ក្រុមអង្គការសង្គមស៊ីវិលចំនួន៧ បានសហការរៀបចំកិច្ចពិគ្រោះយោបល់ ដើម្បីដោះស្រាយទំនាស់ដីធ្លី រវាងប្រជាពលរដ្ឋនៅខេត្តកោះកុង ជាមួយក្រុមហ៊ុនយូនៀនឌីវុឡុបមែនគ្រុប (Union Development Group Co.,Ltd) នៅសណ្ឋាគារកោះកុងស៊ីធី ខេត្តកោះកុង នៅព្រឹកថ្ងៃទី ២៨ តុលា។
កិច្ចពិគ្រោះយោបល់នេះ មានមនុស្សចូលរួមប្រមាណ ៥០ នាក់ មកពីតំណាងរដ្ឋាភិបាល អាជ្ញាធរខេត្ត តំណាងក្រុមហ៊ុន និងពលរដ្ឋមានជម្លោះដី។
អនុប្រធានផ្នែកស៊ើបអង្កេតដីធ្លីនៃសមាគមអាដហុក (Adhoc) លោក ចាន់ សុវ៉េត បានឲ្យដឹងថាអាជ្ញាធរខេត្ត និងក្រសួងបរិស្ថានមិនអាចដោះស្រាយ តាមសំណូមពររបស់ពលរដ្ឋ ដែលចង់ឆ្វៀលយកដីដែលរដ្ឋាភិបាលផ្ដល់ឲ្យក្រុមហ៊ុន មកធ្វើជាកម្មសិទ្ធិ និងដកដីនោះមកវិញឡើយ ដោយអាជ្ញាធរបានបញ្ជាក់ថាក្រុមហ៊ុនចិននេះ ទទួលអាជ្ញាប័ណ្ណពីរដ្ឋាភិបាល។ ទោះជាយ៉ាងណាក៏ដោយ លោក ចាន់ សុវ៉េត បានអំពាវដល់រដ្ឋាភិបាល គួរដោះស្រាយជូនពលរដ្ឋឲ្យបានឆាប់រហ័ស ហើយជៀសវាងការសន្យាដោះស្រាយ មិនច្បាស់លាស់ ធ្វើឲ្យពលរដ្ឋកាន់តែរងគ្រោះទៅៗ ពីការអភិវឌ្ឍរបស់ក្រុមហ៊ុន។
ប្រតិកម្មនឹងការលើកឡើងរបស់លោក ចាន់ សុវ៉េត ទីប្រឹក្សាក្រសួងបរិស្ថាន លោក ស្រ៊ុន ដារិទ្ធិ បានគូសបញ្ជាក់ថា ជំនួបនៅព្រឹកមិញនេះ ជាជំហានដើម្បីស្វែងរកដំណោះស្រាយ ជូនពលរដ្ឋតាមនីតិវិធីច្បាប់ កំណត់ដោយរដ្ឋាភិបាល ប្រកបដោយភាពយោគយល់ តម្លាភាព និងអព្យាក្រឹត្យ៖ «គោលការណ៍របស់រដ្ឋាភិបាល និងការឯកភាពរបស់ក្រុមហ៊ុន អត់មានការពាំត្រណោតទេ គ្រាន់តែមានបញ្ហាសេសសល់ មិនទាន់ដោះស្រាយចប់ ហើយយើងដូចជាជជែកគ្នាព្រឹកមិញ ដូចជាយល់គ្នាច្រើន មិនមែនតែព្រឹកមិញទេ កន្លងមកក៏សង្គមស៊ីវិលក៏យល់ច្រើន គ្រាន់តែនិន្នាការខុសគ្នាតែប៉ុណ្ណឹងទេ » ។
ពលរដ្ឋមានដីជម្លោះជាមួយក្រុមហ៊ុនយូនៀនឌីវុឡុបមែនគ្រុប មកពី៥ឃុំ ក្នុងពីរស្រុកគឺស្រុកបុទុមសាគរ និងស្រុកគិរីសាគរ។ ទំនាស់ដីនោះមានផលប៉ះពាល់ដល់ពលរដ្ឋជាង១ពាន់(១.១៨៤)គ្រួសារ ក្រោមការអភិវឌ្ឍរបស់ក្រុមហ៊ុនលើទំហំផ្ទៃជាង ៤ម៉ឺន(៤៥.១០០) ហិកតារ ដោយមានកិច្ចសន្យាជាមួយរដ្ឋាភិបាល៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។