អ្នកច្បាប់និងព្រះសង្ឃ៖ ការផ្សឹកនិងឃុំព្រះសង្ឃពាក់ព័ន្ធនឹងកាំភ្លើងជ័រជារឿងមិនត្រឹមត្រូវ
2017.06.24
អ្នកច្បាប់ និងព្រះសង្ឃយល់ឃើញដូចគ្នាថា ការផ្សឹក និងឃុំព្រះកាយព្រះសង្ឃដាក់ក្នុងពន្ធនាគារដោយការចោទប្រកាន់ពាក់ព័ន្ធនឹងការប្រើប្រាស់កាំភ្លើងជ័រ និងការបញ្ចេញមតិនៅតាមបណ្ដាញសង្គមហ្វេសប៊ុក (Facebook) ជារឿងមិនត្រឹមត្រូវទាំងផ្នែកអាណាចក្រ និងពុទ្ធចក្រ។ ការចាប់ផ្សឹក និងចាប់ឃុំខ្លួនព្រះសង្ឃ ហន សុផាន្នី យ៉ាងតក់ក្រហល់បែបនេះ ត្រូវគេមើលឃើញថា ជាការអនុវត្តច្បាប់តាមបែបស្តង់ដារពីរ ព្រោះកន្លងមកមានអ្នកគាំទ្រគណបក្សកាន់អំណាចដែលបង្ហាញអាវុធពិតប្រាកដអមដោយសារគំរាមអ្នកដទៃថែមទៀតផង ប៉ុន្តែអាជ្ញាធរមិនបានអើពើ។
សមាជិកបណ្ដាញព្រះសង្ឃឯករាជ្យ ខេត្តបាត់ដំបង ព្រះនាម ហន សុផាន្នី ព្រះជន្ម ២៤ព្រះវស្សា គង់នៅវត្តដំរីស ក្រុងបាត់ដំបង ត្រូវបានបញ្ជូនទៅឃុំព្រះកាយនៅក្នុងពន្ធនាគារខេត្តនេះ តាំងពីថ្ងៃទី២២ ខែមិថុនា គឺមួយថ្ងៃក្រោយព្រះអង្គត្រូវបានចាប់ផ្សឹកទាំងប្រញាប់ប្រញាល់ ក្រោមបទចោទប្រកាន់ថា ព្រះសង្ឃអង្គនេះ កាន់កាប់ និងដឹកជញ្ជូនអាវុធដោយគ្មានការអនុញ្ញាតដោយយោងវត្ថុតាងជាកាំភ្លើងជ័រមួយដើម និងកាំបិតមួយ ដែលព្រះអង្គបានបង្ហោះតាមបណ្ដាញសង្គមហ្វេសប៊ុក។
ការផ្សឹកព្រះសង្ឃទាំងបង្ខំបែបនេះ ត្រូវបានអ្នកបួសចាត់ទុកថា ជាការធ្វើបំពានវិន័យសង្ឃដោយមន្ត្រីសង្ឃខ្លួនឯង ដែលមិនយល់ច្បាស់វិន័យទូទៅសម្រាប់អ្នកបួស។
ព្រះតេជព្រះគុណ សាន សុជា ព្រះគ្រូចៅអធិការវត្តមុណីរតនារាម ក្រុងពោធិ៍សាត់ ក្នុងវេទិកាអ្នកស្ដាប់អាស៊ីសេរី កាលពីថ្ងៃទី២៣ ខែមិថុនា មានថេរដីកាបន្ទោសមន្ត្រីសង្ឃដែលអនុញ្ញាតឲ្យអាជ្ញាធរខ្ចីដៃដើម្បីផ្សឹកព្រះសង្ឃ ហន សុផាន្នី៖ «ដូច្នេះបញ្ហានេះធំបំផុតគឺផ្នែកព្រះសង្ឃយើង គឺខ្ញុំករុណាចង់និយាយទៅកាន់មន្ត្រីសង្ឃទៅវិញ។ ការណ៍ដែលគេរៀបចំឲ្យមានចៅអធិការឲ្យមានព្រះអនុគណឲ្យមានព្រះមេគុណ ឲ្យមានមន្ត្រីសង្ឃ គឺដើម្បីចាត់ចែងរឿងហ្នឹងហើយ។ ក៏ប៉ុន្តែរឿងដែលកើតនេះ វាមិនប្រាសចាសហេតុទេ ដោយសារផ្នែករបស់យើង យើងមិនខ្លាំង»។
