អភិបាលខេត្តកំពង់ធំកំពុងពិនិត្យលើលិខិតស្នើសុំឱ្យដោះស្រាយបញ្ហាដីធ្លីនៅស្រុកស្ទោង
2015.01.23
សមាជិកក្រុមប្រឹក្សាខេត្តគណបក្សសង្គ្រោះជាតិ ផ្ញើលិខិតមួយជូនអភិបាលខេត្តកំពង់ធំ ដើម្បីស្នើឱ្យចាត់វិធានការលើបញ្ហាដីធ្លី ពលរដ្ឋជិត១០ភូមិ ស្មើនិងជាង ២រយគ្រួសារ (២៥៩) នៅឃុំចំណារលើ ស្រុកស្ទោង ។ យ៉ាងណាអភិបាលខេត្តកំពង់ធំបញ្ជាក់ថា លោកកំពុងពិនិត្យលើបញ្ហានេះដើម្បីឈានទៅដោះស្រាយក្នុងពេលឆាប់ៗនេះ។
លិខិតរបស់សមាជិកក្រុមប្រឹក្សាខេត្ត មកពីគណបក្សសង្គ្រោះជាតិ ដែលផ្ញើជូនអភិបាលខេត្តកំពង់ធំ គឺលោក អ៊ុត សំអន កាលពីថ្ងៃទី១៩ មករា ស្នើឱ្យដោះស្រាយបញ្ហាដីធ្លីពលរដ្ឋ នៅឃុំចំណារលើស្រុកស្ទោងនោះ គឺបានដល់ដៃអភិបាលខេត្តនៅថ្ងៃទី ២២ មករា។
សមាជិកក្រុមប្រឹក្សាខេត្តកំពង់ធំ មកពីគណបក្សសង្គ្រោះជាតិ លោក ស៊ុន ចន្ធី មានប្រសាសន៍ថាមូលហេតុដែលខាងលោក សម្រេចផ្ញើលិខិតជូនអភិបាលខេត្ត ឱ្យជួយអន្តរាគមន៍គឺ បន្ទាប់ពីមានពលរដ្ឋជាច្រើនត្អូញត្អែរពីផលប៉ះពាល់របស់ពួកគាត់ក្នុងការរស់នៅ ខណៈអាជ្ញាធរមិនទាន់ដោះស្រាយ បញ្ហាជម្លោះដីធ្លីជូនពួកគាត់បាន។ បន្ថែមពីនេះ លោកថា គឺមានមន្ត្រីធ្វើការនៅសាលាខេត្តមួយចំនួន ពាក់ព័ន្ធរឿងនេះថែមទៀតផង៖ «ឯកឧត្ដមអភិបាលខេត្ត ក្នុងដែនសមត្ថកិច្ចរបស់គាត់នឹងអាចដោះស្រាយ បញ្ហាហ្នឹងជូនប្រជាពលរដ្ឋបាន ក៏ប៉ុន្តែប្រសិនបើមានមន្ត្រីណានៅពីក្រោយខ្នង មន្ត្រីខេត្តទាំងពីររូបហ្នឹងទៀត ការដោះស្រាយបាន ឬមិនបានគឺអាស្រ័យ ការសម្រេចចិត្តរបស់ខេត្ត»។
ក្នុងលិខិតរបស់សមាជិកក្រុមប្រឹក្សាខេត្ត បញ្ជាក់ដោយយោងលើលិខិត របស់ពលរដ្ឋផ្ញើទៅអង្គភាពប្រឆាំងអំពើពុករលួយ និងគណៈកម្មាធិការទី១ នៃរដ្ឋសភាថាបញ្ហាដីធ្លី ពលរដ្ឋនៅឃុំចំណារលើជាមួយឈ្មួញឯកជនឈ្មោះ គាំ សារឿន គឺមានមន្ត្រីកំពុងបម្រើនៅក្នុងសាលាខេត្ត និងមន្ត្រីមូលដ្ឋានមួយចំនួននៅពីក្រោយដូចជាលោក ឡង គីសឺង ជានាយករដ្ឋបាលសាលាខេត្តកំពង់ធំ លោក លី គឹមពាវ ជានាយកទីចាត់ការផ្នែកអន្តរវិស័យ លោក