តុលាការខេត្តសៀមរាបឃុំខ្លួនជនបរទេសពីរនាក់ពីបទលួចបន្លំយកលុយតាមធនាគារ
2016.02.03
បុរសឈ្មោះ ភេត្រូវ ភេតារ៉ាតាណាសូវ (Petrov Petaratansov) ជាជនជាតិប៊ុលហ្គារី និងបុរសឈ្មោះ មូរ៉េសាន អឺហ្កេន ហូរ៉ាទី (Muresan Eugen Horatiu) ជាជនជាតិរ៉ូម៉ានី ដែលប៉ូលិសខេត្តសៀមរាប ចាប់ខ្លួនពីបទដើរលួចយកប្រាក់នៅតាមធនាគារ។ រូបថតថ្ងៃទី៣០ ខែមករា ឆ្នាំ២០១៦
Photo provided
តុលាការខេត្តសៀមរាប សម្រេចបញ្ជូនបុរសជនជាតិប៊ុលហ្គារី (Bulgaria) ម្នាក់ និងបុរសជនជាតិរ៉ូម៉ានី (Romania) ម្នាក់ ទៅឃុំខ្លួននៅពន្ធនាគារជាបណ្ដោះអាសន្ន ដើម្បីរង់ចាំការស៊ើបអង្កេតបន្តទៅតាមនីតិវិធីច្បាប់។
ការសម្រេចឃុំខ្លួននេះ ធ្វើឡើងបន្ទាប់ពីប៉ូលិសនៃការិយាល័យព្រហ្មទណ្ឌកម្រិតស្រាលរបស់ស្នងការនគរបាលខេត្តសៀមរាប ចាប់ខ្លួនជនបរទេសទាំងពីរនាក់នោះ ពាក់ព័ន្ធនឹងករណីលួចដាក់ម៉ាស៊ីនថតយកលេខសម្ងាត់ អេ.ធី.អឹម (ATM) របស់អតិថិជន ហើយលួចបើកយកប្រាក់ពីគណនេយ្យទាំងនោះ។
តុលាការខេត្តសៀមរាប បានធ្វើលិខិតមួយច្បាប់ទៅកាន់ស្ថានទូតប៊ុលហ្គារី និងស្ថានទូតរ៉ូម៉ានី ដើម្បីជូនដំណឹងអំពីការចាប់ខ្លួនបុរស ២នាក់ ពាក់ព័ន្ធនឹងករណីព្រហ្មទណ្ឌ។
លិខិតជូនដំណឹងនេះ ធ្វើឡើងបន្ទាប់ពីកាលពីថ្ងៃទី២ ខែកុម្ភៈ កន្លងទៅ តុលាការខេត្តសៀមរាប បានសម្រេចឃុំខ្លួនបុរសឈ្មោះ ភេត្រូវ ភេតារ៉ាតាណាសូវ (Petrov Petaratansov) អាយុ ៤៣ឆ្នាំ ជាជនជាតិប៊ុលហ្គារី និងបុរសឈ្មោះ មូរ៉េសាន អឺហ្កេន ហូរ៉ាទី (Muresan Eugen Horatiu) អាយុ ៥១ឆ្នាំ ជាជនជាតិរ៉ូម៉ានី ពីបទដើរលួចយកប្រាក់នៅតាមធនាគារមក។
ចៅក្រមស៊ើបសួរនៃសំណុំរឿងក្តីនេះ គឺលោក ស៊ិន សុវណ្ណរ័ត្ន។ លោកមានប្រសាសន៍កាលពីព្រឹកថ្ងៃពុធ ទី៣ ខែកុម្ភៈ ថា តុលាការកំពុងតែដំណើរការសំណុំរឿងនេះទៅតាមនីតិវិធី ក៏ប៉ុន្តែលោកបដិសេធមិនធ្វើការអធិប្បាយឱ្យបានក្បោះក្បាយទេ៖ «អូ! ទាក់ទងនឹងការបកស្រាយ គឺខាងអយ្យការ ប៉ុន្តែខ្ញុំដែលជាចៅក្រមស៊ើបសួរ គឺធ្វើមិនបានទេ ពីព្រោះវាពាក់ព័ន្ធនឹងការងារនីតិវិធីច្បាប់»។
