មន្ត្រីសិទ្ធិមនុស្សរិះគន់នគរបាលយុត្តិធម៌ខេត្តកំពង់ឆ្នាំងដែលប្រើហិង្សាលើស្ត្រី
2015.07.26
មន្ត្រីអង្គការក្រៅរដ្ឋាភិបាលធ្វើការលើកស្ទួយសិទ្ធិមនុស្ស បារម្ភអំពីគ្រោះថ្នាក់នៃជនរងគ្រោះ ក្នុងហេតុការណ៍ប្រើអំពើហិង្សា និងចាប់រំលោភពីសំណាក់មន្ត្រីនគរបាលយុត្តិធម៌។ ក្ដីបារម្ភនេះ បន្ទាប់ពីអធិការស្រុកកំពង់ត្រឡាច និងប្រធានការិយាល័យព្រហ្មទណ្ឌកម្រិតស្រាលនៃស្នងការដ្ឋាននគរបាលខេត្តកំពង់ឆ្នាំង បានប្រើអំណាច និងហិង្សាលើស្ត្រីភេទបន្តបន្ទាប់គ្នា។
ប្រធានការិយាល័យព្រហ្មទណ្ឌកម្រិតស្រាល នៃស្នងការដ្ឋាននគរបាលខេត្តកំពង់ឆ្នាំង លោក ទេព សារ៉ាត់ ត្រូវបានស្ត្រីវ័យ ៤២ឆ្នាំម្នាក់ប្ដឹងទៅតុលាការ ពីបទប្រើអំពើហិង្សាដោយចេតនា កាលពីថ្ងៃទី២៤ ខែកក្កដា។ បណ្ដឹងនេះ ធ្វើឡើងពីរថ្ងៃបន្ទាប់ពីអធិការស្រុកកំពង់ត្រឡាច លោក ហ៊ុល វាសនា ត្រូវសិស្សស្រីវ័យ ១៩ឆ្នាំម្នាក់ ប្ដឹងទៅតុលាការដែរទាក់ទងរឿងប្រើអាវុធបង្ខំចាប់រំលោភ កាលពីថ្ងៃទី១១ ខែកក្កដា។
មន្ត្រីសម្របសម្រួលនៃសមាគមអាដហុក (Adhoc) ខេត្តកំពង់ឆ្នាំង លោក សំ ច័ន្ទគា ថ្លែងនៅថ្ងៃទី២៥ ខែកក្កដា ថា ទង្វើរបស់នគរបាលយុត្តិធម៌ទាំងនេះ អាចធ្វើឲ្យប៉ះពាល់ដល់កិត្តិនាមនគរបាលជាតិ និងបាត់ជំនឿពីប្រជាពលរដ្ឋ។ លោកថា ស្ថាប័នតុលាការ ឬអគ្គស្នងការនគរបាលជាតិ គប្បីវែកញែករកខុសត្រូវលើករណីទាំងនេះ ព្រោះវាជាផ្នែកមួយធ្វើឲ្យប៉ះពាល់ដំណើរការអនុវត្តច្បាប់ដែរ៖ «ខ្ញុំយល់ថា បើអគ្គស្នងការនគរបាលជាតិ មិនពង្រឹងសីលធម៌ដល់មន្ត្រីនគរបាលទេ ជាពិសេសនៅកំពង់ឆ្នាំង ចេះតែកើតឡើងម្ដងហើយម្ដងទៀត សុទ្ធលើមន្ត្រីមានឋានៈបែបនេះ វានឹងប៉ះពាល់ដល់កិត្តិយសនគរបាលជាតិ។ លោក ជិន ជេដ្ឋា៖ ទាក់ទងបញ្ហាហ្នឹងអាចមានផលប៉ះពាល់អីដល់ការអនុវត្តច្បាប់ទេបាទ? បាទ! វានឹងប៉ះពាល់ដល់ការអនុវត្ដច្បាប់ ពីព្រោះអស់លោកទាំងអស់នេះជាអ្នកអនុវត្តន៍ច្បាប់ ហើយខ្លួនបំពានច្បាប់»។
