ពលរដ្ឋព្រួយបារម្ភពីការបង្កើតសមាគមសង្គ្រោះជនពិការនៅខេត្តកំពង់ស្ពឺ

ពលរដ្ឋចំនួន៤៥គ្រួសារ ស្ថិតនៅភូមិវាលធំ ឃុំត្រែងត្រយឹង ស្រុកភ្នំស្រួច ខេត្តកំពង់ស្ពឺ សម្ដែងការព្រួយបារម្ភពីការបង្កើតឡើងវិញ នៃសមាគមសង្គ្រោះជនពិការ។

ដោយ វិជ័យ អានន្ទ
2012-09-07

h090612cp-a1.mp3

ពលរដ្ឋឲ្យដឹងនៅថ្ងៃទី០៦ ខែកញ្ញា ឆ្នាំ២០១២ ថា ការបើកសមាគមសង្គ្រោះជនពិការឡើងវិញ អាចនឹងធ្វើឲ្យពួកគាត់រងគ្រោះដោយសារការរំលោភបំពានរបស់សមាគមរឹបអូសយកដីពួកគាត់ជាថ្មីម្ដងទៀត ព្រោះកន្លងមកសមាគមនេះ មិនបានសង្គ្រោះជនពិការ ឬជួយអ្នកក្រីក្រនោះឡើយ។ ជាងនេះទៅទៀត សមាគមមានតែឆ្លៀតឱកាសជិះជាន់ជនពិការ និងពលរដ្ឋក្រីក្រខ្វះចំណេះដឹង ដើម្បីរំលោភយកដីធ្លីពួកគេ។

នៅថ្ងៃទី០៦ ខែកញ្ញា ឆ្នាំ២០១២ សមាគមសង្គ្រោះជនពិការកោះហៅសមាជិកនៃសមាគមរបស់ខ្លួនមកជួបប្រជុំគ្នា នៅភូមិវាលធំ ឃុំត្រែងត្រយឹង ស្រុកភ្នំស្រួច ដើម្បីបង្កើតសមាគមឡើងវិញ បន្ទាប់ពីប្រធានសមាគមនេះ គឺលោក ទូច សឿលី ត្រូវអាជ្ញាធរចាប់ដាក់ពន្ធនាគារនាពេលកន្លង។ សកម្មភាពរបស់សមាគមបានផ្អាកមួយរយៈ បន្ទាប់ពីប្រធានរបស់ខ្លួនត្រូវអាជ្ញាធរចាប់ដាក់គុកនោះ។

ពលរដ្ឋបញ្ជាក់ថា កន្លងមក សមាគមនេះមានសិទ្ធិអំណាចដកហូតដីពលរដ្ឋតាមអំពើចិត្ត យកទៅលក់ដូរឲ្យឈ្មួញ ដោយប្រើអំពើហិង្សាដាក់ប្រជាពលរដ្ឋក្នុងការយករូបភាពជាសមាគមកាន់កាប់ដីធ្លីរបស់ពលរដ្ឋ ហើយសមាគមហាក់មានអំណាចច្រើន ព្រោះសូម្បីអាជ្ញាធរមូលដ្ឋានក៏មិនហ៊ានប៉ះពាល់សមាគមនេះឡើយ។

ពលរដ្ឋមានចម្ងល់ថា ហេតុអ្វីទើបសមាគមនេះ មានឈ្មោះជាសមាគមសង្គ្រោះជនពិការ តែបែរជាមានសិទ្ធិចាត់ចែងរឿងដីធ្លីរបស់ប្រជាពលរដ្ឋនាពេលកន្លងមកនោះ៖ «ខ្ញុំចង់ធ្វើយ៉ាងណា សំណូមពរកុំឲ្យបង្កើតសមាគមហ្នឹងទៅទៀត ព្រោះសមាគមហ្នឹងធ្វើឡើង វាអត់មានផ្ដល់ផលប្រយោជន៍អីប្រជាពលរដ្ឋនៅនេះទេ។ វាបានតែអ្នកមានអំណាចមួយចំនួន អ្នកមានបុណ្យស័ក្ដិមួយចំនួន អ្នកមានលុយមួយចំនួន ហើយនិងក្រុមសមាជិកមួយចំនួនតូចតែប៉ុណ្ណោះទេ ដែលបានប្រយោជន៍ ចំពោះប្រជាពលរដ្ឋ គឺរងគ្រោះដោយសារគេដកដីហ្នឹងឯង យកទៅលក់ឲ្យអ្នកដទៃ មួយលក់ឲ្យឈ្មួញ អ៊ីចឹងហើយខ្ញុំចង់ថាកុំឲ្យមានសមាគមជាបន្តទៀត ដូច្នេះខ្ញុំចង់សំណូមពរ ចង់ឲ្យរដ្ឋាភិបាល និងក្រសួងមហាផ្ទៃ ឲ្យលោកពិនិត្យមើលក្នុងលក្ខន្តិកៈ បទបញ្ជាផ្ទៃក្នុងរបស់សមាគម បើធ្វើខុសឆ្គងអីចឹង សូមឲ្យលោកលុបសមាគមចោលកុំឲ្យមានបន្តទៀត»។

ឆ្លើយតបការលើកឡើងរបស់ប្រជាពលរដ្ឋនេះ អភិបាលខេត្តកំពង់ស្ពឺ លោក កង ហ៊ាន មានប្រសាសន៍ថា លោកមិនអនុញ្ញាតឲ្យសមាគមនេះបន្តសកម្មភាពជាបន្តទៀតនោះទេ ព្រោះលោកបានរាយការណ៍ពីសកម្មភាពរបស់សមាគមនេះ ដល់ក្រសួងមហាផ្ទៃរួចរាល់ហើយ ដូច្នេះសមាគមនេះមិនអាចបន្តធ្វើសកម្មភាពរបស់ខ្លួនបានទៀតទេ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។