សហគមន៍ជនជាតិដើមភាគតិចលើកគ្នាទាមទារដីព្រៃអភិរក្ស៤ហិកតារ
h070312sr.mp3
តំណាងសហគមន៍ លោក ប៊ុន ស្រួច មានប្រសាសន៍បញ្ជាក់ថា ប្រជាពលរដ្ឋកំណើតខ្មែរម្នាក់ឈ្មោះ ធួន បានចូលមកកាប់រានព្រៃឈើនៃតំបន់សហគមន៍គ្រប់គ្រង ហេតុនេះហើយទើបក្រុមសហគមន៍ទាមទារឲ្យពលរដ្ឋខ្មែរនោះប្រគល់ដីមកវិញ ដើម្បីក្រុមសហគមន៍រក្សាទុកជាដីសមូហភាពរបស់សហគមន៍។
លោកបន្តថា ប្រជាពលរដ្ឋខ្មែរឈ្មោះ ធួន នេះ បានចូលមកកាប់រានព្រៃតាំងពីខែកុម្ភៈ ឆ្នាំ២០១២។ ករណីនេះ ក្រុមសហគមន៍បានប្ដឹងតវ៉ាទៅអាជ្ញាធរមូលដ្ឋានច្រើនលើកមកហើយ ក៏ប៉ុន្តែមិនឃើញមានដំណោះស្រាយអ្វី ទើបក្រុមសហគមន៍សម្រេចគ្នាទៅទារយកដីនោះមកវិញ ដោយខ្លួនឯង៖ «ប្រជាជនកំពុងតស៊ូនេះ យកដីសហគមន៍អានាធិបតេយ្យ។ ដីនេះ ដីព្រៃ ប៉ុន្មានលើកប៉ុន្មានសារហើយ គេប្ដឹងហ្នឹង អត់ចេះព្រមអត់ចុះញ៉មទេ»។
ទោះយ៉ាងនេះក្តី មិនមានអំពើហិង្សាអ្វីក្នុងការតវ៉ាទាមទារដីនោះទេ ក៏ប៉ុន្តែគេឃើញមានក្រុមប៉ូលិសមូលដ្ឋានចំនួនប្រាំនាក់ និងមន្ត្រីកងរាជអាវុធហត្ថស្រុកម្នាក់ នៅឃ្លាំមើលនៅទីកើតហេតុ។
ក្រុមសហគមន៍ឲ្យដឹងថា បុរសជនជាតិខ្មែរឈ្មោះ ធួន បានគេចខ្លួនចេញពីដីមានទំនាស់ បន្ទាប់ពីគេបានបដិសេធមិនប្រគល់ដីនោះទៅឲ្យសហគមន៍វិញទេ។
វិទ្យុអាស៊ីសេរី មិនអាចទាក់ទងបុរសឈ្មោះ ធួន ដើម្បីសុំបញ្ជាក់ពីហេតុការណ៍កើតមានក្នុងបញ្ហាទាមទារដីនោះបានទេ នៅថ្ងៃអង្គារ នេះ។
ជំទប់ទី២ ឃុំតឺន លោក គង់ ភៀន ទទួលស្គាល់ថា ដីដែលក្រុមសហគមន៍នាំគ្នាទៅទាមទារវិញនោះ គឺជាដីបានមកពីការកាប់រានព្រៃឈើក្នុងសហគមន៍ភូមិតឺន។ លោកបន្តថា អាជ្ញាធរឃុំនឹងហាមឃាត់មិនឲ្យឈ្មោះ ធួន ដាំដុះលើដីនោះទេ ហើយដកហូតដីនោះទុកជូនសហគមន៍ប្រើប្រាស់វិញ៖ «គាត់កាន់កាប់មិនមែនកាន់កាប់តែលើប្លង់ដីគាត់ទេ គឺកាន់កាប់ព្រៃតែម្តង ព្រៃធំៗ ឈើប៉ុនណាណីនោះ អស់រលីងហើយ។ ក្នុងហ្នឹង វាមានការបំផ្លាញដំណាំដាំដុះប្រជាពលរដ្ឋ កាប់ចន្ទី កាប់ដំឡូងខ្ទេច»។
អ្នកសម្របសម្រួលសមាគម អាដហុក (Adhoc) ខេត្តរតនគិរី លោក ប៉ែន ប៊ុណ្ណារ៍ បានបញ្ជាក់ថា តាមការស្រាវជ្រាវរបស់សមាគម លោករកឃើញថា ឈ្មោះ ធួន មានឯកសារទិញលក់ដីនៅតំបន់នោះ ក៏ប៉ុន្តែទីតាំងទិញលក់ដីនោះ មិនមែននៅតំបន់ព្រៃដែលកាប់រាននោះទេ។
លោកបន្តថា សហគមន៍មិនមានជម្រើសអ្វី ក្រៅពីរឹបអូសដីពួកគេមករក្សាទុកវិញនោះទេ៖ «គាត់ថា រឹបអូសមែន ប៉ុន្តែផ្លូវច្បាប់មិនមែនជាការរឹបអូសទេ គឺគាត់ទៅការពារដីហ្នឹងកុំឲ្យគេធ្វើ។ រឿងហ្នឹង គាត់បានទូរស័ព្ទទៅខាងមេព្រៃច្រើនដង»។
នាយរងខណ្ឌរដ្ឋបាលព្រៃឈើខេត្តរតនគិរី លោក ផាន់ ភិន មានប្រសាសន៍ថា សកម្មភាពកាប់រានព្រៃឈើយកដី គឺជាប្រការខុសច្បាប់ ហើយសហគមន៍ និងអាជ្ញាធរមូលដ្ឋានមានសិទ្ធិទប់ស្កាត់ករណីនេះ និងរាយការណ៍មកស្ថាប័នខណ្ឌរដ្ឋបាលព្រៃឈើ ដើម្បីបំពេញនីតិវិធីដកហូតតាមផ្លូវច្បាប់៖ «បើមេឃុំធ្វើអញ្ចឹង សល់ព្រៃល្អទៀតណា! មេឃុំគាត់អ្នកគ្រប់គ្រងដីសាធារណៈរបស់រដ្ឋដែរតើ! ឲ្យតែគាត់ដាក់មក យើងរៀបចំសំណុំបែបបទឲ្យ»។
ក្រុមនិស្សិតស្ម័គ្រចិត្តចំនួន៧ក្រុមរបស់រាជរដ្ឋាភិបាល បានបញ្ជូនមកកាន់ខេត្តរតនគិរី រួចហើយ កាលពីសប្ដាហ៍មុននេះ ដើម្បីវាស់វែងធ្វើប្លង់កម្មសិទ្ធិចែកដីជូនប្រជាពលរដ្ឋ។ ក៏ប៉ុន្តែ មិនមានប្រភពព័ត៌មានផ្លូវការណាមួយ បញ្ជាក់ថាតើការងារវាស់វែងដីនោះ បានលទ្ធផលយ៉ាងណាទេ។
យ៉ាងនេះក្តី មន្ត្រីរដ្ឋាភិបាលមួយរូបឲ្យដឹងថា រាជរដ្ឋាភិបាលក៏បានបញ្ជូនក្រុមត្រួតពិនិត្យមួយក្រុមផ្សេងទៀត ដើម្បីឃ្លាំមើលទៅលើការងាររបស់ក្រុមនិស្សិតស្ម័គ្រចិត្តទាំងនោះដែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
-
ស្ដាប់ផ្ទាល់
(ព្រឹក ៥:៣០-៦:៣០ ល្ងាច ៧:៣០-៨:៣០) - សំឡេង
ភាសា
