អាជ្ញាធរខេត្តរតនគិរី ផ្អាកបណ្ដេញពលរដ្ឋឲ្យរុះរើលំនៅឋានចេញពីដីរដ្ឋ
h082612sr.mp3
ការផ្អាកនេះ បន្ទាប់ពីប្រជាពលរដ្ឋទាំងនោះអំពាវនាវសុំឲ្យប្រមុខរាជរដ្ឋាភិបាលផ្តល់ដីនៅទីនោះជាសម្បទានសង្គមកិច្ច ដល់ពួកគាត់ ដើម្បីរស់នៅបម្រើវិស័យព្រះពុទ្ធសាសនា នៅជុំវិញវត្តសុវណ្ណគិរីបព្វត មានទីតាំងនៅជិតនឹងខ្សែបន្ទាត់ព្រំដែនកម្ពុជា និងប្រទេសវៀតណាម។
មន្ត្រីអាជ្ញាធរខេត្តរតនគិរី នៅថ្ងៃអាទិត្យ ទី២៦ ខែសីហា ឆ្នាំ២០១២ ឲ្យដឹងថា ក្រុមសមត្ថកិច្ចចម្រុះកំពុងរៀបចំរបាយការណ៍ដាក់ជូនអភិបាលខេត្ត សុំការសម្រេចលើការស្នាក់នៅរបស់ប្រជាពលរដ្ឋចំណាកស្រុកជាង៣០គ្រួសារ ដែលបានចូលបោះទីតាំងរស់នៅលើដីសម្បទានសេដ្ឋកិច្ចរបស់រដ្ឋ ដែលប្រគល់ទៅឲ្យក្រុមហ៊ុនវៀតណាម ឈ្មោះ ដាយ ដុងយឿង ក្នុងភូមិឡំ ឃុំប៉ក់ញ៉ៃ ស្រុកអូរយ៉ាដាវ។
ក្រុមសមត្ថកិច្ចចម្រុះនៃអាជ្ញាធរខេត្តរតនគិរី កាលពីថ្ងៃទី១២ ខែសីហា បានកំណត់ពេលមួយសប្ដាហ៍ឲ្យប្រជាពលរដ្ឋជាង១០គ្រួសារ រុះរើលំនៅឋានចេញពីដីដែលពួកគាត់ជាប្រជាពលរដ្ឋចំណាកស្រុកចូលបោះទីតាំងថ្មីៗ រស់នៅលើដីសម្បទានសេដ្ឋកិច្ចរបស់រដ្ឋ ដែលបានប្រគល់ទៅឲ្យក្រុមហ៊ុនវៀតណាម បើមិនដូច្នេះទេ ក្រុមអាជ្ញាធរនឹងរុះរើលំនៅឋានប្រជាពលរដ្ឋ ដោយមិនទទួលខុសត្រូវការខូចខាត។
ស្នងការរងនគរបាលខេត្តរតនគិរី លោក ជា ប៊ុនធឿន មានប្រសាសន៍បញ្ជាក់ថា ក្រុមសមត្ថកិច្ចចម្រុះសម្រេចផ្អាកថ្ងៃកំណត់ឲ្យប្រជាពលរដ្ឋទាំងនោះរុះរើលំនៅឋានជាបណ្ដោះអាសន្នសិន បន្ទាប់ពីក្រុមមន្ត្រីមកពីមន្ទីរជំនាញពាក់ព័ន្ធ បានចុះពិនិត្យមើលទិដ្ឋភាពជាក់ស្តែងទីតាំងដែលប្រជាពលរដ្ឋបានតាំងទីលំនៅ។
លោកបន្តថា សមត្ថកិច្ចចម្រុះបានរកឃើញស្ថិតិប្រជាពលរដ្ឋដែលតាំងទីលំនៅលើដីរដ្ឋនោះ មានចំនួនជាង៣០គ្រួសារ ក្នុងនោះ ២១គ្រួសារតាំងទីលំនៅតាំងពីឆ្នាំ២០០៩ និង១០គ្រួសារទៀត ចូលមកសង់រោងប្រក់តង់កៅស៊ូ ក្នុងឆ្នាំ២០១២ នេះ៖ «គោលការណ៍យើង គឺយើងសុំទៅខេត្ត ដើម្បីឲ្យគាត់សម្រេចថាគួរតែឲ្យប្រជាជនរស់នៅទីនោះ ឬក៏យ៉ាងម៉េច។ យើងរង់ចាំការពិភាក្សាគ្នាក្នុងគណៈកម្មការហ្នឹង។ ដល់ពិភាក្សាគ្នាហើយ បានធ្វើរបាយការណ៍មួយដាក់ជូនគណៈអភិបាលខេត្តហ្នឹង»។
