យាយតាអាយុជិត៨០ឆ្នាំបន្តសុំឲ្យលោកហ៊ុនសែនលើករណីក្រុមហ៊ុនអៀងសុធារ៉ារំលោភយកដីធ្លី
2015.03.29
ប្ដីប្រពន្ធវ័យជិត ៨០ឆ្នាំ បច្ចុប្បន្នមានទីលំនៅស្ថិតក្នុងសង្កាត់ទំនប់រលក ស្រុកស្ទឹងហាវ ខេត្តព្រះសីហនុ បន្តស្វែងរកកិច្ចអន្តរាគមន៍ ពីប្រមុខដឹកនាំរដ្ឋាភិបាល ឲ្យជួយរកយុត្តិធម៌លើវិវាទដីធ្លី។ ពួកគាត់អះអាងថា ត្រូវក្រុមហ៊ុនអៀងសុធារ៉ា បានឃុបឃិតលួចធ្វើប្លង់កម្មសិទ្ធិរំលោភយកដីកសិកម្មជាង ៥ហិកតារ ធ្លាប់រស់អាស្រ័យផលក្រោយឆ្នាំ១៩៨៩ នៅឃុំកែវផុស។
បញ្ហានេះ តំណាងក្រុមហ៊ុន អៀង សុធារ៉ា បដិសេធន៍ថា ក្រុមហ៊ុននេះ មិនបានរំលោភបំពានដីធ្លីកសិកម្ម ឬដីលំនៅឋានមនុស្សចាស់ទាំងពីរនាក់ ប្ដីប្រពន្ធដូចការចោទទេ ដោយអះអាងថា សកម្មភាពអភិវឌ្ឍរបស់ក្រុមហ៊ុននេះ ប្រកបដោយសុចរិត នៅលើដីមានប្លង់កម្មសិទ្ធិស្របច្បាប់។ ជាពិសេសជម្លោះដីធ្លីនេះ ក្រុមហ៊ុនបានឈ្នះក្ដី ជារហូតនៅតុលាការគ្រប់ជាន់ថ្នាក់ នាពេលកន្លងមក។
ប្រជាពលរដ្ឋ៤ភូមិ រស់នៅសង្កាត់ទំនប់រលក ស្រុកស្ទឹងហាវ បានត្រៀមផ្ដិតស្នាមមេដៃ និងធ្វើសាក្សី ជូនប្ដីប្រពន្ធ វ័យចាស់ គឺឈ្មោះលោកតា នាង ឃិន និងលោកយាយ លាង យី មនុស្សទាំងពីរ ថាពិតជាធ្លាប់រស់នៅ និងអាស្រ័យផលលើដីកសិកម្ម មានទំហំជាង៥ហិកតារ នៅឃុំកែវផុស ក្រោយឆ្នាំ១៩៨៩ ដែលកាលណោះស្ថិតក្នុងរដ្ឋបាលខេត្តកោះកុងពិតប្រាកដមែន។
ក្រុមប្រជាពលរដ្ឋ បានចោទក្រុមហ៊ុន អៀង សុធារ៉ា ថាបានឃុបឃិតជាមួយស្ថាប័នពាក់ព័ន្ធ លួចធ្វើប្លង់កម្មសិទ្ធិរំលោភយកដីកសិកម្ម និងបំផ្លាញផ្ទះប្ដីប្រពន្ធវ័យចាស់ទាំងពីរនាក់ និងបានប្រើកម្លាំងទាហាន ដើម្បីគំរាមបណ្ដេញមនុស្សវ័យចាស់ទាំងពីរនាក់ ឲ្យចេញពីលំនៅឋាន កាលពីឆ្នាំ២០០៤ ហើយថែមទាំងប្ដឹងប្ដីប្រពន្ធពីរនាក់ រួមជាមួយអ្នកពាក់ព័ន្ធ ទៅកាន់តុលាការថែមទៀត។
ក្នុងកាយវិការលើកដៃសំពះទាំងញ័រញាក់ដោយវ័យជរា លោកតា នាង ឃិន ស្នើសុំកិច្ចអន្តរាគមន៍ ពីលោកនាយករដ្ឋមន្ត្រី ហ៊ុន សែន និងភរិយា ឲ្យជួយរកយុត្តិធម៌ដល់ពួកគាត់ ដែលត្រូវក្រុមហ៊ុន អៀង សុធារ៉ា រំលោភយកដីកសិកម្មជាង ៥ហិកតារ (៥២,៤០០ម៉ែត្រការ៉េ) នៅតំបន់ពយយាយម៉ី ប្រគល់ជូនគាត់គ្រប់គ្រងវិញ។
