អាជ្ញាធរខេត្តរតនគិរីបណ្ដេញពលរដ្ឋសង់លំនៅខុសច្បាប់លើដីសម្បទាន
sr.mp3
ប្រជាពលរដ្ឋជាង ១០គ្រួសារ រស់នៅភូមិឡំ ឃុំប៉ក់ញ៉ៃ ស្រុកអូរយ៉ាដាវ ខេត្តរតនគិរី នៅថ្ងៃច័ន្ទ ទី១៣ ខែសីហា ឆ្នាំ២០១២ អំពាវនាវសុំឲ្យប្រមុខរាជរដ្ឋាភិបាលផ្ដល់ដីសម្បទានសង្គមកិច្ចដល់ពួកគាត់ ដើម្បីរស់នៅបំរើវិស័យព្រះពុទ្ធសាសនា នៅជុំវិញវត្តសុវណ្ណគិរីបព្វតា មានទីតាំងនៅជិតនឹងខ្សែបន្ទាត់ព្រំដែនកម្ពុជា និងប្រទេសវៀតណាម ក្នុងខេត្តរតនគិរី។
សេចក្ដីអំពាវនាវនេះធ្វើឡើងមួយថ្ងៃបន្ទាប់ពីក្រុមអាជ្ញាធរខេត្តរតនគិរី កាលពីថ្ងៃទី១២ ខែសីហា បានដាក់ឱសានវាទឲ្យប្រជាពលរដ្ឋទាំងនោះរុះរើលំនៅឋានចេញពីដីដែលពួកគាត់ជាប្រជាពលរដ្ឋចំណាកស្រុកចូលបោះទីតាំងរស់នៅលើដីសម្បទានសេដ្ឋកិច្ចរបស់រដ្ឋដែលបានប្រគល់ទៅឲ្យក្រុមហ៊ុនវៀតណាម ឈ្មោះ ដាយ ដុងយឿង បើមិនដូច្នេះទេ ក្រុមអាជ្ញាធរនឹងរុះរើលំនៅឋានប្រជាពលរដ្ឋដោយមិនទទួលខុសត្រូវការខូចខាត។
ប្រជាពលរដ្ឋមួយរូបសុំមិនបញ្ចេញឈ្មោះ មានប្រសាសន៍ឲ្យដឹងថា ពួកគាត់សុទ្ធសឹងតែជាប្រជាពលរដ្ឋក្រីក្រខ្វះដីធ្វើស្រែចំការ ហេតុនេះបានធ្វើចំណាកស្រុកមកកាន់តំបន់ដាច់ស្រយាលមួយនេះ ដើម្បីប្រកបរបរចិញ្ចឹមជីវិត និងបានរស់នៅទ្រទ្រង់វត្តខ្មែរដែលមានព្រះសង្ឃមួយអង្គគង់នៅក្នុងតំបន់ជនជាតិដើមភាគតិចជាប់នឹងព្រំដែនប្រទេសវៀតណាមនេះ។
ប្រជាពលរដ្ឋនោះបន្តថា ពួកគាត់មិនមានជម្រើសស្វែងរកដីរស់នៅប្រកបរបរចិញ្ចឹមជីវិតបានទេ ដូច្នេះការបណ្ដេញឲ្យរុះរើលំនៅឋានចេញរបស់ពួកគាត់នឹងធ្វើឲ្យប៉ះពាល់ជីវភាពរស់នៅកាន់តែធ្ងន់ធ្ងរឡើង៖ «ខ្ញុំចង់សំណូមពរដល់សម្ដេចតេជោ ថាសុំមួយជុំវិញវត្តហ្នឹងឲ្យប្រជាជនរស់នៅដើម្បីជាទីសក្ការបូជា។ ម្តុំហ្នឹងកកើតវត្តហើយដល់កកើតវត្តអត់ប្រជាពលរដ្ឋនៅលោកបានចង្ហាន់ឯណាឆាន់»។
ប្រធានភូមិឡំ លោក សេវ លីន មានប្រសាសន៍បញ្ជាក់ថា ប្រជាពលរដ្ឋចំណាកស្រុកទាំងនោះទើបចូលមកបោះរោងប្រក់សំពត់កៅស៊ូរស់នៅលើដីព្រៃរបស់រដ្ឋប្រមាណ ៣ ទៅ ៤ខែកន្លងទៅតែប៉ុណ្ណោះ។
លោកបន្តថា ប្រជាពលរដ្ឋចំណាកស្រុកទាំងនោះបានកាប់ឆ្ការព្រៃចាប់យកដីមួយគ្រួសារពីកន្លះហិកតារទៅមួយហិកតារជាប់នឹងបរិវេណវត្ត ដើម្បីរស់នៅធ្វើកម្មករតាមចំការប្រជាពលរដ្ឋខ្មែរ និងពលរដ្ឋវៀតណាម នៅតំបន់ជិតគ្នានោះ៖ «កន្លែងគេចាប់ដីហ្នឹងគេសួរថា ស្គាល់មេភូមិអត់? ពួកហ្នឹងអត់ស្គាល់មេភូមិផង គេអត់ស្គាល់ខ្ញុំ ខ្ញុំអត់ស្គាល់គេ។ ទើបត្រួសត្រាយព្រៃវាអត់ទាន់ដាំស្អីផងហ្នឹង»។
