រដ្ឋមន្ត្រីក្រសួងបរិស្ថានសន្យាដោះស្រាយជម្លោះដីនៅកោះកុងដោយយុត្តិធម៌
2015.05.05
រដ្ឋមន្ត្រីក្រសួងបរិស្ថាន លោក សាយ សំអាល់ (ឆ្វេងទី១) ចូលឆ្លើយបំភ្លឺគណៈកម្មការទី១ រដ្ឋសភា អំពីការដោះស្រាយជម្លោះដីនៅខេត្តកោះកុង កាលពីថ្ងៃទី៥ ខែឧសភា ឆ្នាំ២០១៥។
រដ្ឋមន្ត្រីក្រសួងបរិស្ថាន ចូលឆ្លើយបំភ្លឺអំពីលទ្ធផលនៃការដោះស្រាយជម្លោះដីធ្លីនៅខេត្តកោះកុង តាមកោះហៅរបស់ប្រធានគណៈកម្មការទី១នៃរដ្ឋសភា កាលពីថ្ងៃទី៥ ខែឧសភា ម្សិលមិញ។ ក្រោយជំនួបបិទទ្វាររយៈពេលប្រមាណ ៣ម៉ោងកន្លះរួចមក រដ្ឋមន្ត្រីក្រសួងបរិស្ថានថ្លែងប្រាប់ក្រុមអ្នកកាសែតថា ក្រសួងនឹងដោះស្រាយជម្លោះដីធ្លីរវាងក្រុមហ៊ុនចិន យូញៀន ឌីវើលឡុប មែន គ្រុប (Union Development Group) និងប្រជាពលរដ្ឋនៅស្រុកគីរីសាគរ និងស្រុកបទុមសាគរ អោយមានយុត្តិធម៌ទាំងសងខាង។
ស្របពេលគ្នានេះ ប្រធានគណៈកម្មការទី១នៃរដ្ឋសភា ក៏បានស្នើអោយក្រសួងបរិស្ថាន កុំប្រើវិធានការក្ដៅចំពោះប្រជាពលរដ្ឋដែលមិនព្រមទទួលយកសំណងក្នុងដំណោះស្រាយជម្លោះដីធ្លីនោះ។
ក្រសួងបរិស្ថាន បានបញ្ចាក់ថា នឹងខិតខំដោះស្រាយជម្លោះដីធ្លីនៅតំបន់អភិវឌ្ឍន៍ក្បាលនាគ ខេត្តកោះកុង ឲ្យមានតម្លាភាព ដោយមិនលម្អៀងទៅភាគីខាងណាមួយនោះទេ។ ទន្ទឹមគ្នានេះដែរ រដ្ឋមន្ត្រីក្រសួងបរិស្ថាន លោក សាយ សំអាល់ ក៏បានច្រានចោលការរិះគន់របស់ក្រុមអង្គការសង្គមស៊ីវិលមួយចំនួនដែលតែងរិះគន់ថា ការដោះស្រាយជម្លោះដីធ្លីរវាងក្រុមហ៊ុន ចិន យូញៀន ឌីវើលឡុប មែន គ្រុប និងប្រជាពលរដ្ឋនៅតំបន់នោះមានអំពើពុករលួយ៖ «ជៀងវាងណាស់នូវបញ្ហាមិនប្រក្រតីនេះ ព្រោះយើងដោះស្រាយបញ្ហា ចង់ឲ្យមានតម្លាភាព ហើយមានភាពយុត្តិធម៌ជូនអ្នកទាំងអស់គ្នា គឺអ្នកដែលមានការពាក់ព័ន្ធនោះ»។
ទោះយ៉ាងណាក៏ដោយ ភាគីពាក់ព័ន្ធទាំងឡាយ ជាពិសេសរដ្ឋាភិបាល រហូតមកដល់ពេលនេះ នៅតែមិនអាចដោះស្រាយជម្លោះដីធ្លីដែលបានអូសបន្លាយរយៈពេល ៨ឆ្នាំមកនេះបាននៅឡើយទេ។
ថ្លែងប្រាប់ក្រុមអ្នកសារព័ត៌មាន បន្ទាប់ពីជំនួបបិទទ្វាររយៈពេល ៣ម៉ោងកន្លះជាមួយលោក អេង ឆៃអ៊ាង ប្រធានគណៈកម្មការសិទ្ធិមនុស្ស ទទួលពាក្យបណ្ដឹង អង្កេត និងទំនាក់ទំនងរដ្ឋសភា ព្រឹទ្ធសភា ឬហៅកាត់ថា គណៈកម្មការទី១ នៅរដ្ឋសភា នៅថ្ងៃទី៥ ឧសភា រដ្ឋមន្ត្រីក្រសួងបរិស្ថាន និងជាប្រធានគណៈកម្មការអន្តរក្រសួងដោះស្រាយទំនាស់ដីធ្លី លោក សាយ សំអាល់ បានរាយការណ៍ជាច្រើនអំពីវឌ្ឍនភាពនៃការដោះស្រាយជម្លោះដីធ្លីរវាងក្រុមហ៊ុន ចិន យូញៀន ឌីវើលឡុប មែន គ្រុប និងប្រជាពលរដ្ឋនៅស្រុកគីរីសាគរ និងស្រុកបទុមសាគរ ខេតុ្តកោះកុង។
កន្លងមក ក្រុមហ៊ុន យូញៀន ឌីវើលឡុប មែន ដែលវិនិយោគវិស័យទេសចរណ៍រមណីយដ្ឋាន និងសណ្ឋាគារបានប្រើអំពើហិង្សាយ៉ាងក្ដៅគគុក ដោយបានដុតបំផ្លាញ និងឈូសឆាយផ្ទះប្រជាពលរដ្ឋជាច្រើនខ្នង។