ផ្ដល់សម្ភាសន៍ដល់វិទ្យុអាស៊ីសេរី ក្រោមខ្ទមប្រក់ស័ង្កសីក៏តូចចង្អៀត ដែលសង់នៅលើភក់ជ្រាំ ក្នុងសង្កាត់ទំនប់រលក ស្រុកស្ទឹងហាវប្ដីប្រពន្ធវ័យចំណាស់នេះ មានក្ដីរំពឹងទៅលើដំណោះស្រាយ របស់ប្រមុខដឹកនាំ និងភរិយា ថា អាចផ្ដល់យុត្តិធម៌ដល់ពួកគាត់ មុនត្រូវសង្ខារលាចាកពីលោកនេះទៅ។
យាយតាទាំងពីរនាក់ បានអះអាងថា ដីជាង៥ហិកតារ របស់ពួកគាត់ ដែលបានកាប់រុកនាដីព្រៃតាំងពីឆ្នាំ១៩៨៩ ដល់ឆ្នាំ២០០៤ គឺមានដាំកសិកម្ម ឬដំណាំហូបផ្លែជាច្រើនប្រភេទ ក្នុងនោះ មានដាំដើមដូងរាប់រយដើម ប៉ុន្តែនៅពេលត្រូវឈ្មួញ ឬក្រុមហ៊ុនអៀង សុធារ៉ា ឃុបឃិតលួចធ្វើប្លង់រំលោភយក ក៏ត្រូវគេកាប់បំផ្លាញភស្តុតាងអស់គ្មានសល់ និងបានដាំដើមឫស្សីជំនួសវិញពេលបច្ចុប្បន្ននេះ។
លោកតា នាង ឃិន បានបន្តថា កាលពីសម័យរដ្ឋកម្ពុជា លោកបានផ្ដល់បន្លែផ្លែឈើ ឬត្រីសាច់ជូនកងទ័ពរដ្ឋាភិបាល ដែលប្រចាំការនៅតំបន់នោះស្ទើរជារៀងរាល់ថ្ងៃ។ ជាពិសេសក៏ធ្លាប់ជាអ្នកផ្ដល់ដំណឹងអំពីវត្តមានកងទ័ពខ្មែរក្រហមនៅតំបន់នោះ ជូនកងទ័ពរដ្ឋាភិបាល នៅតំបន់ពយយាយម៉ី ភូមិកែវផុស ដែលកាលណោះស្ថិតក្នុងដែនរដ្ឋបាលខេត្តកោះកុង ដើម្បីកម្ចាត់ខ្មាំងសត្រូវថែមទៀត៖ «សូមសម្ដេចអាណិតមេត្តាជួយដល់ខ្ញុំផង។ ចំពោះខ្ញុំក៏បានជួយជាតិក៏បានច្រើនដែរ រហូតដល់ខ្ញុំធ្វើចម្ការនៅតំបន់ពយយាយម៉ឺ បានផ្ដល់បន្លែត្រីសាច់ដល់កងទ័ពជាអាហារ រាល់ខែរាល់ថ្ងៃជាហូរហែមកដែរ»។
ទាក់ទិនបញ្ហានេះ កាលពីថ្ងៃទី១៦ ខែមីនា ឆ្នាំ២០១៥ មានមនុស្សក្មេងចាស់ប្រមាណជិត ១រយនាក់ បានប្រមូលផ្ដុំគ្នា នៅក្នុងបរិវេណសាលាស្រុកស្ទឹងហាវ ដើម្បីជួយធ្វើសាក្សីជូនមនុស្សចាស់ ២នាក់ប្ដីប្រពន្ធ ដោយចោទថា ក្រុមហ៊ុនអៀង សុធារ៉ា ពិតជាបានប្រើកម្លាំងប្រដាប់អាវុធ និងប្រពន្ធតុលាការ ដើម្បីប្លន់យកដីពីមនុស្សចាស់ទាំងពីររូបពិតមែន។