អភិបាលស្រុកអូរយ៉ាដាវ លោក ដក ស មានប្រសាសន៍បញ្ជាក់ថា ក្រុមអាជ្ញាធរតម្រូវឲ្យប្រជាពលរដ្ឋទាំងនោះរុះរើរោងចេញពីដីនោះដោយសារតែដីដែលពួកគាត់ទើបតែមកសង់រោងស្នាក់នៅលើដីរដ្ឋខុសច្បាប់។ លោកបន្តថា ប្រជាពលរដ្ឋដែលចូលមកបោះទីតាំងរសនៅលើដីរដ្ឋនេះ គឺធ្វើឡើងតាមការដឹកនាំពីមន្ត្រីនគរបាលការពារព្រំដែនម្នាក់នៅតំបន់នោះ៖ «ដីវត្តក្រុមហ៊ុនគេទុកឲ្យហើយ ប៉ុន្តែគេទៅចាប់ក្រៅពីដីវត្ត អ្នកនាំចាប់ដីហ្នឹងប៉ូលិសព្រំដែន របាយការណ៍គេរាយការណ៍តាមទូរស័ព្ទ»។
អ្នកសម្របសម្រួលសមាគមការពារសិទ្ធិមនុស្សអាដហុក (ADHOC) ខេត្តរតនគិរី លោក ប៉ែន ប៊ុណ្ណារ៍ មានប្រសាសន៍ថា ការអនុវត្តគោលនយោបាយចាស់សកម្មភាពថ្មីរបស់រាជរដ្ឋាភិបាលនៅពេលនេះ គឺផ្ដល់ដីជូនប្រជាពលរដ្ឋដែលរស់នៅក្នុងដីសម្បទានសេដ្ឋកិច្ច និងរស់នៅលើដីមួយចំនួនទៀតជាទ្រព្យសម្បត្តិរដ្ឋ និងរៀបចំផ្ដល់ដីសម្បទានសង្គមកិច្ចជូនប្រជាពលរដ្ឋគ្មានដីពិតប្រាកដ ក៏ប៉ុន្តែក្នុងការអនុវត្តគោលនយោបាយនេះ ប្រជាពលរដ្ឋមួយចំនួនចាត់ទុកថា មានករណីមិនស្មើភាពគ្នាក្នុងការអនុវត្តច្បាប់។
លោកបន្តថា រដូវនេះជារដូវភ្លៀង និងជារដូវប្រជាពលរដ្ឋបង្កបង្កើនផល ដូច្នេះក្រុមអាជ្ញាធរគួរពិចារណាពន្យារពេលដល់ប្រជាពលរដ្ឋជាបណ្ដោះអាសន្ន រហូតដល់ពេលប្រមូលផលសិន៖ «យើងមិនដែលឃើញអាជ្ញាធរទៅបណ្ដេញពួកអ្នកមានអំណាចមានប្រាក់ដែលកាប់រានដីព្រៃរាប់ពាន់ហិកតារ រាប់រយហិកតារទេ យើងទាមទារទៅប្រមុខរដ្ឋាភិបាលសុំឲ្យមានការអនុវត្តច្បាប់ឲ្យស្មើគ្នា។ក្នុងវិធីច្បាប់ដោះស្រាយគឺផ្ដល់ដីសម្បទានសង្គមកិច្ច»។
យ៉ាងនេះក្តីមន្ត្រីអាជ្ញាធរស្រុកអូរយ៉ាដាវ ឲ្យដឹងថា ប្រជាពលរដ្ឋអ្នកចំណាកស្រុកត្រូវវិលត្រឡប់ទៅអតីតភូមិស្រុករបស់ខ្លួនរកឯកសារបញ្ជាក់ពីអាជ្ញាធរមូលដ្ឋានជុំវិញតម្រូវការដីសម្បទានសង្គមកិច្ច ដើម្បីអាជ្ញាធរខេត្តចាត់វិធានការស្នើសុំដីសម្បទានសង្គមកិច្ចជូនតាមគោលនយោបាយរបស់រាជរដ្ឋាភិបាល៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
-
ស្ដាប់ផ្ទាល់
(ព្រឹក ៥:៣០-៦:៣០ ល្ងាច ៧:៣០-៨:៣០) - សំឡេង
ភាសា
