អាដហុក​អំពាវនាវ​ឲ្យ​ទប់ស្កាត់​ចលនា​បំភ័យ​ពលរដ្ឋ​ឲ្យ​លក់​ដី​នៅ​រតនគិរី

រាជ​រដ្ឋាភិបាល​ដាក់​ចេញ​គោល​នយោបាយ​កាត់​ដី​ប្រជាពលរដ្ឋ​ចេញ​ពី​ដី​សម្បទាន​សេដ្ឋកិច្ច និង​ចេញ​ប័ណ្ណ​កម្មសិទ្ធិ​ស្រប​ច្បាប់​ផ្តល់​ជូន​ប្រជាពលរដ្ឋ ដើម្បី​លើក​ស្ទួយ​ជីវភាព​ពលរដ្ឋ​ឲ្យ​បាន​កាន់​តែ​ប្រសើរ។
ដោយ រដ្ឋា វិសាល
2013-02-25
អ៊ីម៉ែល
មតិ
ចែករំលែក
បោះពុម្ព
  • បោះពុម្ព
  • ចែករំលែក
  • មតិ
  • អ៊ីម៉ែល

យ៉ាង​នេះ​ក្តី នៅ​ឯ​ខេត្ត​រតនគិរី មាន​សេចក្តី​រាយការណ៍​ថា ក្រុមហ៊ុន​សម្បទាន​សេដ្ឋកិច្ច​មួយ​ចំនួន​បាន​ព្យាយាម​ប្រើ​ល្បិច​កល​ធ្វើ​យ៉ាង​ណា​ឲ្យ​អ្នក​ភូមិ​ដែល​មាន​ដី​ចុះ​បញ្ជី​ប័ណ្ណ​កម្មសិទ្ធិ​ឯកជន​ពី​គោល​នយោបាយ​នេះ លក់​ដី​របស់​ខ្លួន​វិញ​ក្នុង​តម្លៃ​ថោក​ទៅ​ឲ្យ​ក្រុមហ៊ុន។

មន្ត្រី​ឃ្លាំ​មើល​សិទ្ធិ​មនុស្ស សមាគម​អាដហុក (ADHOC) ខេត្ត​រតនគិរី នៅ​ថ្ងៃ​ច័ន្ទ ទី២៥ ខែ​កុម្ភៈ ឆ្នាំ​២០១៣ អំពាវនាវ​ឲ្យ​អាជ្ញាធរ​ខេត្ត​ចាត់​វិធាន​ការ​ទប់ស្កាត់​ចលនា​បំភិតបំភ័យ​ប្រជាពលរដ្ឋ​ជន​ជាតិ​ដើម​ភាគ​តិច ឲ្យ​លក់​ដី​ដែល​បាន​ចុះ​បញ្ជី​កម្មសិទ្ធិ​ទៅ​ឲ្យ​ក្រុមហ៊ុន​សម្បទាន​សេដ្ឋកិច្ច។

សេចក្តី​អំពាវនាវ​នេះ ធ្វើ​ឡើង​បន្ទាប់​ពី​មន្ត្រី​អាជ្ញាធរ​ភូមិ​យ៉ាសោម ឃុំ​ស៊ឺង ស្រុក​បរកែវ ខេត្ត​រតនគិរី រាយការណ៍​ថា មេការ​គ្រឿងចក្រ​ឈូស​ឆាយ​ដី​របស់​ក្រុមហ៊ុន​សម្បទាន​សេដ្ឋកិច្ច​វៀតណាម ឈ្មោះ អេលែវ ហ្យ័ញស្តុក បាន​ចលនា​ឲ្យ​អ្នក​ភូមិ​ដែល​មាន​ដី​ស្រែ​ចម្ការ​ក្នុង​បរិវេណ​ដី​ក្រុមហ៊ុន ហើយ​បាន​ចុះ​បញ្ជី​កម្មសិទ្ធិ​ដីធ្លី​រួច ឲ្យ​លក់​ដី​មក​ឲ្យ​ក្រុមហ៊ុន​វិញ។