ចំណែកតំណាងអយ្យការនៃសំណុំរឿងក្ដីនេះ លោក រៀម មុន្នី ក៏បដិសេធមិនធ្វើការអធិប្បាយដែរ ដោយលោកប្រាប់ថា កំពុងជាប់រវល់សវនាការ។
នាយការិយាល័យព្រហ្មទណ្ឌកម្រិតស្រាលនៃស្នងការនគរបាលខេត្តសៀមរាប លោកវរសេនីយ៍ឯក ភឹង ចិន្តារ៉េត ឱ្យដឹងថា បុរសបរទេសទាំងពីរនាក់នោះ ត្រូវកម្លាំងរបស់លោកចាប់ខ្លួនកាលពីថ្ងៃទី៣០ ខែមករា កន្លងទៅ នៅពេលដែលពួកគេចូលទៅធ្វើសកម្មភាពថតយកលេខសម្ងាត់ ATM របស់អតិថិជនពីធនាគារ ១កន្លែង។
លោក ភឹង ចិន្តារ៉េត បញ្ជាក់ថា បុរសជនជាតិប៊ុលហ្គារី និងជនជាតិរ៉ូម៉ានី នោះ បានធ្វើសកម្មភាពដើរដាក់កាមេរ៉ាលួចថតយកលេខសម្ងាត់ ATM របស់អតិថិជន ដែលប្រើប្រាស់ធនាគារតាំងតែពីអំឡុងខែធ្នូ ឆ្នាំ២០១៥ ហើយកម្លាំងប៉ូលិសបានតាមស៊ើបអង្កេតជិត ១ខែមកហើយ៖ «វាលួចលេខកូដ កាត ATM របស់អតិថិជន ធនាគារក្នុងខេត្តសៀមរាប ហើយវាទៅដកយកលុយនៅប្រទេសឡាវ»។
ប៉ូលិសឱ្យដឹងថា តាមការសាកសួរ ពេលចាប់ខ្លួន គឺជនបរទេសទាំងពីរបានឆ្លើយថា គេបានលួចលេខសម្ងាត់ ATM របស់អតិថិជននៅធនាគារ អេ.ប៊ី.អេ (ABA) ដោយបានដកយកប្រាក់ចំនួន ១៣.៧០០ដុល្លារអាមេរិក។ ក៏ប៉ុន្តែតាមម្ចាស់គណនេយ្យចំនួន ២រូប ដែលបានដាក់ពាក្យបណ្ដឹងបានប្រាប់សមត្ថកិច្ចថា ពួកគេបានបាត់សាច់ប្រាក់ពីគណនេយ្យសរុបចំនួន ២១.០០០ដុល្លារអាមេរិក។
នៅពេលចាប់ខ្លួនជនបរទេសទាំងពីរនាក់នោះ សមត្ថកិច្ចបានរកឃើញឧបករណ៍ដែលគេប្រើសម្រាប់ដកយកសាច់ប្រាក់ពី ATM ព្រមទាំងកាមេរ៉ាតូចបំផុតសម្រាប់បង្កប់ថតយកលេខសម្ងាត់របស់អតិថិជន ដែលប្រើប្រាស់កាត ATM ផង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- វៀតណាមព្រមានថា ព្រែកជីកហ្វូណនតេជោអាចជួយសម្រួលវត្តមានយោធាចិនក្នុងទឹកដីកម្ពុជាកាន់តែជ្រៅ
- ពលរដ្ឋនៅតំបន់បឹងតាមោក ចោទប្រកាន់អាជ្ញាធរខណ្ឌព្រែកព្នៅថា ប្រើអំពើហិង្សា
- អាជ្ញាធរក្រុងភ្នំពេញមិនអនុញ្ញាតឱ្យបក្សកម្លាំងជាតិធ្វើបាតុកម្ម នៅទីលានប្រជាធិបតេយ្យ
- ក្រសួងដែនដីបានហៅអតិថិជនបុរីពិភពថ្មីទៅពិភាក្សា ដើម្បីរកដំណោះស្រាយ
- ពលរដ្ឋខ្មែរ-អូស្ត្រាលីម្នាក់ ដែលរិះគន់រដ្ឋាភិបាលកម្ពុជា រងការវាយដំពីជនមិនស្គាល់មុខមួយក្រុម ពេលទៅលេងស្រុកខ្មែរ