ពលរដ្ឋមួយគ្រួសារនៅខេត្តក្រចេះចោទមេភូមិថាឃុបឃិតរំលោភយកដីពួកគាត់
2016.05.29
ពលរដ្ឋបង្ហាញទីតាំងដីមានវិវាទទៅមន្ត្រីអាដហុក (ADHOC) ឋិតនៅភូមិគ្រង ឃុំស្នួល ស្រុកស្នួល ខេត្តក្រចេះ កាលពីដើមខែឧសភា ឆ្នាំ២០១៦។ Photo ADHOC
Photo ADHOC
ពលរដ្ឋមួយគ្រួសាររស់នៅភូមិគ្រង ឃុំស្នួល ស្រុកស្នួល ខេត្តក្រចេះ ចោទមេភូមិគ្រង ថាឃុបឃិតជាមួយមេភូមិក្បាលស្នួល រំលោភយកដីគាត់។ ពលរដ្ឋថា មេភូមិរូបនោះបានយកដីគាត់ប្រគល់ឲ្យអាជ្ញាធរភូមិផ្សេងទៀតកាន់កាប់កាលពីចុងឆ្នាំ២០១៥ និងហាមឃាត់ពួកគាត់មិនឲ្យបង្កបង្កើនផល។ ចំណែកមេភូមិគ្រង បដិសេធការចោទប្រកាន់នេះ។
ពលរដ្ឋមួយគ្រួសាររស់នៅឃុំស្នួល ស្រុកស្នួល នៅថ្ងៃទី២៨ ឧសភា អំពាវនាវឲ្យអាជ្ញាធរខេត្ត និងស្ថាប័នពាក់ព័ន្ធ អន្តរាគមន៍ករណីមេភូមិគ្រង លោក យឹង គឹមស្រីន និងមេភូមិក្បាលស្នួល លោក ឡុង នឿន បំពានដីធ្លីពួកគាត់ជិត ៨ហិកតារកាន់កាប់ជាសម្បត្តិផ្ទាល់ខ្លួន។
ពលរដ្ឋរស់នៅភូមិគ្រង លោកស្រី រស់ សុខុម រៀបរាប់ថា លោកស្រីមានដីជិត ៨ហិកតារឋិតនៅភូមិគ្រង ឃុំស្នួល ស្រុកស្នួល កាន់កាប់នៅឆ្នាំ២០០៥ ដាំដំណាំដំឡូង សណ្ដែករៀងរាល់ឆ្នាំ។ រហូតដល់ចុងឆ្នាំ២០១៥ មេភូមិគ្រង លោក យឹង គឹមស្រីន ហាមលោកស្រីមិនឲ្យដាំដំណាំលើដីនោះ ដោយសំអាងថា ជាដីរបស់មេភូមិក្បាលស្នួល លោក ឡុង នឿន។
លោកស្រីកត់សម្គាល់ថា កាលពីឆ្នាំ២០១២ លោក យឹង គឹមស្រីន បានហាមមិនឲ្យក្រុមនិស្សិតវាស់វែងដីរបស់លោកស្រី សំអាងថា ដីនេះកំពុងមានវិវាទ។ ចំណែកក្រុមនិស្សិតបានដកទិន្នន័យចេញពីនៅតំបន់នោះ ស្រាប់តែចុងឆ្នាំ២០១៥ មេភូមិក្បាលស្នួល លោក ឡុង នឿន អះអាងថា គេមានប្លង់កម្មសិទ្ធិគ្រប់គ្រងដីនេះស្របច្បាប់៖ «លោក ឡុង នឿន គាត់រំលោភខ្ញុំ អយុត្តិធម៌ខ្លាំងណាស់។ ខ្ញុំម្ចាស់ដី ហើយគេធ្វើប្លង់លើដីយើង។ យើងអ្នកម្ចាស់កម្មសិទ្ធិគ្មានសិទ្ធិធ្វើ។ គេហាមឃាត់មិនឲ្យខ្ញុំធ្វើ ហើយគេគំរាមខ្ញុំទៀត យកខ្នោះកាំភ្លើងគំរាមខ្ញុំរកចាប់ខ្ញុំដាក់គុក»។
ឆ្លើយតបការចោទប្រកាន់នេះ មេភូមិគ្រង លោក យឹង គឹមស្រីន អះអាងថា ពលរដ្ឋដែលចោទលោក គឺជាកម្មករចំណាកស្រុកមករស់នៅតាំងពីក្រុមហ៊ុនសម្បទានសេដ្ឋកិច្ចកូរ៉េ មកវិនិយោគដីនៅតំបន់នោះមុនឆ្នាំ២០០៨។ លោកកត់សម្គាល់ថា ដីនោះក្រុមនិស្សិតបានវាស់វែងផ្តល់ប្លង់កម្មសិទ្ធិឲ្យឈ្មោះ ឡុង នឿន តាំងពីឆ្នាំ២០១៣។ លោកថា ដីនោះជាដីរបស់លោក ឡុង នឿន គ្រប់គ្រងមុនពេលរដ្ឋាភិបាលមិនទាន់វិនិយោគឲ្យក្រុមហ៊ុនសម្បទានសេដ្ឋកិច្ចរបស់កូរ៉េ មុនឆ្នាំ២០០៧៖ «ខ្ញុំសូមបញ្ជាក់ថា គាត់មកតាមរយៈក្រុមហ៊ុន ហើយសួរថា គាត់មានដីដែរ? គាត់ស្រុកកំណើតនៅហ្នឹងដែរ? ហើយ ឡុង នឿន កាលពីមុនក៏ធ្វើមេភូមិ បច្ចុប្បន្នក៏ធ្វើមេភូមិដែរ។ ធម្មតារដ្ឋសម្បទានឲ្យក្រុមហ៊ុនហើយ អ្នកធ្វើការដើរចេញដោយសារតែពេលនោះក្រុមហ៊ុនឈូសឆាយអ៊ីចឹងទៅ»។