ប្រជាពលរដ្ឋអ្នកតាំងទីលំនៅលើដីរដ្ឋមួយរូប សុំមិនឲ្យបញ្ចេញឈ្មោះ មានប្រសាសន៍បញ្ជាក់ថា ដីដែលប្រជាពលរដ្ឋចូលទៅតាំងទីលំនៅ គឺជាដីព្រៃសេសសល់ពីការកាប់រានរបស់ជនជាតិដើមភាគតិច នៅតំបន់នោះ មានចំងាយ៥០០ម៉ែត្រពីព្រំដែនប្រទេសវៀតណាម មិនមានប្រជាពលរដ្ឋខ្មែររស់នៅទេ។ លោកបន្តថា បច្ចុប្បន្នវត្តព្រះពុទ្ធសាសនាមួយបានកកើតនៅទីនោះរួចហើយ ដូច្នេះអាជ្ញាធរគួរផ្តល់ដីនោះជាដីសម្បទានសង្គមកិច្ច ជូនប្រជាពលរដ្ឋរួមជាមួយព្រះសង្ឃរស់នៅ ដើម្បីរក្សាអត្តសញ្ញាណពលរដ្ឋខ្មែររស់នៅលើដីខ្មែរនាតំបន់ព្រំដែនជាការប្រសើរ៖ «ឥឡូវហ្នឹង គេអត់មានប្រតិកម្មអ្វីទាំងអស់ ពីមុនគេឲ្យប្រជាជនរុះរើផ្ទះ។ ប្រជាពលរដ្ឋយើងខ្ញុំនៅរង់ចាំមើលការស្នើសុំហ្នឹង។ កាលថ្ងៃទី១៨ ហ្នឹង គេចុះមកធ្វើស្ថិតិប្រជាពលរដ្ឋ អ្នកណាដែលអត់ហ្នឹង ហើយម្សិលមិញហ្នឹង ប្រជាពលរដ្ឋទៅឃុំថតរូបហ្នឹង»។
អភិបាលស្រុកអូរយ៉ាដាវ លោក ដក ស មានប្រសាសន៍ថា គោលបំណងរបស់អាជ្ញាធរមូលដ្ឋាន គឺចង់ឲ្យប្រជាពលរដ្ឋអ្នកចំណាកស្រុក ត្រូវវិលត្រឡប់ទៅអតីតភូមិស្រុករបស់ខ្លួន រកឯកសារបញ្ជាក់ពីអាជ្ញាធរមូលដ្ឋាន ជុំវិញតម្រូវការដីសម្បទានសង្គមកិច្ច តាមគោលនយោបាយរបស់រាជរដ្ឋាភិបាល។ លោកមិនទាន់ប្រាកដថា តើអាជ្ញាធរខេត្តនឹងសម្រេចបែបណា ជុំវិញស្ថានភាពប្រជាពលរដ្ឋចូលមកតាំងទីលំនៅលើដីរដ្ឋនោះទេ។
អ្នកសម្របសម្រួលសមាគមការពារសិទ្ធិមនុស្សអាដហុក (ADHOC) ខេត្តរតនគិរី លោក ប៉ែន ប៊ុណ្ណារ៍ មានប្រសាសន៍ចាត់ទុកការផ្អាកបណ្ដេញប្រជាពលរដ្ឋថា ជាកត្តាសំខាន់មួយជួយកាត់បន្ថយការលំបាករបស់ប្រជាពលរដ្ឋក្រីក្រខ្វះខាតដីធ្វើស្រែចម្ការចិញ្ចឹមជីវិត។ លោកបន្តថា តំបន់ព្រំដែនខ្មែរនៅចំណុចភូមិឡំ មិនសូវមានប្រជាពលរដ្ឋទៅរស់នៅទេ ក្រៅពីជនជាតិដើមភាគតិចចារាយខ្មែរនោះ៖ «ការដោះស្រាយនេះ ជាវិធីមួយល្អហើយ ពីព្រោះវាបានជួយប្រជាពលរដ្ឋឲ្យមានជម្រក ជាពិសេសគាត់បាននៅជិតព្រំដែនផង ដែលជាកន្លែងដែលយើងត្រូវការឲ្យមានប្រជាពលរដ្ឋយើងរស់នៅច្រើនកុះករ»។
យ៉ាងនេះក្តី អភិបាលខេត្តរតនគិរី លោក ប៉ាវ ហមផាន មានប្រសាសន៍បញ្ជាក់ថា ក្រុមសមត្ថកិច្ចចម្រុះមិនទាន់បានផ្តល់របាយការណ៍ពីករណីនេះមកអាជ្ញាធរខេត្តនៅឡើយ ក៏ប៉ុន្តែលោកកត់សម្គាល់ថា ការតាំងទីលំនៅរបស់ប្រជាពលរដ្ឋខ្លះ ទើបតែកើតមាននៅពេលថ្មីៗនេះតែប៉ុណ្ណោះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
-
ស្ដាប់ផ្ទាល់
(ព្រឹក ៥:៣០-៦:៣០ ល្ងាច ៧:៣០-៨:៣០) - សំឡេង
ភាសា
