ពលរដ្ឋនៅក្រចេះថាក្រុមហ៊ុនឯកជនមួយកំពុងរំលោភបំពានយកដីអ្នកភូមិ
2015.02.23
ពលរដ្ឋរស់នៅខេត្តក្រចេះ ឲ្យដឹងថា ចាប់តាំងពីដើមឆ្នាំ២០១៥ មកទល់ពេលនេះ ក្រុមហ៊ុន សៀងបៃ អុបទិច កំពុងតែរំលោភបំពានដីចំការរបស់ពួកគេ។ ពលរដ្ឋថា ទោះបីពួកគេសុំអន្តរាគមន៍ពីអាជ្ញាធរមូលដ្ឋានយ៉ាងណាក្ដី ប៉ុន្តែមិនទទួលបានលទ្ធផលអ្វីឡើយ។
ពលរដ្ឋអះអាងថា ដីចំការមានដំណាំស្រូវ ចេក និងអំពៅ ជាង ២០០ហិកតារ នៅភូមិអាជេន ឃុំកំពង់ចាម ស្រុកសំបូរ ខេត្តក្រចេះ របស់ប្រជាពលរដ្ឋ ៤០គ្រួសារ កំពុងរងការខូចខាតដោយការឈូសឆាយរបស់ក្រុមហ៊ុនសៀងបៃ អុបទិច។ ក្រោយជួបរឿងដដែលៗដូចនេះ ក្រុមពលរដ្ឋទទូចឲ្យស្ថាប័នថ្នាក់ជាតិចុះអង្កេតរឿងនេះដល់ទីកន្លែង និងជួយអន្តរាគមន៍។
តំណាងប្រជាពលរដ្ឋ លោក តុក សុខជា រៀបរាប់ថា ក្រុមពលរដ្ឋមករស់នៅលើដីចំការនោះមុនពេលក្រុមហ៊ុនចូលមកវិនិយោគ ប៉ុន្តែភាគីក្រុមហ៊ុនចោទប្រកាន់ថា ពលរដ្ឋទន្ទ្រានយកដីរបស់ក្រុមហ៊ុន។ ពលរដ្ឋរូបនេះថា នៅពេលពលរដ្ឋប្ដឹងសុំអន្តរាគមន៍ពីអាជ្ញាធរភូមិ ឃុំ ក្រុមអាជ្ញាធរមិនចុះមកដោះស្រាយឲ្យនោះទេ ដោយលើកឡើងថា ក្រុមពលរដ្ឋហៅពួកគេមកម្តងៗ មិនដែលផ្ដល់កម្រៃជើងសា ឬថ្លៃសាំងម៉ូតូឲ្យពួកគេ៖ «ពួកខ្ញុំប្រជាជនតំបន់នេះក្រីក្រណាស់ ហៅគេ (អាជ្ញាធរមូលដ្ឋាន) ម្តងៗគេមិនមក ប៉ុន្តែបើក្រុមហ៊ុនបានពួកគេមក»។
ឆ្លើយតបការចោទប្រកាន់នេះ តំណាងក្រុមហ៊ុនសៀងបៃ អុបទិច លោក លី សុមេធា ទទួលស្គាល់ថា ការឈូសឆាយរបស់ក្រុមហ៊ុនលោកពិតជាប៉ះពាល់ដីពលរដ្ឋមែន ប៉ុន្តែក្រុមហ៊ុនបានដោះស្រាយស្ទើរតែអស់ទៅហើយ។ តំណាងក្រុមហ៊ុនរូបនេះប្រាប់ថា រាល់ការប៉ះពាល់ម្តងៗ ក្រុមហ៊ុនតែងតែអញ្ជើញពលរដ្ឋរួមទាំងវត្តមានអាជ្ញាធរចូលរួមក្នុងកិច្ចប្រជុំដើម្បីផ្ដល់ដំណោះស្រាយ៖ «ត្រូវយល់ថា ពាក្យធ្វើគឺមានប៉ះពាល់ហើយ ប៉ុន្តែយើងដោះស្រាយឲ្យពួកគេ»។
ទោះបែបនេះក្តី ពលរដ្ឋនិយាយថា រាល់កិច្ចប្រជុំដោះស្រាយម្តងៗ ក្រុមហ៊ុនតែងតែប្រើពាក្យសម្ដីគំរាមកំហែងពលរដ្ឋ ហើយមានមន្ត្រីអាជ្ញាធរភាគច្រើនថ្លែងការពារក្រុមហ៊ុន។