ភាពមិនខ្លាំងខាងពុទ្ធចក្រនេះ ព្រះតេជព្រះគុណ សាន សុជា ចង់មានសង្ឃដីកាយោងទៅលើភាពខ្វះខាតខាងចំណេះដឹងផ្នែកពុទ្ធវិន័យដែលកើតមានឡើង សូម្បីតែក្នុងរង្វង់ព្រះចៅអធិការវត្ត៖ «ជួនកាលមិនមែនលោកលម្អៀងទេ ជួលកាលលោកអត់ចេះ ដូចជានៅខេត្តពោធិ៍សាត់ ចៅអធិការជិត ២០វត្ត មកប្រជុំនៅកន្លែងសាលាមេគណ។ លោកលើកអំពីបារាជិកបួនមកសួរចៅអធិការគ្រប់អង្គ សួរថា បារាជិកបួនហ្នឹងមានអ្វីខ្លះ? ជាងពាក់កណ្ដាលនៃចៅអធិការ ឆ្លើយវិន័យបួនខដំបូងហ្នឹងអត់ត្រូវទេ។ ដល់តែដូច្នេះ លោកមិនដឹងថា ណាមួយដែលនាំឲ្យអន្តរាយភេទលោកផងហ្នឹង។ មេអត់ដឹងផងហ្នឹង។ ដល់តែមិនដឹងហ្នឹង អាចដែលលោកអត់មានអ្វីទៅប្រកែកជាមួយគេទេ»។
ការមិនអាចមានអ្វីប្រកែកជាមួយនឹងអាជ្ញាធរបានដូច្នេះ ទើបធ្វើឲ្យមានការផ្សឹកព្រះសង្ឃ ហន សុផាន្នី បានសម្រេច និងចាប់បញ្ជូនព្រះកាយព្រះអង្គទៅពន្ធនាគារដូច្នេះ។
ចំណែកឯផ្នែកអាណាចក្រវិញ អ្នកច្បាប់ចាត់ទុកចំណាត់ការរបស់អាជ្ញាធរដែលឃុំព្រះកាយព្រះសង្ឃ ដោយគ្រាន់តែបង្ហាញរូបភាពកាំភ្លើងជ័រនៅលើហ្វេសប៊ុក ដោយមិនបានស៊ើបអង្កេតរកភស្តុតាងត្រឹមត្រូវជាមុនដូច្នេះ ថាជាការធ្វើមិនត្រឹមត្រូវតាមផ្លូវច្បាប់។
លោកមេធាវី ហុង គឹមសួន លើកឡើងក្នុងវេទិកាអ្នកស្ដាប់អាស៊ីសេរី ដែរថា ការបង្ហោះជារូបភាពអ្វីក៏ដោយ គេមិនអាចចាត់ទុកថា របស់ហ្នឹងជារបស់ពិតនៅឡើយទេ ទាល់តែធ្វើការស៊ើបអង្កេត និងឆែកឆេរចាប់ឲ្យបានថា របស់នោះជាកាំភ្លើងពិតដែលបាញ់ទៅស្លាប់មនុស្ស ឬរបួសមនុស្ស ទើបគេអាចយកវត្ថុនោះធ្វើជាភស្តុតាងជាផ្លូវការបាន។
លោកបន្តថា រឿងដែលមិនទំនងបែបនេះ អាជ្ញាធរចាត់ការយ៉ាងបន្ទាន់ឯរឿងធ្ងន់ជាងនេះ បែរជាធ្វើព្រងើយទៅវិញ៖ «អ៊ីចឹងមិនមែនគ្រាន់តែយករូបភាព គ្រាន់តែឃើញថា អាហ្នឹងកាំភ្លើងហើយចាត់ទុកអាហ្នឹងថា ជារបស់ពិត អត់បានទេ។ ខ្ញុំក៏ធ្លាប់ឃើញដែរ នៅតាមសង្គមហ្វេសប៊ុក ឬក៏ Messenger ឬក៏បង្ហោះរូបភាពជេរប្រមាថគ្នា ឬគំរាមសម្លាប់អ្នកនេះ អ្នកនោះ ខ្ញុំមិនលើកឈ្មោះទេ ខ្ញុំឃើញខ្ញុំស្គាល់ច្បាស់ហើយ។ បើគំរាមដល់អាយុជីវិត អាហ្នឹងត្រូវអាជ្ញាធរមិនអាចនៅឈរមើល ចាំតែគេប្ដឹងទេ ត្រូវចាត់វិធានការតាមរកអ្នកដែលតាមគំរាមជីវិតគេទៅទៀត។ រឿងខ្លះហ្នឹង អាជ្ញាធរនៅធ្វើមិនដឹងមិនឮ មានរហូតដល់សព្វថ្ងៃនៅដើរព្រងើយក៏មានដែរ»។