ឆ្លើយតបបញ្ហានេះ តំណាងក្រុមហ៊ុនអៀង សុធារ៉ា លោក សម ចេក បានប្រាប់វិទ្យុអាស៊ីសេរីថា ក្រុមហ៊ុននេះ មិនបានរំលោភបំពានដីធ្លីកសិកម្ម ឬលំនៅឋានប្ដីប្រពន្ធវ័យចាស់ទាំងពីរនាក់ ដូចការចោទនោះទេ។ ហើយថា សកម្មភាពអភិវឌ្ឍ របស់ក្រុមហ៊ុននៅក្នុងមូលដ្ឋានភូមិកែវផុស ឃុំកែវផុស ស្រុកស្ទឹងហាវ ខេត្តព្រះសីហនុ សព្វថ្ងៃនេះ គឺដីធ្លីទាំងនោះមានម្ចាស់កម្មសិទ្ធិចំនួន ១០នាក់ ហើយពួកគេមានប្លង់កម្មសិទ្ធិស្របច្បាប់។ លោកបដិសេធន៍រាល់ការចោទដែលថា ក្រុមហ៊ុនបានប្រើកម្លាំងប្រដាប់អាវុធ ទៅគំរាមរុះរើផ្ទះមនុស្សចាស់ទាំងពីររូបជារឿងមិនពិត។ ផ្ទុយពីនេះ លោកថា មនុស្សវ័យចាស់ទាំងពីរនាក់ និងគូកនមួយចំនួនទៅវិញទេ ទើបជាអ្នកបង្កព្យុះភ្លៀងបង្ខូចកេរ្តិ៍ឈ្មោះក្រុមហ៊ុន។
លោក សម ចេក តំណាងក្រុមហ៊ុនអៀង សុធារ៉ា បានចាត់ទុកការលើកយកបញ្ហាដីធ្លីនេះ របស់លោកតា នាង ឃិន និងលោកយាយ លាង យី ដែលក្រុមហ៊ុនបានឈ្នះក្ដីជារហូតកន្លងមក លើកមកសើរើពេលនេះ អាចមានបុគ្គលផ្សេងនៅពីក្រោយការតវ៉ានេះ៖ «ដីនេះគេមានម្ចាស់ត្រឹមត្រូវ និងមានប្រភពលទ្ធកម្មត្រឹមត្រូវ និងមិនមែនជារបស់ក្រុមហ៊ុនទេ។ ដីនៅភូមិកែវផុសនេះប្រវត្តិក្រុមហ៊ុនទិញមកជាដីទំនេរ ត្រូវភ្លើងឆេះទៅតាមរដូវកាលនៃខែប្រាំងចូលមកដល់។ ប្រសិនបើខ្ញុំឃើញថា ដីនេះមានចម្ការ ឬមានផ្ទះតាយាយ រួចហើយទៅវិញវាស់យក គឺមិនអាចធ្វើទៅកើតទេ។ បើធ្វើដូច្នេះគឺអាចកើតមានរឿងរ៉ាវ តាំងពីថ្ងៃវាស់ហ្នឹងមកម្ល៉េះមិនមែនរង់ចាំដល់ឆ្នាំ២០១៥នេះទេ»។
យ៉ាងនេះក្ដី ទាំងមេបញ្ជាការកងទ័ព និងប្រជាពលរដ្ឋ រស់នៅមូលដ្ឋានឃុំទប់នប់រលក ស្រុកស្ទឹងហាវ បានចេញមុខជួយធ្វើសាក្សីជូនប្ដីប្រពន្ធវ័យចាស់ទាំងពីរនាក់នេះដែរ។ សាក្សីបញ្ជាក់ថា ដោយ សារតែមនុស្សវ័យចាស់ទាំង២នាក់ មិនមានលទ្ធភាព ឬគ្មានថវិកា ដើម្បីធ្វើប្លង់កម្មសិទ្ធិគ្រប់គ្រងដី ធ្លាប់កាន់កាប់តាំងពីឆ្នាំ១៩៨៩មក ក៏ត្រូវក្រុមហ៊ុនអៀង សុធារ៉ា ឃុបឃិតលួចធ្វើប្លង់កម្មសិទ្ធិរំលោភ និងបណ្ដេញពីលំនៅឋាន។