មេឃុំកំពង់ចាម ស្រុកសំបូរ លោក ឈិត ណន បដិសេធការចោទរបស់ពលរដ្ឋ និងថា ដីដែលប៉ះពាល់គឺតំបន់ដីរបស់រដ្ឋដែលក្រុមពលរដ្ឋរស់នៅ។ ស្រដៀងគ្នានឹងការលើកឡើងរបស់តំណាងក្រុមហ៊ុនសៀងបៃ អុបទិច លោកជាមេឃុំថា អាជ្ញាធរមូលដ្ឋានផ្ដល់ដំណោះស្រាយជូនពលរដ្ឋស្ទើរចប់រួចរាល់ហើយ៖ «យើងតាមមើលរហូតមិនឲ្យក្រុមហ៊ុនប៉ះពាល់ប្រជាពលរដ្ឋទេ»។
ក្រុមហ៊ុនសៀងបៃ អុបទិច បានចាប់ផ្ដើមដាំកូនឈើអាកាស្យា ម៉ៃសាក់ និងគ្រញូង ក្នុងតំបន់មានជម្លោះចាប់តាំងពីឆ្នាំ២០១២។ ប៉ុន្តែក្រុមហ៊ុនផ្ដើមឈូសឆាយ ប៉ះពាល់ដីពលរដ្ឋខ្លាំងនៅឆ្នាំ២០១៥នេះ។
អភិបាលស្រុកសំបូរ ខេត្តក្រចេះ លោក សូរ សារិន មានប្រសាសន៍ថា អាជ្ញាធរមូលដ្ឋានថ្នាក់ក្រោមមិនទាន់រាយការណ៍ឲ្យលោកបានដឹងរឿងនេះនៅឡើយទេ។ លោកអភិបាលស្រុកបញ្ជាក់ថា ក្រោយដឹងរឿងនេះ លោកនឹងចុះស៊ើបអង្កេតផ្ទាល់ដល់ទីតាំង៖ «ខ្ញុំនឹងចុះស្រាវជ្រាវព្រោះក្រុមហ៊ុនមិនអាចរំលោភបំពានដីពលរដ្ឋដែលគាត់រស់នៅស្របច្បាប់បានទេ»។
ក្រុមពលរដ្ឋអះអាងថា ប្រសិនអាជ្ញាធរនៅតែបណ្ដោយឲ្យក្រុមហ៊ុនឈូសឆាយដីរបស់គេទៀត ពួកគេនឹងធ្វើសកម្មភាពទប់ស្កាត់ការបំពាននោះ ឬនាំគ្នាបិទផ្លូវធ្វើបាតុកម្មដើម្បីឲ្យស្ថាប័នមានសមត្ថកិច្ចអន្តរាគមន៍។
មន្ត្រីសង្គមស៊ីវិលទាមទារឲ្យភាគីទាំងអស់ដោះស្រាយដោយតម្លាភាព និងយុត្តិធម៌ ព្រមទាំងផ្ដល់ដំណោះស្រាយមួយដែលគ្រប់ភាគីអាចទទួលយកបាន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- វៀតណាមព្រមានថា ព្រែកជីកហ្វូណនតេជោអាចជួយសម្រួលវត្តមានយោធាចិនក្នុងទឹកដីកម្ពុជាកាន់តែជ្រៅ
- ពលរដ្ឋនៅតំបន់បឹងតាមោក ចោទប្រកាន់អាជ្ញាធរខណ្ឌព្រែកព្នៅថា ប្រើអំពើហិង្សា
- អាជ្ញាធរក្រុងភ្នំពេញមិនអនុញ្ញាតឱ្យបក្សកម្លាំងជាតិធ្វើបាតុកម្ម នៅទីលានប្រជាធិបតេយ្យ
- ក្រសួងដែនដីបានហៅអតិថិជនបុរីពិភពថ្មីទៅពិភាក្សា ដើម្បីរកដំណោះស្រាយ
- ពលរដ្ឋខ្មែរ-អូស្ត្រាលីម្នាក់ ដែលរិះគន់រដ្ឋាភិបាលកម្ពុជា រងការវាយដំពីជនមិនស្គាល់មុខមួយក្រុម ពេលទៅលេងស្រុកខ្មែរ
