ពលរដ្ឋដែលមានជម្លោះដីធ្លីប្រមាណ ៨០នាក់ និងព្រះសង្ឃប្រមាណ ២០អង្គ ដង្ហែក្បួនដាក់ញត្តិនៅការិយាល័យអង្គការសហប្រជាជាតិ ទទួលបន្ទុកសិទ្ធិមនុស្សប្រចាំកម្ពុជា តាមស្ថានទូតមួយចំនួន និងរដ្ឋសភា នៅថ្ងៃទី១៥ ខែមករា។
ស្ថានទូតទាំងនោះមាន ស្ថានទូតបារាំង អង់គ្លេស អាមេរិក អាល្លឺម៉ង់ សហភាពអឺរ៉ុប អូស្ត្រាលី ជប៉ុន និងកូរ៉េខាងត្បូង។
គោលបំណងនៃការដាក់ញត្តិនេះ គឺស្នើសុំឯកអគ្គរដ្ឋទូត និងរាជទូតទាំងអស់ ចូលរួមឃ្លាំមើលសវនាការកាត់ទោសស្ត្រីសកម្មជនដីធ្លីទាំង ១០នាក់ នៅសាលាឧទ្ធរណ៍ថ្ងៃទី២២ ខែមករា។
អ្នកស្រី ឆាយ គឹមហ៊ន តំណាងអ្នកបុរីកីឡា ដែលចូលរួមដាក់ញត្តិនៅព្រឹកនេះថ្លែងថា មន្ត្រីតំណាងទូតបានឆ្លើយតបថា ពួកគេនឹងចូលរួមតាមដានរឿងនេះតាមការស្នើសុំរបស់ពលរដ្ឋខ្មែរ។ ក្រុមសហគមន៍សង្ឃឹមថា មន្ត្រីតំណាងទូតទាំងអស់ នឹងតាមដានសវនាការដើម្បីជាសក្ខីភាពមួយផ្តល់យុត្តិធម៌ឲ្យសកម្មជនដីធ្លីដែលកំពុងជាប់ឃុំ៖ «ខ្ញុំសង្ឃឹមថា គ្រប់ទូតទាំងអស់នឹងរួមតាមដានករណីនេះ ហើយក៏សង្ឃឹមថា តុលាការនឹងដោះលែងពួកគាត់ជាបន្ទាន់ ព្រោះគាត់តែទាមទារនូវសិទ្ធិ និងដីធ្លីរបស់គាត់»។
ការដើរហែក្បួននេះ មានការឃ្លាំមើលយ៉ាងប្រុងប្រយ័ត្នពីនគរបាលស្លៀកពាក់ស៊ីវិល និងឯកសណ្ឋាន ហើយក៏មានការដាក់រនាំងដែកពីរជាន់ឈរអមដោយកងសន្តិសុខខណ្ឌដូនពេញ នៅពីមុខ និងសមត្ថកិច្ចប្រដាប់ដោយខែល និងដំបងនៅពីក្រោយ នៅពេលពលរដ្ឋដើរដាក់ញត្តិដល់ស្ថានទូតសហភាពអឺរ៉ុប ក្បែរផ្ទះលោកនាយករដ្ឋមន្ត្រី ហ៊ុន សែន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។