ទាក់ទិនបញ្ហានេះ លោក អ៊ិន គង់ជិត មន្ត្រីសម្របសម្រួលអង្គការលីកាដូ (Licadho) ប្រចាំខេត្តកោះកុង នៅតែរិះគន់ភាពយឺតយ៉ាវនៃការដោះស្រាយទំនាស់ដីធ្លីនៅតំបន់នេះ ហើយលោកក៏គ្មានជំនឿចិត្តឡើយចំពោះការប្ដេជ្ញារបស់រដ្ឋមន្ត្រីក្រសួងបរិស្ថាន ព្រោះរហូតមកដល់ពេលនេះ ក្រុមហ៊ុនចិន នៅតែយាយីប្រជាជនដើម្បីបង្ខំអោយទទួលយកសំណង៖ «រហូតមកពេលនេះ ក្រុមហ៊ុនចិន បានធ្វើអ្វីតាមតែអំពើចិត្ត ហើយគណៈកម្មការអន្តរក្រសួង បានចុះទៅតំបន់ហ្នឹង គឺជួបតែក្រុមហ៊ុនចិន អភិបាលស្រុក ជួបមេឃុំ។ គាត់អត់បានចុះទៅជួបប្រជាជនដែលរងផលប៉ះពាល់ផ្ទាល់ទេ»។
នៅចំពោះមុខ លោក អេង ឆៃអ៊ាង ប្រធានគណៈកម្មការទី១ នៃរដ្ឋសភា ក៏បានស្នើរដ្ឋមន្ត្រីក្រសួងបរិស្ថាន ចំនួន ៤ចំណុច រួមមាន ពិនិត្យលទ្ធភាពក្នុងការឆ្វៀលដីជូនប្រជាពលរដ្ឋដែលនៅសេសសល់ប្រមាណ ៣១៨គ្រួសារ នៅក្នុងស្រុកទាំងពីរ ដែលមិនព្រមទទួលយកសំណង។ ទី២ ស្នើអោយក្រសួងកុំមានវិធានការគំរាមកំហែង ឬប្រើប្រាស់វិធានតុលាការចំពោះពលរដ្ឋទាំងនោះ។ ទី៣ ស្នើអោយស៊ើបអង្កេតអំពីភាពមិនប្រក្រតីនៃការដោះស្រាយផលប៉ះពាល់កន្លងមក។ ទី៤ គណៈកម្មការនេះ បានស្នើសុំរបាយការណ៍ និងឯកសារពាក់ព័ន្ធជាមួយនឹងប្រជាពលរដ្ឋដែលបានទទួលយកសំណងពីក្រុមហ៊ុន។
ផ្ដើមចេញជាជម្លោះដីធ្លីនេះ គឺកាលឆ្នាំ២០០៨ រាជរដ្ឋាភិបាលបានផ្ដល់សម្បទានដីទំហំ ៣៦.០០០ហិកតារ ស្ថិតនៅតាមបណ្តោយឆ្នេរសមុទ្រ ក្នុងស្រុកបុទុមសាគរ និងស្រុកគីរីសាគរ ខេត្តកោះកុង ជូនក្រុមហ៊ុន យូញៀន ឌីវើលឡុបមែន គ្រុប ដើម្បីអភិវឌ្ឍតំបន់នេះឲ្យក្លាយទៅជាទីក្រុងទំនើបមួយនៅតំបន់អាស៊ីលើវិស័យពាណិជ្ជកម្ម និងទេសចរណ៍ធម្មជាតិលំដាប់អន្តរជាតិ។
ក្រុមប្រជាពលរដ្ឋបានអះអាងថា ពួកគាត់ភាគច្រើនបានមកតាំងទីលំនៅប្រកបរបរចិញ្ចឹមជីវិត និងដាំដំណាំកសិកម្មនៅលើតំបន់នេះចំនួន ៣ជំនាន់ គឺចាប់តាំងពីជំនាន់សង្គមរាស្ត្រនិយម ក្រោមការដឹកនាំរបស់អតីតព្រះមហាក្សត្រ សម្ដេចព្រះនរោត្តម សីហនុ រហូតមកដល់ពេលនេះម្ល៉េះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- វៀតណាមព្រមានថា ព្រែកជីកហ្វូណនតេជោអាចជួយសម្រួលវត្តមានយោធាចិនក្នុងទឹកដីកម្ពុជាកាន់តែជ្រៅ
- ពលរដ្ឋនៅតំបន់បឹងតាមោក ចោទប្រកាន់អាជ្ញាធរខណ្ឌព្រែកព្នៅថា ប្រើអំពើហិង្សា
- អាជ្ញាធរក្រុងភ្នំពេញមិនអនុញ្ញាតឱ្យបក្សកម្លាំងជាតិធ្វើបាតុកម្ម នៅទីលានប្រជាធិបតេយ្យ
- ក្រសួងដែនដីបានហៅអតិថិជនបុរីពិភពថ្មីទៅពិភាក្សា ដើម្បីរកដំណោះស្រាយ
- ពលរដ្ឋខ្មែរ-អូស្ត្រាលីម្នាក់ ដែលរិះគន់រដ្ឋាភិបាលកម្ពុជា រងការវាយដំពីជនមិនស្គាល់មុខមួយក្រុម ពេលទៅលេងស្រុកខ្មែរ
