ពលរដ្ឋនៅតាមព្រំដែនខេត្តត្បូងឃ្មុំបារម្ភរឿងវៀតណាមហាមមិនឱ្យធ្វើចម្ការនៅដីរបស់ខ្លួន
2015.03.05
ប្រជាពលរដ្ឋរស់នៅជាប់ព្រំដែនខ្មែរ-វៀតណាម នៅឃុំទ្រៀក ស្រុកមេមត់ ខេត្តត្បូងឃ្មុំ ឱ្យដឹងថា អាជ្ញាធរវៀតណាម បានហាមពួកគាត់មិនឲ្យធ្វើចម្ការលើដីរបស់ខ្លួនដែលស្ថិតនៅក្នុងដីខ្មែរចម្ងាយពីបង្គោលព្រំដែនជាច្រើនរយម៉ែត្រ។ អាជ្ញាធរព្រំដែនខ្មែរបញ្ជាក់ថា បើទោះបីជាមានការហាមឃាត់មែន ប៉ុន្តែអាជ្ញាធរនៅតែប្រាប់ពលរដ្ឋឲ្យបន្តធ្វើចម្ការជាបន្តទៀត ពីព្រោះដីនោះពុំមែនជាដីស្ថិតនៅតំបន់ហាមឃាត់នោះទេ។
ក្រោយពេលពលរដ្ឋនៅឃុំទ្រៀក នាំគ្នាទៅធ្វើចម្ការនៅក្បែរព្រំដែន ដែលមានប្រវែងប្រមាណ ៥ម៉ែត្រពីបង្គោលព្រំដែនលេខ ១០៥, ១០៦ អាជ្ញាធរព្រំដែនវៀតណាម បានដើរមកប្រាប់ពួកគាត់មិនឱ្យបន្តភ្ជួរដីដាំដំណាំរបស់ខ្លួនបានទេ ដោយអះអាងថា ដីតំបន់នោះរដ្ឋាភិបាលនៃប្រទេសទាំងពីរមិនទាន់បានដោះស្រាយចប់សព្វគ្រប់នៅឡើយ។ ពលរដ្ឋថា ដីស្រែចម្ការ គឺពួកគាត់ធ្វើជាច្រើនឆ្នាំមកហើយ ដោយមិនមានបញ្ហាចោទឡើងទេ ប៉ុន្តែពេលនេះបែរជាអាជ្ញាធរវៀតណាមមកហាមឃាត់ពួកគាត់ទៅវិញ។
ពលរដ្ឋនៅភូមិព្រៃ ឃុំទ្រៀក លោក ម៉ូន នឿន មានប្រសាសន៍ថា ការហាមឃាត់ពួកគាត់គឺកើតឡើងកាលពីថ្ងៃទី១ មីនា បន្ទាប់ពីពលរដ្ឋជួលអាត្រាក់ទៅភ្ជួរនិងកាយដីសម្រាប់ដាំដំណាំម្រេច បែរជាត្រូវសមត្ថកិច្ចព្រំដែនវៀតណាម មកប្រាប់ពលរដ្ឋខ្មែរឱ្យបញ្ឈប់សកម្មភាពរបស់ខ្លួន ហើយពួកគាត់ក៏ដកឃ្លាមួយរយៈសិន។
លោកបញ្ជាក់ថា ដីរបស់លោក និងពលរដ្ឋមួយចំនួនទៀត ស្ថិតនៅឆ្ងាយពីបង្គោលព្រំដែនប្រទេសទាំងពីរ និងមិនស្ថិតនៅក្នុងតំបន់សឡើយ៖ «បាទ! ខ្ញុំបារម្ភដែរ បារម្ភថា ខ្ញុំធ្វើលើដីរបស់ខ្លួនប៉ុណ្ណឹងហើយ ដល់ថ្ងៃមុខថ្ងៃក្រោយគេមកធ្វើទៀតទៅ គេយកមិនដឹងយកមកដល់ណាទេ»។