ឡុច ប៊ុនធត មេឃុំចំណារលើ និងលោក ខាត់ ភាច ជាក្រុមប្រឹក្សាឃុំចំណារលើ។ ក្នុងលិខិតបន្ថែមថា អ្នកទាំងនេះហើយដែលបានឃុបឃិត បន្លំលិខិតស្នាម គំរាមកំហែងប្រជាពលរដ្ឋយកដីស្រែ ពួកគាត់ជាង ៧រយហិកតារ (៧៧០) ទៅឱ្យឈ្មួញ។ លើសពីនេះទៀត ថែមទាំងឃុបឃិតជាមួយមន្ត្រី តុលាការខេត្តឱ្យចេញដីកា ចោទប្រកាន់ និងដកហូតដីស្រែពួកគាត់ ដោយរំលោភលើសេចក្ដីជូនដំណឹងរបស់ខេត្ត សេចក្ដីជូនដំណឹងរបស់រាជរដ្ឋាភិបាល និងរំលោភលើចំណាររបស់លោកនាយករដ្ឋមន្ត្រីកាលពីថ្ងៃទី ២២ កក្កដា ២០១៤ ដែលតម្រូវឱ្យកាត់ផ្ទៃដីជូនពលរដ្ឋ ធ្លាប់អាស្រ័យផលកន្លងមក។
ទាក់ទងបញ្ហានេះ អភិបាលខេត្តកំពង់ធំ លោក អ៊ុត សំអន មានប្រសាសន៍នៅថ្ងៃទី ២២ មករា ថា លោកទើបតែទទួលបានលិខិតនោះ ហើយកំពុងពិនិត្យមើល ដើម្បីចុះស្រាវជ្រាវលើបញ្ហានេះ។ លោកបន្ថែមថា ដំណោះស្រាយមានជាហូរហែមក ហើយខាងខេត្ត គឺអនុវត្តតាមសេចក្ដីសម្រេចរបស់រាជរដ្ឋាភិបាល ដែលតម្រូវឱ្យដោះស្រាយជូនពលរដ្ឋ ដែលបានអាស្រ័យផលជាក់ស្ដែង ប៉ុន្តែគឺត្រូវចុះពិនិត្យឱ្យបានជាក់លាក់ជាមុនសិន។ អភិបាលខេត្តដដែលបញ្ជាក់ ថាមិនមានមន្ត្រីខេត្តណានៅពីក្រោយ ដូចការលើកឡើងនោះឡើយ ប៉ុន្តែអាចជាការយល់ច្រឡំទៅវិញទេ៖ «នេះគ្រាន់តែជាការលើកឡើងរបស់គាត់ ប៉ុន្តែខ្ញុំយល់ថា ប្រហែលមានការយល់ច្រឡំទេ»។
លោកបន្ថែមថា ប្រសិនរកឃើញថា ពលរដ្ឋពិតជាបានអាស្រ័យផលជាក់ស្ដែងពិតមែន គោលនយោបាយរបស់រដ្ឋាភិបាល នឹងប្រគល់ដីជូនពួកគាត់ ដោយមិនអាចប្រគល់ជូនក្រុមហ៊ុន ឬការប្រមូលផ្ដុំដីធំៗ របស់បុគ្គលណាឡើយ។ យ៉ាងណា លោក ស៊ុន ចន្ធី សង្ឃឹមថា ប្រសិនបើមិនមានមន្ត្រីរដ្ឋាភិបាលធំណានៅពីក្រោយទេ ដំណោះស្រាយនឹងមានសម្រាប់ពលរដ្ឋ។ ដោយឡែកតំណាងពលរដ្ឋ សុំមិនឱ្យប្រាប់ឈ្មោះម្នាក់ គឺទាមទារឱ្យអាជ្ញាធរខេត្ត អនុវត្តតាមចំណាររបស់លោកនាយករដ្ឋមន្ត្រី កាលពីថ្ងៃទី២២កក្កដា នោះទើបពលរដ្ឋព្រម។ ប៉ុន្តែបើមិនមានដំណោះស្រាយ ពលរដ្ឋនឹងឡើងទៅភ្នំពេញ ដើម្បីសុំកិច្ចអន្តរាគមន៍ពីមន្ត្រីថ្នាក់ជាតិបន្ថែមទៀត៕