ចំណែកឯស្ថាបនិកបណ្ដាញព្រះសង្ឃឯករាជ្យក៏បានសម្ដែងព្រះទ័យមិនពេញចិត្តជាខ្លាំងទៅនឹងអាជ្ញាធរមានសមត្ថកិច្ចខេត្តបាត់ដំបង ដែលរួមគ្នាចាប់ផ្សឹកព្រះសង្ឃ ហន សុផាន្នី និងដាក់ពន្ធនាគារដោយសារទោសកំហុសបន្តិចបន្តួចដែលអាចអប់រំកែប្រែបាន មិនដល់ថ្នាក់ដាក់គុកដាក់ច្រវាក់នោះទេ។ តាមរយៈសារដែលព្រះអង្គបង្ហោះតាមហ្វេសប៊ុក ផ្ទាល់របស់ព្រះអង្គ កាលពីថ្ងៃទី២៣ ខែមិថុនា ព្រះតេជព្រះគុណ ប៊ុត ប៊ុនតិញ ចាត់ទុកមន្ត្រីតុលាការ និងមន្ត្រីសមត្ថកិច្ចខេត្តបាត់ដំបង ថាខ្វះភាពត្រឹមត្រូវក្នុងចំណាត់ការរឿងនេះ៖ «តុលាការ ព្រះរាជអាជ្ញា និងសមត្ថកិច្ចខេត្តបាត់ដំបង មានចំណេះដឹងតិចតួចស្ដួចស្ដើង។ មានន័យថា ពួកតុលាការអគតិ ពួកសមត្ថកិច្ចអវិជ្ជា រួមគ្នាដើរលើផ្លូវមួយដ៏ខ្មៅកខ្វក់។ ពួកគាត់ធ្វើតុលាការ ពួកគាត់ធ្វើព្រះរាជអាជ្ញារាប់សិបឆ្នាំ តែមិនមែនមានន័យថា ពួកគាត់ចេះច្បាប់ទេ មិនមែនមានន័យថា ពួកគាត់គឺជាតួអង្គអនុវត្តច្បាប់នៅក្នុងព្រះរាជាណាចក្រកម្ពុជា បានត្រឹមត្រូវនោះទេ»។
ព្រះតេជព្រះគុណ ប៊ុត ប៊ុនតិញ ក៏ស្តីបន្ទោសមន្ត្រីសង្ឃខេត្តបាត់ដំបង ថាមិនមែនជាអ្នកបដិបត្តិ និងអនុវត្តទៅតាមពុទ្ធបញ្ញត្តិ និងពុទ្ធវិន័យនោះទេ។ ចំណែកលោកសាស្ត្រាចារ្យ ឆាត សុឆេត សង្កេតឃើញភាពមិនត្រឹមត្រូវនៃការផ្សឹកព្រះសង្ឃនេះដែរ គឺដោយព្រះសង្ឃ ហន សុផាន្នី មិនបានប្រព្រឹត្តខុសទោសទាំងបួនខាងពុទ្ធសាសនានោះទេ។ ទោសទាំងបួននោះ រួមមានទីមួយ គឺសម្លាប់មនុស្ស ទី២ ប្រព្រឹត្តមេថុនធម្ម ទីបី គឺលួចទ្រព្យសម្បត្តិអ្នកដទៃ ឯទីបួន គឺការអួតនូវគុណវិសេសរបស់ខ្លួនដែលអត់មាន៖ «កាលណាដែលលោកមានទោសទាំងបួនក្នុងព្រះវិន័យហ្នឹង ទើបសមគួរដែលត្រូវទោស ដែលត្រូវសឹកខ្លួនឯងក្តី ឬក៏អាចារ្យ ឬឧបជ្ឈាហ្នឹងត្រូវផ្សឹកលោក»។
មន្ត្រីផ្នែកស៊ើបអង្កេតសមាគមការពារសិទ្ធិមនុស្សអាដហុក (ADHOC) ខេត្តបាត់ដំបង អ្នកស្រី ប្រាក់ សុភីមា លើកឡើងថា ករណីចោទប្រកាន់នេះ គឺជាការគំរាមកំហែងធ្ងន់ធ្ងរដល់ស្ថាបនិកបណ្ដាញព្រះសង្ឃឯករាជ្យ ធ្វើឲ្យប៉ះពាល់ដល់ការងារសង្គមព្រះសង្ឃ៕