ប្រធាន​ភូមិ​យ៉ាសោម លោក រចំ វិន មាន​ប្រសាសន៍​បញ្ជាក់​ថា អ្នក​ភូមិ​ត្រូវ​គេ​បំភិតបំភ័យ​ថា ការ​ចុះ​បញ្ជី​ដីធ្លី​នោះ​មិន​ទាន់​ផ្លូវ​ការ​ទេ ហេតុ​នេះ​ដី​អ្នក​ភូមិ​ដែល​ស្ថិត​ក្នុង​បរិវេណ​ដី​ក្រុមហ៊ុន នឹង​ត្រូវ​ក្រុមហ៊ុន​ដក​ហូត ប្រសិន​អ្នក​ភូមិ​មិន​លក់​ដី​នោះ។ លោក​បន្ត​ថា អ្នក​បម្រើ​ការ​ឲ្យ​ក្រុមហ៊ុន បាន​ព្យាយាម​បញ្ចុះបញ្ចូល​ឲ្យ​អាជ្ញាធរ​ភូមិ​ជួយ​ផ្សព្វផ្សាយ​ឲ្យ​អ្នក​ភូមិ​លក់​ដី។

លោក រចំ វិន៖ «ឲ្យ​ខ្ញុំ​មក​បញ្ចុះបញ្ចូល​ប្រជាពលរដ្ឋ​ហ្នឹង លក់​ប្លង់។ គេ​ថា ៥០០ ខ្ញុំ​ត​មាត់​ជាមួយ​គាត់​មិញ ខ្ញុំ​ថា​ខ្ញុំ​មេ​ភូមិ ខ្ញុំ​ដើម្បី​ឲ្យ​ប្រជាពលរដ្ឋ​មាន ឲ្យ​ប្រជាពលរដ្ឋ​ក្រ​ទៀត ក្រ​ហើយ​លក់​ដី។ អា​នេះ​ថា​ប្លង់​របស់​និស្សិត ០១​របស់​សម្ដេច សូម្បី​មិន​មាន​ប្លង់ ក៏​ខ្ញុំ​មិន​អាច​បញ្ចុះបញ្ចូល​ឲ្យ​ប្រជាពលរដ្ឋ​លក់​ដី​ដែរ»

សេចក្តី​រាយការណ៍​ពី​អ្នក​ភូមិ​យ៉ាសោម ឲ្យ​ដឹង​ថា ដី​អ្នក​ភូមិ​ដែល​បាន​ចុះ​បញ្ជី​កម្មសិទ្ធិ​ដោយ​ក្រុម​ការងារ និង​និស្សិត​ស្ម័គ្រចិត្ត​របស់​រាជ​រដ្ឋាភិបាល បាន​វាស់វែង​ចុះ​បញ្ជី​កម្មសិទ្ធិ​រួច​ហើយ ក្រុមហ៊ុន​សម្បទាន អេលែវ ហ្យ័ញស្តុក ទិញ​ក្នុង​តម្លៃ ២៥០​ដុល្លារ​ក្នុង​ដី​មួយ​ហិកតារ។

មេការ​គ្រឿងចក្រ​ឈូស​ឆាយ​ដី​របស់​ក្រុមហ៊ុន អេលែវ ហ្យ័ញស្តុក លោក ស៊ិន សេងហួរ មាន​ប្រសាសន៍​ទទួល​ស្គាល់​ថា ក្រុមហ៊ុន​ពិត​ជា​ព្យាយាម​រក​វិធី​ឲ្យ​អ្នក​ភូមិ​លក់​ដី ប៉ុន្តែ​អ្នក​ភូមិ​មិន​យល់​ព្រម​លក់​ទេ ដោយ​សារ​តម្លៃ​ទិញ​ថោក​ពេក។ លោក​បន្ត​ថា ដោយ​សារ​ហេតុ​ផល​នេះ ទើប​លោក​ចេញ​មុខ​ទិញ​ដី​ពី​ប្រជាពលរដ្ឋ​ក្នុង​តម្លៃ​ខ្ពស់​ជាង ហើយ​ផ្ទេរ​ដី​នោះ​ទៅ​ឲ្យ​ក្រុមហ៊ុន​វិញ ក៏​ប៉ុន្តែ​ការ​លក់​ដី​អាស្រ័យ​លើ​ការ​ស្ម័គ្រចិត្ត​លក់​របស់​ប្រជាពលរដ្ឋ។

