ពលរដ្ឋ១២គ្រួសារស្នើដកខ្លួនចេញពីការគ្រប់គ្រងរបស់អង្គការសុវណ្ណា
h080112tn.mp3
ក្នុងលិខិតនោះ អ្នកភូមិស្នើសុំឲ្យអាជ្ញាធរឃុំ ធ្វើលិខិតបញ្ជាក់ថា ពួកគេបានផ្តាច់ខ្លួនចេញពីការគ្រប់គ្រងរបស់អង្គការបរិស្ថានឈ្មោះ អង្គការសុវណ្ណា ប្រយោជន៍ដើម្បីឲ្យពួកគាត់អាចរស់នៅដោយឯករាជ្យ។
អ្នកស្រីបន្តថា អង្គការសុវណ្ណា ដែលមានទិសដៅការពារបរិស្ថាន បានកៀងគរប្រមូលអ្នកភូមិដែលរស់នៅក្នុងតំបន់ព្រៃ ឲ្យមករស់នៅជុំគ្នា ក្នុងភូមិថ្មីមួយឈ្មោះថា ភូមិសុវណ្ណាបៃតង ដែលមានទំហំជាង៣ពាន់ហិកតារ តាំងពីឆ្នាំ២០០៤។ អង្គការនេះបានចែកដីទំហំ១ហិកតារកន្លះ ដល់អ្នកភូមិក្នុងមួយគ្រួសារ សម្រាប់បង្កបង្កើនផល និងសន្យាថា នៅពេលដែលអ្នកភូមិមករស់នៅបានរយៈពេល៥ឆ្នាំ នឹងចេញប្លង់កម្មសិទ្ធិឲ្យពួកគេស្របច្បាប់។
តែរយៈពេល៨ឆ្នាំមកហើយ អង្គការសុវណ្ណា នៅតែមិនទាន់ចេញប្លង់កម្មសិទ្ធិដល់អ្នកភូមិ ធ្វើឲ្យពួកគាត់អស់សង្ឃឹម។ រួមផ្សំនឹងការបង្កបង្កើនផលមិនបានទាន់តាមការកំណត់ តាមគោលការណ៍របស់អង្គការ ម្យ៉ាងវិញទៀត អង្គការនេះក៏បានផ្តាច់ជំនួយអង្ករដល់អ្នកភូមិជិត៣ឆ្នាំមកហើយ ធ្វើឲ្យពួកគាត់ខ្វះខាតជីវភាព ទើបសម្រេចផ្តាច់ខ្លួនចេញពីអង្គការតែម្តង៖ «កុំឲ្យគ្មានដីនឹងគេ គ្មានធ្វើអីបានហាម៉ាត់ណា ក៏គេថាដីគម្រោង ហាម៉ាត់ថាដីគម្រោងអញ្ចឹង។ ចង់មានសិទ្ធិកាន់កាប់ដីធ្លីរបស់ខ្ញុំ»។
អ្នកភូមិម្នាក់ទៀតឈ្មោះ មៀច ម៉ន អាយុ ៥៤ឆ្នាំ ឲ្យដឹងស្រដៀងគ្នា ដោយបញ្ជាក់បន្ថែមថា អ្នកភូមិទទួលដំណឹងថាក្រុមនិស្សិតចុះវាស់វែងដីរបស់នាយករដ្ឋមន្ត្រី ហ៊ុន សែន គ្រោងទៅវាស់វែងដីនៅភូមិប្រលាន នៅដើមខែសីហា នេះ ទើបអ្នកភូមិចង់ផ្តាច់ខ្លួនចេញពីក្រោមការគ្រប់គ្រងរបស់អង្គការ និងស្នើសុំអាជ្ញាធរឃុំ ឲ្យក្រុមនិស្សិតទាំងនោះចុះទៅវាស់វែងដី ដែលពួកគាត់កំពុងកាន់កាប់ក្នុងតំបន់ដែលអង្គការបរិស្ថានគ្រប់គ្រង៖ «ទាមទារប្រាប់មេឃុំថា ខ្ញុំមិនរស់នៅក្រោមគម្រប មិនឲ្យមាននរណាគាបសង្កត់ខ្ញុំអញ្ចឹង។ ខ្ញុំចង់ធ្វើអីបានស្រេចតែខ្ញុំអញ្ចឹង ប៉ុន្តែថា នៅតែដីហ្នឹងដដែល»។
មេឃុំកណ្ដោល លោក គីម ជួន ឲ្យដឹងថា លោកមិនទាន់បានឃើញលិខិតស្នើសុំរបស់អ្នកភូមិនៅឡើយទេ តែគាត់បានប្រជុំជាមួយតំណាងសហគមន៍អំពីបញ្ហានេះដែរ នៅថ្ងៃទី១ ខែសីហា។ លោកនៅមិនទាន់អាចឆ្លើយតបអ្វីចំពោះសំណើសុំរបស់អ្នកភូមិទេ ដោយរង់ចាំសិក្សាពីករណីនេះបន្ថែមទៀត។
នាយប៉ុស្តិ៍នគរបាលឃុំកណ្ដោល លោក ឆាយ បូ ដែលចូលរួមប្រជុំជាមួយតំណាងសហគមន៍ នៅសាលាឃុំ ឲ្យដឹងថា អ្នកភូមិចង់ឲ្យក្រុមនិស្សិតវាស់វែងដីទំហំ១ហិកតារកន្លះ ដែលអង្គការសុវណ្ណា ចែកឲ្យពួកគេ ដើម្បីឲ្យដីទាំងនោះក្លាយជាកម្មសិទ្ធិស្របច្បាប់របស់គាត់។
លោកបន្តថា អ្នកភូមិមួយចំនួនចង់ធ្វើការចំណាកស្រុក ទៅរកការងារធ្វើ តែពួកគេមិនអាចទៅបាន ដោយសារតែដីនោះស្ថិតក្រោមការកាន់កាប់របស់អង្គការសុវណ្ណា។ ម្យ៉ាង មិនមានប្លង់កាន់កាប់ និងខ្លាចក្រែងអង្គការនេះដកហូតយកដីទៅវិញ។
លោកបន្តថា តាមគម្រោងក្រុមនិស្សិតទាំងនោះ នឹងទៅចុះវាស់វែងដីនៅភូមិប្រលាន នៅថ្ងៃទី៣ ខែសីហា ខាងមុខ ហើយបើទោះបីជាដីនោះស្ថិតក្រោមការគ្រប់គ្រងរបស់អង្គការបរិស្ថានក៏ដោយ ក៏ពួកគេនៅតែមានគោលដៅទៅវាស់ដីធ្លីជូនអ្នកភូមិ នៅតំបន់នោះដដែល ព្រោះអង្គការបរិស្ថាន បានធ្វើការបែងចែកដីឲ្យអ្នកភូមិកាន់កាប់រួចហើយ៖ «គាត់មានក្បាលដីគ្រប់គ្រាន់អញ្ចឹង ងាយធ្វើការណាស់។ គាត់ស្នើហ្នឹង មិនឲ្យអំណោយ ឲ្យស្អីក៏ដោយ ក៏ក្រុមការងាររបស់យុវជនហ្នឹងក៏នៅតែវាស់ឲ្យ និងនៅតែចេញប្លង់ឲ្យហ្នឹង»។
វិទ្យុអាស៊ីសេរី មិនអាចទំនាក់ទំនងសុំការបំភ្លឺពីប្រធានអង្គការសុវណ្ណា បានទេ នៅថ្ងៃទី១ ខែសីហា។
អ្នកសម្របសម្រួលអង្គការលីកាដូ (Licadho) លោក អ៊ិន គង់ជិត ឲ្យដឹងថា អ្នកភូមិមានសិទ្ធិស្នើសុំរស់នៅជាម្ចាស់ការលើខ្លួនឯង ដោយមិនចាំបាច់ស្ថិតក្រោមការជំនួយឧបត្ថម្ភពីអង្គការបរិស្ថាន។ ម្យ៉ាងវិញទៀត វាអាចជួយសម្រាលបន្ទុករបស់អង្គការសុវណ្ណា ផងដែរ ប្រសិនបើអ្នកភូមិទាំងនោះ អាចមានឯករាជ្យភាពក្នុងការរស់នៅដោយខ្លួនឯង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
-
ស្ដាប់ផ្ទាល់
(ព្រឹក ៥:៣០-៦:៣០ ល្ងាច ៧:៣០-៨:៣០) - សំឡេង
ភាសា