ទំនាស់ដីធ្លីនេះ បានឈានដល់ ក្រុមហ៊ុនអៀង សុធារ៉ា បានដាក់ពាក្យប្ដឹងមនុស្សចាស់ទាំង ២នាក់ប្ដីប្រពន្ធ និងអ្នកឈឺឆ្អាលមួយចំនួន ទៅកាន់តុលាការ ដោយចោទពីបទ ធ្វើឲ្យខូចខាតទ្រព្យសម្បត្តិអ្នកដ៏ទៃ។ ហើយក្រុមហ៊ុន បានឈ្នះក្ដីនៅតុលាការគ្រប់ជាន់ថ្នាក់ជារហូត ព្រោះតុលាការសំអាងក្រុមហ៊ុនមានប្លង់កម្មសិទ្ធិកាន់កាប់ដីធ្លីត្រឹមត្រូវ។
មនុស្សជរាទាំង ២នាក់ប្ដីប្រពន្ធ ដែលបច្ចុប្បន្នប្រឹងត្រដររស់ ដោយធ្វើរបរនេសាទសមុទ្រ បានបង្ហាញអារម្មណ៍ក្ដុកក្ដួល កាលបើដីសង់លំនៅឋាន និងដីកសិកម្មធ្លាប់ដាំដំណាំ ឬបន្លែ ជួយផ្គត់ផ្គង់កងទ័ពរដ្ឋាភិបាល កាលពីសម័យរដ្ឋកម្ពុជា ធ្វើជាអាហារ ដើម្បីកម្ចាត់ខ្លាំងសត្រូវនោះ ប៉ុន្តែមកដល់ ស្រុកមានសន្តិភាព បែរជាដីកសិកម្មពួកគាត់ ត្រូវឈ្មួញ ឬក្រុមហ៊ុនឃុបឃិតលួចធ្វើប្លង់រំលោភយកទាំងអយុត្តិធម៌បំផុត។
ត្រង់ចំណុចនេះ លោក ទឹម យ៉ុន បច្ចុប្បន្នជានាយរងសេនាធិការតំបន់ប្រតិបត្តិការសឹករង ខេត្តព្រះសីហនុ និងជាអតីតជាមេបញ្ជាការយោធា ខណ្ឌស្ទឹងហាវ អះអាងថា ដីធ្លីរបស់លោកតា នាង ឃិន និងលោកយាយ លាង យី ទាំង ២នាក់ប្ដីប្រពន្ធ រូបគាត់ជាអ្នកអនុញ្ញាតឲ្យពួកគាត់ទៅកាប់រុករានធ្វើចម្ការ និងសង់ផ្ទះនៅតំបន់ពយយាយម៉ី កាលពីឆ្នាំ១៩៨៩។ លោកថា ការរំលោភដីលំនៅឋាន និងដីចម្ការប្ដីប្រពន្ធវ័យចាស់ទាំងពីរនាក់ ថាជារឿងអយុត្តិធម៌បំផុត។
មេទ័ពរូបនេះ បានអះអាងថា ទាំងពីរនាក់ ពិតជាធ្លាប់បានផ្ដល់បន្លែត្រីសាច់ និងជាអ្នកស៊ើបកការណ៍ផ្ដល់ព័ត៌មានពីវត្តមានកងទ័ពខ្មែរក្រហម ដែលឆ្លងកាត់តំបន់ពយយាយម៉ី ភូមិកែវផុស ជូនកងកម្លាំងទ័ពរបស់លោក ប្រចាំការនៅសមរភូមិជួរមុខ ក្នុងសម័យរដ្ឋកម្ពុជាពិតមែន។
ដោយផ្នែកលើគុណបំណាច់ពីអតីតកាលក្នុងនាមមេទ័ពម្នាក់ លោកសូមអំពាវនាវដល់លោកនាយករដ្ឋមន្ត្រី ហ៊ុន សែន និងភរិយា ដើម្បីជួយរកយុត្តិធម៌ជូនលោកតា នាង ឃិន និងលោកយាយ លាង យី ដោយអនុគ្រោះ៖ «យាយតាពីរនាក់ប្ដីប្រពន្ធគាត់ បានដាំដំណាំលើដីចម្ការ របស់គាត់មានដំណាំជាច្រើនមុខ។ មានចេក និងដូងជាដើមរាប់រយដើម។ កាលដែលខ្ញុំប្រគល់ឲ្យគាត់កាប់រុករាននៅឆ្នាំ១៩៨៩ គឺគាត់រុករានបានដីប្រមាណ ៥ហិកតារ ឬច្រើនជាងនេះ ហើយខ្ញុំក៏ឲ្យគាត់ដាំដំណាំលើដីចម្ការនៅតំបន់ពយយាយម៉ី ក្នុងគោលបំណងពីរយ៉ាង។ ទី១ គឺដើម្បីបម្រើដល់ជីវភាពក្រុមគ្រួសារគាត់ផង និងទី២ ឲ្យគាត់ធ្វើជាភ្នាក់ងារផ្ដល់ដំណឹងគ្រប់ពេលវេលា នៃដំណើរចេញចូលរបស់កងទ័ពខ្មែរក្រហមនៅតំបន់នោះ។ ព្រោះកាលណោះតំបន់នេះមានបញ្ហាស្មុគស្មាញ ឬប្រឈមមុខខ្លាំង រវាងកម្លាំងកងទ័ពរដ្ឋាភិបាលសម័យរដ្ឋកម្ពុជា ជាមួយកងទ័ពខ្មែរក្រហម។ ដូច្នេះយាយតាទាំងពីរនាក់ប្ដីប្រពន្ធ ពួកគាត់បានទៅធ្វើចម្ការនៅលើដី ភូមិកែវផុស ដែលមានទំនាស់ជាមួយក្រុមហ៊ុនអៀង សុធារ៉ា ជាយូរមកហើយ គឺចាប់តាំងពីឆ្នាំ១៩៨៩រហូតមក» ។
ទាក់ទិនបញ្ហានេះ គណៈកម្មាធិការសិទ្ធិមនុស្សកម្ពុជា ដែលមានលោក ម៉ក់ សម្បត្តិ ជាប្រធាន ក៏បានចេញលិខិតស្នើឲ្យអភិបាលខេត្តព្រះសីហនុ ជួយពិនិត្យដោះស្រាយករណីទំនាស់ដីធ្លី រវាងលោកតា នាង ឃិន និងលោក យា លាង យី ជាមួយលោក អៀង សុធារ៉ានេះដែរ។
កិច្ចអន្តរាគមន៍នេះ ធ្វើឡើងតាមពាក្យស្នើសុំអន្តរាគមន៍ របស់មនុស្សវ័យចាស់ទាំងពីរ ដែលបានស្នើសុំជួយឲ្យពួកគាត់ទទួលបានដីកាន់កាប់ស្របច្បាប់ឡើងវិញ។
លិខិតអន្តរាគមន៍ មានចុះហត្ថលេខា លោក ម៉ក់ សម្បត្តិ ប្រធានគណៈកម្មាធិការសិទ្ធិមនុស្សកម្ពុជា ក៏បានសង្កត់ធ្ងន់ថា ទំនាស់ដីធ្លីនេះ ស្ថាប័នខ្លួន ធ្លាប់បានចាត់មន្ត្រីចុះស៊ើបអង្កេតចំនួន២លើករួចមកហើយៗ រកឃើញថា ករណីនេះ ស្ថិតក្នុងសមត្ថកិច្ច របស់ថ្នាក់ដឹកនាំខេត្តព្រះសីហនុ ត្រូវដោះស្រាយ ប៉ុន្តែរហូតមកដល់ពេលនេះ ពុំទាន់មានការជួយពិនិត្យដោះស្រាយជូនយាយតាទាំង ២នាក់ប្ដីប្រពន្ធនៅឡើយទេ។
ឆ្លើយតបបញ្ហានេះ លោក ឈិត សុខុន កាលពីថ្ងៃទី២៤ ខែមីនា បញ្ជាក់ថា នឹងពិនិត្យលើករណីទំនាស់ដីធ្លី ដែលគណៈកម្មាធិការសិទ្ធិមនុស្សកម្ពុជាស្នើឡើងពេលនេះ។ ប៉ុន្តែលោកមិនទាន់បញ្ជាក់ពីកាលបរិច្ឆេទ អញ្ជើញភាគីពាក់ព័ន្ធមកជួបពិភាក្សាគ្នា ដើម្បីរកដំណោះស្រាយនៅឡើយទេ។