ប្រភពដដែលបន្តថា ខាងវៀតណាម គេមិនមានតំបន់សអីនោះទេ ព្រោះឃើញពលរដ្ឋវៀតណាម មកធ្វើស្រែ ឬចម្ការមកដល់ព្រំដែន ប៉ុន្តែចម្លែកតែពលរដ្ឋខ្មែរដែលមិនអាចធ្វើដូចគេបាន។ លោកបញ្ជាក់ថា បើទោះបីជាអាជ្ញាធរវៀតណាម មកហាមឃាត់ក៏ដោយ ក៏លោករួមនិងពលរដ្ឋផ្សេងទៀត នឹងនៅតែបន្តធ្វើចម្ការលើដីរបស់ខ្លួនតទៅទៀត។ តែយ៉ាងណា លោកចង់ឱ្យរាជរដ្ឋាភិបាលកម្ពុជា ដោះស្រាយបញ្ហាព្រំដែនជាមួយប្រទេសវៀតណាម ឱ្យបានច្បាស់លាស់ ជៀសវាងបញ្ហាកើតឡើងរវាងពលរដ្ឋនិងពលរដ្ឋ។
ទាក់ទងបញ្ហានេះ មេឃុំទ្រៀក លោក អ៊ូច យ៉ាន់ មានប្រសាសន៍ថា លោកទើបទទួលបានព័ត៌មាននេះ ប៉ុន្តែលោកត្រូវការព័ត៌មានឱ្យច្បាស់ជាមុនសិន ដើម្បីឈានទៅដោះស្រាយ។ លោកបញ្ជាក់ថា កន្លងមកនៅឃុំលោកគ្រប់គ្រង មិនធ្លាប់មានបញ្ហានេះកើតឡើងទេ។
ដោយឡែកមន្ត្រីសមត្ថកិច្ចទទួលបន្ទុកឃ្លាំមើលព្រំដែន នៅប៉ុស្តិ៍នគរបាលដូនរ័ត្ន លោក ជួន សម្បត្តិ បញ្ជាក់ថា ពិតជាមានសមត្ថកិច្ចវៀតណាម មកហាមឃាត់ពលរដ្ឋខ្មែរនៅពេលពួកគេទៅធ្វើចម្ការមែន ប៉ុន្តែលោកថា បញ្ហានេះបានដោះស្រាយទៅវិញហើយ ដោយបង្គាប់ឱ្យពលរដ្ឋខ្មែរបន្តធ្វើចម្ការលើដីពួកគេដូចដើម។
លោកបន្ថែមថា ដីពលរដ្ឋដែលត្រូវបានអាជ្ញាធរវៀតណាម ហាមឃាត់ គឺមានចម្ងាយពីបង្គោលលេខ ១០៦ ប្រវែងប្រមាណ ៥០០ម៉ែត្រ និងឆ្ងាយពីតំបន់សនៃប្រទេសទាំងពីរប្រវែង ២០០ម៉ែត្រ ដូចនេះការហាមឃាត់របស់អាជ្ញាធរវៀតណាម លោកយល់ថា ជារឿងមិនត្រឹមត្រូវ៖ «វាជារឿងមិនត្រឹមត្រូវទេ ព្រោះវៀតណាមគេយល់ឃើញអ៊ីចេះ។ គេមិនហាមឃាត់ការដាំដំឡូងដាំអីដដែលទេ ប៉ុន្តែគេឃើញមានអីស្ការកកាយ»។
មន្ត្រីការពារព្រំដែនដដែលឱ្យដឹងទៀតថា ជារៀងរាល់ឆ្នាំតែងមានបញ្ហានេះកើតឡើង ដោយសារអាជ្ញាធរវៀតណាម ចេះតែមកហាមឃាត់ពលរដ្ឋខ្មែរ ៣ ឬ ៤គ្រួសារ មិនឱ្យធ្វើស្រែចម្ការបាន។ តែយ៉ាងណាខាងលោកក៏ធ្លាប់ហាមឃាត់ពលរដ្ឋវៀតណាម ដូចគ្នាដែរ នៅពេលពួកគេចូលមកដល់តំបន់ហាមឃាត់។ លោកបន្ថែមទៀតថា ការដោះស្រាយរបស់អាជ្ញាធរកន្លងមក គឺធ្វើឡើងដោយសន្តិវិធីរវាងភាគីប្រទេសទាំងពីរ។
