ក្រុមហ៊ុនបាត់ដំបងខេ.ធីស៊ីម៉ិនថាមិនបានរំលោភយកដីពលរដ្ឋ២៦គ្រួសារនៅស្រុករតនមណ្ឌល
2016.07.13
ប្រជាពលរដ្ឋមានទំនាស់ដីធ្លីជាមួយក្រុមហ៊ុន បាត់ដំបង ខេធី ស៊ីម៉ិន (Battambang KT Cement) របស់ចិន នៅស្រុករតនមណ្ឌល ជួបជុំគ្នានៅក្រោមដើមពោធិ៍នាគបាញ់ទឹក ក្រុងបាត់ដំបង ក្រោយពីសុំអន្តរាគមន៍ពីអាជ្ញាធរខេត្ត កាលពីថ្ងៃទី១៤ ខែមិថុនា ឆ្នាំ២០១៦។ RFA/Hum Chamroeun
RFA/Hum Chamroeun
តំណាងក្រុមហ៊ុនបាត់ដំបង ខេ.ធី ស៊ីម៉ិន (BB KT Cement) របស់ជនជាតិចិន ស្រាយបំភ្លឺថា ក្រុមហ៊ុននេះធ្វើការរុករករ៉ែ ដើម្បីសាងសង់រោងចក្រផលិតស៊ីម៉ងត៍នៅស្រុករតនមណ្ឌល ខេត្តបាត់ដំបង ពុំបានរំលោភយកដីធ្លីពីប្រជាពលរដ្ឋចំនួន ២៦គ្រួសារដែលធ្លាប់តវ៉ាប្រឆាំងនឹងក្រុមហ៊ុនឡើយ។ ប្រជាពលរដ្ឋនៅតែអះអាងថា ក្រុមហ៊ុននេះបានឈូសឆាយលើដីទំនាស់ដែលអាជ្ញាធរពុំទាន់ដោះស្រាយ និងផ្ដល់សំណងជូនពួកគាត់នៅឡើយទេ។
តំណាងក្រុមហ៊ុនបាត់ដំបង ខេ.ធី ស៊ីម៉ិន របស់ជនជាតិចិន នៅស្រុករតនមណ្ឌល លោក ចាន់ ដារិទ្ធ មានប្រសាសន៍កាលពីថ្ងៃទី១១ កក្កដា ថា ដីដែលក្រុមហ៊ុនឈូសឆាយនៅភ្នំដូនមាយ ឃុំស្ដៅ នោះ ជាដីរបស់ក្រុមហ៊ុនដែលបានទិញពីប្រជាពលរដ្ឋភូមិដូនមាយ គឺពុំមែនជាដីរបស់អ្នកភូមិនោះឡើយ។ លោកអះអាងថា ក្រុមហ៊ុនមួយនេះពុំមានទំនាស់ជាមួយប្រជាពលរដ្ឋនោះទេ ក៏ប៉ុន្តែលោកបញ្ជាក់ថា កន្លងមក ប្រជាពលរដ្ឋតែងតែនាំគ្នាទៅរារាំងគ្រឿងចក្ររបស់ក្រុមហ៊ុននោះ ធ្វើឡើងដោយខុសច្បាប់ទៅវិញទេ៖ «ប្រជាជនដែលថាក្រុមហ៊ុនកាយដីឈ្មោះ ជួន នី នោះ គឺក្រុមហ៊ុនបានដោះស្រាយឲ្យប្រាក់អស់ទៅហើយ ប៉ុន្តែប្រជាពលរដ្ឋដែលទៅទាមទារនោះ ដីរបស់គាត់នៅលើភ្នំឯណោះទេ ហើយមិនមែនក្រុមហ៊ុនត្រូវដោះស្រាយជាមួយពួកគាត់ទេ»។
ឆ្លើយតបនឹងបញ្ហានេះ តំណាងប្រជាពលរដ្ឋមានទំនាស់ដីធ្លីនៅភូមិដូនមាយ អ្នកស្រី មុំ ពិសី អះអាងថា ផ្ទៃដីដែលក្រុមហ៊ុនចិន ឈូសឆាយបម្រុងសង់ផ្លូវនៅភ្នំដូនមាយ នោះ ជាដីមានទំនាស់របស់ពួកគាត់ដាំដុះតាំងពីឆ្នាំ១៩៩៥ មក។ អ្នកស្រីបញ្ជាក់ថា ក្រុមហ៊ុនមួយនេះបានឈូសឆាយលើដីមានទំនាស់មិនទាន់ដោះស្រាយចប់នៅឡើយ៖ «អ្វីដែលគាត់និយាយនេះ មិនមែនជាការពិតទេ គឺដីដែលក្រុមហ៊ុនកាយជាដីរបស់លោក ជួន នី ហើយដីនៅខាងក្រោយភ្នំខាងក្រុមហ៊ុនបានឲ្យលុយមែន ប៉ុន្តែចំណុចដែលក្រុមហ៊ុនឈូសឆាយនោះ គឺមិនទាន់ឲ្យលុយនៅឡើយទេ»។