បញ្ហានេះដែរ លោក អេង ឆៃអ៊ាង ប្រធានគណៈកម្មការសិទ្ធិមនុស្ស ទទួលពាក្យបណ្ដឹង អង្កេត និងទំនាក់ទំនងរដ្ឋសភា ព្រឹទ្ធសភា ឬហៅថា គណៈកម្មការទី១ នៅក្នុងបេសកកម្មដឹកនាំប្រតិភូ ចុះមកខេត្តព្រះសីហនុ កាលពីថ្ងៃទី២៤ ខែមីនា បានបញ្ជាក់ថា នឹងពិនិត្យទៅលើទំនាស់ដីធ្លី រវាងលោកតា នាង ឃិន និងលោកយាយ លាង យី នៅឃុំកែវផុស ជាមួយក្រុមហ៊ុនអៀង សុធារ៉ា ដោយយកចិត្តទុកដាក់។ ជាងនេះក៏នឹងពិនិត្យឲ្យប្រាកដថា ប្លង់កម្មសិទ្ធិដែលក្រុមហ៊ុនមាន គឺទទួលបានដោយសុចរិតត្រឹមត្រូវ ឬមួយក៏ជាការឃុបឃិតជាមួយស្ថាប័នពាក់ព័ន្ធ៖ «គណៈកម្មការទី១ នឹងជំរុញលើករណីទំនាស់ដីធ្លី រវាងលោកតា នាង ឃិន និងលោកយាយ លាង យីទាំងពីរនាក់ប្ដីប្រពន្ធ មានទំនាស់ជាមួយក្រុមហ៊ុនអៀង សុធារ៉ា ដើម្បីឲ្យមានការស្រាវជ្រាវទំនាស់នេះ ឲ្យបានពេញលេញ និងត្រឹមត្រូវ។ ហើយរឿងនេះ បើពិនិត្យមើលសវនាកាន់កាប់ដី គឺមានភាពអយុត្តិធម៌សម្រាប់មនុស្សចាស់ទាំងពីរនាក់ប្ដីប្រពន្ធ ដែលបានមកកាន់កាប់ដីកសិកម្មយូរឆ្នាំ ប៉ុន្តែប្លង់កម្មសិទ្ធិគ្រប់គ្រងដីធ្លី បែរជាទៅធ្លាក់ទៅឲ្យអ្នកផ្សេងទៅវិញ?»។
ទាក់ទិនទំនាស់នេះ កាលពីថ្ងៃទី១៦ ខែមីនា ឆ្នាំ២០១៥ អាជ្ញាធរស្រុកស្ទឹងហាវ ធ្លាប់បានបើកកិច្ចប្រជុំសម្របសម្រួល រវាងលោកតា នាង ឃិន និងលោកយាយ លាង យី ជាមួយតំណាងក្រុមហ៊ុនអៀង សុធារ៉ា ដឹកនាំដោយអ្នកស្រី ឈុន ដារី អភិបាលរងស្រុកស្ទឹងហាវ ម្ដងរួចមកហើយ ប៉ុន្តែមិនទទួលបាលទ្ធផលទេ ដោយក្រុមហ៊ុនសំអាងថាកាន់កាប់ដីនេះស្របច្បាប់។
តំណាងក្រុមហ៊ុនអៀង សុធារ៉ា លោក ប៊ុនថន បានអះអាងថា ក្រុមហ៊ុនខ្លួន មានប្លង់កម្មសិទ្ធិត្រឹមត្រូវ ដើម្បីកាន់កាប់ផ្ទៃដីចំនួន ៣៨ហិកតារ នៅឃុំកែវផុស ស្រុកស្ទឹងហាវ ខេត្តព្រះសីហនុ ដោយមិនបានរំលោភបំពាន ឬគំរាមប្លន់យកដីពលរដ្ឋណាម្នាក់ទេ។
យ៉ាងនេះក្ដី លោកតា នាង ឃិន និងលោកយាយ លាង យី និងសាក្សីរស់នៅសង្កាត់ទំនប់រលក ស្រុកស្ទឹងហាវ បានស្នើឲ្យមន្ត្រីជំនាញស្រុកស្ទឹងហាវ ខេត្តព្រះសីហនុ ឲ្យបញ្ជូនមន្ត្រីចុះវាស់ទំហំផ្ទៃដី របស់ក្រុមហ៊ុនអៀង សុធារ៉ាជាថ្មី ដើម្បីឲ្យប្រាកដថា ក្រុមហ៊ុននេះមានផ្ទៃដីពិតប្រាកដចំនួនប៉ុន្មានហិកតារនៅតំបន់ពយយាយម៉ី៕