លោកបញ្ជាក់ថា មូលហេតុតំបន់នោះនៅមានតំបន់សទៀត ពីព្រោះបង្គោលព្រំដែន ទាំងបង្គោលធំ និងបង្គោលរណប គឺមិនទាន់បានដាក់សម្ពោធជាផ្លូវការរវាងរដ្ឋាភិបាលទាំងពីរនៅឡើយ។
ទោះបីជាយ៉ាងណាក៏ដោយ កន្លងមកការហាមឃាត់ពលរដ្ឋខ្មែរនៅតាមព្រំដែននៅខេត្តត្បូងឃ្មុំ មិនឱ្យធ្វើស្រែចម្ការលើដីខ្លួនតែងកើតមានឡើង ដូចជានៅឃុំរូង ឃុំទ្រៀក ឃុំច័ន្ទមូល ស្ថិតនៅក្នុងស្រុកមេមត់ ឃុំត្រពាំងផ្លុង ស្រុកពញាក្រែក ជាដើម។ លើសពីនេះ មានតំបន់ខ្លះ សមត្ថកិច្ចវៀតណាម មកបោះទីតាំងលើដីខ្មែរថែមទៀតផង។ ទោះជាយ៉ាងណា ទេសរដ្ឋមន្ត្រី និងជាប្រធានគណៈកម្មាធិការទទួលបន្ទុកកិច្ចការព្រំដែន លោក វ៉ា គឹមហុង ធ្លាប់មានប្រសាសន៍ថា បើតំបន់ណាបានបោះបង្គោលព្រំដែនរួចរាល់ហើយ តំបន់នោះគឺលែងមានជាតំបន់សទៀតហើយ។
ទាក់ទិនរឿងនេះសមាជិកក្រុមប្រឹក្សាខេត្តត្បូងឃ្មុំ លោក ស៊ូ យាន គត់សម្គាល់ថា កន្លងមកអាជ្ញាធរវៀតណាម តែងបំពានលើបូរណភាពដែនដីកម្ពុជា បើទោះបីជាកន្លែងខ្លះ មានបង្គោលព្រំដែនជាផ្លូវការទៅហើយក្តី។ លោកយល់ថា មូលហេតុនាំឱ្យវៀតណាម ចេះតែមើលងាយខ្មែរ ដោយសារតែរាជរដ្ឋាភិបាលកម្ពុជា ហាក់នៅក្រោមឥទ្ធិពលរបស់វៀតណាម៖ «ខ្ញុំថា ដោយសារថ្នាក់ដឹកនាំខ្មែរចុះសន្ធិសញ្ញាបំពេញបន្ថែមនៅឆ្នាំ១៩៧៩ ,៨២,៨៣,៨៥ ហាក់នៅពីក្រោម។ ពាក្យខ្មែរថា ជាអាយ៉ងបរទេស»។
លោកបន្តថា នឹងដាក់សំណើនេះជូនទៅគណៈអភិបាលខេត្តត្បូងឃ្មុំ នៅពេលប្រជុំខាងមុខ ឱ្យមានការជួបជាមួយអាជ្ញាធរវៀតណាម ដើម្បីដោះស្រាយលើបញ្ហានេះ និងបង្កើតឱ្យមានការគោរពគ្នាទៅវិញទៅមក។ ម្យ៉ាងទៀត ដើម្បីប្រជាពលរដ្ឋខ្មែររស់នៅក្បែរខ្សែបន្ទាត់ព្រំដែនមានភាពកក់ក្ដៅផង៕