ផ្ទៃមុខក្រហម និងភ្នែកស្ដាំឡើងប៉ោងជាំ គឺអ្នកស្រី ឌុក ឌីឡុម រៀបរាប់ទាំងអួលដើមកថា លោក ទេព សារ៉ាត់ មានទំនាក់ទំនងស្នេហាជាមួយគាត់ដែលជាស្ត្រីមេម៉ាយជាយូរមកហើយនោះ បានវាយគាត់ចំផ្ទៃមុខចំនួនបីដៃ ដួលទៅលើដី ហើយស្ទុះទៅក្របួចកអាវរកវាយបុរសម្នាក់ទៀត ដែលប្រុងចូលមកជួយគាត់ទៀតផង។ អ្នកស្រីបានដាក់បណ្ដឹងចូលតុលាការក្នុងថ្ងៃកើតហេតុ គឺនៅថ្ងៃទី២៤ ខែកក្កដា ឆ្នាំ២០១៥ ដោយស្នើឲ្យតុលាការផ្ដន្ទាទោសជនដៃដល់ គឺលោក ទេព សារ៉ាត់ និងទារសំណងជំងឺចិត្តចំនួន ២០លានរៀល៖ «ខ្ញុំសំណូមពរឲ្យលោកព្រះរាជអាជ្ញា និងស្នងការនគរបាលខេត្តកំពង់ឆ្នាំង ជួយរកយុត្តិធម៌ឲ្យនាងខ្ញុំផង»។
ឆ្លើយតបបញ្ហានេះ ប្រធានការិយាល័យព្រហ្មទណ្ឌកម្រិតស្រាលនៃស្នងការដ្ឋាននគរបាលខេត្តកំពង់ឆ្នាំង លោក ទេព សារ៉ាត់ បញ្ជាក់យ៉ាងខ្លីថា ករណីវាយតប់នេះ គឺជារឿងផ្ទៃក្នុងគ្រួសារដែល លោក និងអ្នកស្រី ឌុក ឌីឡុម បានរួមរស់ជាមួយគ្នាដូចជាប្ដីប្រពន្ធជាច្រើនឆ្នាំមកហើយ។ លោកថា នឹងផ្ដល់ព័ត៌មានលម្អិតទៀត ក្រោយពេលលោកពិភាក្សាដោះស្រាយបញ្ហាជាមួយអង្គភាពរបស់លោករួច។
ចំណែកស្នងការនគរបាលខេត្តកំពង់ឆ្នាំង លោក ប្រាក់ វុឌ្ឍី បដិសេធមិនអត្ថាធិប្បាយជុំវិញបញ្ហានេះទេ នៅល្ងាចថ្ងៃទី២៥ ខែកក្កដា ដោយលោកប្រាប់ថា កំពុងជាប់ប្រជុំ។ ប៉ុន្តែថ្មីៗនេះ លោកមានវិធានការចំពោះ លោក ហ៊ុល វាសនា ជាអតីតអធិការស្រុកកំពង់ត្រឡាច ដែលបានប្រព្រឹត្តកំហុសស្រដៀងគ្នានេះ ដោយរាយការណ៍ទៅថ្នាក់លើ ដើម្បីបញ្ឈរជើង និងត្រួតពិនិត្យតាមផ្លូវរដ្ឋបាល ឬវិន័យនគរបាល។
កាលពីថ្ងៃទី១១ ខែកក្កដា ឆ្នាំ២០១៥ អធិការស្រុកកំពង់ត្រឡាច លោក ហ៊ុល វាសនា ត្រូវបានសិស្សសាលាវ័យ ១៩ឆ្នាំម្នាក់ ចោទថាបានប្រើអាវុធគំរាមចាប់រំលោភនាង ប៉ុន្តែ លោក ហ៊ុល វាសនា វិញប្រកែកថា ករណីនេះមិនមែនជារឿងចាប់រំលោភឡើយ តែវាជាករណីព្រមព្រៀងរួមរស់ជាមួយគ្នា។
យ៉ាងណា ករណី លោក ទេព សារ៉ាត់ គេមិនទាន់ដឹងថា អគ្គស្នងការ ឬស្នងការនគរបាលខេត្ត មានវិធានការយ៉ាងណានៅឡើយទេ៕