លោក ស៊ិន សេងហួរ៖ «ដី​ហ្នឹង​វា​ពាក់ព័ន្ធ​ដី​ក្រុមហ៊ុន ក្នុង​ប្លង់​ក្រុមហ៊ុន ហើយ​បង​ប្អូន​ប្រជាជន​យើង​ទៅ​កាប់​យក។ ដល់​អ៊ីចឹង ខ្ញុំ​សុំ​ទិញ​គាត់ ក្រុមហ៊ុន​គេ​ឲ្យ​ខ្ញុំ​សុំ​ចរចា​សុំ​ទិញ។ ក្រុមហ៊ុន​កាត់​ពី​ប្រជាពលរដ្ឋ​ឲ្យ​គ្នា​តែ ពីរ​រយ ពីរ​រយ​ហាសិប។ គ្នា​គ្រាន់​តែ​ឈ្នួល​កាប់​មួយ​ហិកតារ អស់​ពីរ​បី​រយ​ហើយ គ្នា​ឲ្យ​ម៉េច​កើត​លក់​ម៉េច​កើត។ ដល់​ឲ្យ​មិន​កើត ក្រុមហ៊ុន​ចេះ​តែ​ឡូឡា​រក​រឿង​គេ​រក​រឿង​ឯង»

អ្នក​សម្របសម្រួល​សមាគម​អាដហុក ខេត្ត​រតនគិរី លោក ឆាយ ធី បាន​កត់​សម្គាល់​ថា មុន​មាន​គោល​នយោបាយ​ចុះ​បញ្ជី​ដីធ្លី​ប្រជាពលរដ្ឋ​នៅ​ភូមិ​យ៉ាសោម ក៏​ត្រូវ​ក្រុមហ៊ុន​ចលនា​ឲ្យ​ទទួល​ប្រាក់​ជា​ថ្នូរ​នឹង​ការ​ប្រគល់​ដី​ស្រែ​ចម្ការ និង​ដី​ចម្ការ​វិល​ជុំ​ទៅ​ឲ្យ​ក្រុមហ៊ុន​នេះ​ដូច​គ្នា។

លោក​បន្ត​ថា ប្រសិន​មិន​មាន​វិធាន​ការ​ទប់ស្កាត់​ចលនា​បំភ័យ​អ្នក​ភូមិ​ឲ្យ​ប្រគល់​ដី​នេះ​ទេ ជន​ជាតិ​ដើម​ភូមិ​យ៉ាសោម នឹង​ក្លាយ​ជា​ជន​រង​គ្រោះ​អស់​ដី​ធ្វើ​ស្រែ​ចម្ការ៖ «ក្រុម​ជន​ជាតិ​ដើម​ភាគ​តិច​នៅ​យ៉ាសោម ហ្នឹង គឺ​ជួប​ភាព​មហន្តរាយ​ហើយ។ បាន​ន័យ​ថា គាត់​នឹង​បាត់​បង់​ដីធ្លី​ទាំង​ស្រុង ហើយ​គាត់​នឹង​បាត់​បង់​ជីវភាព​ធ្វើ​ឲ្យ​គាត់​មិន​អាច​រស់​នៅ​ជា​លក្ខណៈ​ប្រពៃណី​គាត់​បាន​ត​ទៅ​ទៀត​ទេ»

វិទ្យុ​អាស៊ីសេរី នៅ​ថ្ងៃ​ច័ន្ទ ទី២៥ ខែ​កុម្ភៈ មិន​អាច​ទាក់​ទង​អ្នក​នាំ​ពាក្យ​អាជ្ញាធរ​ខេត្ត​រតនគិរី លោក ថង សាវុន សុំ​អធិប្បាយ​ពី​បញ្ហា​នេះ​បាន​ទេ។

របាយការណ៍​អង្កេត​របស់​សមាគម​អាដហុក ឲ្យ​ដឹង​ថា នៅ​ពេល​បច្ចុប្បន្ន​នេះ អ្នក​ភូមិ​យ៉ាសោម ៥​គ្រួសារ មិន​មាន​ដី​ធ្វើ​ស្រែ​ចម្ការ​ទេ ដោយ​សារ​ដី​ពួក​គាត់​ត្រូវ​ក្រុមហ៊ុន​ឈូស​ឆាយ​យក ហើយ​ផ្តល់​ប្រាក់​ជា​ថ្នូរ​តិច​តួច​មុន​ពេល​ក្រុម​និស្សិត​ចុះ​វាស់​វែង​ចេញ​ប័ណ្ណ​កម្មសិទ្ធិ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

មតិ (0)
  • បោះពុម្ព
  • ចែករំលែក
  • អ៊ីម៉ែល