វិទ្យុអាស៊ីសេរី មិនអាចរកប្រភពទាក់ទងមេភូមិក្បាលស្នួល លោក ឡុង នឿន ដើម្បីសុំការបំភ្លឺជុំវិញការចោទប្រកាន់នេះបានទេនៅថ្ងៃទី២៨ ឧសភា។
អភិបាលស្រុកស្នួល លោក គង់ គឹមនី បញ្ជាក់ថា អាជ្ញាធរស្រុកបានទទួលពាក្យបណ្ដឹងនេះហើយ។ លោកថា អាជ្ញាធរមិនអាចសម្របសម្រួលវិវាទដីធ្លីនេះបានទេ ព្រោះភាគីម្ខាងមានប្លង់កម្មសិទ្ធិ ឬប្លង់រឹង៖ «គេចេញប័ណ្ណកម្មសិទ្ធិ គឺគេបានបំពេញនីតិវិធី។ ខាងសុរិយោដីគេបានបិទផ្សាយបិទអីសព្វបែបយ៉ាងចឹង។ ផុតពីដៃអាជ្ញាធរហើយ»។
មន្ត្រីស៊ើបអង្កេតនៃសមាគមអាដហុក (ADHOC) ខេត្តក្រចេះ លោក ឌិន ខន្នី ដែលបានចុះអង្កេតករណីនេះរកឃើញថា ការផ្តល់ប្លង់កម្មសិទ្ធិអាចមានភាពមិនប្រក្រតី ខណៈដីកំពុងមានវិវាទ ស្រាប់តែភាគីម្ខាងមានប្លង់កម្មសិទ្ធិគ្រប់គ្រងដីនោះ។ លោកទាមទារឲ្យមន្ត្រីសុរិយោដី ពិនិត្យលិខិតបទដ្ឋាននានាស្ដីពីការផ្តល់ប្លង់កម្មសិទ្ធិនោះ ថាអនុលោមតាមច្បាប់ ឬយ៉ាងណា? លោកថា ដីកំពុងមានវិវាទ អាជ្ញាធរជំនាញពុំអាចមានសិទ្ធិផ្តល់ប្លង់កម្មសិទ្ធិបានទេ ដរាបណាមិនទាន់ដោះស្រាយចប់ជាស្ថាពរ៖ «មិនដឹងថាចេញប្លង់យ៉ាងម៉េច បើដីកំពុងមានវិវាទ។ មន្ត្រីសុរិយោដីគួរតែត្រួតពិនិត្យឡើងវិញទាក់ទងប្លង់ហ្នឹង។ ថាតើប្លង់ហ្នឹងចេញត្រឹមត្រូវតាមច្បាប់អត់? ចេញដោយលក្ខណៈឃុបឃិត ឬចេញដោយមន្ទីរសុរិយោដីអ្នកចេញ។ ចឹងយើងគួរតែស្រាវជ្រាវឡើងវិញ»។
លោកស្រី រស់ សុខុម ឲ្យដឹងទៀតថា កាលពីខែមីនា ឆ្នាំ២០១៦ ក្រុមគ្រួសារលោក ឡុង នឿន ធ្លាប់គំរាមលោកស្រីចាប់ដាក់គុក បើលោកស្រីនៅមានះទាមទារដីនោះបន្តទៀត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- វៀតណាមព្រមានថា ព្រែកជីកហ្វូណនតេជោអាចជួយសម្រួលវត្តមានយោធាចិនក្នុងទឹកដីកម្ពុជាកាន់តែជ្រៅ
- ពលរដ្ឋនៅតំបន់បឹងតាមោក ចោទប្រកាន់អាជ្ញាធរខណ្ឌព្រែកព្នៅថា ប្រើអំពើហិង្សា
- អាជ្ញាធរក្រុងភ្នំពេញមិនអនុញ្ញាតឱ្យបក្សកម្លាំងជាតិធ្វើបាតុកម្ម នៅទីលានប្រជាធិបតេយ្យ
- ក្រសួងដែនដីបានហៅអតិថិជនបុរីពិភពថ្មីទៅពិភាក្សា ដើម្បីរកដំណោះស្រាយ
- ពលរដ្ឋខ្មែរ-អូស្ត្រាលីម្នាក់ ដែលរិះគន់រដ្ឋាភិបាលកម្ពុជា រងការវាយដំពីជនមិនស្គាល់មុខមួយក្រុម ពេលទៅលេងស្រុកខ្មែរ