កាលពីថ្ងៃទី៧ កក្កដា ប្រជាពលរដ្ឋប្រមាណ ៣០នាក់បានតវ៉ានៅភ្នំដូនមាយ ឃុំស្ដៅ ដើម្បីឲ្យអាជ្ញាធរស្រុករតនមណ្ឌល បញ្ឈប់គ្រឿងចក្ររបស់ក្រុមហ៊ុនចិន ឈូសឆាយដីដែលពួកគាត់អះអាងថា ជាតំបន់ដីមានទំនាស់ប្រមាណ ២០ហិកតារ អាជ្ញាធរមិនទាន់ដោះស្រាយសំណងជូនពួកគាត់នៅឡើយ។
អភិបាលរងស្រុករតនមណ្ឌល លោក ហ៊ុន ហូ ធ្លាប់មានប្រសាសន៍ខណៈចុះទៅជួបក្រុមអ្នកតវ៉ានៅទីកន្លែងដីទំនាស់ថា អាជ្ញាធរខេត្តបាត់ដំបង និងមន្ត្រីពាក់ព័ន្ធ កំពុងដំណើរដោះស្រាយលើការងារនេះជូនប្រជាពលរដ្ឋ។
ទោះបីជាយ៉ាងនេះក្ដី មន្ត្រីសម្របសម្រួលសមាគមការពារសិទ្ធិមនុស្សអាដហុក (ADHOC) ខេត្តបាត់ដំបង លោក យិន ម៉េងលី ស្នើឲ្យអាជ្ញាធរពាក់ព័ន្ធបង្កើតគណៈកម្មការចុះដោះស្រាយករណីនេះដោយអព្យាក្រឹត្យ និងមិនលម្អៀង៖ «អ៊ីចឹងខ្ញុំនឹងចុះទៅតំបន់នោះដែរ ដើម្បីពិនិត្យមើល ព្រោះក្រុមហ៊ុនក៏បានអះអាងថាបានទិញពីប្រជាពលរដ្ឋ ១៣៤គ្រួសារ។ យើងចង់ដឹងថា ដីដែលក្រុមហ៊ុនទិញនោះជាម្ចាស់ដីពិតប្រាកដ ឬក៏មានអ្នកបន្លំលួចយកដីលក់ឲ្យក្រុមហ៊ុន»។
ក្រុមហ៊ុនចិន មួយនេះ មានអាជ្ញាប័ណ្ណរុករករ៉ែដើម្បីសង់រោងចក្រផលិតស៊ីម៉ងត៍លើផ្ទៃដីជាង ២៧០ហិកតារ នៅភូមិដូនមាយ ឃុំស្ដៅ ស្រុករតនមណ្ឌល ខេត្តបាត់ដំបង។ តំណាងក្រុមហ៊ុននេះអះអាងថា ក្រុមហ៊ុនចំណាយដើមទុន ២៣៥លានដុល្លារសហរដ្ឋអាមេរិក (២៣៥.០០០.០០០ដុល្លារ) ក្នុងនោះជនជាតិចិន មានភាគហ៊ុនប្រមាណ ៦០ភាគរយ និងខ្មែរ ៤០ភាគរយ។ រោងចក្រនេះនឹងដំណើរការនៅដើមឆ្នាំ២០១៨ ហើយអាចផលិតស៊ីម៉ងត៍បានប្រមាណ ៥ពាន់តោនក្នុងមួយថ្ងៃ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- វៀតណាមព្រមានថា ព្រែកជីកហ្វូណនតេជោអាចជួយសម្រួលវត្តមានយោធាចិនក្នុងទឹកដីកម្ពុជាកាន់តែជ្រៅ
- ពលរដ្ឋនៅតំបន់បឹងតាមោក ចោទប្រកាន់អាជ្ញាធរខណ្ឌព្រែកព្នៅថា ប្រើអំពើហិង្សា
- អាជ្ញាធរក្រុងភ្នំពេញមិនអនុញ្ញាតឱ្យបក្សកម្លាំងជាតិធ្វើបាតុកម្ម នៅទីលានប្រជាធិបតេយ្យ
- ក្រសួងដែនដីបានហៅអតិថិជនបុរីពិភពថ្មីទៅពិភាក្សា ដើម្បីរកដំណោះស្រាយ
- ពលរដ្ឋខ្មែរ-អូស្ត្រាលីម្នាក់ ដែលរិះគន់រដ្ឋាភិបាលកម្ពុជា រងការវាយដំពីជនមិនស្គាល់មុខមួយក្រុម ពេលទៅលេងស្រុកខ្មែរ
