់ចេញពីបន្ទប់អស់នៅឡើយទេ។
អគ្គនាយកនៃអគ្គនាយកដ្ឋានលំនៅឋាននៃក្រសួងដែនដី លោក បេងហុង សុជាតិ ខេមរ៉ូ ឲ្យដឹងថា ក្រសួងទុកពេលដល់ថ្ងៃទី២០ ខែកក្កដា ដល់ពលរដ្ឋដែលរើអីវ៉ាន់មិនទាន់រួចរាល់។ មន្ត្រីជំនាញរូបនេះអះអាងថា ការវាយកម្ទេចអគារនេះធ្វើតាមបច្ចេកទេសទំនើប ការពារសំឡេងរំខាន ការពារធូលីហុយ គោរពម៉ោងពេល មិនឲ្យរំខានដល់ពលរដ្ឋរស់នៅជុំវិញនេះទេ៖ «មានពីដំណាក់កាលមួយគាត់លក់ លក់ហ្នឹងបានមួយរយភាគរយតាំងពីថ្ងៃទី១៥ ខែកក្កដា។ ទី២ គឺអ្នកចាកចេញ ហើយអ្នកចាកចេញនៅតែសល់បួន ឬប្រាំគ្រួសារទេដែលគាត់នឹងរើបណ្ដើរៗ»។
តាមគម្រោង ទឹកប្រាក់វិនិយោគប្រមាណ ៨០លានដុល្លាររបស់ក្រុមហ៊ុន អារ៉ាកាវ៉ា (Arakawa) របស់ជប៉ុន នឹងអភិវឌ្ឍអគារប៊ូឌីងទៅជាអគារទំនើបមានកម្ពស់ ២១ជាន់ ដែលត្រូវការពេលវេលាសាងសង់ប្រមាណ ៤ឆ្នាំ។ ពលរដ្ឋជិត ៥០០គ្រួសាររស់នៅអគារនេះ យល់ព្រមចាកចេញដែលទទួលសំណងនៃការលក់បន្ទប់តម្លៃ ១.៤០០ដុល្លារក្នុងមួយម៉ែត្រការ៉េ។
ពលរដ្ឋម្នាក់ក្នុងចំណោមពលរដ្ឋ ៧គ្រួសារដែលចាកចេញក្រោយគេ ព្រោះរង់ចាំសុំសំណងបន្ថែម លោកស្រី ឈុំ សាគន ឲ្យដឹងថា លោកស្រីមិនទាន់រើអីវ៉ាន់ចេញអស់នៅឡើយ។ ស្ត្រីដែលរស់នៅអគារប៊ូឌីងរយៈពេលជាង ៣០ឆ្នាំ ប្រាប់ថា ថវិកាដែលលក់បន្ទប់អាចធ្វើឲ្យលោកស្រីទិញផ្ទះល្វែងមួយកន្លែងក្នុងសង្កាត់ចាក់អង្រែ ខណ្ឌមានជ័យ៖ «ដល់ឥឡូវខាងក្រុមហ៊ុនគាត់ដោះស្រាយឲ្យពួកខ្ញុំអាចទិញផ្ទះបាន ចា៎! សម្រាប់ខ្ញុំផ្ទាល់ ខ្ញុំសប្បាយចិត្ត ឯកឧត្តម ជា សុផារ៉ា គាត់ដោះស្រាយទៅបានរលូន»។
ទាក់ទងការចាកចេញពីអគារប៊ូឌីងនេះដែរ ក្រុមសិល្បៈដែលរស់នៅទីនេះស្នើទៅរដ្ឋមន្ត្រីក្រសួងដែនដី លោក ជា សុផារ៉ា និងក្រុមហ៊ុនវិនិយោគ នៅពេលអគារកើតចេញជារូបរាងនៅលើទឹកដីចាស់នេះ រៀបចំផ្នែកណាមួយនៃអគារឲ្យក្រុមសិល្បៈ ជាពិសេសសិល្បៈបុរាណខ្មែរ អាចសម្ដែងនៅទីនេះបាន។
ឆ្លើយតបសំណើនេះ អគ្គនាយកនៃអគ្គនាយកដ្ឋានលំនៅឋាននៃក្រសួងដែនដី លោក បេងហុង សុជាតិ ខេមរ៉ូ ប្រាប់ថា រដ្ឋមន្ត្រីក្រសួងដែនដី បានឃើញសំណើនេះ និងបានបញ្ជូនទៅក្រុមហ៊ុន អារ៉ាកាវ៉ា ដើម្បីសម្រេច។ ជាងនេះទៅទៀត លោកយល់ថា ក្រុមហ៊ុនជប៉ុន អាចនឹងយល់ព្រមលើសំណើនេះ ព្រោះលោកថា ក្រុមហ៊ុននេះយកគោលការណ៍សង្គមជាមូលដ្ឋាន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- វៀតណាមព្រមានថា ព្រែកជីកហ្វូណនតេជោអាចជួយសម្រួលវត្តមានយោធាចិនក្នុងទឹកដីកម្ពុជាកាន់តែជ្រៅ
- ពលរដ្ឋនៅតំបន់បឹងតាមោក ចោទប្រកាន់អាជ្ញាធរខណ្ឌព្រែកព្នៅថា ប្រើអំពើហិង្សា
- អាជ្ញាធរក្រុងភ្នំពេញមិនអនុញ្ញាតឱ្យបក្សកម្លាំងជាតិធ្វើបាតុកម្ម នៅទីលានប្រជាធិបតេយ្យ
- ក្រសួងដែនដីបានហៅអតិថិជនបុរីពិភពថ្មីទៅពិភាក្សា ដើម្បីរកដំណោះស្រាយ
- ពលរដ្ឋខ្មែរ-អូស្ត្រាលីម្នាក់ ដែលរិះគន់រដ្ឋាភិបាលកម្ពុជា រងការវាយដំពីជនមិនស្គាល់មុខមួយក្រុម ពេលទៅលេងស្រុកខ្មែរ
